Olketa Meeting for Muvim Man for Show Aot Love and Duim Gudfala Work
Olketa firstfala Kristian hipap tugeta, planti taem long haos bilong samfala brata, for kasem instruction and enjoyim way for fren wea encouragim olketa. Distaem, olketa kongregeson bilong Olketa Witness Bilong Jehovah hipap threefala taem insaed long week. Iu welkam for attendim eni meeting hia. Meeting bilong olketa no wanfala ceremony, but main samting hem education bilong God. Olketa kongregeson meeting start and finis withim song and prea. Hem free nomoa, and olketa no collectim eni selen.—Acts 4:23-31; 14:22; 15:32, 35; Romans 16:5; Colossians 4:15.
Maet firstfala meeting wea bae iu attendim hem 45-minute pablik tok, wea story abaotem olketa Bible teaching, profesi, or kaonsel long Kristian living. Bihaen long disfala tok, wanfala study long Bible bae kamap, wea kam from wanfala article insaed long Wastaoa wea olketa workim for kongregeson studyim. Study hem followim disfala way: Samwan readim wanfala paragraf from Wastaoa, and conductor askim samfala kwestin abaotem disfala information wea audience savvy volunteer for ansa long way for apim hand. Audience savvy givim samfala koment long each paragraf. Disfala meeting hem for wan hour.
Insaed long week, tufala meeting kamap wea each wan hem for 45 minute. Wanfala hem Theocratic Ministry Skul. Diswan trainim man for readyim information long samfala point from Bible and teachim long gudfala way. Bihaen 21-minute bilong spesel instruction, samfala student wea kasem assignment givim shortfala tok. Bihaen long each tok, skul ovaseer givim kaonsel wea showim way wea student savvy kamap moabeta. Olketa readyim samfala buk for iusim long disfala skul. Olketa wea evritaem attendim olketa meeting hia savvy joinim skul, sapos living bilong olketa fitim olketa Kristian principle.
Meeting wea kam bihaen datwan hem Service Meeting. Hem garem three or fofala part wea story abaotem way for talemaot gud nius from haos tu haos and otherfala part bilong ministry tu. Olketa part hia maet olsem tok, way wea samfala brata story tugeta, or samfala demonstration, and way wea audience tek part tu. Klosap full part bilong program hem followim Kingdom Ministry Bilong Iumi, wanfala foa-page instruction pepa wea Watch Tower Society pablisim evri month.
Narafala meeting hem kamap wanfala taem evri week long olketa smallfala grup, planti taem long haos bilong samfala brata insaed long territory bilong kongregeson. Disfala study hem kam from Bible and wanfala buk wea Society pablisim. From grup hem small, planti chance stap for evriwan share long study, and diswan givim gudfala chance for olketa wea hipap for savvy gud long each other.
Planti kongregeson garem meeting bilong olketa long wanfala Kingdom Hall wea Olketa Witness Bilong Jehovah nao buildim. Contribution wea olketa Witness seleva willing for givim nao peim olketa kost, and klosap evritaem olketa volunteer workman duim disfala work free nomoa. Samfala contribution box stap long evri meeting for olketa wea laek givim contribution.
Olketa kongregeson meeting helpem Olketa Witness Bilong Jehovah for followim kaonsel long Hebrews 10:24, 25: “Iumi mas tingim each other for muvim each other for show aot love and duim olketa gudfala work, no lusim fasin for hipap tugeta, olsem hem way bilong samfala, but encouragim each other, and duim long bigfala way moa taem [iumi] lukim datfala day hem kam klosap.”
• Wanem nao samfala part long meeting bilong olketa firstfala Kristian wea semsem withim meeting bilong Olketa Witness Bilong Jehovah distaem?
• Storyim wanem nao kamap long faevfala meeting bilong olketa Witness evri week.
• Hao nao olketa garem ples for olketa meeting?
[Piksa long page 14]
Elder conductim Wastaoa Study, United States
Theocratic Ministry Skul, Faeroe Islands
Grup study long wanfala haos, Yap
Kingdom Hall, New Braunfels, Texas, U.S.A., wea Olketa Witness Bilong Jehovah buildim insaed tufala day
[Piksa long page 15]
Olketa Kingdom Hall long different kantri
Japan
Australia
Austria
Spain