Chapter 8
‘Faet Againstim Olketa Badfela Spirit’
1. Why nao yumi interest long samting wea olketa badfela spirit they duim?
PIPOL wea ting long material samting nomoa maet mek funny long way for believim olketa badfela spirit. But hem no samting for mek funny long hem. Nomata they believim or no moa, samting wea olketa demon duim hem affectim everywan. Diswan affectim olketa wea worshipim Jehovah tu. Tru tumas, they nao main target. Aposol Paul talem yumi abaot disfela faet, taem hem say: “Yumi garem wanfela faet, no againstim blood and body, but againstim olketa gavman [wea no stap long ples bilong blood and body], againstim olketa wea garem power, againstim olketa world ruler bilong disfela darkness, againstim olketa badfela spirit wea stap long heven.” (Eph. 6:12) Long taem bilong yumi, disfela faet hem kamap moa big from they throwim Satan from heven and hem kros tumas, from hem savvy hem garem shortfela taem nomoa.—Rev. 12:12.
2. Hao nao yumi fit for winim faet againstim olketa spirit wea strong winim man?
2 Hao nao anywan long yumi fit for winim faet againstim olketa spirit wea strong winim man? Only long way for depend every bit long Jehovah. Yumi mas listen long hem and obeyim Word bilong hem. Sapos yumi duim olsem, yumi savvy stap klia long way wea Satan hem spoelem olketa wea stap under long hem long saed bilong body, fashion, feeling and mind.—Eph. 6:11; Jas. 4:7.
Olketa World Ruler long Heven
3. Long wanem and hu nao Satan hem strong for againstim?
3 Jehovah story klia long yumi abaot samting wea go ahed long world, wea hem lukim from ples bilong hem long heven. Hem showim wanfela vision long aposol John abaot Satan wea olsem “wanfela bigfela redfela dragon” wea ready for kaikaim Kingdom bilong Messiah bilong God taem hem ready for born long heven long year 1914 C.E. From hem fail long datwan, Satan hem strong for againstim olketa wea stand for datfela Kingdom long earth, datfela mek-tu part bilong seed bilong “woman” bilong God.—Rev. 12:3, 4, 13, 17.
4. (a) Olsem Bible talem long yumi, hu nao givim power long gavman bilong olketa man? (b) Olketa ruler bilong politik they hipap distaem for wanem samting, and hu nao hipim ap olketa?
4 Datfela revelation long John hem showim aot klia tu, wea nao gavman bilong olketa man they kasem power. Hem lukim wanfela wild animal, withim 7-fela hed and 10-fela horn, wanfela animal wea garem power “ovarem every tribe and pipol and langwis and nation.” Diswan no stand for wanfela gavman nomoa, but whole system bilong politik everywea long world. John hem herem hao datfela “dragon [Satan the Devil] givim disfela animal strong bilong hem and throne bilong hem and bigfela power.” (Rev. 13:1, 2, 7; lukim Luke 4:5, 6.) Nomata olketa ruler bilong politik hia they say they garem religion, no any nation wea member bilong datfela “animal” hem stap under long rul bilong Jehovah and King wea hem appointim, Jesus Kraest. Everywan they trae hard for rul bilong themseleva. Olsem Revelation showim aot, distaem, “toktok wea kam aot from olketa demon” hem hipim ap everywan long them, long “war bilong bigfela day bilong God Olmaeti,” Har–Magedon. (Rev. 16:13, 14, 16) Tru nao, olsem aposol Paul hem raetem, “olketa world ruler” they no man nomoa but they “olketa badfela spirit wea stap long heven” tu. (Eph. 6:12) Everywan wea want for prove-im themseleva olsem trufela worshiper bilong Jehovah mas barava meanim gud datwan.
5. Why nao yumi need for lukaot gud for no letem any samting pullim yumi for supportim system bilong Satan?
5 Olketa rowa wea divaedem olketa man they affectim living bilong yumi everyday. Planti taem pipol they tek saed, maet long toktok bilong them or narafela way, withim nation, tribe, langwis or pipol wea garem sem living olsem them. Nomata taem olketa seleva no insaed long rowa wea go ahed, they laek for tek saed. But nomata wanem samting nao they rowa abaot, nomata wanem kaen man or idea nao they saed withim, wanem nao they really supportim? Bible talem stret hao “whole world hem stap long power bilong badfela man.” (1 John 5:19) So, hao nao man savvy stap klia long way for followim giaman way wea otherfela man they followim? Only sapos hem supportim every bit Kingdom bilong God and no saed withim anywan long any rowa bilong world.—John 17:15, 16.
Olketa Kleva Trik bilong Badfela Man
6. Wanem nao samfela way wea Satan use-im for tanem pipol awe from trufela worship?
6 Insaed long history Satan hem use-im persecution long toktok and body for tanem man awe from trufela worship. But hem use-im tu otherfela way wea haed—olketa giaman samting and kleva trik.
7. Hao nao way wea Satan use-im giaman religion show aot hem kleva tumas?
7 Hem kleva tumas for mekem bigfela sekson bilong olketa man for stap insaed darkness bilong false religion, hem letem them for ting they servim God. From they no garem really love for truth, samting wea pullim them maet olketa service bilong religion wea muvim feeling bilong man or samting wea they duim for showim aot power bilong them. (2 Thess. 2:9, 10) But yumi kasem warning hao, nomata from midlwan long olketa wea share long trufela worship, “samfela bae lusim faith . . . listen long olketa giaman toktok and teaching bilong olketa demon.” (1 Tim. 4:1) Hao nao datwan savvy happen?
8. Hao nao Satan sweetim samfela wea worshipim Jehovah bifor for go insaed long false religion?
8 Long kleva way, Devil use-im weak point bilong man. Waswe, hem still garem fashion for fraet long man? Sapos olsem, hem maet weak daon and joinim olketa relative or neibor for share insaed samfela samting wea start kam from false religion. Waswe, datfela man hem garem proud fashion? Then hem maet feel no gud taem hem kasem kaonsel or taem other pipol no acceptim olketa idea wea hem supportim. (Prov. 29:25; 15:10; 1 Tim. 6:3, 4) Waswe sapos love hem no samting wea muvim hem for tek part long field ministry? Winim way for change-im tingting bilong hem for followim example bilong Kraest, hem maet want for listen long olketa wea ‘talem samting wea hem laek for herem’ wea talem way for readim Bible nomoa and garem “gudfela living” hem inaf. (2 Tim. 4:3) Nomata hem joinim narafela religion or stap insaed religion wea hem laekem, datwan no important samting long Satan, but main samting, hem no wantim hem for worshipim Jehovah long way wea God talem thru long Word and organization bilong hem.
9. Long kleva way, hao nao Satan use-im sex for pullim pipol?
9 Long kleva way tu, Satan sweetim pipol for satisfyim samting wea they wantim long rongfela way. Hem duim diswan withim way for wantim sex. Long way wea they rejectim klinfela fashion bilong Bible, planti pipol long world ting way wea single pipol duim sex hem olsem gudfela hapitaem or hem savvy prove-im they full grown nao. And waswe, long olketa wea marit finis? Planti taem pipol long world wea kasem problem long saed bilong marit they divorce and marit moa or maet they separate and stap withim narawan. Taem yumi lukim dis kaen living, waswe, yumi ting yumi misstim samting, yumi ting Kristian way hem hard tumas? Kleva way bilong Satan hem for mekem man ting Jehovah hem haedem samfela gudfela samting. Hem sweetim yumi for ting long hapi wea yumi savvy kasem distaem—no long hao hem savvy affectim yumi and other pipol bihaen, and no long way wea yumi fren withim Jehovah and Son bilong hem.—Gal. 6:7, 8; 1 Cor. 6:9, 10.
10. Wanem nao Satan use-im for trae for change-im tingting bilong yumi abaot raf fashion?
10 Narafela samting wea man wantim hem hapitaem. Sapos hem duim long gudfela way, diswan savvy strongim body, mind and feeling bilong hem. But wanem nao yumi duim taem Satan use-im olketa taem bilong rest for trae mekem yumi lusim tingting bilong God? For example, yumi savvy hao Jehovah hate-im olketa wea love-im raf fashion. (Ps. 11:5) But taem yumi lukluk long movie or video wea showim datwan, waswe, yumi go ahed for sidaon and lukluk long hem? Or taem raf fashion hem kamap insaed long sports, waswe, yumi acceptim and maet sing aot for encouragim olketa wea play?—Lukim Genesis 6:13.
11. Wanem nao samfela way wea man wea savvy long trufela samting abaot spiritism savvy fall daon long trap sapos hem no lukaot gud?
11 Yumi savvy tu hao olketa wea join insaed any samting bilong spiritism—way for talem samting wea bae happen long future, kastom samting or way for trae for story withim olketa wea dae finis—they “samting wea Jehovah hate-im.” Yumi bae nating askim help bilong pipol wea story withim olketa spirit and welkamim them long hom bilong yumi for duim magic samting bilong them. But waswe, yumi bae listen long them and interest for lukluk long them long video or movie? Nomata yumi no savvy acceptim medicine from kastom doctor, waswe, yumi bae tie-im wanfela string raonem hand bilong niuborn baby mekem diswan savvy protectim pikinini hia from any trabel? Or, nomata yumi savvy Bible tambuim ‘way for spoelem other pipol withim magic samting,’ waswe, yumi bae letem man wea savvy duim hypnotism for bossim mind bilong yumi, maet for lelebet taem nomoa?—Deut. 18:10-12; Gal. 5:19-21.
12. (a) Hao nao music savvy mekem yumi garem olketa rong tingting? (b) Hao nao kaleko, hairstyle or toktok bilong man savvy showim aot hem ting hae long pipol wea Jehovah no hapi long them? (c) Wanem nao yumi need for duim mekem yumi no fall daon long olketa kleva trik bilong Satan?
12 Yumi readim insaed olketa Scripture hao ‘yumi mas no story abaot fornication and every different kaen dirty fashion long no gud way.’ (Eph. 5:3-5) But waswe sapos olketa samting hia join withim nicefela music, rhythm or wanfela strongfela beat? Waswe, maet yumi no luksavvy hao yumi start for singim song wea mek hae long sex wea no insaed marit, way for use-im drug for hapitaem and planti otherfela samting moa? Or, nomata yumi savvy yumi mas no followim living bilong pipol wea duim olketa samting olsem, waswe, yumi trae for followim way wea they wearim kaleko, hairstyle bilong them or way wea they toktok? Satan hem kleva tumas! Hem use-im olketa way wea kleva tumas for sweetim olketa man for followim dirty mind bilong hem! (2 Cor. 4:3, 4) For no fall daon long olketa kleva trik bilong hem, yumi mas stap klia long way for followim world. Yumi need for tingim hu nao olketa “world ruler bilong disfela darkness” and trae hard for faet againstim power bilong them.—Eph. 6:12; 1 Pet. 5:8.
Ready for Win
13. Hao nao yumi wea no perfect fit for winim world wea Satan rulim?
13 Bifor Jesus hem dae hem say olsem long olketa aposol bilong hem: “Stand strong! Mi winim world finis.” So, olketa tu savvy win; and aposol John raet olsem long samting olsem 60 year bihaen: “Hu nao man wea savvy winim world but dat wan wea garem faith long way wea Jesus hem Son bilong God?” (John 16:33; 1 John 5:5) Faith olsem hem show aot long way wea yumi obeyim olketa komand bilong Jesus and depend long Word bilong God, olsem hem duim. Wanem moa yumi need for duim? Yumi mas stap klosap long kongregeson wea hem nao hed long hem. Taem yumi no duim stret samting, yumi mas barava repent and askim God for forgivim yumi long faondeson bilong sakrifaes bilong Jesus. Long disfela way, nomata yumi no perfect, yumi tu savvy win.
14. (a) Readim Ephesians 6:13-18. (b) Use-im olketa question and scripture hia for story abaot olketa gudfela samting bilong each part bilong datfela spiritual kaleko for faet.
14 For win, yumi need for wearim “full kaleko for faet from God,” no aotem any part bilong hem. Please openem Bible bilong yu long Ephesians 6:13-18 and read abaot datfela kaleko for faet. Then, taem yu answerim olketa question long daon, ting abaot hao yu savvy kasem gudfela samting from way wea each part bilong datfela kaleko for faet savvy protectim yu.
“Wearim belt bilong truth raonem bele”
Nomata yumi maet savvy long truth, hao nao way for study everytaem, ting raonem Bible truth and attendim meeting savvy protectim yumi? (Phil. 3:1; 4:8, 9; 1 Cor. 10:12, 13; 2 Cor. 13:5; 1 Pet. 1:13, Kingdom Interlinear)
“Breastplate bilong raeteous fashion”
Diswan hem raeteous fashion bilong hu? (Rev. 15:3)
Showim aot hao way for no obey long olketa komand bilong Jehovah, from man hem no mekem grow love for olketa way bilong God, savvy mekem hem kasem bigfela spiritual trabel. (Lukim 1 Samuel 15:22, 23; Deuteronomy 7:3, 4.)
“Leg wea use-im shoe bilong gud nius bilong peace”
Taem leg bilong yumi busy for tekem yumi go for tok long pipol abaot olketa samting wea God provide-im for peace, hao nao diswan savvy protectim yumi? (Rom. 10:15; Ps. 73:2, 3; 1 Tim. 5:13)
“Bigfela shield bilong faith”
Sapos yumi garem strongfela faith, wanem nao yumi bae duim taem samfela samting kamap for mekem yumi garem daot or fraet? (Lukim 2 Timothy 1:12; 2 Kings 6:15-17.)
“Hat bilong salvation”
Hao nao hope bilong salvation helpem man for stap klia long trap bilong way for ting tumas long material samting? (1 Tim. 6:7-10, 19)
“Sword bilong spirit”
Wanem nao yumi mas depend long hem everytaem, taem yumi faetem samting wea trae for spoelem spiritual living bilong yumi or other pipol tu? (Ps. 119:98; Prov. 3:5, 6; lukim Matthew 4:3, 4.)
For fitim datwan, long Ephesians 6:18, 19, wanem other samting hem important for win long disfela spiritual faet? Haomas taem nao yumi mas duim diswan? Hu nao yumi duim for hem?
15. (a) Waswe, spiritual faet wea yumi insaed hem bilong yumi seleva nomoa? (b) Long wanem way nao yumi savvy attack insaed long disfela faet?
15 Olsem olketa Kristian soldia, yumi part bilong wanfela bigfela army wea insaed long spiritual faet. Sapos yumi lukaot gud and barava use-im full kaleko bilong faet from God, yumi bae no dae insaed disfela faet. But, yumi bae strongim otherfela servant bilong God tu. Yumi bae ready and willing for attack, for talemaot gud nius abaot Kingdom bilong Messiah bilong God, datfela gavman wea Satan hem barava againstim.
Samting for Review
● Why nao olketa wea worshipim Jehovah trae hard for no saed withim anywan long olketa rowa bilong world?
● Wanem nao samfela kleva trik wea Satan use-im for spoelem olketa Kristian long spiritual way?
● Hao nao kaleko for faet wea God provide-im hem protectim yumi long olketa way wea important tumas insaed long disfela spiritual faet?