Olketa Overseer and Ministerial Servant Kasem Appointment Followim Theocratic Wei
“Lukluk gud long iufala seleva and long evri sheep, wea holy spirit appointim iufala olsem olketa overseer.”—Acts 20:28.
1, 2. Hao nao Isaiah 60:22 hem go ahed for fulfill distaem?
JEHOVAH talem longtaem go finis hao wanfala spesol samting bae happen long taem bilong end. Thru long profet Isaiah, disfala toktok hem kamap: “Smol wan seleva bae kamap wan thousand, and wan wea no mas big bae kamap wanfala maeti nation. Mi nao, Jehovah, bae speedim diswan long taem bilong hem.”—Isaiah 60:22.
2 Waswe, pruv stap hao disfala profesi hem go ahed for fulfill distaem? Yes! Long olketa year bilong 1870, wanfala kongregeson bilong pipol bilong Jehovah hem start long Allegheny, Pennsylvania, U.S.A. From smol start, planti thousand kongregeson kamap and grow evriwea long world. Planti million wea talemaot Kingdom—wanfala maeti nation—distaem olketa insaed winim 91,000 kongregeson long 235 kantri raonem earth. Iumi sure, diswan pruvim Jehovah hem speedim wei for hipimap olketa tru worshiper bifor datfala “big trabol” wea klosap for start hem kam.—Matthew 24:21; Revelation 7:9-14.
3. Wanem nao hem minim for baptaes ‘long nem bilong Father, Son, and holy spirit’?
3 Bihaen olketa seleva dedicate long Jehovah, and followim instruction bilong Jesus, planti million hia baptaes “long nem bilong Father and bilong Son and bilong holy spirit.” (Matthew 28:19) Wei for baptaes “long nem bilong Father” hem minim olketa hia wea dedicate luksavve long Jehovah olsem Dadi bilong olketa long heven and Man wea Givim Laef and olketa stap anda long sovereign rul bilong hem. Wei for baptaes ‘long nem bilong Son’ minim olketa luksavve long Jesus Christ olsem Man wea Givim Ransom, Leader, and King bilong olketa. Olketa luksavve tu long waka bilong holy spirit, or paoa bilong God, for leadim laef bilong olketa. Diswan showaot olketa baptaes ‘long nem bilong holy spirit.’
4. Hao nao olketa Christian minister kasem appointment?
4 Taem olketa baptaes, olketa niu disaepol kasem appointment olsem olketa minister bilong Jehovah God. Hu nao appointim olketa? Olketa toktok long 2 Corinthians 3:5 fitim olketa tu: “Wei wea iumi kamap fit [olsem minister] hem kam from God.” Olketa no savve kasem honor wea moa big winim wei for Jehovah God seleva nao appointim olketa! Bihaen olketa baptaes, olketa bae go ahed for grow long spiritual wei olsem olketa minister bilong “gud nius” sapos olketa go ahed for acceptim lead bilong spirit bilong God and go ahed for followim Word bilong hem.—Matthew 24:14; Acts 9:31.
Appointim Long Theocratic—No Democratic—Wei
5. Waswe, wei for chusim olketa Christian overseer and ministerial servant hem followim democratic wei? Minim diswan.
5 Hem needim olketa overseer wea fit and mature and olketa ministerial servant wea helpem olketa nao for lukaftarem spiritual need bilong olketa minister wea kamap staka tumas. (Philippians 1:1) Hao nao olketa spiritual man olsem kasem appointment? No followim wei wea olketa long Christendom duim. Olsem example, olketa no electim olketa Christian overseer followim democratic wei, hem nao wei for win followim vote bilong pipol insaed kongregeson. Bat, olketa appointment hia followim theocratic wei. Wanem nao diswan minim?
6. (a) Wanem nao trufala theocratic wei? (b) Why nao wei for appointim olketa overseer and ministerial servant hem followim theocratic wei?
6 For talem klia, trufala theocratic wei hem rul bilong God. Olketa Witness bilong Jehovah willing for stap anda long rul bilong hem and waka tugeta for duim will bilong God. (Psalm 143:10; Matthew 6:9, 10) Wei wea olketa Christian overseer, or olketa elder, and ministerial servant kasem appointment hem followim theocratic wei bikos wei wea olketa followim for recommendim and appointim olketa man hia hem followim arrangement bilong God wea stap insaed Holy Scripture. And olsem “hed ovarem evri samting,” Jehovah nomoa fit for disaedem hao nao organization bilong hem long earth bae waka.—1 Chronicles 29:11; Psalm 97:9.
7. Hao nao waka bilong Olketa Jehovah’s Witness hem organize?
7 Long wei wea difren from planti long olketa religion bilong Christendom, Olketa Jehovah’s Witness no disaedem seleva hao olketa mas organizem religion bilong olketa. Olketa honest Christian hia trae hard for followim olketa mark bilong Jehovah. Olketa overseer midolwan long olketa no kasem appointment from kongregeson, from olketa bigman bilong church, or followim promotion. Sapos samfala bilong world trae for changem olketa appointment hia, pipol bilong Jehovah no willing for followim olketa. Olketa strong for followim samting wea olketa aposol duim long first century taem olketa sei: “Mifala mas obeyim God olsem ruler and no olketa man.” (Acts 5:29) So, olketa Witness stap anda long God long evri samting. (Hebrews 12:9; James 4:7) Wei for followim theocratic arrangement hem mekem God appruvim olketa.
8. Hao nao democratic and theocratic wei hem difren?
8 Olsem olketa servant bilong Nambawan Man Bilong Theocracy, Jehovah, hem gud for iumi tingim wei wea democratic and theocratic wei hem difren. Democratic wei for kasem appointment hem minim for evriwan garem sem chance and planti taem man mas duim campaign for olketa votem hem for datfala waka. Theocratic wei for mekem olketa appointment hem no followim kaen wei olsem. Olketa hia no kam from olketa man; or kamaot from eni legal corporation. Long taem wea, luk olsem hem storyim appointment bilong hem from Jesus and Jehovah olsem “wanfala aposol long olketa nation,” Paul talem olketa long Galatia hao hem kasem appointment “no from olketa man or thru long wanfala man, bat thru Jesus Christ and God wea hem nao Father, wea raisim hem ap from dae.”—Romans 11:13; Galatians 1:1.
Holy Spirit Appointim
9. Wanem nao Acts 20:28 talem abaotem appointment bilong olketa Christian overseer?
9 Paul talem moa olketa overseer wea stap long Ephesus hao olketa kasem appointment from God thru long holy spirit. Hem sei: “Lukluk gud long iufala seleva and long evri sheep, wea holy spirit appointim iufala olsem olketa overseer, for shepherdim kongregeson bilong God, wea hem baem finis witim blood bilong Son bilong hem.” (Acts 20:28) Olketa Christian overseer hia needim wei for holy spirit go ahed leadim olketa taem olketa duim waka bilong olketa olsem shepherd for sheep bilong God. Sapos man wea kasem appointment hem no go ahed for kasem moa olketa mark bilong God, gogo holy spirit bae duim samting for aotem hem from position bilong hem.
10. Hao nao holy spirit garem barava important waka long olketa theocratic appointment?
10 Hao nao holy spirit hem duim barava important waka olsem? First samting, record wea talem olketa mark for spiritual shepherd hem kam from holy spirit. Long olketa leta bilong hem for Timothy and Titus, Paul showimaot olketa mark wea olketa overseer and ministerial servant mas kasem. Evriwan tugeta, hem storyim 16-fala difren mark. Olsem example, olketa overseer mas free from blame, no ova tumas long fasin, garem gudfala tingting, followim order, welkamim pipol, fit for teach and showimaot gudfala example olsem hed bilong famili. Olketa mas balance long wei for iusim alcohol, no lovem selen, and showimaot fasin for kontrolem seleva. Olketa sem hae mark tu stap for olketa man wea reach aot for waka olsem ministerial servant.—1 Timothy 3:1-10, 12, 13; Titus 1:5-9.
11. Wanem nao samfala mark wea olketa man wea reach aot for responsibility insaed kongregeson mas kasem?
11 Wei for lukluk gud long olketa mark hia showimaot hao olketa wea lead long worship bilong Jehovah mas showimaot gudfala example long Christian fasin. Olketa man wea reach aot for responsibility long kongregeson mas givim pruv hao holy spirit hem waka long olketa. (2 Timothy 1:14) Hem mas barava showaot klia hao spirit bilong God hem putim insaed olketa man hia olketa frut bilong “love, hapi, peace, patient for safa, kaenfala fasin, gudfala fasin, faith, kwaet fasin, fasin for kontrolem seleva.” (Galatians 5:22, 23) Frut olsem bae showaot long wei wea olketa deal witim olketa brata and nara pipol. Tru, samfala maet gud tumas for showimaot samfala frut bilong spirit, and olketa narawan maet barava kasem stret olketa nara mark bilong overseer. Bat, long full living bilong olketa, evriwan wea hope for kasem appointment olsem overseer or ministerial servant shud showimaot hao olketa spiritual man, wea kasem olketa mark long Word bilong God.
12. Hu nao iumi savve sei hem kasem appointment thru long holy spirit?
12 Taem Paul encouragem olketa narawan for followim fasin bilong hem, hem free for talem datwan bikos hemseleva followim Jesus Christ, wea ‘leavim wanfala example for iumi for followim gud olketa step bilong hem.’ (1 Peter 2:21; 1 Corinthians 11:1) Dastawe iumi savve sei olketa wea kasem olketa mark bilong Scripture taem olketa kasem appointment olsem overseer or ministerial servant kasem appointment thru long holy spirit.
13. Hao nao holy spirit helpem olketa wea mekem recommendation for olketa man for serve insaed long kongregeson?
13 Narafala samting hem showimaot wei wea holy spirit hem waka for recommendim and appointim olketa overseer. Jesus sei ‘Father long heven hem givim holy spirit long olketa wea askem hem.’ (Luke 11:13) So taem olketa elder insaed kongregeson meet for recommendim olketa man for kasem responsibility insaed kongregeson, olketa prea for spirit bilong God gaedem olketa. Recommendation bilong olketa hem garem faondeson long samting wea stap insaed Word bilong God, and holy spirit helpem olketa for luksavve sapos datfala man wea olketa tingim hem kasem olketa mark bilong Scripture or nomoa. Olketa wea mekem recommendation bae no letem lukluk bilong hem, education, or savve for affectim olketa. Main samting olketa lukluk long hem nao sapos datfala man hem wanfala spiritual man, wea olketa member bilong kongregeson bae no hol bak for askem spiritual kaonsel from hem.
14. Wanem nao iumi lanem from Acts 6:1-3?
14 Nomata olketa body of elders share witim olketa traveling overseer for recommendim olketa brata for serve olsem elder and ministerial servant, olketa appointment hia followim example wea kamap long first century. Wantaem, wanfala need kamap for olketa man wea fit long spiritual wei for lukaftarem wanfala important assignment. Governing body givim disfala direction: “Lukaotem for iufala seleva sevenfala man wea fit from midolwan long iufala, wea fulap witim spirit and wisdom, mekem mifala savve appointim olketa ovarem disfala important waka.” (Acts 6:1-3) Nomata olketa wea stap long there nao duim recommendation, olketa appointment kam from olketa man wea garem responsibility for duim datwan long Jerusalem. Olketa followim sem wei tu long distaem.
15. Hao nao Governing Body hem insaed long wei for appointim olketa man?
15 Governing Body bilong Olketa Jehovah’s Witness nao appointim evri member bilong olketa Branch Komiti. Taem olketa disaedem hu nao savve kasem bigfala responsibility olsem, Governing Body tingim disfala toktok bilong Jesus: “Evriwan wea kasem planti samting, hem mas duim planti samting tu; and man wea olketa pipol markem for duim bigfala waka, hem mas duim barava bigfala waka tu.” (Luke 12:48) Join witim wei for appointim olketa member bilong Branch Komiti, Governing Body appointim tu olketa Bethel elder and traveling overseer. Nomata olsem, olketa markem samfala brata wea olketa savve trustim for stand for olketa long olketa nara appointment. Diswan followim example insaed long Bible tu.
‘Appointim Olsem Mi Givim Order Long Iu’
16. Why nao Paul leavim Titus long Crete, and wanem nao diswan showimaot abaotem olketa theocratic appointment distaem?
16 Paul talem man wea waka witim hem Titus: “For disfala reason nao mi lusim iu long Crete, mekem iu savve stretem rong samting and for appointim olketa older man long olketa taon, olsem mi givim order long iu.” (Titus 1:5) Then Paul talemaot olketa mark wea Titus mas lukluk for hem insaed olketa man wea bae fit for kasem olketa appointment olsem. So, distaem, Governing Body appointim olketa brata wea fit long olketa branch for stand for hem long wei for appointim olketa elder and ministerial servant. Olketa careful tumas for sekson hia wea stand for Governing Body for minim gud and followim olketa gaedlaen insaed Scripture for mekem olketa appointment hia. So, anda long direction bilong Governing Body nao olketa man wea fit kasem appointment for serve insaed olketa kongregeson bilong Olketa Jehovah’s Witness evriwea long world.
17. Hao nao branch office hem lukaftarem olketa recommendation for appointment bilong olketa overseer and ministerial servant?
17 Taem olketa sendem recommendation for appointment bilong olketa overseer and ministerial servant long wanfala branch office bilong Watch Tower Society, olketa man wea garem experience and depend long spirit bilong God for gaedem olketa nao mekem olketa appointment hia. Olketa man hia savve olketa mas givim ansa, olketa luksavve olketa mas no kwiktaem putim hand bilong olketa antap long eni man, nogud olketa share witim sin bilong hem.—1 Timothy 5:22.
18, 19. (a) Hao nao olketa talemaot samfala appointment? (b) Hao nao full wei for duim recommendation and appointment hem kamap?
18 Olketa savve talemaot samfala appointment thru long leta wea garem official stamp from wanfala legal corporation. Olketa savve iusim leta olsem for appointim winim wanfala brata insaed long kongregeson.
19 Olketa theocratic appointment kam from Jehovah thru long Son bilong hem and samting wea God iusim long earth, datfala “faithful and wise slave” and Governing Body bilong hem. (Matthew 24:45-47) Datfala full wei for duim recommendation and appointment hem kasem lead, or gaed bilong holy spirit. Diswan hem tru bikos olketa mark for diswan stap insaed Word bilong God, wea holy spirit nao muvim man for raetem, and datfala man wea kasem appointment hem givim pruv bilong wei for garem olketa frut bilong spirit. So, fitim for iumi ting long olketa appointment hia olsem kam from holy spirit. Long sem wei wea olketa overseer and ministerial servant kasem appointment long theocratic wei long first century, hem olsem tu distaem.
Hapi Tumas for Gaedens Bilong Jehovah
20. Why nao iumi garem sem tingting olsem David wea stap long Psalm 133:1?
20 Long disfala taem bilong gudfala spiritual living and wei wea theocratic waka for preachim Kingdom hem kamap moa big, iumi hapi tumas long wei wea Jehovah nao bihaenem appointment bilong olketa overseer and ministerial servant. Disfala arrangement from Scripture hem help for keepim olketa hae mark bilong God midolwan long iumi Olketa Jehovah’s Witness. And tu, Christian spirit and hard waka bilong olketa man hia hem barava help long wei wea iumi kasem nambawan peace and wan mind olsem olketa servant bilong Jehovah. Olsem man wea raetem psalm, David, diswan muvim iumi for sei: “Lukim! Hem gud and naes tumas for olketa brata for stap tugeta witim wan mind!”—Psalms 133:1.
21. Hao nao Isaiah 60:17 hem fulfill distaem?
21 Iumi thankiu tumas for lead bilong Jehovah thru long Word and holy spirit bilong hem! Tru nao, olketa toktok long Isaiah 60:17 garem bigfala mining for iumi: “Winim copper mi bae tekem kam gold, and winim iron mi bae tekem kam silver, and for changem wood, copper, and for changem olketa ston, iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” Taem Olketa Jehovah’s Witness followim theocratic wei hia long wei wea moa big, iumi kasem olketa blessing long full organization bilong God long earth.
22. Iumi barava sei thankiu long wanem, and wanem nao iumi shud disaed strong for duim?
22 Iumi thankiu tumas for olketa theocratic arrangement wea stap midolwan long iumi. And iumi barava tinghae long hard waka wea mekem man satisfae wea olketa overseer and ministerial servant, wea kasem appointment followim theocratic wei, olketa duim. Witim full heart iumi praisem loving Dadi bilong iumi long heven, wea givim iumi gudfala spiritual living and blessim iumi long barava rich wei. (Proverbs 10:22) So, letem iumi disaed strong for followim step witim organization bilong Jehovah. Winim eni samting, letem iumi go ahed for serve tugeta long wan mind for givim honor, praise, and glory long bigfala and holy nem bilong Jehovah.
Hao Nao Bae Iu Ansa?
• Why nao iumi savve sei appointment bilong olketa overseer and ministerial servant hem followim theocratic wei, no democratic wei?
• Hao nao olketa Christian man wea fit kasem appointment from holy spirit?
• Hao nao Governing Body hem insaed long appointment bilong olketa overseer and ministerial servant?
• Long saed bilong olketa theocratic appointment, why nao iumi shud thankiu long Jehovah?
[Olketa Piksa long page 15]
Olketa elder and ministerial servant kasem privilege for serve from theocratic appointment