Samting wea Bible Talem Abaotem Soul
“Man hem kamap wanfala living soul.”—GENESIS 2:7.
1. Wanem nao iumi need for lukluk gud long hem for luksavvy samting wea Bible teachim abaotem soul?
OLSEM iumi lukim finis, planti different belief stap abaotem soul. Nomata midolwan long pipol wea say belief bilong olketa kam from Bible, olketa garem different idea abaotem wanem nao soul and wanem nao happen long hem taem iumi dae. But wanem nao Bible really teachim abaotem soul? For faendaot, iumi need for lukluk gud long olketa meaning bilong Hebrew and Greek word wea olketa transletem “soul” insaed long Bible.
“Soul” Olsem Wanfala Living Samting
2, 3. (a) Wanem word nao olketa transletem olsem “soul” insaed olketa Hebrew Scripture, and wanem nao meaning bilong disfala word? (b) Hao nao Genesis 2:7 showaot datfala word “soul” meanim wanfala full person?
2 Hebrew word wea olketa transletem olsem “soul” hem neʹphesh, and hem kamap 754 taem insaed long olketa Hebrew Scripture (wea planti kolem Old Testament). Wanem nao neʹphesh hem meanim? Olsem The Dictionary of Bible and Religion talem hem “planti taem meanim datfala full samting wea laef, datfala full man.”
3 For example, Genesis 2:7 say: “Jehovah God hem go ahed for workim man from dust bilong graon and for blowim wind bilong laef go insaed long nose bilong hem, and man hem kamap wanfala living soul.” Lukim hao Adam hem no garem wanfala soul; hem nao wanfala soul—long sem way wea samwan wea kamap wanfala doctor hem wanfala doctor. So, datfala word “soul,” hem meanim datfala full person.
4, 5. (a) Givim olketa example wea showaot datfala word “soul” hem meanim full person. (b) Hao nao The Dictionary of Bible and Religion hem supportim way wea wanfala person hem wanfala soul?
4 Disfala way for meanim samting hem stap insaed long full Hebrew Scripture, wea iumi faendem olketa toktok olsem “sapos wanfala soul hem sin” (Leviticus 5:1), “eni soul wea duim eni kaen work” (Leviticus 23:30), “sapos olketa faendem wanfala man hem stealim wanfala soul” (Deuteronomy 24:7), “soul bilong hem lusim way for patient” (Judges 16:16), “hao long nao bae iufala go ahed for mekem soul bilong mi kros?” (Job 19:2), and “soul bilong mi no sleep from mi sorry tumas.”—Psalm 119:28.
5 No eni samting showaot long olketa scripture hia hao soul hem wanfala samting wea laef bihaen man dae. “For say ‘soul’ bilong dat wan wea iumi love-im hem go for stap withim Lord or for say ‘soul kanduit dae’ hem no samting wea fitim tingting bilong OT [Old Testament],” The Dictionary of Bible and Religion hem talem.
6, 7. Wanem word nao olketa transletem “soul” insaed long olketa Kristian Greek Scripture, and wanem nao meaning bilong datfala word?
6 Datfala word wea olketa transletem olsem “soul” winim wan hundred taem insaed long olketa Kristian Greek Scripture (wea planti kolem Niu Testament) hem psy·kheʹ. Olsem neʹphesh, datfala word planti taem meanim wanfala full person. For example, tingim olketa scripture hia: “Soul bilong mi hem feel nogud.” (John 12:27) “Evri soul start for feel fraet.” (Acts 2:43) “Evri soul mas stap under long olketa hae paoa.” (Romans 13:1) “Tok kaen long olketa soul wea feel sorry.” (1 Thessalonians 5:14) “Fewfala pipol nomoa, hem nao, eitfala soul, stap sef thru long wata.”—1 Peter 3:20.
7 Olsem neʹphesh, datfala word psy·kheʹ hem barava story abaotem full person. Savvyman Nigel Turner say disfala word “meanim man nao, datfala man seleva, datfala physical body wea rûaḥ [spirit] bilong God hem stap insaed. . . . Hem strongim datfala full man.”
8. Waswe, animal hem soul? Meanim diswan.
8 Insaed long Bible datfala word “soul” hem no meanim olketa man nomoa but olketa animal tu. For example, taem hem storyim creation bilong olketa animal long sea, Genesis 1:20 say God komandim: “Letem olketa wata fulap withim olketa living soul.” And long nextfala day bilong creation, God say: “Letem earth garem olketa living soul followim laen bilong olketa, animal bilong man and animal wea muv and wild animal long earth followim laen bilong hem.” (Genesis 1:24; markem Numbers 31:28.) So, “soul” savvy meanim wanfala living samting, nomata hem man or animal.
“Soul” olsem Laef
9. (a) Wanem extra meaning nao datfala word “soul” savvy garem? (b) Waswe, diswan hem no agree withim way wea soul hem datfala person seleva?
9 Samfala taem, datfala word “soul” meanim laef wea wanfala person or animal hem garem. Diswan no changim meaning bilong Bible abaotem soul olsem wanfala person or animal. For example: Iumi say samwan hem laef, wea meanim hem wanfala living person. Iumi maet say tu hao hem garem laef. Long sem way, wanfala living person hem wanfala soul. Nomata olsem, taem hem laef, “soul” hem samting wea hem garem.
10. Givim olketa example wea showaot datfala word “soul” savvy meanim laef wea wanfala person or wanfala animal garem.
10 For example, God talem Moses: “Evri man wea lukaotem soul bilong iu dae finis.” (Exodus 4:19) Yes, olketa enemy bilong Moses lukaotem hem for endim laef bilong hem. Semkaen way for iusim word “soul” hem stap long olketa toktok hia. “Mifala barava fraet tumas for olketa soul bilong mifala.” (Joshua 9:24) “Olketa ranawe for sevem soul bilong olketa.” (2 Kings 7:7) “Man wea raeteous hem lukaftarem soul bilong animal bilong hem.” (Proverbs 12:10) “Son bilong man hem kam . . . for givim soul bilong hem olsem ransom for baem back planti pipol.” (Matthew 20:28) “Hem klosap for dae, putim soul bilong hem long danger.” (Philippians 2:30) Long each scripture, datfala word “soul” meanim “laef.”a
11. Taem Bible iusim word “soul,” wanem nao hem meanim?
11 So datfala word “soul” wea Bible iusim hem meanim wanfala person or wanfala animal or laef wea wanfala person or animal enjoyim. Meaning bilong soul insaed long Bible hem simple, semsem olowe, and no mix olabaot withim olketa idea and tingting bilong man wea no klia. But wanem nao happen long soul taem man dae? For ansarem datfala kwestin, iumi mas firstaem meanim why nao iumi dae.
[Footnote]
a Matthew 10:28 tu iusim word “soul” for meanim “laef.”
[Piksa long page 20]
Evriwan nao olketa soul