Chapter Eit
‘Faet Againstim Olketa Wicked Spirit’
1. Why nao iumi interest tumas long waka bilong olketa wicked spirit?
PLANTI pipol maet laf long idea for sei olketa wicked spirit stap. Bat hem no samting for laf long hem. Nomata pipol bilivim or nomoa, olketa wicked spirit really stap, and olketa trae for duim samting wea affectim evriwan. Olketa worshiper bilong Jehovah tu insaed diswan. For tok stret, olketa nao main wan wea sekson hia targetim. Aposol Paul talem diswan klia long iumi taem hem sei: “Iumi garem wanfala faet, no againstim blood and body, bat againstim olketa gavman [wea iumi no savve lukim], againstim olketa wea garem paoa, againstim olketa world ruler bilong disfala darkness, againstim olketa wicked spirit long olketa ples bilong heven.” (Ephesians 6:12) Long taem bilong iumi, wei wea olketa wicked spirit affectim evriwan hem barava big winim eni narataem bikos olketa torowem Satan aot from heven and hem kros fogud, from hem savve taem bilong hem short.—Revelation 12:12.
2. Hao nao iumi fit for winim faet againstim olketa spirit wea garem strongfala paoa?
2 Waswe, man fit for winim faet againstim spirit wea garem strong paoa? Yes, bat only sapos hem depend evribit long Jehovah. Iumi mas lisin long hem and obeyim Word bilong hem. Taem iumi duim olsem, iumi savve missim bigfala sorre saed long body, fasin, and feeling wea kasem olketa wea Satan kontrolem olketa.—James 4:7.
Olketa World Ruler wea Stap Long Heven
3. Hu nao Satan persecutim long raf wei, and hao nao hem duim datwan?
3 Jehovah talem klia long iumi olketa samting wea happen long world taem hem lukim evri samting from hae ples bilong hem long heven. Hem showim wanfala vision long aposol John abaotem Satan wea olsem “wanfala big red dragon.” Hem redy for kaikaim Messiah Kingdom bilong God taem hem born long heven long 1914. From hem fail long datwan, Satan kosim raf persecution againstim olketa wea stap long earth wea stand for datfala Kingdom. (Revelation 12:3, 4, 13, 17) Hao nao Satan bae faetem disfala war? Thru long olketa man wea stand for hem.
4. Hu nao givim paoa long olketa gavman bilong man, and hao nao iumi savve long datwan?
4 Next samting, John lukim wanfala wild animal wea garem sevenfala hed and tenfala horn, wanfala animal wea garem paoa “ovarem evri tribe and pipol and languis and nation.” Datfala animal hem stand for system bilong politik long full earth. John herem hao “dragon [Devil Satan] givim long disfala animal strong bilong hem and throne bilong hem and bigfala paoa.” (Revelation 13:1, 2, 7) Tru nao, Satan nao givim strong and paoa long olketa gavman bilong man. So, olsem aposol Paul hem raetem, olketa really “world ruler” nao “olketa wicked spirit long olketa ples bilong heven,” wea kontrolem olketa gavman bilong man. Evriwan wea want for worshipim Jehovah need for minim evribit datwan.—Luke 4:5, 6.
5. Olketa bigman bilong politik go ahed for hipap for wanem distaem?
5 Nomata planti ruler bilong politik sei olketa followim religion, no eniwan long olketa nation stap anda long rul bilong Jehovah or King bilong hem, Jesus Christ. Evriwan barava trae hard for hol strong long paoa bilong olketa seleva. Distaem, olsem story bilong Revelation showimaot, “toktok wea kamaot from olketa demon” go ahed for mekem olketa world ruler hipap for “war bilong bigfala day bilong God Olmaeti” long Armageddon.—Revelation 16:13, 14, 16; 19:17-19.
6. Why nao man mas careful mekem hem missim wei for saportim system bilong Satan?
6 Evriday, raoa saed long politik, living, selen, and religion divaedem olketa man. Long olketa raoa hia, hem wei bilong pipol for teksaed—thru long toktok or samting olketa duim—witim nation, tribe, languis, or olketa wea garem sem living witim olketa. Nomata taem pipol no join insaed raoa, planti taem olketa favorim wansaed winim narasaed. Bat, nomata hu or wanem saed nao olketa saportim, hu nao olketa really givim saport long hem? Bible talem stret: “Full world hem stap long paoa bilong wicked wan.” (1 John 5:19) So, hao nao man savve missim wei wea Satan trikim planti man? Only long wei for saportim evribit Kingdom bilong God and for barava no teksaed long olketa raoa bilong world.—John 17:15, 16.
Olketa Kleva Trik Bilong Wicked Wan
7. Hao nao wei wea Satan hem kleva tumas showaot long wei wea hem iusim giaman religion?
7 Long full history bilong man, Satan iusim persecution saed long toktok and body for tanem pipol awe from trufala worship. Hem iusim tu olketa narakaen haed wei—olketa kleva trik. Hem mekem bigfala haf long olketa man stap insaed darkness thru long giaman religion, taem hem mekem olketa tingse olketa servem God. From olketa no garem stretfala savve abaotem God and no lovem truth, olketa laekem service bilong religion wea muvim feeling bilong man or olketa letem samfala waka wea showimaot paoa for pullim olketa. (2 Thessalonians 2:9, 10) Bat iumi kasem warning hao nomata from midolwan long olketa wea insaed long trufala worship bifor, “samfala bae lusim faith . . . , lisin long olketa giaman toktok from antap and teaching bilong olketa demon.” (1 Timothy 4:1) Hao nao datwan savve happen?
8. Hao nao Satan savve switim iumi for joinim giaman religion nomata sapos iumi worshipim Jehovah?
8 Devil hem kleva tumas for mekius long olketa wik point bilong iumi. Waswe, wei for fraet long man hem still kontrolem iumi? Sapos olsem, maet iumi letem olketa relative and neiba for forcem iumi for share insaed olketa samting wea start kam from giaman religion. Waswe iumi garem praod fasin? Sapos olsem, iumi maet feel nogud taem iumi kasem kaonsel or taem narafala pipol no acceptim olketa idea bilong iumi. (Proverbs 15:10; 29:25; 1 Timothy 6:3, 4) Winim wei for changem tingting bilong iumi for followim example bilong Christ, iumi laekem olketa wea ‘switim ear bilong iumi’ taem olketa sei wei for readim Bible and no duim nogud samting hem inaf nao. (2 Timothy 4:3) Nomata iumi joinim narafala religion or followim tingting bilong iumiseleva, datwan no important long Satan, main samting hem laekem nao hem for iumi no worshipim Jehovah long wei wea God talem thru long Word and organization bilong hem.
9. Hao nao Satan kleva for iusim sex for kasem olketa goal bilong hem?
9 Long kleva wei tu Satan pullim pipol for satisfaem olketa normal feeling for wantem samting bat long wei wea rong. Hem duim diswan witim feeling for wantem sex. Planti long world rejectim standard bilong Bible saed long fasin and sei wei wea tufala singol wan duim sex hem stretfala hapitaem or hem wei for pruvim olketa full-grown nao. And waswe long olketa wea marit finis? Planti duim adultery. And nomata tufala wea marit no olabaot, planti aftarem wei for divorce or separate mekem olketa savve tekem narawan. Haed wei wea Satan iusim hem witim goal for mekem pipol garem living wea wantem hapitaem distaem, hem pullim olketa for forgetim hao diswan bae affectim future bilong olketa seleva and tu bilong olketa narawan bat especially wei wea olketa fren witim Jehovah and Son bilong hem.—1 Corinthians 6:9, 10; Galatians 6:7, 8.
10. Wanem nao Satan iusim for trae for spoelem hao iumi ting abaotem dirty and raf fasin?
10 Narafala feeling wea man born witim hem feeling for wantem hapitaem. Gudfala hapitaem savve strongim body, mind, and feeling. Bat wanem nao iumi duim taem Satan long kleva wei trae for iusim taem for relax for mekem tingting bilong iumi stap farawe from God? Olsem example, iumi savve Jehovah heitim dirty fasin and raf fasin. Taem olketa movie, and television program showim olketa samting hia, waswe, iumi sidaon kwaet and go ahed for lukluk? Tingim tu hao Satan bae mek sure olketa samting hia kamap moa worse taem taem bilong hem for finis evribit kam klosap, bikos “olketa wicked man and man for laea bae go ahed for moa worse, laea long pipol and long olketa seleva tu.” (2 Timothy 3:13) Dastawe iumi need for luk aot evritaem long olketa trik bilong Satan.—Genesis 6:13; Psalm 11:5; Romans 1:24-32.
11. Wanem nao olketa wei wea maet man wea savve long truth abaotem spiritism hem foldaon insaed long trap sapos hem no luk aot gud?
11 Iumi savve tu hao olketa wea join insaed eni part bilong spiritism—eniwan wea duim divination, duim magic, or trae for story witim olketa wea dae finis—Jehovah barava heitim. (Deuteronomy 18:10-12) From iumi savve long datwan, iumi nating ting for go long man wea tok long olketa spirit, and iumi no invaetem olketa for kam long haos bilong iumi for duim waka bilong olketa long there. Bat waswe, bae iumi lisin long olketa sapos olketa showaot long television or long Internet? Nomata iumi bae nating acceptim treatment from wanfala witch doctor, waswe, iumi taemap rope raonem hand bilong baby bilong iumi, from iumi ting maet datwan bae protectim pikinini from enikaen nogud samting? From iumi savve Bible tambuim wei for garem paoa ovarem pipol thru long kastom, waswe, bae iumi letem man wea duim hypnotism for kontrolem mind bilong iumi?—Galatians 5:19-21.
12. (a) Hao nao Satan iusim music for mekem iumi ting abaotem olketa idea wea iumi savve olketa rong? (b) Hao nao kaleko, hairstael, or wei bilong man for toktok showaot hem laekem living bilong olketa wea Jehovah no appruvim? (c) Wanem nao iumi mas duim sapos iumi no want for foldaon long olketa kleva trik bilong Satan?
12 Bible sei iumi shud no story (witim tingting wea no klin) abaotem fornication and evri difren kaen fasin wea no klin. (Ephesians 5:3-5) Bat waswe sapos kaen story olsem hem join witim music wea garem naes tiun, or gudfala beat? Waswe, bae iumi start for repeatim toktok wea mekhae long sex midolwan tufala wea no marit, wei for iusim drug for hapitaem, and narafala sin wea pipol duim? Or nomata iumi savve hem rong for followim living bilong pipol wea duim kaen samting olsem, waswe, iumi start for luk olsem olketa taem iumi followim sem wei wea olketa werem kaleko, hairstael, or wei bilong olketa for toktok? Olketa trik bilong Satan luk naes bat olketa wanfala trap for switim man for followim barava nogud wei bilong hem! (2 Corinthians 4:3, 4) For no foldaon long olketa trik bilong hem, iumi mas stap klia long wei for isisi followim world. Iumi need for evritaem remember hu nao “olketa world ruler bilong disfala darkness” and barava strong for faet againstim wei wea olketa savve pullim man.—1 Peter 5:8.
Redy for Kamap Man wea Win
13. Hao nao iumi wea no perfect savve winim world wea Satan hem rulim?
13 Bifor hem dae, Jesus sei long olketa aposol bilong hem: “Stand strong! Mi winim world finis.” (John 16:33) Olketa tu savve win. Samting olsem 60 year bihaen, aposol John raet olsem: “Hu nao man wea bae winim world? Hem mas datwan wea garem faith hao Jesus hem Son bilong God.” (1 John 5:5) Faith olsem hem showaot taem iumi obeyim olketa komand bilong Jesus and depend long Word bilong God, olsem Jesus duim. Wanem moa iumi mas duim? Stap klosap long kongregeson wea hem nao Hed ovarem. Taem iumi duim wanfala sin, iumi mas barava repent and askem God for forgivim iumi long faondeson bilong sakrifaes bilong Jesus. Long wei olsem, nomata iumi no perfect and duim mistek, iumi tu savve kamap man wea win.—Psalm 130:3, 4.
14. Readim Ephesians 6:13-17, and iusim olketa kwestin and scripture long disfala paragraf for storyim hao each part bilong datfala spiritual kaleko savve helpem iumi.
14 For win, iumi need for werem “full kaleko for faet wea kam from God,” and no missim eni part bilong hem. Plis openem Bible bilong iu long Ephesians 6:13-17, and read abaotem evri part bilong datfala kaleko. Then, taem iu ansarem olketa kwestin long daon, tingim hao iu savve kasem gudfala samting from protection bilong each part bilong datfala kaleko.
“Belt bilong truth raonem bele”
Nomata iumi maet savve long truth, hao nao wei for study evritaem, ting raonem truth bilong Bible, and attendim olketa meeting hem protectim iumi? (1 Corinthians 10:12, 13; 2 Corinthians 13:5; Philippians 4:8, 9)
“Breastplate bilong raeteous fasin”
Diswan hem standard bilong raeteous fasin bilong hu? (Revelation 15:3)
Showimaot hao wei for fail for followim olketa raeteous standard bilong Jehovah hem spoelem man long spiritual wei. (Deuteronomy 7:3, 4; 1 Samuel 15:22, 23)
“Werem shoe bilong gud nius bilong peace”
Hao nao wei for keepim leg bilong iumi busy for tekem iumi go for story long pipol abaotem olketa samting wea God provaedem for peace hem protectim iumi? (Psalm 73:2, 3; Romans 10:15; 1 Timothy 5:13)
“Bigfala shield bilong faith”
Sapos faith bilong iumi garem strong faondeson, iumi bae hao taem olketa samting kamap wea trae for mekem iumi garem daot or fraet? (2 Kings 6:15-17; 2 Timothy 1:12)
“Helmet bilong salvation”
Hao nao hope bilong salvation helpem man for stap klia from wei for foldaon long trap bilong wei for warim tumas olketa material samting? (1 Timothy 6:7-10, 19)
“Sword bilong spirit”
Wanem nao iumi mas evritaem depend long hem for winim olketa attak wea iumi kasem againstim spiritual fasin bilong iumi or bilong narafala pipol? (Psalm 119:98; Proverbs 3:5, 6; Matthew 4:3, 4)
Wanem moa iumi barava needim for win long spiritual war? Iumi mas iusim diswan haomas taem? Iumi savve duim diswan for hu nao? (Ephesians 6:18, 19)
15. Hao nao iumi savve faet strong insaed long spiritual faet?
15 Olsem olketa soldia bilong Christ, iumi part bilong wanfala bigfala army wea faet insaed spiritual war. Sapos iumi go ahed for wekap and iusim gud full kaleko for faet wea kam from God, bae datfala war no spoelem iumi. Bat, bae iumi help for strongim olketa narafala servant bilong God. Bae iumi redy and strong for faet, talemaot gud nius bilong Messiah Kingdom bilong God, datfala gavman long heven wea Satan barava againstim.
Review
• Why nao olketa worshiper bilong Jehovah barava no teksaed long olketa raoa bilong world?
• Wanem nao samfala kleva trik wea Satan iusim for spoelem olketa Christian long spiritual wei?
• Hao nao spiritual kaleko wea God provaedem protectim iumi long spiritual faet bilong iumi?
[Piksa long page 76]
Olketa nation start for hipap distaem for Armageddon