Why Nao God Garem Wanfala Organization?

1. Why nao God organizem pipol long Israel bifor?

Olketa wea kam from laen bilong Abraham kamap wanfala nation and God organizem olketa and givim olketa law for olketa followim. Disfala nation wea hem kolem “Israel,” olketa nomoa followim tru worship and defendim and followim toktok bilong God. (Psalm 147:19, 20) From diswan, pipol long evri nation savve kasem blessing from datfala nation, Israel.​—Readim Acts 3:25.

God chusim olketa Israelite for kamap olketa witness bilong hem. Evri samting wea happen long olketa Israelite bifor taem olketa obeyim God, hem helpem pipol for luksavve wei for obeyim law bilong God mekem pipol kasem gud samting. (Deuteronomy 4:6) So taem pipol lukim samting wea happen long olketa Israelite, datwan mekem olketa luksavve long trufala God.​—Readim Isaiah 43:10, 12.

2. Why nao God organizem olketa tru Christian?

From olketa Israelite no obeyim God, gogo hem rejectim olketa and changem datfala nation witim Christian kongregeson. (Matthew 21:43; 23:37, 38) Distaem olketa tru Christian nao kamap olketa witness bilong Jehovah.​—Readim Acts 15:14, 17.

Jesus hem organizem olketa follower bilong hem for preach and teachim pipol long evri kantri for kamap disaepol. (Matthew 10:7, 11; 24:14; 28:19, 20) Long disfala taem wea world hem gogo for finis, disfala preaching waka hem kamap big winim enitaem bifor. Diswan hem firstaem wea Jehovah hipimap staka million pipol long evri kantri for worshipim hem long stretfala wei and diswan mekem olketa for wan mind. (Revelation 7:9, 10) Olketa tru Christian hipap tugeta for encouragem and helpem narawan. Nomata long wanem ples long world olketa stap, olketa kasem sem instruction from Bible long olketa meeting bilong olketa.​—Readim Hebrew 10:24, 25.

3. Hao nao organization bilong Olketa Jehovah’s Witness hem start?

Long olketa year bilong 1870 wanfala smol grup wea studyim Bible start for luksavve long olketa tru teaching long Bible. Olketa savve Jesus hem organizem Christian kongregeson for preach, so olketa startim wanfala waka for preach abaotem Kingdom evriwea long world. Long 1931 olketa start for iusim datfala nem Olketa Jehovah’s Witness.​—Readim Acts 1:8; 2:1, 4; 5:42.

4. Hao nao Olketa Jehovah’s Witness organize?

Long first century, wanfala grup bilong olketa mature Christian man lukaftarem olketa kongregeson long olketa difren kantri. Olketa man hia luksavve Jesus nao Hed bilong Christian kongregeson. (Acts 16:4, 5) Distaem tu, wanfala grup bilong olketa mature Christian man, wea hem wanfala Governing Body, olketa nao lukaftarem Olketa Jehovah’s Witness evriwea long world. Datfala Governing Body hem lukaftarem olketa branch office bilong Olketa Jehovah’s Witness wea transleitim, printim, and givimaot olketa buk for studyim Bible long winim 600 languis. So datfala Governing Body savve iusim Bible for helpem and givim encouragement long winim 100,000 kongregeson long world. Olketa man wea fit nao duim waka bilong olketa elder for lukaftarem olketa kongregeson hia. Olketa man hia barava willing for lukaftarem olketa sheepsheep bilong God.​—Readim 1 Peter 5:2, 3.

Olketa Jehovah’s Witness organize for preachim gud nius and helpem pipol kamap disaepol. Olketa preach long haos tu haos, olsem olketa aposol. (Acts 20:20) Olketa willing for studyim Bible witim pipol wea laek for savve long tru samting long Bible. Bat Olketa Jehovah’s Witness no wanfala organization nomoa. Olketa olsem wanfala famili wea garem wanfala Dadi wea lovem olketa. Olketa olsem olketa brata and sista wea lovem olketa evriwan. (2 Thessalonica 1:3) From pipol bilong Jehovah organize for duim wanem hem laekem and for helpem narawan, olketa kamap wanfala famili long earth wea barava hapi.​—Readim Psalm 33:12; Acts 20:35.