Showimaot Klia Olketa Main Point

WANEM nao olketa main point bilong wanfala tok? Hem no minim evri smol point wea interesting nomoa. Olketa nao olketa important idea wea iu storyim gud. Hem nao olketa idea wea important tumas for kasem goal bilong iu.

Wanfala important samting for mekem olketa main point showaot klia hem for chusim and organizem information long wisefala wei. Taem man duim research for wanfala tok, planti taem hem faendem moa information winim wanem hem needim. Hao nao iu savve disaedem wanem information iu shud iusim?

First samting, tingim audience bilong iu. Waswe, olketa barava no savve long subject bilong iu, or olketa savve gud long hem? Waswe, planti long olketa agree witim samting wea Bible talem abaotem datwan, or samfala daot? Wanem kaen challenge nao olketa feisim long evriday living taem olketa trae for followim samting Bible talem long datfala subject? Mek-tu, mek sure goal bilong iu for storyim datfala subject long datfala audience hem klia long mind bilong iu. Taem iu ting raonem information bilong iu, followim tufala instruction hia, and keepim nomoa information wea barava fitim.

Sapos iu kasem wanfala aotlaen wea garem finis theme and olketa main point, iu shud followim datwan. Nomata olsem, tok bilong iu bae barava moabeta sapos iu tingim olketa point antap taem iu storyim each main point. Taem iu no kasem eni aotlaen, iu nao mas chusim olketa main point.

Taem iu garem olketa main point klia long mind bilong iu and iu organizem finis information for each point, bae hem moa isi for iu givim datfala tok. And tu, audience bilong iu bae kasem moa samting from datwan.

Olketa Difren Wei for Organizem Information Bilong Iu. Samfala difren wei stap for organizem body bilong tok bilong iu. Taem iu savve gud long olketa difren wei hia, bae iu luksavve hao wei for iusim olketa savve barava help, sapos hem fitim goal bilong iu.

Gudfala wei hem for divaedem tok saed long olketa topic. (Each main point hem important bikos hem helpem olketa wea lisin for minim datfala subject or helpem iu kasem goal bilong datfala tok.) Narafala wei hem for followim order wea olketa samting hem happen. (Olsem example, samting wea happen bifor long Flood, then samting wea happen bifor Jerusalem hem distroe long 70 C.E., and then, olketa samting wea happen long taem bilong iumi.) Mek-thri wei hem samting wea kosim and samting wea kamaot from datwan. (Olsem example, maet iu start witim samting wea happen, wea hem nao samting wea kamaot, and then storyim wanem nao kosim datwan.) Mek-foa wei hem for storyim opposite bilong samting. (Maet iu markem gud samting witim nogud samting or saed wea saportim witim saed wea againstim.) Samfala taem tok maet garem winim wanfala long olketa wei hia.

Taem olketa laea for accusim Stephen front long Jew Sanhedrin, hem givim strongfala tok wea followim order bilong olketa samting wea happen. Taem iu readim datwan long Acts 7:​2-​53, lukim wei wea hem garem reason for chusim olketa point wea hem storyim. Firstaem, Stephen talem klia hao hem storyim history wea audience kanduit denyim. Then hem storyim hao nomata olketa brata bilong Joseph rejectim hem, God iusim hem for provaedem wei for sev. Next, hem storyim hao olketa Jew no obeyim Moses wea God iusim. Last samting, hem strongim hao sem spirit wea muvim olketa Jew bifor muvim olketa wea killim dae Jesus Christ.

No Iusim Tumas Main Point. Tu-thri point nomoa important for story followim wanfala theme. Klosap evri taem wanfala tok bae no garem winim faevfala main point. Diswan hem tru nomata tok bilong iu hem for 5 minute, 10 minute, 30 minute, or winim. No trae for mekem tumas point showaot klia. Audience bilong iu fit for minim gud tu-thri difren idea nomoa from wanfala tok. And sapos datfala tok hem moa long, olketa main point mas showaot moa klia.

Nomata haomas main point iu iusim, mek sure iu storyim gud each wan. Givim inaf taem for audience ting raonem each point mekem hem barava klia long mind bilong olketa.

Tok bilong iu shud here simpol nomoa. Diswan hem no evritaem depend long haomas information nao iu storyim. Sapos olketa point bilong iu anda long tu-thri main heding and iu storyim olketa followim order wea iu raetem, pipol bae minim tok bilong iu and bae hem isi for olketa rememberim.

Mekem Olketa Main Point Bilong Iu Showaot Klia. Sapos iu organizem information bilong iu long stretfala wei, bae hem no hard for strongim olketa main point taem iu givim datfala tok.

Main wei for mekem wanfala main point showaot klia hem for storyim olketa pruv, scripture, and nara information long wei wea hem point go long datfala main idea and strongim hem moa. Evri nara point shud kliarem, pruvim, or strongim datfala main point. No addim samfala idea wea interesting nomoa bat nating important. Taem iu storyim olketa nara point, showimaot klia hao olketa join witim and saportim datfala main point. No tingse audience bae luksavve long diswan seleva. Showim hao nao olketa point hia join tugeta long wei for talem moa olketa main word or full toktok bilong datfala main point.

Samfala speaker mekhae long olketa main point long wei for nambarem olketa. Nomata hem wanfala wei for mekhae long olketa main point, hem important for chusim gud information and storyim followim stretfala order.

Maet iu disaed for talem firstaem datfala main point bifor iu storyim information wea saportim. Diswan bae helpem audience for luksavve hao samting wea iu storyim bihaen hem important, and tu hem bae strongim datfala main point. Maet iu strongim moa datfala point long wei for talem moa bihaen iu storyim finis.

Long Field Ministry. Olketa principle antap fitim olketa tok and tu story bilong iu long field ministry. Taem iu prepare, tingim eni big samting wea maet happen wea pipol long datfala ples maet ting abaotem. Chusim wanfala theme wea givim iu chance for showimaot hao hope bilong Bible bae stretem datfala samting. Chusim maet tufala main point for storyim datfala theme. Chusim olketa scripture wea iu bae iusim for saportim olketa point hia. Then planim hao for startim story bilong iu. For prepare long wei olsem hem minim iu savve change fitim need insaed story. Hem helpem iu tu for talem samting wea olketa haosholder bae rememberim.