Reviewim Olketa Main Point

Hao, samfala taem hem no isi for iu rememberim wat iu just studyim? Datwan savve happen lo iumi evriwan. Wat nao savve helpem iu? Hem gud for iu reviewim olketa main point.

During lo study, stop samfala taem and ting abaotem which point nao hem barava important. Lukim wat aposol Paul encouragem olketa brata and sista for duim taem olketa readim leta blo hem. Hem sei: “Tingim main point bilong samting wea mifala talem.” (Heb. 8:1) Disfala toktok helpem olketa wea lisin lo hem for understandim wat hem gohed for storyim and for lukim hao each point hem join witim main point wea hem laekem olketa for tingim.

Lo end blo study, hem gud for iu markem taem, maet ten minute olsem, for ting raonem olketa main point lo wat iu studyim. If iu no savve tingim, chekim olketa subheding, or main sentence wea staka taem hem stap lo first sentence blo olketa paragraf. Datwan savve helpem iu for remember. If iu lanem wanfala niu point, trae for explainim datwan lo own toktok blo iu. Taem iu reviewim olketa main point, datwan bae helpem iu for rememberim wat iu lanem and hao bae iu followim datwan lo laef blo iu.