Kwestin From Reader

Waswe, Jehovah mekem covenant bilong hem witim Abraham long Ur or long Haran?

Firstaem wea Bible storyim covenant bilong Jehovah witim Abraham hem long Genesis 12:1-3, wea sei: “Jehovah sei long Abram: ‘Go aot from kantri bilong iu and from olketa relative bilong iu and from haos bilong dadi bilong iu and go long kantri wea mi bae showim long iu; and mi bae mekem wanfala bigfala nation kamaot from iu . . . and evri famili bilong graon bae barava blessim olketa seleva thru long iu.’”a Jehovah maet mekem disfala covenant witim Abraham taem hem long Ur and strongim diswan moa taem Abraham stap long Haran.

Long first century, Stephen tok abaotem komand bilong Jehovah for Abraham mas muv go long Canaan. Taem hem tok long Sanhedrin, hem sei: “God bilong glory showim hemseleva long laen dadi bilong iumi Abraham taem hem stap long Mesopotamia, bifor hem go for stap long Haran, and hem sei long hem, ‘Go aot from land bilong iu and from olketa relative bilong iu and kam insaed long land wea mi bae showim long iu.’” (Acts 7:2, 3) Abraham firstaem kam from Ur, and olsem Stephen showimaot, long there nao hem first herem komand for go long Canaan. (Genesis 15:7; Nehemiah 9:7) Stephen no storyim covenant bilong God witim Abraham, bat long Genesis 12:1-3, datfala covenant hem join witim komand for go long Canaan. So hem fitim for iumi bilivim hao Jehovah mekem covenant witim Abraham long Ur.

Nomata olsem, sapos iu readim gud story long Genesis, hem showimaot hao Jehovah hem startim bak covenant bilong hem witim Abraham long Haran, olsem hao samfala taem long Canaan hem talem moa and addim go moa samfala samting saed long covenant. (Genesis 15:5; 17:1-5; 18:18; 22:16-18) Story long Genesis 11:31, 32 showim hao dadi bilong Abraham, Terah, lusim Ur for go long Canaan, and Abraham, Sarah, and Lot go witim hem. Olketa kam long Haran and stap long there go kasem dae bilong Terah. Taem Abraham stap long Haran hem kasem planti rich samting. (Genesis 12:5) And long datfala semtaem, Nahor, brata bilong Abraham, hem muv go long there tu.

Bihaen Bible recordim dae bilong Terah, hem talem toktok bilong Jehovah long Abraham and hem go ahed for sei: “From diswan Abram hem go barava olsem Jehovah talem long hem.” (Genesis 12:4) Dastawe, luk olsem Genesis 11:31–12:4 hem point go long wei wea Jehovah talem toktok long Genesis 12:1-3 bihaen Terah dae finis. Sapos olsem, Abraham lusim Haran and muv go long ples wea Jehovah showim from komand wea hem just kasem, and tu from datwan wea hem herem firstaem long Ur.

Genesis 12:1 storyim hao Jehovah komandim Abraham: “Go aot from kantri bilong iu and from olketa relative bilong iu and from haos bilong dadi bilong iu.” Bifor, “kantri” bilong Abraham nao Ur, and “haos” bilong dadi bilong hem long there. Bat, famili bilong dadi bilong Abraham muv go long Haran, and gogo Abraham kolem datfala ples land bilong hem. Bihaen planti year long Canaan, taem hem sendem wakman bilong hem for go long ‘kantri bilong hem and long olketa relative bilong hem’ for faendem waef for Isaac, datfala wakman hem go long “datfala bigfala taon bilong Nahor” (maet long Haran or samwea klosap long there). (Genesis 24:4, 10) Long there datfala wakman faendem Rebekah midolwan olketa relative bilong Abraham, hem nao bigfala famili bilong Nahor.—Genesis 22:20-24; 24:15, 24, 29; 27:42, 43.

Insaed toktok bilong hem long Sanhedrin, Stephen sei abaotem Abraham: “Bihaen dadi bilong hem dae, God mekem hem for kam stap long disfala land wea iufala stap long hem distaem.” (Acts 7:4) Diswan showimaot hao Jehovah story witim Abraham long Haran. Hem fitim for man bilivim hao long datfala taem Jehovah talem moa covenant bilong hem witim Abraham olsem Genesis 12:1-3 hem showimaot, from datfala covenant hem start taem Abraham muv go long Canaan. Dastawe, taem iumi ting raonem evri samting hia hem showim iumi hao Jehovah maet mekem covenant bilong hem witim Abraham taem hem long Ur and strongim moa diswan long hem taem hem long Haran.

[Footnote]