Chapter 4
Dat Wan Wea Every Profet Witness Abaot
1. Olketa toktok abaot laef bilong Jesus long heven bifor show aot wanem samting abaot way wea hem fren withim Jehovah?
TAEM hem story abaot way wea hem barava fren gud withim Jehovah, Jesus hem say: “Father hem love-im son and showim hem every samting wea hem duim.” (John 5:19, 20) Way wea they barava fren gud olsem hem start taem God create–im hem, staka thousand year bifor hem born olsem man. Hem nao only Son bilong God, only wan wea Jehovah seleva createim. Every otherfela samting long heven and earth kamap thru long datfela firstborn Son wea God love-im tumas. Hem work tu olsem Word bilong God or Man For Toktok for hem, dat wan wea God use-im for talemaot will bilong hem long other pipol. Dis wan, Son wea God love-im tumas, hem kamap datfela man Jesus Kraest.—Col. 1:15, 16; John 1:14; 12:49, 50.
2. Haomas taem nao olketa Bible profesi story abaot Jesus?
2 Bifor hem born olsem wanfela man, they raetem planti profesi abaotem hem. Olsem aposol Peter talem long Cornelius, “Every profet witness abaotem hem.” (Acts 10:43) Jesus duim barava bigfela work for saed bilong klinfela worship, dastawe wanfela angel tok olsem long aposol John: “Worshipim God; from way for givim witness abaot Jesus hem mekem profesi kamap.” (Rev. 19:10) Olketa profesi hia barava point go long hem, and point go long olketa samting insaed purpose bilong God abaotem hem, wea yumi barava interest long hem distaem.
Samting Wea Olketa Profesi Showim Aot
3. (a) Long profesi bilong Genesis 3:14, 15, hu nao “snek” piksarem? “Woman”? ‘Seed bilong snek’? (b) Why nao olketa servant bilong Jehovah barava interest long way for ‘killim snek long hed’?
3 First wan long olketa profesi hia kam aot bihaen way for againstim God kamap long Eden. Hem insaed long judgment bilong Jehovah for datfela snek. Jehovah hem say: “Mi bae putim fashion for enemy midlwan long yu and datfela woman and midlwan long seed bilong yu and seed bilong hem. Hem bae killim yu long hed and yu bae killim hem long leg.” (Gen. 3:14, 15) Wanem nao datwan meanim? Long taem wea God markem, samfela other profesi mekem datwan kamap moa klia and talem samfela samting moa abaotem. Dastawe, yumi savvy datwan hem profesi abaot Satan the Devil, wea snek nao piksarem. “Woman” hem loyal organization bilong Jehovah long heven, wea olsem wanfela waef wea faithful long hem. ‘Seed bilong snek’ meanim tu olketa angel and olketa man wea show aot spirit bilong Devil, olketa wea againstim Jehovah and pipol bilong hem. From Devil use-im datfela snek long Eden, yumi luksavvy from datfela profesi hao way for ‘killim snek long hed’ hem meanim taem wea disfela son bilong God wea no obey bae finis every bit, wea hem liar for tok spoelem nem bilong Jehovah and bringim bigfela trabel for olketa man. But way for luksavvy long datfela “seed” wea bae killim snek, hem stap olsem wanfela holy secret for longfela taem.—Rom. 16:25, 26.
4. Hao nao laen wea Jesus kam from showim aot way wea hem nao promis Seed?
4 Bihaen samting olsem 2,000 year, Jehovah showim aot samfela samting moa. Hem showim aot hao Seed bae kamap insaed famili laen bilong Abraham. (Gen. 22:15-18) But, datfela laen wea lead go long Seed bae no depend nomoa long laen bilong man but long man wea God choosim. Nomata Abraham garem bigfela love for son bilong hem Ishmael, wea slave girl Hagar hem bornim, Jehovah tok stret olsem: “Mi bae mekem covenant bilong mi withim Isaac, wea Sarah nao bae bornim long yu.” (Gen. 17:18-21; 21:8-12) Bihaen, hem strongim datfela covenant, no long firstborn son bilong Isaac, Esau, but long Jacob, wea 12-fela tribe bilong Israel they born kam from. (Gen. 28:10-14) Go-go, hem klia hao datfela Seed bae born long tribe bilong Judah, insaed long haos bilong David.—Gen. 49:10; 1 Chron. 17:3, 4, 11-14.
5. Nomata long start long ministry bilong Jesus long earth, wanem samting moa showim aot hem nao Messiah?
5 Winim 700 year bifor diswan happen, Bible say Bethlehem nao ples wea Seed bae born olsem man and tu, hem showim aot hao dat wan hem stap finis “from taem bifor kam,” start long taem wea God create-im hem long heven. (Mic. 5:2) Profet Daniel hem profesi abaot taem wea hem bae kam long earth olsem dat Wan Wea Jehovah Anointim, datfela Messiah. (Dan. 9:24-26) And taem hem kasem anointing withim holy spirit, wanfela voice from heven talemaot klia hu nao hem. (Matt. 3:16, 17) So, bihaen hem kamap wanfela follower bilong Jesus, Philip fit for say withim strongfela feeling: “Mifela faendem dat wan wea Moses, insaed long Law, and olketa Profet they raet abaot, Jesus, son bilong Joseph [wea hem adoptim], from Nazareth.”—John 1:45.
6. (a) Bihaen long dae bilong Jesus, wanem nao olketa follower bilong hem start for luksavvy? (b) Hu nao main wan bilong datfela ‘seed bilong woman,’ and wanem nao meaning bilong way wea hem killim snek long hed?
6 Bihaen, olketa follower bilong Jesus start for luksavvy hao staka profesi abaotem hem they stap insaed long olketa Scripture. Bihaen long dae and resurrection bilong hem, hemseleva “talemaot meaning bilong olketa samting abaotem hemseleva insaed long every Scripture.” (Luke 24:27) Hem klia hao Jesus nao main wan bilong datfela ‘seed bilong woman,’ dat wan wea killim hed bilong “snek” long way wea hem bae finisim Satan every bit. Thru long Jesus every promis bilong God for olketa man, every samting wea yumi barava want for kasem, bae fulfill.—2 Cor. 1:20.
7. For join withim way for luksavvy long dat wan wea olketa profesi hia they story abaot, wanem samting moa savvy givim yumi gudfela samting sapos yumi ting raonem?
7 Taem yu readim samfela long olketa profesi hia for firstaem, maet yu garem question olsem eunuch long Ethiopia hem garem, “Hu nao disfela profet hem tok abaot?” But taem datfela eunuch hem kasem answer bilong datwan, hem no stap nomoa. Bihaen hem listen gud long meaning wea Philip talem, datfela man luksavvy way for ting hae long way wea Jesus fulfillim datfela profesi meanim hemseleva mas duim samting, taem hem baptaes. (Acts 8:32-38; Isa. 53:3-9) Waswe, yumi duim sem samting? Samfela taem way wea Bible hem story abaot wanfela profesi nao barava muvim yumi, or way wea Bible showim aot meaning bilong olketa profesi hia taem they fulfill hem affectim heart bilong yumi.
8. Fofela profesi abaot Jesus Kraest stap long hia. Story gud long olketa question and scripture for showim aot hao olketa profesi hia they affectim yumi. Lukluk long each wan.
8 Lukim hao diswan hem tru long olketa profesi abaotem Jesus Kraest wea stap long daon. Yu savvy answerim olketa question hia withim help bilong olketa scripture wea they raetem.
(1) Hao nao story abaot way wea Abraham trae for offerim Isaac helpem yumi for ting hae long samting wea Jehovah duim taem hem provide-im ransom thru long Son bilong hem? (John 3:16; Gen. 22:1-18 [lukim samting wea Ge 22 verse 2 talem abaot Isaac.])
Wanem trust nao diswan mas givim long yumi? (Rom. 8:32, 38, 39)
But wanem samting nao yumi need for duim? (Gen. 22:18; John 3:36)
(2) Taem hem showim aot Jesus nao profet wea olsem Moses, wanem important responsibility nao Bible say yumi garem? (Acts 3:22, 23; Deut. 18:15-19)
Wanem nao samfela samting wea Jesus talem long yumi, and why nao they fitim disfela taem? (Matt. 28:18-20; 19:4-9; 18:3-6)
(3) Taem hem talemaot wanem nao priesthood bilong Aaron hem piksarem, wanem nao olketa nambawan fashion bilong Jesus olsem hae priest wea Bible hem tok abaot? (Heb. 4:15–5:3; 7:26-28)
So hao nao yumi mas ting abaot way for go long God long prayer thru long Kraest for kasem help for winim olketa weak point bilong yumi?
(4) From way wea sakrifaes bilong Jesus hem moa hae (hem change-im everywan wea they offerim under long Law bilong Moses), why nao yumi mas barava lukaot for stap klia long way for garem fashion for duim any samting wea yumi savvy hem no mekem God hapi? (Heb. 10:26, 27)
Sapos yumi barava ting hae long hope bilong laef wea kamap from sakrifaes bilong Jesus, wanem nao olketa samting wea yumi bae barava work hard for duim? (Heb. 10:19-25)
Hao Nao Yumi Savvy Showim Aot Faith long Kraest?
9. Why nao yumi no garem any other way for kasem laef but thru long Jesus Kraest nomoa?
9 Bihaen hem talemaot long hae kot bilong olketa Jew long Jerusalem hao Jesus nao fulfillim planti profesi, aposol Peter talem strong olketa toktok hia: “No anywan moa savvy sevem man, from no moa any otherfela nem hem stap underneath long heven for mekem way for yumi kasem laef.” (Acts 4:11, 12; Ps. 118:22) Everywan wea kam from Adam they sin, so dae bilong them hem panis for sin and hem kanduit for kamap ransom for anywan. But Jesus hem perfect, and way wea hem givim laef bilong hem, hem olsem wanfela sakrifaes. (Ps. 49:6-9; Heb. 2:9) Hem offerim long God wanfela ransom wea barava fitim samting wea Adam lusim for olketa pikinini bilong hem. Hao nao diswan givim gudfela samting long yumi?—1 Tim. 2:5, 6.
10. Talemaot wanfela way wea sakrifaes bilong Jesus hem barava givim yumi gudfela samting.
10 Hem mekem yumi fit for garem klinfela conscience bikos hem forgivim sin bilong yumi—diswan hem winim samting wea Israel kasem from olketa sakrifaes bilong animal under long Law bilong Moses. (Acts 13:38, 39; Heb. 9:13, 14) But, from yumi garem diswan, hem meanim yumi mas honest long yumi seleva and really garem faith long Jesus Kraest. Waswe, yumi seleva luksavvy hao yumi barava needim sakrifaes bilong Kraest? “Sapos yumi say: ‘Yumi no garem sin,’ yumi giamanim yumi seleva and truth hem no stap insaed yumi. Sapos yumi talemaot sin bilong yumi, hem faithful and raeteous for forgivim sin bilong yumi and hem mekem yumi kamap klin from every fashion wea no raeteous.”—1 John 1:8, 9.
11. Why nao wata baptism hem wanfela important samting for kasem gudfela conscience withim God?
11 Hem tru, samfela wea luksavvy they sin and wea say they believe long Kraest, and share tu for talem other pipol abaot Kingdom bilong God olsem Jesus hem duim, they no garem full faith long Jesus. Long wanem way? Well, olsem Bible talem, taem samfela long first century kamap olketa wea barava believe, hao nao they showim aot diswan long pablik? They baptaes. Why nao olsem? Bikos Jesus komandim olketa disaepol bilong hem for baptaes. (Matt. 28:19, 20; Acts 8:12; 18:8) Taem loving samting wea Jehovah provide-im thru long Jesus Kraest hem muvim heart bilong wanfela man, hem bae no hold back. Hem bae change-im any samting long laef bilong hem wea hem need for duim, dedicate-im hemseleva long God and showim aot diswan long wata baptism. Olsem Bible talem, sapos hem showim aot faith bilong hem long disfela way nao hem savvy ‘askim God for wanfela gud conscience.’—1 Pet. 3:21.
12. Sapos yumi luksavvy yumi duim wanfela sin, wanem nao yumi mas duim, and why nao olsem?
12 Hem tru, nomata bihaen long datwan, olketa fashion bilong sin bae still show aot. Wanem nao bae yu duim? “Mi raetem every samting hia long yufela for mekem yufela no duim sin,” aposol John hem say. So yumi mas no ting nating long sin wea yumi garem, maet long samting wea yumi duim, toktok or tingting. “But, sapos anywan duim wanfela sin, yumi garem wanfela for helpem yumi withim Father, Jesus Kraest, datwan wea raeteous. And hem wanfela sakrifaes wea coverim sin bilong yumi, but no for yumi seleva nomoa but for whole world tu.” (1 John 2:1, 2) Waswe, datwan meanim, nomata wanem samting yumi duim, sapos yumi pray long God, ‘Forgivim sin bilong mifela,’ every samting bae olraet? No moa. Key bilong way for hem forgivim yumi hem sapos yumi really repent. Yumi maet needim help tu from olketa elder insaed long Kristian kongregeson. Yumi mas luksavvy long way wea samting yumi duim hem barava rong and yumi barava feel sorry long diswan mekem yumi bae work hard for no duim moa. (Acts 3:19; Jas. 5:13-16) Sapos yumi duim olsem, yumi savvy sure Jesus bae helpem yumi. Faith bilong yumi long sakrifaes bilong hem wea savvy aotem sin, bae fit for mekem Jehovah hapi moa, and diswan hem important sapos yumi wantim hem for acceptim worship bilong yumi.
13. (a) Talemaot narafela way wea sakrifaes bilong Jesus hem givim gudfela samting long yumi. (b) Why nao disfela reward hem no depend long haomas service yumi duim for God? (c) But sapos yumi really garem faith, wanem nao yumi bae duim?
13 Sakrifaes bilong Jesus hem openem way tu for yumi garem chance bilong laef olawe—long heven for wanfela “little flock,” and long Paradaes earth for planti billion pipol. (Luke 12:32; Rev. 20:11, 12; 21:3, 4) Disfela reward hem no olsem pay bilong samting wea yumi duim. Nomata haomas samting yumi duim insaed service bilong Jehovah, yumi kanduit for say God mas givim yumi laef for fitim wanem yumi duim. Laef olawe hem “present wea God givim . . . thru long Kraest Jesus Lord bilong yumi.” (Rom. 6:23; Eph. 2:8-10) Nomata olsem, sapos yumi garem faith long datfela present and ting hae long hao yumi kasem, yumi bae showim aot diswan. From yumi luksavvy long nambawan way wea Jehovah use-im Jesus for duim will bilong Hem and way wea hem barava important tumas for yumi followim gud step bilong Jesus, yumi bae mekem Kristian ministry wanfela long olketa barava important samting long laef bilong yumi. Faith bilong yumi bae show aot klia long way wea yumi barava strong for talem other pipol abaot disfela barava nambawan present bilong God.—Lukim Acts 20:24.
14. Hao nao faith long Jesus Kraest mekem wan mind kamap?
14 Faith olsem mekem nambawan way for kasem wan mind kamap! From diswan yumi kamap moa klos long Jehovah, long Son bilong hem and long each other insaed long Kristian kongregeson. (1 John 3:23, 24) Yumi barava hapi from Jehovah givim Son bilong hem “nem wea winim every other nem [but no winim nem bilong God], mekem olketa long heven and olketa long earth and olketa underneath long graon mas bendim nee long nem bilong Jesus, and every tongue mas talemaot Jesus nao hem Lord for givim glory long God and Father.”—Phil. 2:9-11.
Samting for Review
● Taem Messiah kam, why nao olketa wea barava believim Word bilong God luksavvy long hem?
● Hao nao olketa profesi wea Jesus fulfillim, olsem olketa piksa long page 34 showim aot, mas affectim yumi?
● Wanem nao olketa way wea sakrifaes bilong Jesus givim gudfela samting long yumi finis? Hao nao yumi savvy show aot yumi ting hae long hem?
[Box/Piksa long page 34]
Olketa Profesi Abaot Jesus—Hao Nao They Mas Affectim Yu?
Abraham offerim Isaac
Moses olsem man wea tok for God
Aaron olsem hae priest
Olketa animal sakrifaes