Truth Abaotem God and Christ

Hu Nao God?

Hu Nao Nem blo God? God seleva sei: “Mi Jehovah. Datwan nao nem blo mi.” (Isaiah 42:8) Nem blo God stap samting olsem 7,000 taems lo Bible. Nomata olsem, staka Bible transleison aotem disfala nem and changem witim title olsem “Lord.” God laekem iu for fren witim hem, so hem encouragem iu for “singaot lo nem blo hem.”—Psalm 105:1.

Olketa Title blo Jehovah. Bible iusim olketa title olsem “God,” “Olmaeti,” “Creator,” “Dadi,” “Lord,” and “Sovereign,” taem hem storyim Jehovah. Staka prea wea stap lo Bible, olketa iusim olketa title and nem blo God, Jehovah.—Daniel 9:4.

God Hem Wanfala Spirit. God hem wanfala spirit wea iumi no savve lukim. (John 4:24) Bible sei “no eni man hem lukim God.” (John 1:18) Bible storyim olketa feeling blo hem. Pipol savve mekem hem sorre, or olketa savve mekem “hem hapi.”—Proverbs 11:20; Psalm 78:40, 41.

Olketa Nambawan Wei blo God. God no fevarem eniwan. (Acts 10:34, 35) And tu, “hem God wea garem bigfala mercy, hem tingim man, hem no savve kros kwiktaem, loyal love blo hem big tumas, hem talem tru samting evritaem.” (Exodus 34:6, 7) Nomata olsem, fofala wei blo God nao iumi laekem tumas.

Paoa. From hem nao “Olmaeti God,” hem garem bigfala paoa for duim eni samting wea hem promis for duim.—Genesis 17:1.

Wisdom. Wisdom blo God hem winim eni narawan. Dastawe Bible sei “God seleva nomoa hem wise tumas.”—Rome 16:27.

Justice. God evritaem duim stret samting. Olketa samting wea hem duim “hem perfect” and hem “evritaem duim samting wea followim justice.”—Deuteronomy 32:4.

Love. Bible sei “God hem love.” (1 John 4:8) Bible no sei God garem love, bat hem sei God hem love. Bigfala love blo hem showaot lo evri samting wea hem duim, and hem helpem iumi lo staka difren wei.

Frenship blo God Witim Olketa Man. God hem Dadi blo iumi lo heven wea lovem iumi. (Matthew 6:9) If iumi garem faith lo hem, iumi savve fren witim hem. (Psalm 25:14) Tru samting nao, God invaetem iu for fren gud witim hem lo prea and for “putim evri wari bilong iufala long hand bilong hem bikos hem tingim iufala.”—1 Peter 5:7; James 4:8.

Wat Nao Difference Between God and Christ?

Jesus Hem No God. Jesus hem spesol bikos hem nomoa only wan wea God seleva creatim. Dastawe Bible sei hem Son blo God. (John 1:14) Afta Jehovah creatim Jesus, hem iusim firstborn Son blo hem olsem “wakaman wea garem skill” for creatim evri samting.—Proverbs 8:30, 31; Colossae 1:15, 16.

No enitaem Jesus Christ sei hem God. Bat hem sei: “Mi man for toktok for [God], and hem nao sendem mi kam.” (John 7:29) Taem hem story lo wanfala disaepol blo hem, Jesus sei Jehovah hem “Dadi bilong mi wea hem Dadi bilong iufala tu” and “God bilong mi wea hem God bilong iufala tu.” (John 20:17) Afta Jesus dae, Jehovah resurrectim hem for laef lo heven and givim hem big paoa and hem sidaon lo raet saed blo Dadi blo hem.—Matthew 28:18; Acts 2:32, 33.

Jesus Christ Savve Helpem Iu for Fren Gud Witim God

Jesus kam lo earth for teachim iumi abaotem Dadi blo hem. Jehovah seleva sei olsem abaotem Jesus: “Disfala man hem Son bilong mi wea mi lovem. Iufala mas herem samting wea hem talem.” (Mark 9:7) Jesus savve gud lo God winim eni narawan. Hem sei: “No eniwan savve gud long Dadi long heven. Son nomoa savve long hem witim olketa narawan tu wea Son hem willing for helpem olketa minim hem.”—Luke 10:22.

Jesus showim olketa wei blo Dadi blo hem lo perfect wei. Jesus showim olketa wei blo Dadi blo hem dastawe hem sei: “Man wea lukim mi hem lukim Dadi tu.” (John 14:9) Jesus helpem pipol for kam lo God taem hem followim example blo Dadi blo hem for showim love lo wat hem talem and duim. Hem sei: “Mi nao road, mi nao truth, and mi nao laef. Mi nomoa road for man go long Dadi long heven.” (John 14:6) Hem sei tu: “Olketa wea worshipim God long stretfala wei bae worshipim hem followim holy spirit and followim samting wea tru. God lukaotem kaen pipol olsem for worshipim hem.” (John 4:23) Imaginim! Jehovah hem lukaotem pipol olsem iu wea laek for savve lo truth abaotem hem.