Wanem Iu Shud Savve Abaotem Witchcraft

HEM hard for minim witchcraft bilong distaem. Diswan hem bikos olketa wea duim nating semsem. Olketa no luk go long eni rul or teaching or holy buk for wan mind long biliv. Olketa no followim sem kastom, organization, and tingting long saed long wanem god for honorim. Wanfala man for raet hem sei: “Occult world hem givim man wanwan wanfala ‘free market’ bilong olketa idea.” Narawan sei: “Staka pipol wea worshipim heathen god no agree long klosap evri samting.”

For staka pipol, wei wea olketa no wan mind hem no wanfala problem. Wanfala buk for olketa wea laek kamap witch hem sei: “Taem iu feisim olketa idea wea luk olsem olketa opposite, lukluk gud long datfala information and disaed which wan for followim. Lisin long mind bilong iu. Hem minim, feel free for pikim and chusim wanem wei for followim and wanem buk for disaedem samting wea feel olsem hem stret.”

For pipol wea luksavve long wei bilong truth, kaen opposite idea olsem hem wanfala problem. Truth hem samting wea tru, samting wea really happen. No eni samting hem tru from man feel or hope or biliv hem tru. Olsem example, wantaem olketa doctor biliv olketa savve healim pneumonia sapos olketa hafem laef kokorako and leim olketa pis bilong hem antap long chest bilong sikman. Iumi no daotem hao staka sikman barava biliv datfala treatment bae healim olketa. Bat biliv and hope bilong olketa no stret witim tru samting—kaen treatment olsem no healim pneumonia. Pipol no wakem truth; olketa trae for minim.

Bible hem sei hem garem truth abaotem olketa spiritual samting. Taem hem stap long earth, Jesus Christ prea long Dadi bilong hem olsem: “Word bilong iu nao truth.” (John 17:17) Aposol Paul hem raet: “Evri Scripture kam from God.” (2 Timothy 3:16) Staka wea duim witchcraft no agree. Olketa aftarem ansa and gaedens from kastom story, olketa religion from bifor kam, and olketa mekap idea saed long science tu. Bat waswe, hem no fitim for ting long wanem Bible talem? Tingim, hem wanfala buk wea pipol evriwea luk long hem olsem holy buk. Hem wanfala long olketa buk from bifor kam wea stap kam kasem iumi distaem. Olketa raetem Bible insaed 1,600 year, bat evri teaching bilong hem wan mind. Letem iumi markem olketa Bible teaching witim samfala biliv wea olketa wea duim witchcraft mekhae long hem.

Hu Nao Stap Long Ples Bilong Olketa Spirit?

Wanfala main kwestin long wei for aftarem spiritual savve hem, Hu nao stap long ples bilong olketa spirit? Nomata staka witch distaem putim faith long nature and planti god, samfala worshipim wanfala main woman god wea olketa luk long hem olsem young girl, mami, and olo woman, for piksarem olketa main part bilong laef. Wanfala god wea garem horn nao hem lovem. Samfala nara witch worshipim wanfala man god and woman god tugeta. Wanfala man for raet hem sei: “Datfala Woman God and Man God olketa minim olsem wei for showimaot woman and man paoa bilong nature. Evri wan [garem] olketa spesol fasin wea waka gud tugeta for wakem laef.” Nara man for raet hem sei: “Wanfala barava important samting for chusim long Witchcraft hem olketa god bilong iu (Olketa Man God/Woman God) wea iu bae waka witim. . . . Disfala Religion givim iu freedom for chusim and honorim God bilong iuseleva.”

Bible hem no saportim eni idea hia. Jesus Christ iusim full ministry bilong hem for teachim pipol abaotem Jehovah, datfala “only trufala God.” (John 17:3) Bible hem sei: “Jehovah hem nambawan and barava fit for kasem praise. And hem nao man shud fraet long hem winim evri nara god. From evri god bilong pipol olketa iusles god.”—1 Chronicles 16:25, 26.

Waswe Devil? Webster’s Ninth New Collegiate Dictionary hem minim witchcraft olsem “wei for story witim devil.” Hem hard for faendem wanfala witch distaem wea bae agree witim disfala mining, bikos staka no acceptim tu wei wea Devil Satan hem stap. Wanfala young woman wea The Irish Times sei hem witch wea garem “hae position and leader bilong wanfala main sekson bilong olketa witch long Ireland,” hem minim olsem: “Wei for biliv long Devil hem showimaot man acceptim Christian Wei . . . [Datfala Devil] kanduit stap long universe sapos no eni God stap.”

Bible showimaot Devil hem really stap and hem nao kosim staka wei for safa and trabol bilong earth. (Revelation 12:12) Jesus hem no just teachim wei wea Devil hem really stap bat hem showimaot tu hao man savve duim samting Devil laekem wea hem no min for duim. Olsem example, olketa leader bilong religion wea tingse olketa raeteous, sei olketa olsem son bilong God and biliv olketa duim will bilong God. Bat Jesus, wea luksavve wanem nao insaed heart bilong olketa, nating agree. Hem talem olketa stret: “Iufala kam from dadi bilong iufala datfala Devil, and iufala laek duim samting wea dadi bilong iufala laekem.” (John 8:44) And tu, Bible buk bilong Revelation sei Devil hem “giamanim olketa man long earth.”—Revelation 12:9.

Waswe, Samfala Magic Hem Gud?

Magic hem evritaem join witim occult.a Planti pipol bifor and distaem tu biliv magic bilong olketa witch hem for spoelem pipol. Olketa sei olketa witch garem paoa for givim bigfala pain and dae tu thru long magic. From bifor kam, olketa witch kasem blame for staka nogud samting wea happen, wea insaed diswan hem sik, dae, and taem kaikai no grow gud.

Olketa witch bilong distaem strong for denyim diswan. Nomata olketa agree tu-thri nogud witch laek for duim wicked samting, staka witch sei magic bilong olketa hem for helpem pipol, no for spoelem olketa. Olketa wea duim witchcraft teachim hao samting wea kamaot from magic bae kam bak long man wea duim diswan and bae thri taem moa strong, wea diswan stopem wei for putim curse. Samfala example bilong wanem olketa kolem gudfala magic hem olketa spell for protectim iuseleva, for klinim haos from nogud spirit wea olketa wea stap long hem bifor lusim bihaen, for mekem man lovem iu, for healim and mekem man healthy, for mekem man no lusim waka for selen, and for kasem selen. From pipol herem wei wea witchcraft garem paoa olsem, iumi no sapraes staka interest tumas long hem.

Bat, long Bible, gud magic and nogud magic semsem nomoa. Long Law wea Moses kasem, God talem klia tingting bilong hem. Hem sei: “Iufala mas no iusim magic.” (Leviticus 19:26) Iumi readim tu: “No eniwan mas stap midolwan long iufala wea . . . man wea iusim magic or eniwan wea lukaotem saen or iusim demon paoa, or man wea iusim kastom long pipol or eniwan wea go lukim man wea tok long olketa spirit.”—Deuteronomy 18:10, 11.

Why nao God talem diswan? Hem no from hem holem bak gud samting from iumi. Jehovah givim olketa law hia long pipol bilong hem bikos hem lovem olketa and no wantem olketa for kamap slave long fraet and spiritism. Bat, hem invaetem olketa servant bilong hem for askem hem for need bilong olketa. Hem nao Man Wea Givim “evri gudfala present and evri perfect present.” (James 1:17) Aposol John promisim olketa wea biliv: “Eni samting wea iumi askem iumi kasem from [God], bikos iumi obeyim olketa komandment bilong hem and duim olketa samting wea hem hapi long hem.”—1 John 3:22.

Waswe Olketa Nogud Spirit?

Staka witch agree witim Bible long disfala samting: Olketa wicked spirit stap. Long wanfala raeting, wanfala wea saportim witchcraft givim warning: “Olketa samting wea haed stap: Olketa stap, long world wea iumi no lukim wea semsem olsem bilong iumi, olketa living samting. . . . Toktok olsem ‘Wicked Spirit’ and ‘Demon’ klosap fitim olketa. Olketa strong tumas. . . . Olketa wea garem bigfala savve . . . fit for (sapos samwan helpem olketa thru long wei for openem wei for olketa) kam long world bilong iumi. . . . Olketa savve go insaed body bilong iu . . . , and kontrolem iu tu. Tru nao, diswan hem barava olsem olketa story from bifor abaotem wei wea Demon go insaed man.”

Long taem bilong Bible, pipol safa long difren wei taem demon go insaed olketa. Samfala wea kasem diswan lusim wei for tok, samfala kamap blind, mentol, and samfala kasem spesol strong wea barava winim man. (Matthew 9:32; 12:22; 17:15, 18; Mark 5:2-5; Luke 8:29; 9:42; 11:14; Acts 19:16) Samfala taem diswan moa worse taem staka demon wantaem go insaed man. (Luke 8:2, 30) So, gudfala reason stap why Jehovah hem warnim pipol bilong hem for stap klia from witchcraft and olketa nara samting wea join witim spiritism.

Religion wea Followim Truth

Witchcraft hem pullim staka distaem bikos hem luk olsem wanfala religion wea no spoelem eniwan, no ova tumas, and hem join witim nature. Long samfala ples, pipol acceptim nao. Pipol no fraetem. Planti taem olketa ting nating long hem. Long taem wea wei for acceptim difren religion mekem pipol acceptim nomata olketa religion wea ova tumas, witchcraft kamap samting wea kasem respect.

Tru tumas, world bilong religion kamap market wea pipol free for chusim wanem religion fitim need bilong olketa, wea olsem taem man baem shoe. Long narasaed, Jesus storyim hao tufala wei nomoa stap wea man savve chus from. Hem sei: “Go insaed long smolfala gate; bikos road wea lead go long dae hem big tumas and waed, and planti pipol nao go insaed long hem; bat gate hem smol and road hem taet wea lead go long laef, and samfala nomoa faendem.” (Matthew 7:13, 14) So hem fitim for iumi free for chusim wanem wei nao for followim. Bat bikos laef bilong iumi for olowe insaed diswan, disfala wei for chus hem barava important. For kasem spiritual laet, iumi mas aftarem wei bilong truth—datfala wei hem stap nomoa insaed Word bilong God, Bible.

[Footnote]

[Piksa long page 5]

Staka distaem tingim witchcraft olsem religion bilong nature wea no spoelem man

[Piksa long page 6]

Magic evritaem join witim occult

[Piksa long page 6]

Olketa wea duim witchcraft no savve olketa duim will bilong Devil?

[Piksa long page 7]

Bible showimaot wei bilong truth