Kongregeson for Buildim Ap Man Long Love and Wan Mind
Maet iu attendim finis samfala kongregeson meeting bilong Olketa Witness Bilong Jehovah klosap long ples wea iu stap. Pipol from evri different kaen living—olketa famili, single pipol, olketa olo and young pipol—hipap long there. Evriwan garem wan mind long worship bilong olketa and interest for helpem otherfala pipol.
Long eni arrangement wea planti pipol want for work tugeta withim wan mind, samfala mas stap for luk aftarem olketa. God hem God bilong order; dastawe, datfala order mas show aot long kongregeson bilong pipol bilong hem. Olsem long first century, distaem tu samfala mature Kristian man wea kasem mark, and garem savvy serve olsem elder, or ovaseer. Olketa hia luk aftarem kongregeson and spiritual need bilong hem. Olketa kasem help tu from samfala otherfala faithful man wea olketa kolem ministerial servant. Olketa man hia no kasem pei or samfala selen for diswan but olketa seleva willing for serve, and olketa garem work for selen for supportim olketa seleva.—1 Corinthians 14:33, 40; Philippians 1:1; 1 Timothy 3:8, 9.
Hao nao they choosim olketa hia? Olketa mas faithful servant bilong God wea kasem samfala mark bilong Bible. Samfala mark hia olsem: mas ‘no ova tumas long fasin, garem stretfala tingting, followim order, welkamim otherfala pipol, fit for teach, and garem balance fasin; no love-im selen; guide-im famili bilong hem long gudfala way; mas no niufala Kristian man; pipol aotsaed story gud abaotem hem’; ‘hold strong long faithful word long way for teach.’—1 Timothy 3:1-15; Titus 1:7-9.
Kongregeson no vote-im olketa man hia, wea maet planti taem staka long olketa they niufala Kristian. But, samfala mature man wea garem savvy wea they elder and garem fasin for luksavvy, they nao savvy recommendim olketa sapos olketa hia kasem mark wea Bible talem. Then Governing Body bilong Olketa Witness Bilong Jehovah appointim olketa elder and ministerial servant, wea followim example bilong Kristian kongregeson long first century.
Olketa elder hia, or ovaseer, no wanfala sekson bilong bigman long religion; olketa no masta ovarem otherfala pipol. Olsem Jesus talem, eniwan wea lead mas kamap slave bilong evriwan. Tru nao, long kongregeson bilong Olketa Witness Bilong Jehovah, olketa elder work tugeta withim evriwan for Kingdom bilong God.—Matthew 20:26, 27; 23:8-11; Romans 12:8; 1 Corinthians 3:5; 4:1, 2; Colossians 4:11; 1 Thessalonians 5:12-14.
Olketa ovaseer hia luk aftarem instruction wea kamap long olketa meeting and lead long preaching work. Wanfala main goal bilong kongregeson hem for preachim gud nius bilong Kingdom long territory bilong hem. Olketa ovaseer serve olsem shepherd tu, visitim olketa member bilong kongregeson for encouragim olketa taem need kamap.—Matthew 24:14; Acts 1:8; 1 Thessalonians 2:11, 12; 5:14, 15; 2 Timothy 2:24-26; Hebrews 13:17; James 5:13-16; 1 Peter 5:1-4.
Olketa elder garem responsibility for givim reproof and discipline tu long eniwan wea maet followim rongfala way and wea maet spoelem spiritual living and klinfala fasin and wan mind bilong kongregeson.—1 Corinthians 5:4, 5, 7, 11-13; Titus 1:9; 2:15; 3:10, 11.
Way for kampani evritaem withim kongregeson bae mekem iu garem olketa gudfala fren and planti gudfala spiritual samting.—Psalm 35:18; 84:10.
• Hu nao luk aftarem olketa samting insaed long each kongregeson?
• Hao nao olketa choosim olketa ovaseer?
• Wanem nao responsibility bilong olketa?
[Piksa long page 13]
Olketa ovaseer teachim kongregeson, lead for preach from haos tu haos, givim encouragement long shepherding kol, givim kaonsel and reproof taem need kamap