Hao Jehovah Leadim Iumi
“Leadim mi long road bilong stretfala fasin.”—PSALM 27:11.
1, 2. (a) Hao nao Jehovah leadim pipol bilong hem distaem? (b) Wanem nao insaed wei for mekius evribit long olketa meeting?
JEHOVAH hem Source bilong laet and truth, olsem iumi lanem long article bifor diswan. Word bilong hem laetem wei bilong iumi taem iumi gogo long road bilong stretfala fasin. Jehovah leadim iumi taem hem teachim iumi long olketa wei bilong hem. (Psalm 119:105) Olsem man wea raetem psalm bifor, iumi willing for followim olketa wei wea God leadim iumi and prea olsem: “Teachim mi, O Jehovah, long wei bilong iu, and leadim mi long road bilong stretfala fasin.”—Psalm 27:11.
2 Wanfala wei wea Jehovah provaedem instruction distaem hem thru long olketa Christian meeting. Waswe, iumi mekius evribit long disfala loving arrangement taem iumi (1) evritaem attend, (2) lisin gud long program, and (3) tekpart long olketa chance wea audience savve ansa? And tu, waswe, iumi kwiktaem and hapi for followim taem iumi kasem olketa idea wea bae helpem iumi for stap “long road bilong stretfala fasin”?
Hao Nao Wei wea Iu Attendim Meeting?
3. Hao nao wanfala full-taem servant mekem grow gudfala fasin for evritaem attendim olketa meeting?
3 Samfala Kingdom pablisa attendim olketa meeting start kam from taem olketa smol yet. “Taem mi growap witim olketa sista bilong mi long olketa year bilong 1930,” wanfala full-taem minister bilong olketa Jehovah’s Witness talem, “mifala no need for askem dadi and mami sapos mifala bae go long meeting or nomoa. Mifala savve mifala bae go sapos mifala no sik. Famili bilong mifala no savve missim olketa meeting.” Olsem woman profet Anna, disfala sista hem “nating savve miss” from ples for worshipim Jehovah.—Luke 2:36, 37.
4-6. (a) Why nao samfala Kingdom pablisa missim olketa meeting? (b) Why nao hem barava important for attendim olketa meeting?
4 Waswe, iu midolwan long olketa wea evritaem attendim olketa Christian meeting, or iu go samtaem nomoa? Samfala Christian wea ting olketa go ahed gud disaed for mek sure long diswan. For tu-thri week, olketa raetem daon evri meeting wea olketa attendim. Taem olketa reviewim record long end bilong datfala taem, olketa sapraes for lukim haomas meeting olketa missim.
5 ‘Iumi no sapraes,’ samwan maet sei. ‘Pipol garem staka hevi distaem dastawe hem no isi for olketa evritaem go long olketa meeting.’ Hem barava tru hao iumi stap long olketa hard taem. And tu, hevi hia bae kamap moa big. (2 Timothy 3:13) Bat waswe, datwan no mekem wei for attendim olketa meeting hem moa important? Sapos iumi no evritaem kaikaim spiritual kaikai for strongim iumi, bae iumi kanduit stand strong againstim hevi wea kam from disfala system. Tru nao, sapos iumi no evritaem kaban tugeta maet samting pullim iumi for lusim “road bilong olketa raeteous wan”! (Proverbs 4:18) Hem tru, taem iumi kasem haos long end bilong busy day, maet iumi no evritaem garem feeling for attendim wanfala meeting. Bat, taem iumi attend, nomata iumi taed, iumi kasem gudfala samting, and iumi encouragem olketa narafala Christian long Kingdom Hall.
6 Hebrews 10:25 talem narafala important reason why iumi mas attendim olketa meeting evritaem. Long there aposol Paul encouragem olketa Christian for hipap tugeta ‘long bigfala wei moa taem olketa lukim datfala day hem kam klosap.’ Tru nao, iumi mas nating forgetim wei wea “day bilong Jehovah” hem klosap tumas. (2 Peter 3:12) Sapos iumi tingse end bilong disfala system hem farawe tumas, iumi maet start for letem samting bilong iumiseleva for changem important spiritual samting, olsem for attendim olketa meeting. Then, olsem Jesus givim warning, ‘seknomoa datfala day bae kasem iumi kwiktaem.’—Luke 21:34.
Kamap Man wea Lisin Gud
7. Why nao hem important for olketa pikinini lisin gud long olketa meeting?
7 Hem no inaf for attendim olketa meeting nomoa. Iumi mas lisin gud, ting strong long wanem iumi herem. (Proverbs 7:24) Olketa pikinini tu mas duim diswan. Taem pikinini go long skul, hem mas lisin gud long teacher, nomata sapos hem no interest tumas long wanfala subject or maet hem no minim evribit. Teacher savve hao sapos pikinini hia trae for lisin gud, bae hem kasem samfala gud samting from datfala leson. So waswe, hem fitim tu for olketa pikinini wea go long skul for lisin long instruction wea kamaot long olketa kongregeson meeting and dadi and mami no letem olketa for sleep long taem bilong meeting? Hem tru, samfala nambawan truth wea stap insaed long Bible “hem hard for minim.” (2 Peter 3:16) Bat iumi mas no ting smol long wei wea pikinini savve lanem samting. God no garem tingting olsem. Long taem bilong Bible, God komandim olketa young servant bilong hem for ‘lisin and lane and fraet long Jehovah and lukaot gud for followim olketa toktok bilong disfala law,’ wea samfala hard for pikinini minim. (Deuteronomy 31:12; markem Leviticus 18:1-30.) Waswe, Jehovah askem sem samting distaem from olketa pikinini?
8. Wanem nao samfala dadi and mami duim for helpem pikinini lisin gud long olketa meeting?
8 Christian dadi and mami luksavve olketa pikinini kasem samfala spiritual kaikai wea olketa needim from olketa meeting. So, samfala dadi and mami arrangem for pikinini mas sleep bifor olketa meeting mekem olketa savve wekap and redy for lane taem olketa kasem Kingdom Hall. Samfala dadi and mami stopem pikinini for lukluk long TV long naet bilong meeting. (Ephesians 5:15, 16) And dadi and mami olsem katdaon long samting wea savve pullim tingting awe from meeting bat helpem pikinini for lisin and lane, fitim age and savve bilong olketa.—Proverbs 8:32.
9. Wanem nao savve helpem iumi for mekem grow wei for lisin?
9 Jesus hem story long olketa wea full-grown taem hem sei: “Ting strong long hao iufala lisin.” (Luke 8:18) Long distaem, datwan hem isi for talem bat hard for duim. Tru, wei for lisin and minim samting hem hard waka, bat man savve mekem grow wei for lisin. Taem iu lisin long wanfala Bible tok or wanfala meeting part, trae for luksavve long olketa main idea. Trae tingim wanem nao next samting wea speaker bae talem. Lukaotem olketa point wea iu savve iusim long ministry bilong iu or followim insaed laef bilong iu. Reviewim olketa point insaed mind bilong iu. Raetem olketa short note.
10, 11. Hao nao samfala dadi and mami helpem pikinini for lisin gud, and wanem wei nao iu faendem hem helpem iu?
10 Best taem for lanem wei for lisin gud hem taem man smol yet. Nomata bifor pikinini lane for read and raet, samfala dadi and mami encouragem olketa wea no skul yet for raetem “note” long taem bilong olketa meeting. Pikinini savve putim wanfala mark long pis pepa taem olketa herem word olsem “Jehovah,” “Jesus,” or “Kingdom.” Long wei olsem, olketa pikinini savve lane for lisin gud long tok wea kam from platform.
11 Samfala taem olketa pikinini wea moa big tu needim encouragement for lisin gud. From hem lukim mind bilong son bilong hem wea 11 year hem go wakabaot long taem bilong wanfala Christian convention, wanfala famili hed givim Bible long boy hia and askem hem for faendem evri scripture wea olketa speaker talem. Datfala dadi, wea raetem note, lukluk witim hem taem son bilong hem holem Bible. Bihaen, datfala boy hapi and lisin gud long convention program.
Letem Voice Bilong Iu Here Laod
12, 13. Why nao hem important for join insaed singsing long kongregeson?
12 King David sing olsem: “Mi bae march raonem altar bilong iu, O Jehovah. For mekem wei for givim thankiu hem here laod.” (Psalm 26:6, 7) Meeting bilong olketa Jehovah’s Witness hem nambawan chance for iumi talemaot laod faith bilong iumi. Wanfala wei iumi savve duim diswan hem for share for sing witim kongregeson. Diswan hem wanfala important part long worship bilong iumi, bat hem isi for no tingim diswan.
13 Samfala pikinini wea no savve read yet savve baeheartim toktok bilong olketa Kingdom song wea iumi singim long olketa meeting evri week. Olketa barava hapi tumas for sing witim olketa big wan. Bat, taem olketa kamap moa big, maet olketa no willing tumas for singim olketa Kingdom song. Samfala big wan tu feel shame for singsing long olketa meeting. Nomata olsem, singsing hem part long worship bilong iumi, olsem field ministry tu hem part long worship bilong iumi. (Ephesians 5:19) Iumi duim best bilong iumi for praisem Jehovah long field ministry. Waswe, fitim iumi for givim glory long hem tu taem iumi apim voice bilong iumi—nomata hem heregud or nomoa—long singsing bilong praise wea kam from heart?—Hebrews 13:15.
14. Why nao olketa samting for studyim long olketa meeting needim iumi for prepare gud firstaem?
14 Iumi laek tu for praisem God taem iumi givim ansa for buildimap narawan long olketa part bilong meeting wea audience savve tekpart. Diswan minim man mas prepare. Hem needim taem for ting raonem olketa deep part long Word bilong God. Aposol Paul, wea strong for studyim Bible, luksavve long diswan. Hem raet olsem: “O hao deep nao riches and wisdom and savve bilong God!” (Romans 11:33) Olketa famili hed, iu mas helpem evri member long famili bilong iu for luk insaed long wisdom bilong God, wea stap insaed Bible. Markem taem long famili Bible study for minim olketa hard point and helpem famili bilong iu for prepare for olketa meeting.
15. Wanem nao samfala idea wea maet helpem man for givim ansa long olketa meeting?
15 Sapos iu laek for givim moa ansa long olketa meeting, hem gud sapos iu preparem firstaem wanem iu laek for talem. Iu no need for talem eni big toktok. Wei for readim klia wanfala Bible scripture or tu-thri toktok wea man talem from heart, hem samting wea evriwan tinghae long hem. Samfala pablisa askem conductor for markem first koment long paragraf wea olketa chusim for givim ansa, mekem olketa bae no missim chance for talemaot faith bilong olketa.
Man wea No Garem Savve Hem Kamap Wise
16, 17. Wanem kaonsel nao wanfala elder givim long wanfala ministerial servant, and why nao hem kasem gud samting?
16 Long olketa meeting bilong Olketa Witness Bilong Jehovah, planti taem iumi kasem reminder for readim Word bilong God evriday. Iumi bae kasem bak strong sapos iumi duim olsem. Hem helpem iumi tu for disaedem samting long wise wei, stretem samfala fasin wea no mas gud, stand strong long olketa test, and kasem bak spiritual balance sapos iumi mekem mistek.—Psalm 19:7.
17 Olketa kongregeson elder wea garem savve stanbae for givim Bible kaonsel wea fitim olketa need bilong iumi. For “pullim datwan kamap” iumi need for ask nomoa for Bible kaonsel. (Proverbs 20:5) Wanday wanfala young ministerial servant askem wanfala elder for olketa idea long hao for help moa insaed kongregeson. Datfala elder, wea savve gud long datfala young man, openem Bible bilong hem go long 1 Timothy 3:3, wea sei olketa man wea kasem waka bilong overseer mas “balance.” Hem showimaot samfala wei wea datfala young man savve balance long hao hem fren witim olketa narawan. Waswe, datfala young brata feel nogud from honest kaonsel hia wea hem kasem? Nomoa nao! Hem sei: “Datfala elder iusim Bible, so mi luksavve kaonsel hem kam from Jehovah.” Datfala ministerial servant followim datfala kaonsel and go ahed for muv ahed gud.
18. (a) Wanem nao helpem wanfala young Christian for stand strong long test long skul? (b) Wanem Bible scripture nao iu savve tingim taem iu feisim test?
18 Word bilong God savve helpem young pipol for “ranawe from olketa samting wea young pipol wantem.” (2 Timothy 2:22) Wanfala young Witness bilong Jehovah wea just finis long secondary skul hem fit for stand strong long test taem hem skul from hem ting raonem and followim samfala Bible scripture. Planti taem hem tingim kaonsel long Proverbs 13:20: “Man wea wakabaot witim wisefala pipol bae kamap wise.” So, hem lukaot gud long wei for fren nomoa witim olketa wea barava respectim olketa Bible principle. Hem sei olsem: “Mi no moabeta winim eniwan. Sapos mi kaban witim rong sekson, bae mi laek for mekem olketa fren bilong mi hapi, and datwan savve lead go for trabol.” Kaonsel bilong Paul long 2 Timothy 1:8 helpem hem tu. Hem sei olsem: “Iu no shame for witness abaotem Lord bilong iumi, . . . bat . . . acceptim part bilong iu for safa for talemaot gud nius.” For fitim datfala kaonsel, hem no fraet for talemaot wanem hem bilivim from Bible witim olketa classmate bilong hem long evri chance. Taem hem kasem assignment for givim wanfala tok long class, hem chusim wanfala subject wea hem savve givim gudfala witness abaotem Kingdom bilong God.
19. Why nao wanfala young man no savve stand strong againstim olketa hevi bilong disfala world, bat wanem nao givim hem spiritual strong?
19 Sapos iumi go difren lelebet from “road bilong olketa raeteous wan,” Word bilong God savve helpem iumi for stretem gogo bilong iumi. (Proverbs 4:18) Wanfala young man wea stap long Africa hem barava faendemaot diswan. Taem wanfala Witness Bilong Jehovah visitim hem, hem acceptim wanfala Bible study. Hem hapi long samting wea hem lanem bat no longtaem bihaen hem kaban witim olketa nogud pikinini long skul. Gogo, hem garem living wea fulap witim dirty fasin. Hem sei: “Conscience bilong mi pokem mi, and mi no go ahed attendim olketa meeting nao.” Bihaen, hem start for attendim moa olketa meeting. Hem sei olsem: “Mi faendemaot main samting wea kosim diswan hem bikos mi hangre long spiritual wei. Mi no study seleva. Dastawe mi no savve stand strong againstim test. Then mi start for readim Wastaoa and Wekap! Gogo, mi start for kasem bak spiritual strong bilong mi and klinim laef bilong mi. Datwan hem gudfala witness long pipol wea luksavve long wei wea mi change. Mi baptaes, and distaem mi hapi.” Wanem nao mekem disfala young man strong for winim olketa wik point bilong hem? Hem kasem bak spiritual strong taem hem evritaem studyim Bible.
20. Hao nao wanfala young wan savve stand strong againstim olketa attak bilong Satan?
20 Olketa young Christian, iufala anda attak distaem! Sapos iufala laek for stand strong againstim olketa attak bilong Satan, iufala mas evritaem kaikaim spiritual kaikai. Man wea raetem psalm, wea hem young tu, minim diswan. Hem sei thankiu long Jehovah for provaedem Word bilong hem, mekem ‘young man savve stretem road bilong hem.’—Psalm 119:9.
Eniwea God Hem Leadim Iumi, Bae Iumi Followim
21, 22. Why nao iumi mas no sei wei bilong truth hem hard tumas?
21 Jehovah leadim nation bilong Israel for go aot from Egypt and go insaed long Promis Land. Road wea hem chusim maet luk olsem hard tumas long tingting bilong man. Jehovah no tekem olketa long road wea moa isi, wea stret nomoa followim Mediterranean Sea, bat, hem leadim pipol bilong hem insaed long hardfala desert road. Bat, diswan hem kaeness long saed bilong God. Nomata hem moa short, road wea followim sea minim olketa Israelite bae go thru long land bilong olketa enemy Philistine. From hem chusim narafala road, Jehovah sevem pipol bilong hem from wei for feisim olketa Philistine.
22 Olsem tu, road wea Jehovah leadim iumi long hem distaem maet luk olsem hard tumas samfala taem. Evri week, iumi garem full schedule bilong olketa Christian waka, insaed diswan olketa kongregeson meeting, study seleva, and field service. Olketa narafala road nao maet luk moa isi. Bat only sapos iumi followim lead from God bae iumi kasem ples wea iumi waka hard tumas for kasem. So, letem iumi go ahed for kasem important instruction from Jehovah and stap long “road bilong stretfala fasin” for olowe!—Psalm 27:11.
Waswe, Iu Savve Minim?
• Why nao iumi barava need for evritaem attendim olketa Christian meeting?
• Wanem nao dadi and mami savve duim for helpem pikinini lisin gud long olketa meeting?
• Wanem nao insaed long wei for kamap man wea lisin gud?
• Wanem nao savve helpem iumi for givim ansa long olketa meeting?
[Piksa long page 16]
For attendim olketa Christian meeting helpem iumi for tingim evritaem day bilong Jehovah
[Piksa long page 18]
Olketa difren wei stap for praisem Jehovah long olketa Christian meeting