Arrangem Information Followim Order wea Fitim

BIFOR iu savve redyim information long gudfala wei, iu need for tingim goal bilong iu. Waswe, goal bilong iu hem for givim nomoa information abaotem wanfala subject long narafala pipol—wanfala biliv, wei for tingting, wanfala fasin, wei for duim samting, or wankaen living? Waswe, iu laek for pruvim hao wanfala idea hem stret or no stret? Waswe, iu laek for buildimap fasin for tinghae long samting or muvim man for duim samting? Nomata sapos iu bae storyim datfala information long man wanwan or long wanfala audience wea moa big, for kasem goal bilong iu, iu need for tingim wanem nao audience savve finis long hem and hao nao tingting bilong olketa long datwan. Bihaen iu duim diswan, arrangem information bilong iu long wei wea bae helpem iu for kasem goal bilong iu.

Abaotem ministry bilong Saul (Paul) long Damascus, Acts 9:22 talem hao hem “mekem olketa Jew wea stap long Damascus sapraes fogud taem hem pruvim long kliafala wei hao diswan nao hem Christ.” Wanem nao insaed datfala kliafala pruv? Olsem record abaotem ministry bilong Paul bihaen long Antioch and Thessalonica showimaot, firstaem hem iusim olsem faondeson wei wea olketa Jew acceptim olketa Hebrew Scripture and wei wea olketa bilivim wanem nao olketa scripture hia talem abaotem Messiah. Then, Paul chusim samfala sekson bilong Scripture hia wea storyim laef and ministry bilong Messiah. Hem talem toktok from olketa scripture hia and markem olketa witim samting wea really happen saed long Jesus. Long end, hem talem stret hao Jesus nao datfala Christ, or Messiah. (Acts 13:16-41; 17:2, 3) Sapos iu tu storyim truth bilong Bible long wei wea followim order, hem savve muvim pipol.

Organizem Wei for Storyim Information. Planti difren gudfala wei stap for arrangem information followim order. Sapos hem helpem iu, iu savve iusim samfala difren idea tugeta. Tingim samfala difren wei wea iu savve iusim.

Arrangem followim olketa subject. Diswan minim for putim information bilong iu long olketa sekson, wea each wan helpem iu kasem goal bilong iu. Olketa sekson hia maet olketa main point wea important for minim subject bilong iu. Olketa hia maet olketa kliafala point wea pruvim wei wea samting hem stret or no stret. Long wei wea depend long audience or goal bilong iu, iu savve iusim or aotem samfala point, nomata olketa join witim datfala subject.

Tingim wanfala example bilong wei for arrangem samting followim subject. Wanfala shortfala tok abaotem nem bilong God maet storyim (1) why nao hem important for savve long nem bilong God, (2) wanem nao nem bilong God, and (3) wei wea iumi savve honorim datfala nem.

Iumi savve lanem planti samting abaotem wei for arrangem information followim subject sapos iumi lukluk gud long olketa pablikeson wea “faithful and wise slave” wakem for iumi iusim long olketa hom Bible study. (Matt. 24:45) Planti taem olketa pablikeson hia garem olketa subject wea savve helpem olketa student for savve long olketa main truth bilong Bible. Olketa pablikeson wea moa big iusim olketa subheding for divaedem each chapter. Evri subject redyim student for information wea bae kamap bihaen and hem saportim main theme.

Samting wea kosim and samting wea kamaot from datwan. Narafala gudfala wei for storyim information hem for storyim samting wea kosim samting and samting wea kamaot from datwan.

Disfala wei maet barava help sapos iu story long wanfala grup or samfala wanwan wea need for tingting gud long samting wea bae kamaot from samting wea olketa duim, or plan for duim. Proverbs chapter 7 givim nambawan example long diswan. Hem storyim long kliafala toktok hao wanfala young man wea “short long heart” (samting wea kosim) hem go witim wanfala jury woman and barava safa (samting wea kamaot from datwan).—Prov. 7:7.

For strongim point, iu savve markem olketa nogud samting wea kasem olketa wea no wakabaot long wei bilong Jehovah witim olketa gud samting wea olketa wea lisin long Jehovah kasem. From spirit bilong Jehovah muvim hem, Moses hem duim diswan taem hem story long nation bilong Israel bifor olketa go insaed long Promis Land.—Deut., chap. 28.

Samfala taem, hem moabeta for startim story bilong iu long wei for talem wanfala problem (samting wea kamaot) and then givim pruv wea showimaot wanem nao mekem datwan kamap (samting wea kosim). Planti taem diswan minim iu givim tok long wei for storyim problem-and-ansa.

Problem and ansa. Long field ministry, taem iu storyim wanfala problem wea pipol wari long hem and iu showim hao wanfala ansa stap wea mekem man satisfae, maet diswan encouragem wanfala man for lisin. Maet hem problem wea iu nao storyim firstaem or maet hem problem wea haosholder askem.

Datfala problem maet wei wea pipol kamap olo and dae, wei wea criminal fasin hem big tumas, or hao wei for no followim justice hem long evri ples. Iu no need for storyim staka samting for pruvim problem olsem hem stap, from hem showaot klia. Talem datfala problem nomoa and then givim ansa wea stap long Bible.

Long narasaed, datfala problem maet samting bilong man seleva, maet olketa challenge wea singol parents feisim, wei wea man hem wikdaon from bigfala sik, or hard taem wea man kasem bikos narawan deal witim hem long nogud wei. For mekem iu barava savve helpem datfala man iu mas firstaem kamap man wea lisin gud. Bible provaedem gudfala information long evri problem hia. Bat iu mas iusim witim fasin for luksavve. For mekem story bilong iu really helpem narafala man, iu mas luksavve long really need bilong hem. Talem klia sapos iu storyim ansa wea for olowe, ansa wea bae help for lelebet taem nomoa, or maet wei for deal witim wanfala problem wea bae no change insaed disfala system. Hem minim, iu mas mek sure wei wea iu storyim olketa Scripture hem fitim ansa wea iu showim. Sapos nomoa, man wea lisin maet tingse ansa wea iu storyim hem no mek-sense.

Followim taem wea olketa samting happen. Hem fitim samfala information for man storyim followim taem wea hem happen. Olsem example, buk bilong Exodus hem storyim Tenfala Trabol followim order wea olketa kamap. Long Hebrews chapter 11, aposol Paul listim olketa man and woman wea showimaot nambawan example bilong faith followim taem wea olketa stap.

Sapos iu storyim olketa samting wea happen bifor long taem wea hem happen, datwan maet helpem audience bilong iu for minim why nao samfala samting hem kamap. Diswan fitim history bilong distaem and bilong taem bilong Bible tu. Long wei olsem iu savve joinim wei for storyim samting followim taem wea hem happen witim wei for storyim samting wea kosim and samting wea kamaot from datwan. Sapos iu plan for storyim olketa samting wea Bible showaot bae happen long future, for storyim followim taem wea olketa samting bae happen maet mekem hem isi for audience minim gud and no forgetim.

For storyim samting followim taem wea hem happen no minim iu mas evritaem storyim from barava start. Samfala taem hem maet moabeta for startim story long wanfala interesting part. Olsem example, taem iu talem wanfala experience, iu maet disaed for storyim taem samting testim faithful fasin bilong wanfala man bilong God. From iu mekem man interest taem iu storyim datfala part bilong story, iu savve talem olketa samting wea lead go long datwan followim taem wea hem happen.

Iusim Nomoa Information wea Important. Nomata wanem wei nao iu organizem information bilong iu, careful for iusim nomoa samting wea important. Theme bilong tok bilong iu shud helpem iu for disaed. Iu mas tingim tu hu nao insaed audience bilong iu. Maet wanfala point hem important tumas for wanfala audience, bat for difren audience iu no needim. Iu mas feel sure tu hao evri information bae help for kasem goal bilong iu. Sapos nomoa, tok bilong iu, nomata hem maet interesting, maet no duim waka bilong hem.

Taem iu duim research, iu maet faendem planti interesting information abaotem subject bilong iu. Haomas nao iu shud iusim? Sapos iu givim audience tumas information, maet datwan spoelem goal bilong iu. Hem moa isi for man rememberim tu-thri main point wea iu storyim gud winim planti point wea iu storyim fast tumas. Diswan no minim iu mas no iusim samfala extra information wea interesting. Bat no letem datwan spoelem goal bilong iu. Lukim hao kaen information olsem hem kamap insaed long Bible long Mark 7:3, 4 and John 4:1-3, 7-9.

Taem iu muv from wanfala point go long next wan, careful for no duim kwiktaem tumas long wei wea audience no savve followim hao nao olketa point join tugeta. For mekem olketa point waka tugeta long gudfala wei, iu maet need for provaedem samting olsem wanfala bridge for joinim olketa tugeta. Datfala bridge maet lelebet toktok or wanfala sentence for showimaot klia hao olketa point join tugeta. Long planti languis iu savve iusim samfala simpol word or toktok for showimaot hao wanfala niu point hem join witim olketa wea kam bifor.

For helpem iu kasem goal bilong iu, iusim important information nomoa and storyim long wei wea followim gudfala order.