For Keepim Wanfala Fren, Iu Mas Kamap Wanfala Fren

Wei for fren hem kamaot from love. Sapos iu lanem moa samting abaotem Jehovah, love bilong iu for hem bae kamap moa big. Taem love bilong iu for God hem grow, feeling bilong iu for servem hem bae grow tu. Diswan bae muvim iu for kamap disaepol bilong Jesus Christ. (Matthew 28:19) Taem iu joinim hapi famili bilong olketa Jehovah’s Witness, iu bae enjoyim wei for fren witim God for olowe. Wanem nao iu mas duim?

Iu mas showim love bilong iu for God taem iu obeyim olketa law bilong hem. “Diswan nao mining bilong love bilong God, for iumi obeyim evri komandment bilong hem; and olketa komandment bilong hem no hevi.”—1 John 5:3.

Followim wanem iu lanem. Jesus hem talem wanfala story wea showimaot diswan. Wanfala wise man buildim haos bilong hem antap long bigfala stone. Wanfala krangge man buildim haos bilong hem long sandbis. Taem bigfala rain kam, haos wea antap long bigfala stone nating foldaon, bat datfala haos long sandbis barava nogud evribit. Jesus talem hao olketa wea herem teaching bilong hem and followim, olketa olsem wise man wea build antap long bigfala stone. Bat olketa wea lisin long teaching bilong hem and no followim, olketa olsem datfala krangge man wea build long sandbis. Iu laek for olsem which man?—Matthew 7:24-27.

Dedicate. Diswan minim for iu story long Jehovah insaed long prea and talem hem iu laek for duim will bilong hem for olowe. Taem iu duim will bilong God, iu showimaot iu wanfala disaepol bilong Jesus Christ.—Matthew 11:29.

Baptaes. “Baptaes and wasimaot sin bilong iu thru long wei for kol long nem bilong hem.”—Acts 22:16.

Mas barava servem God. “Nomata wanem iufala duim, duim witim full soul for Jehovah, and no for man.”—Colossians 3:23.