Hu Nao God?

“GOD hem nem wea pipol givim long samting wea givim evri laef and paoa long universe and wea kasem worship saed long religion,” The Encyclopedia Americana hem talem. Wanfala dictionary givim mining bilong “God” olsem “nambawan tru wan.” So wanem nao disfala nambawan tru wan?

Waswe, God hem wanfala paoa nomoa or hem wanfala really man? Waswe, hem garem nem? Waswe, hem thrifala man insaed wan man, wanfala Trinity, olsem staka bilivim? Hao nao bae iumi savve long God? Bible hem provaedem olketa ansa wea tru and wea mekem man satisfae long olketa kwestin hia. Tru nao, hem encouragem iumi for lukaotem God taem hem sei: “Hem no farawe from iumi wanwan.”—Acts 17:27.

Wanfala Paoa Nomoa or Wanfala Really Man?

Staka wea biliv long God ting long hem olsem wanfala paoa, no olsem wanfala man. Olsem example, long samfala culture, pipol markem olketa difren god followim olketa paoa bilong nature. Samfala wea studyim pruv wea kamaot from olketa science research abaotem universe and wei bilong laef faendemaot hao masbi wanfala samting kosim evriting for laef. Nomata olsem, olketa hol bak for sei disfala samting wea kosim evriting for laef hem wanfala man.

Bat waswe, bigfala savve bilong creation no showimaot hao datfala samting wea kosim evriting for laef mas garem bigfala savve? Savve hem kam from wanfala mind. Datfala nambawan mind wea bihaenem evri creation hem bilong God. Yes, God hem garem wanfala body, no wanfala physical body olsem iumi garem, bat wanfala spiritual body. Bible hem sei: “Sapos physical body hem stap, spiritual body hem stap tu.” (1 Corinthians 15:44) Taem hem explainim God, Bible talem klia: “God hem wanfala Spirit.” (John 4:24) Wanfala spirit garem laef wea difren tumas from laef bilong iumi, and man no savve lukim wanfala spirit. (John 1:18) Olketa narafala spirit stap tu. Olketa nao olketa angel—“olketa son bilong trufala God.”—Job 1:6; 2:1.

From God garem spirit body wea no eniwan creatim, hem stret for sei hem stap long wanfala ples. Abaotem disfala ples bilong olketa spirit, Bible talem iumi hao heven nao “ples wea [God] stap long hem.” (1 Kings 8:43) And tu, man wea raetem Bible, Paul, hem sei: ‘Christ hem go long heven, for standap front long God for iumi.’—Hebrews 9:24.

Bible iusim word “spirit” long nara wei tu. Taem hem prea long God, man wea raetem psalm hem sei: “Sapos iu sendem go spirit bilong iu, iu creatim olketa.” (Psalm 104:30) Disfala spirit hem no God bat hem paoa wea God sendem, or iusim, for duim wanem hem laekem. Thru long spirit nao God creatim physical heven, earth, and evri samting wea laef. (Genesis 1:2; Psalm 33:6) Spirit bilong hem garem nem holy spirit. God iusim holy spirit bilong hem for muvim olketa man for raetem Bible. (2 Peter 1:20, 21) So, holy spirit hem paoa wea man no savve lukim wea God iusim for fulfillim olketa purpose bilong hem.

God Garem Spesol Nem

Man wea raetem Bible, Agur, hem ask: “Hu nao holem wind long tufala hand? Hu nao pasolem wata insaed kaleko? Hu nao mekem full earth for rise ap? Wanem nao nem bilong hem and nem bilong son bilong hem?” (Proverbs 30:4) Hem olsem Agur hem ask, ‘Waswe, iu savve long nem or famili laen bilong eni man wea duim olketa samting hia?’ God nomoa garem paoa for kontrolem paoa bilong nature. Creation hem strongfala pruv hao God hem stap, bat hem no showimaot nem bilong God. Iumi bae no savve long nem bilong God sapos God seleva no talem long iumi. Bat hem talem finis. Creator hem sei: “Mi nao Jehovah. Hem nao nem bilong mi.”—Isaiah 42:8.

Insaed olketa Hebrew Scripture seleva, nem bilong God, Jehovah, hem kamap klosap 7,000 taem. Jesus Christ talemaot and praisem datfala nem front long pipol. (John 17:6, 26) Datfala nem hem stap long lastfala buk bilong Bible insaed toktok “Hallelujah,” wea minim “praisem Jah.” And “Jah” hem short wei for talem “Jehovah.” (Revelation 19:1-6, footnote) Bat, staka Bible bilong distaem no iusim tumas disfala nem. Planti taem olketa raetem “LORD” or “GOD” long kapitol leta for mekem hem difren from olketa nara “Lord” and “God.” Samfala savveman sei maet wei for talem nem bilong God hem Yahweh.

Why nao olketa tingting wea difren tumas olsem kamap abaotem nem bilong nambawan Man bilong universe? Problem hem start planti handred year bifor taem kastom biliv bilong olketa Jew mekem olketa fraet for iusim nem bilong God and start for putim Hebrew word for “Sovereign Lord” long evri ples long Bible wea nem bilong God stap. From Hebrew languis insaed Bible no garem olketa vowel, no eni wei stap for sure hao nao Moses, David, and olketa narawan bifor talem nem bilong God. Bat, pipol bin iusim English wei for talem Jehovah for planti handred year finis, and planti ples garem languis wei for talem nem hia.—Exodus 6:3; Isaiah 26:4, King James Version.

Nomata wei for talem nem bilong God long Hebrew languis bilong bifor hem no mas klia, mining bilong hem no haed. Nem bilong hem garem mining “Hem Mekem Kamap.” Long disfala wei, Jehovah God showim hemseleva olsem Nambawan Man Bilong Purpose. Hem evritaem fulfillim olketa purpose and promis bilong hem. Trufala God nomoa, wea garem paoa for duim diswan, fit for garem nem hia.—Isaiah 55:11.

Tru nao, nem bilong Jehovah separatem Olmaeti God olsem difren from evri nara god. Dastawe disfala nem kamap planti taem insaed Bible. Nomata planti transleison fail for iusim nem bilong God, Psalm 83:18 talem klia: “Iu wea nem bilong iu Jehovah, iu nomoa Most Hae ovarem full earth.” Taem hem duim ministry bilong hem, Jesus Christ teachim olketa follower bilong hem: “Iufala mas prea olsem: ‘Dadi bilong mifala wea stap long heven, letem nem bilong iu kamap holy.’” (Matthew 6:9) So iumi shud iusim nem bilong God taem iumi prea, story abaotem hem, and praisem hem front long pipol.

Waswe, Jesus Hem God?

Jehovah God seleva showimaot klia hu nao Son bilong hem. Gospel bilong Matthew sei bihaen Jesus hem baptaes, “wanfala voice from heven hem sei: ‘Diswan nao Son bilong mi, wea mi lovem, wea mi appruvim.’” (Matthew 3:16, 17) Jesus Christ hem Son bilong God.

Nomata olsem, samfala pipol bilong religion sei Jesus nao God. Samfala moa sei God hem wanfala Trinity. Disfala teaching sei “Father hem God, Son hem God, and Holy Spirit hem God. Nomata olsem, wanfala God nomoa stap and no thrifala.” Olketa bilivim thrifala hia “stap olowe and olketa semsem.” (The Catholic Encyclopedia) Waswe, kaen tingting olsem hem stret?

Abaotem Jehovah, Bible hem sei: “From taem olowe go kasem taem olowe iu nao God.” (Psalm 90:2) Hem nao “King bilong olowe”—no garem start or end. (1 Timothy 1:17) Long narasaed, Jesus hem “firstborn bilong evri creation,” “start bilong creation bilong God.” (Colossians 1:13-15; Revelation 3:14) Jesus hem storyim God olsem Dadi bilong hem, and hem sei moa: “Dadi hem hae winim mi.” (John 14:28) Jesus hem explainim tu hao samfala samting stap wea hem and olketa angel no savve bat God nomoa savve. (Mark 13:32) And tu, Jesus prea long Dadi bilong hem and sei: “No followim will bilong mi, bat followim will bilong iu.” (Luke 22:42) Jesus masbi prea long Wan wea moa hae winim hem. And God nao resurrectim Jesus from dae, Jesus no resurrectim hemseleva.—Acts 2:32.

So, for fitim wanem Bible talem, Jehovah hem God Olmaeti, and Jesus hem Son bilong hem. Tufala nating semsem bifor Jesus kam long earth or long taem hem laef long earth; and bihaen Jesus hem resurrect go long heven, hem nating kamap semsem witim Dadi bilong hem. (1 Corinthians 11:3; 15:28) Olsem iumi lukim finis, wanem pipol tingim olsem mek-thri wan bilong Trinity, datfala holy spirit, hem no wanfala person. Bat, hem paoa wea God iusim for duim wanem hem laekem. So Trinity hem no wanfala Bible teaching.a Bible hem sei: “Jehovah God bilong iumi hem wanfala Jehovah.”—Deuteronomy 6:4.

Savve Gud Long God

For iumi lovem God and givim hem worship wea hem nomoa fit for kasem, iumi need for kasem stretfala savve abaotem hem. Hao nao bae iumi savve gud long God? Bible sei: “Olketa fasin bilong hem wea man no savve lukim, showaot klia start kam long creation bilong world, from olketa showaot long olketa samting wea hem wakem, insaed diswan paoa bilong hem wea olowe and wei wea hem God.” (Romans 1:20) Wanfala wei for savve gud long God hem for lukluk and tinghae long olketa samting wea hem creatim.

Bat, creation no talem iumi evriting iumi need for savve abaotem God. Olsem example, for savve hao hem wanfala really spirit Person wea garem nem, iumi need for luk insaed Bible. For studyim Bible nao hem best wei for savve gud moa long God. Insaed olketa Scripture, Jehovah talem iumi moa samting abaotem wanem kaen God nao hem. Hem showimaot tu olketa purpose bilong hem and teachim iumi olketa wei bilong hem. (Amos 3:7; 2 Timothy 3:16, 17) Iumi hapi tumas bikos God laekem iumi for “kasem stretfala savve bilong truth” mekem iumi savve kasem gud samting from olketa loving samting wea hem provaedem! (1 Timothy 2:4) Iumi shud duim best bilong iumi for kasem moa savve abaotem Jehovah.

[Footnote]

[Piksa long page 5]

God iusim holy spirit bilong hem for creatim earth and for muvim olketa man for raetem Bible

[Piksa long page 5]

Wanfala voice from heven sei: “Diswan nao Son bilong mi”

[Piksa long page 7]

Jesus hem prea long God—Wan wea moa hae winim hem

[Piksa long page 7]

Jesus talemaot nem bilong God long pipol

[Olketa Piksa long page 7]

Iumi fit for savve gud moa long God