Lovem God wea Lovem Iu
“Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.”—MATTHEW 22:37.
1, 2. Wanem nao maet mekem olketa Pharisee askem Jesus abaotem which wan long olketa komandment hem nambawan?
INSAED Law bilong Moses wea garem winim 600 law, which wan nao hem barava important? Datwan nao kwestin wea olketa Pharisee wea stap long taem bilong Jesus raoa tumas abaotem. Waswe, hem wanfala law abaotem olketa sakrifaes? Tru nao, olketa sakrifaes wea olketa givim hem for God forgivim sin bilong olketa and for thankiu long God. Or waswe, barava important law nao datwan saed long wei for circumcise? Datfala law hem important tu, from hem wanfala saen bilong datfala covenant wea Jehovah mekem witim Abraham.—Genesis 17:9-13.
2 Bat olketa wea hol strong long Law tingse from evri law wea God givim hem barava important, bae hem no stret for sei wanfala komandment hem moa important winim olketa narawan. Olketa Pharisee disaed for askem Jesus datfala kwestin wea staka pipol no agree long hem. Maet olketa hope hem bae talem samting wea bae spoelem wei wea pipol trustim hem. Wanfala long olketa kam long Jesus and askem hem olsem: “Wanem komandment bilong Law nao hem nambawan winim evri narawan?”—Matthew 22:34-36.
3. Wanem komandment nao Jesus sei hem nambawan?
3 Ansa wea Jesus talem hem barava important for iumi distaem. Long ansa bilong hem, hem talem wanem nao hem barava main important samting long tru worship. Jesus talem moa toktok from Deuteronomy 6:5, taem hem sei: “ ‘Iu mas lovem God bilong iu Jehovah witim full heart bilong iu and witim full soul bilong iu and witim full mind bilong iu.’ Diswan nao nambawan and firstfala komandment.” Nomata datfala Pharisee askem Jesus for wanfala komandment, Jesus talem narawan tu taem hem talem moa disfala toktok from Leviticus 19:18: “Mek-tu hem olsem, ‘Iu mas lovem neiba bilong iu olsem iu lovem iuseleva.’ ” Jesus talem hao tufala law hia nao main important samting saed long tru worship. Then, for mekem olketa no askem hem for listim olketa nara law wea important, Jesus sei olsem: “Tufala komandment hia hem faondeson bilong full Law, and olketa Profet.” (Matthew 22:37-40) Insaed disfala article, bae iumi storyim first wan long tufala komandment hia. Why nao iumi mas lovem God? Hao nao iumi showimaot iumi lovem God? And hao nao iumi savve mekem grow datfala love? Hem important for savve long olketa ansa for olketa kwestin hia, bikos for mekem Jehovah hapi, iumi mas lovem hem witim full heart, soul, and mind bilong iumi.
Why Love Hem Important
4, 5. (a) Why nao datfala Pharisee no sapraes long samting wea Jesus talem? (b) Wanem nao hem moa important long God winim olketa sakrifaes?
4 Luk olsem datfala Pharisee wea askem Jesus hem nating seke and sapraes long ansa wea Jesus talem long hem. Hem savve hao important part long tru worship nao hem for lovem God, nomata plande no showimaot datwan. Insaed long olketa synagogue, hem wei bilong olketa for talem big datfala Shema, wea hem wanfala Hebrew prea, and insaed long diswan hem datfala toktok wea Jesus talem from Deuteronomy 6:4-9. Long story abaotem diswan long buk bilong Mark, datfala Pharisee sei olsem long Jesus: “Teacher, iu tok tru taem iu sei, ‘Hem Wanfala, and no eniwan bat Hem nomoa’; and diskaen wei for man lovem hem witim full heart bilong hem and witim full mind bilong hem and witim full strong bilong hem and diskaen wei for man lovem neiba bilong hem olsem hemseleva hem barava winim evri sakrifaes wea olketa bonem and olketa nara sakrifaes.”—Mark 12:32, 33.
5 Tru nao, Law talem pipol bilong God for duim sakrifaes wea olketa bonem and olketa nara sakrifaes, bat God tinghae long olketa servant bilong hem wea love nao muvim olketa for duim samting. Sapos love nao muvim man for offerim wanfala sparrow, God tinghae long datwan winim wei for man offerim plande thousand sheep from samting wea no stret nao muvim hem. (Micah 6:6-8) Tingim story abaotem datfala poor widow woman wea Jesus lukim long temple long Jerusalem. Tufala smol coin wea hem go putim long contribution box no fit for baem nomata wanfala sparrow. Nomata olsem, from love for Jehovah nao muvim hem for givim datfala contribution, Jehovah barava tinghae long datwan winim olketa bigfala donation wea olketa rich man givim from olketa leftova samting bilong olketa. (Mark 12:41-44) Hem barava encouragem iumi for savve hao Jehovah barava tinghae long samting wea iumi evriwan savve showimaot nomata iumi rich or poor, hem nao love wea iumi garem for hem!
6. Wanem nao Paul raetem wea showimaot love hem barava important?
6 Aposol Paul hem strongim wei wea love hem important long tru worship taem hem raet olsem: “Sapos mi tok long languis bilong olketa man and bilong olketa angel bat mi no garem love, mi kamap olsem wanfala belo wea mek noise or wanfala pis iron wea man bangam. And sapos mi garem spesol savve for talem profesi and mi savve long olketa holy secret and evri savve, and sapos mi garem bigfala faith wea savve muvim olketa maunten, bat mi no garem love, mi samting nating nomoa. And sapos mi givim evri samting bilong mi for feedim narafala pipol, and sapos mi letem olketa killim mi dae, mekem mi tok praod, bat mi no garem love, datwan no mekem mi kasem eni gud samting.” (1 Corinthians 13:1-3) Tru tumas, iumi mas garem love for mekem God hapi long worship bilong iumi. Bat hao nao iumi showimaot iumi lovem Jehovah?
Hao Iumi Showimaot Iumi Lovem Jehovah
7, 8. Hao nao iumi savve showimaot iumi lovem Jehovah?
7 Plande pipol sei love hem wanfala feeling wea iumi no savve kontrolem. Bat, trufala love hem no wanfala feeling nomoa. Hem showaot long samting wea iumi duim. Bible storyim love olsem “wanfala wei wea moabeta” and samting wea iumi “aftarem.” (1 Corinthians 12:31; 14:1) Iumi olketa Christian kasem encouragement for showimaot love, no “long toktok or mouth nomoa, bat long samting wea iumi duim and long truth.”—1 John 3:18.
8 Love for God hem muvim iumi for duim wanem hem mekem hem hapi and for defendim and mekhae long rul bilong hem, thru long toktok and samting wea iumi duim. Hem muvim iumi for no lovem world and olketa wei bilong world wea no followim God. (1 John 2:15, 16) Olketa wea lovem God heitim nogud samting. (Psalm 97:10) Love for God minim iumi mas lovem neiba tu, wea iumi bae storyim long nextfala article. Nara samting tu, for iumi lovem God minim iumi mas obey. Bible hem sei: “Samting wea showimaot iumi lovem God nao hem wei wea iumi obeyim olketa komandment bilong hem.”—1 John 5:3.
9. Hao nao Jesus showimaot hem lovem God?
9 Jesus showimaot long perfect wei hao for lovem God. Love muvim hem for lusim hom bilong hem long heven and kam stap long earth olsem man. Love muvim hem for givim glory long Dadi bilong hem thru long olketa samting wea hem duim and teachim. Love muvim hem for ‘obey nomata diswan minim hem mas dae.’ (Philippians 2:8) Datfala wei for obey, wea showimaot love bilong hem, openem wei for olketa wea faithful for kamap raeteous front long God. Paul raet olsem: “Thru long wei wea wanfala man [Adam] no obey, plande kamap sinner, long sem wei tu, thru long wei wea wanfala man [Christ Jesus] obey, plande bae kamap raeteous.”—Romans 5:19.
10. Why nao wei for lovem God minim iumi mas obey?
10 Iumi showimaot iumi lovem God long wei for obeyim hem olsem Jesus hem duim. Aposol John wea Jesus lovem, hem raet olsem: “Diswan nao mining bilong love, for iumi gohed for wakabaot followim olketa komandment bilong hem.” (2 John 6) Olketa wea barava lovem Jehovah barava laekem hem for leadim olketa. From olketa luksavve olketa kanduit chusim gogo bilong olketa seleva, olketa trustim wisdom bilong God and followim direction bilong hem. (Jeremiah 10:23) Olketa olsem olketa wea stap long Beroea bifor wea garem gudfala tingting and “barava willing tumas” for acceptim message bilong God and barava laek for duim will bilong hem. (Acts 17:11) Olketa lukluk gud long olketa scripture for minim gud will bilong God, wea helpem olketa for showimaot love long wei for obey long samfala wei moa.
11. Wanem nao hem minim for lovem God witim full heart, mind, soul, and strong bilong iumi?
11 Olsem Jesus hem talem, wei for lovem God hem join witim full heart, mind, soul, and strong bilong iumi. (Mark 12:30) Kaen love olsem hem kam from heart from hem join witim feeling bilong iumi, olketa samting iumi laekem, and tingting bilong iumi, and iumi barava laek for mekem Jehovah hapi. Iumi showimaot love tu long wei for iusim tingting bilong iumi. Savve nao mekem iumi lovem Jehovah. Iumi savve long olketa fasin, standard, and olketa plan bilong hem. Iumi iusim soul, wea hem nao full body and laef bilong iumi for servem and praisem hem. And iumi iusim tu strong bilong iumi.
Why Iumi Shud Lovem Jehovah
12. Why nao God laekem iumi for mas lovem hem?
12 Wanfala reason iumi shud lovem Jehovah hem bikos hem laekem iumi for showimaot olketa fasin bilong hem. Love hem start kam from God and hem nao nambawan example bilong love. Aposol John hem raet olsem: “God hem love.” (1 John 4:8) God wakem iumi olketa man long image bilong hem; hem wakem iumi long wei for showimaot love. Tru nao, faondeson long rul bilong Jehovah hem love. Hem laek for rul ovarem nomoa olketa wea servem hem from olketa barava laekem tumas raeteous rul bilong hem. Tru nao, love nao main samting wea bae mekem evri creation stap long peace and wan mind.
13. (a) Why nao Jesus talem olketa Israelite for ‘lovem God bilong olketa Jehovah’? (b) Why nao hem fitim for Jehovah expectim iumi for lovem hem?
13 Nara reason for iumi lovem Jehovah hem from iumi tinghae long wanem hem duim for iumi. Tingim disfala toktok wea Jesus talem long olketa Jew: “Iu mas lovem God bilong iu Jehovah.” Jesus no expectim olketa for lovem wanfala god wea olketa no savve long hem and wea no laek fren witim olketa. Olketa mas lovem Datwan wea showimaot love bilong hem for olketa. Jehovah nao God bilong olketa. Hem nao Datwan wea tekem olketa kamaot from Egypt go long Promis Land, Datwan wea protectim, sapotim, and lovem olketa, Datwan wea givim discipline long olketa witim love. And distaem, Jehovah nao God bilong iumi, Datwan wea givim Son bilong hem olsem wanfala ransom mekem iumi kasem laef olowe. Hem barava fitim for Jehovah expectim iumi for lovem hem! God askem iumi for lovem hem bikos Hem lovem iumi tu. Iumi lovem Datwan wea “lovem iumi firstaem.”—1 John 4:19.
14. Hao nao love bilong Jehovah hem olsem love bilong wanfala dadi or mami?
14 Jehovah lovem olketa man long sem wei wea wanfala mami or dadi hem lovem olketa pikinini bilong hem. Nomata olketa dadi and mami no perfect, olketa wea lovem pikinini bilong olketa barava waka hard for plande year for lukaftarem pikinini bilong olketa, and mekem staka sakrifaes for duim olsem. Parents teachim, encouragem, sapotim, and disciplinem pikinini bilong olketa bikos olketa laekem pikinini for hapi and garem gudfala laef. Wanem nao parents laekem from olketa pikinini? Olketa laekem pikinini for lovem olketa and for barava followim wanem olketa teachim long olketa mekem olketa kasem gud samting. Waswe, iu agree hao hem fitim for Dadi bilong iumi long heven wea perfect for laekem iumi showimaot iumi tinghae long evri samting wea hem duim for iumi?
Mekem Grow Love Bilong Iumi for God
15. Wanem nao first samting for iumi duim for mekem grow love for God?
15 Iumi no lukim God and iumi no herem voice bilong hem. (John 1:18) Nomata olsem, hem laekem iumi for fren witim hem. (James 4:8) Hao nao iumi savve duim datwan? Hem hard for iumi lovem samwan wea iumi no savve long hem, so first samting, iumi mas kasem savve abaotem hem. Jehovah provaedem Word bilong hem, Bible, for iumi lane abaotem hem. Dastawe Jehovah iusim organization bilong hem for encouragem iumi for readim Bible evriday. Bible hem teachim iumi abaotem God, olketa fasin bilong hem, and wei wea hem deal witim pipol for plande thousand year finis. Taem iumi ting raonem olketa samting olsem, savve bilong iumi bae kamap moa big and datwan bae mekem grow love bilong iumi for hem.—Romans 15:4.
16. Hao nao wei for ting raonem ministry bilong Jesus hem strongim love bilong iumi for God?
16 Wanfala main wei wea iumi savve mekem grow wei for lovem Jehovah hem for ting raonem laef and ministry bilong Jesus. Tru nao, Jesus barava showimaot olketa fasin bilong Dadi bilong hem long perfect wei, dastawe hem savve sei olsem: “Man wea lukim mi hem lukim Father tu.” (John 14:9) Waswe, hem no muvim iu for savve hao Jesus showimaot fasin for kea taem hem mekem only son bilong datfala widow woman for laef bak moa? (Luke 7:11-15) Waswe, hem no muvim iu for savve hao Jesus wea hem Son bilong God and nambawan man wea winim evri nara man, hambol for wasim leg bilong olketa disaepol bilong hem? (John 13:3-5) And hao nao iu feel taem iu savve nomata hem nambawan and hem wise winim eni narafala man, no eniwan fraet for story witim hem, nomata olketa pikinini tu? (Mark 10:13, 14) Taem iumi ting raonem olketa samting hia, iumi olsem olketa Christian wea Peter raet abaotem olketa: “Nomata iufala nating lukim [Jesus], iufala lovem hem.” (1 Peter 1:8) Taem love bilong iumi for Jesus hem grow, love for Jehovah hem grow tu.
17, 18. Wei for ting raonem olketa wanem samting wea Jehovah provaedem nao savve mekem grow love bilong iumi for hem?
17 Narafala wei wea iumi savve mekem grow love bilong iumi for God hem for ting raonem plande samting wea hem provaedem for iumi enjoyim laef—wei wea creation hem luk naes, plande naes samting for kaikaim, wei for fren gud witim olketa narawan, and tu, plande nara gud samting wea mekem iumi hapi and satisfae. (Acts 14:17) Taem iumi lanem moa samting abaotem God bilong iumi, datwan mekem iumi garem plande reason for tinghae long gudfala fasin and kaenfala fasin bilong hem. Ting raonem evri samting wea Jehovah duim for iu. Waswe, iu agree hao Jehovah fit for kasem love bilong iu?
18 Wanfala long olketa present wea God givim iumi hem for prea long hem enitaem, and for savve hao “Datwan wea herem prea” hem lisin long iumi. (Psalm 65:2) Jehovah givim paoa for rul and for judge long Son wea hem lovem. Nomata olsem, hem no markem Son bilong hem or eni narawan for herem olketa prea. Hemseleva nao lisin long olketa prea bilong iumi. Disfala loving wei wea Jehovah interest long iumi hem mekem iumi laek for fren gud witim hem.
19. Wanem nao olketa promis bilong Jehovah wea mekem iumi laek fren gud witim hem?
19 Iumi laek fren gud witim Jehovah tu taem iumi tingim plan bilong hem for olketa man long future. Hem promis for finisim sik, wei for sorre, and dae. (Revelation 21:3, 4) Taem olketa man kamap perfect, no eniwan bae safa from wei for feel sorre, wei for wikdaon, and olketa trabol. Hangre, poor living, and war bae finis nao. (Psalm 46:9; 72:16) Earth bae kamap paradaes. (Luke 23:43) Jehovah bae givim iumi olketa blessing hia, no from hem mas duim, bat bikos hem lovem iumi.
20. Wanem nao olketa gud samting wea Moses sei hem kamaot from wei for lovem Jehovah?
20 So, iumi garem olketa barava gudfala reason for lovem God and mekem datfala love for grow. Waswe, bae iu gohed for strongim love bilong iu for God, and letem hem leadim iu long evri samting? Iuseleva nao mas disaed. Moses luksavve long olketa gud samting wea man savve kasem from wei for mekem grow love for Jehovah and for gohed strongim datwan. Moses sei olsem long olketa Israelite bifor: “Iufala mas chusim laef mekem iufala and olketa pikinini bilong iufala savve gohed for laef, thru long wei for lovem God bilong iufala Jehovah, thru long wei for lisin long voice bilong hem and barava followim hem; from hem nao givim laef long iufala and mekem iufala stap longtaem.”—Deuteronomy 30:19, 20.
Waswe, Iu Remember?
• Why nao iumi mas lovem Jehovah?
• Hao nao iumi savve showimaot iumi lovem God?
• Wanem nao olketa reason wea iumi garem for lovem Jehovah?
• Hao nao iumi savve mekem grow love for God?
[Piksa long page 17]
Jehovah barava tinghae long samting wea iumi evriwan savve showimaot—love wea iumi garem for hem
[Piksa long page 18]
“Man wea lukim mi hem lukim Father tu.” —John 14:9