Wanem Nao Iu Savve Abaotem Witchcraft?

WITCHCRAFT! Wanem nao iu tingim taem iu herem disfala word?

For staka pipol, hem kastom story and story bilong pikinini nomoa, man no fit for bilivim. Long pipol olsem, witchcraft hem samting bilong mind nomoa—olketa witch wea werem bigfala blak kaleko and putim wing bilong flying fox insaed big blak pot wea go ahed for boel, olketa tanem pipol for kamap frog, and laflaf long haefala voice taem olketa flae long skae antap brumstik.

For nara pipol, witchcraft hem tru samting. Samfala wea studyim diswan sei winim haf long pipol long world biliv olketa witch really stap and savve affectim laef bilong pipol. Planti million biliv witchcraft hem nogud samting, danger samting, and man shud barava fraetem. Olsem example, wanfala buk abaotem olketa religion long Africa sei: “Wei for biliv long waka and danger bilong nogud magic, paoa from nogud spirit and witchcraft hem barava part long laef bilong Africa . . . Pipol heitim tumas olketa witch and kastom man. Nomata long samfala ples and taem distaem, pipol hitim olketa dae.”

Bat, long olketa rich kantri, witchcraft hem kamap samting wea pipol start for respectim. Olketa buk, television, and movie barava daonem wei for fraetem witchcraft. Man wea studyim hapitaem, David Davis, hem talem: “Seknomoa, olketa witch kamap moa young and luk moa naes, barava moa naes. Olketa wea wakem movie barava savve hao for luksavve long interest bilong pipol. . . . Thru long wei for mekem olketa witch luk moa naes and for pipol laekem, olketa savve pullim moa pipol, wea insaed diswan hem olketa woman and young pikinini.” Olketa wea wakem movie savve hao for tanem eni interest bilong pipol for kamap samting wea mek-selen.

Samfala sei witchcraft hem wanfala spiritual muvment long United States wea grow fast tumas. Evriwea long olketa rich kantri, namba long pipol, wea muvment bilong olketa woman saportim and wea olketa no satisfae witim religion wea stap finis, duim difren kaen witchcraft for satisfae long spiritual wei. Tru nao, from staka difren kaen witchcraft stap, pipol no agree tu long mining bilong word “witch.” Nomata olsem, olketa wea kolem olketa seleva witch sei olketa followim Wicca—wea wanfala dictionary minim olsem “wanfala heathen religion wea start long western Europe bifor olketa Christian Church kasem there and wea olketa startim moa long mek-20 century.”a From diswan, planti kolem olketa seleva heathen or man wea worshipim heathen god moa.

Insaed full history, pipol heitim, persecutim, whipim, and killim dae tu olketa witch. So iumi no sapraes hao olketa witch distaem wantem tumas for mekem pipol acceptim olketa. Long wanfala survey, olketa askem planti witch wanem message nao olketa laek talem long pablik. Ansa bilong olketa, wea woman wea duim study Margot Adler kasem, hem: “Mifala no nogud pipol. Mifala no worshipim Devil. Mifala no spoelem or switim pipol. Mifala no mekem eni danger kamap. Mifala man nomoa olsem iufala. Mifala garem famili, waka, hope, and goal. Mifala no wanfala cult. Mifala no difren. . . . Iu no need for fraetem mifala. . . . Mifala olsem iu winim wanem iu tingim.”

Pipol go ahed for acceptim disfala message. Bat waswe, diswan minim no eni reason stap for wari abaotem witchcraft? Letem iumi storyim disfala kwestin long nextfala article.

[Footnote]