Magic and Devildevil Hem Nogud

Satan laekem iu for iusim magic. Planti duim sakrifaes long olketa laen dadi or olketa spirit for protectim olketa seleva from trabol. Olketa duim diswan bikos olketa fraetem paoa bilong spirit world. Olketa werem magic ring or handband. Olketa drinkim or rabem long body “olketa medicine” wea olketa tingse hem garem magic paoa. Insaed haos or long graon, samfala pipol haedem samting wea olketa tingse hem garem paoa for protectim olketa. Olketa narawan iusim magic “medicine” bikos olketa tingse bae hem mekem olketa win saed long bisnis, test long skul, or saed long girlfren and boyfren.

Best samting for protectim iu againstim Satan hem for garem Jehovah olsem fren bilong iu. Jehovah God and olketa angel bilong hem garem staka paoa winim Satan and olketa demon bilong hem. (James 2:19; Revelation 12:9) Jehovah hem barava willing for showim paoa bilong hem for helpem olketa fren bilong hem—olketa wea barava faithful evribit long hem.—2 Chronicles 16:9.

Word bilong God hem sei: “Iufala mas no iusim magic.” Jehovah tok strong againstim magic and devildevil bikos samting olsem savve mekem man for barava stap andanit long paoa bilong Satan datfala Devil.—Leviticus 19:26.