Jehovah, God wea Laekem Evri Samting for Organize Gud

1, 2. (a) Hu nao first wan wea God wakem, and wanem nao hem helpem Jehovah for duim? (b) Hao nao iumi savve olketa angel organize gud?

JEHOVAH, wea wakem universe, hem laekem evri samting for organize gud. First wan wea God wakem hem Son bilong hem, Jesus. Bible sei Jesus hem “Word” bikos hem nao main wan wea God iusim for toktok for hem. Bible sei: “Long bifor kam, taem God no wakem olketa nara samting yet, Word hem stap, and Word hem stap witim God.” Hem duim waka bilong Jehovah long heven for staka million year. Bible sei olsem tu abaotem Jesus: “God iusim hem for wakem evri samting, and no eni samting hem stap wea hem no helpem God for wakem.” Winim 2,000 year go finis, Jehovah sendem datfala Word long earth and hem nao perfect man Jesus Christ. Jesus faithful for duim evri samting wea Dadi bilong hem laekem hem for duim.—John 1:1-3, 14.

² Bifor Jesus kam long earth, hem “nambawan wakaman” wea faithful for duim wanem God laekem. (Prov. 8:30) Jesus helpem Jehovah for wakem staka million angel long heven. (Col. 1:16) Bible showimaot olketa angel bilong Jehovah long heven organize gud olsem wanfala army. Hem sei: “Plande thousand gohed waka for hem, and ten thousand taems ten thousand gohed for standap front long hem.”—Dan. 7:10; Ps. 103:21.

3. Haomas star nao stap long universe, and waswe, olketa organize gud?

³ Taem Jehovah wakem universe, hem wakem olketa star and planet wea staka fogud. Haomas star nao stap? Datfala niuspepa, Chronicle, long Houston, Texas, hem story abaotem wanfala research wea olketa scientist just duim. Distaem olketa scientist tingse namba bilong olketa star long universe hem 300 sextillion. For raetem datfala namba, man mas putim 23-fala zero bihaen long namba 3! Waswe, olketa star and olketa planet hia organize gud? Yes, olketa star hia stap tugeta long olketa grup wea iumi kolem olketa galaxy. Each galaxy hem garem staka planet and plande billion or maet plande trillion star. Staka galaxy stap tugeta long olketa grup wea olketa kolem cluster, and olketa cluster hia stap tugeta long olketa bigfala grup wea olketa kolem supercluster.

4. Why nao hem fitim for sei God bae organizem pipol bilong hem long earth?

⁴ Olketa angel long heven and olketa star and planet long universe barava organize gud. (Isa. 40:26) So iumi sure Jehovah bae organizem tu pipol wea worshipim hem long earth. Hem barava important for olketa organize gud bikos olketa garem staka important waka for duim. For staka thousand year finis Jehovah organizem gud pipol bilong hem mekem olketa savve worshipim hem. Staka example showimaot Jehovah sapotim pipol bilong hem, and hem “God [wea] no laekem evri samting for olobaot, bat hem laekem peace.”—Readim 1 Corinth 14:33, 40.

GOD ORGANIZEM PIPOL BILONG HEM BIFOR

5. Why nao samting wea God planim for earth hem no happen bifor?

⁵ Taem Jehovah wakem first man and woman, hem sei long tufala: “Garem plande pikinini and fulimap earth and lukaftarem. Olketa fish long sea and olketa bird long heven and evri samting wea laef long earth mas stap anda long iufala.” (Gen. 1:28) Jehovah no wakem staka million pipol wantaem nomoa, bat Adam and Eve bae garem pikinini, and then pikinini bilong tufala bae garem pikinini gogo staka pipol bae stap long earth. Plan bilong God hem for evri man hia mekem earth kamap paradaes. Bat from Adam and Eve no obeyim God, wanem God planim hem no happen long datfala taem. (Gen. 3:1-6) Staka pikinini bilong Adam and Eve no worshipim Jehovah, and gogo “Jehovah lukim hao wei bilong pipol long earth hem barava nogud tumas and tingting bilong olketa hem nogud olowe.” From diswan, God “lukim evri samting hem nogud tumas and earth hem fulap witim pipol wea raf.” So God disaed for mekem wanfala flood kamap long earth for finisim nogud pipol.—Gen. 6:5, 11-13, 17.

6, 7. (a) Why nao Jehovah sevem Noah? (Lukim piksa long start bilong study.) (b) Wanem nao happen long evriwan wea no lisin long Noah?

⁶ No evriwan nao dae long datfala Flood. Noah “mekem Jehovah hapi” bikos “hem wanfala raeteous man” wea “evritaem duim wanem trufala God laekem.” Jehovah talem Noah for wakem wanfala big ark and talem hem hao for wakem datwan. (Gen. 6:8, 9, 14-16) Noah wakem datfala ark for float mekem olketa man and animal stap sef insaed long taem bilong Flood. Noah and famili bilong hem duim evri samting wea Jehovah talem olketa for duim. Bihaen olketa tekem kam evri animal insaed long ark, “Jehovah hem satem door.”—Gen. 7:5, 16.

⁷ Noah warnim pipol wanfala Flood bae kam, bat olketa no laek lisin long hem. (2 Pet. 2:5) Long year 2370 B.C.E., datfala Flood hem start. Jehovah finisim “evri samting wea laef” long earth, bat hem sevem Noah, olketa son bilong hem, and waef bilong olketa insaed long datfala ark. (Gen. 7:23) Evri man long earth distaem kam from laen bilong Noah and famili bilong hem. Bat evriwan wea no laek for followim warning bilong Noah olketa dae long datfala Flood.

8. Wanem nao showimaot olketa Israelite organize gud finis taem olketa redi for go insaed long Promis Land?

⁸ Winim 800 year bihaen datfala Flood, God organizem olketa Israelite for kamap wanfala nation. Evri samting long laef bilong olketa hem organize gud, especially hao olketa worshipim Jehovah. Olsem example, hem markem samfala for kamap olketa priest and olketa Levite. And tu, hem organizem samfala woman for ‘duim samfala waka long tabernacle.’ (Ex. 38:8) Jehovah talem datfala nation for go stap long Canaan. Bat staka Israelite fraet and no laek for go, so God sei long olketa: “No eniwan long iufala bae go insaed datfala land wea mi promis for givim long iufala, bat Caleb wea hem son bilong Jephunneh and Joshua wea hem son bilong Nun nomoa bae go insaed datfala land.” God talem datwan abaotem Joshua and Caleb bikos tufala nomoa storyim gud samting abaotem datfala Promis Land wea olketa go spaem. (Num. 14:30, 37, 38) Bihaen, Jehovah markem Joshua for leadim olketa Israelite. (Num. 27:18-23) Taem Joshua redi for leadim olketa Israelite go long Canaan, Jehovah sei long hem: “Iu mas no fraet and mas strong. No seksek or fraet tumas, bikos God bilong iu Jehovah hem stap witim iu nomata wea nao iu go.”—Josh. 1:9.

9. Wanem nao tingting bilong Rahab abaotem Jehovah and pipol bilong hem?

⁹ Jehovah God hem stap witim Joshua long evri ples wea hem go. Olsem example, long 1473 B.C.E., olketa Israelite go camp klosap long Jericho, wanfala taon long Canaan. Joshua sendem tufala man for spaem Jericho, and long there nao tufala meetim Rahab, wanfala jury woman. Olketa man long datfala taon lukaotem tufala spae hia, bat Rahab haedem tufala antap long ruf long haos bilong hem. Rahab sei long tufala spae hia: “Mi barava savve Jehovah bae givim iufala disfala land . . . from mifala herem Jehovah mekem Red Sea kamap drae for iufala . . . and wanem iufala duim long tufala king bilong olketa Amorite.” Hem sei tu: “God bilong iufala, Jehovah, hem God wea rul ovarem evri samting long heven and long earth.” (Josh. 2:9-11) Rahab and famili bilong hem sapotim pipol bilong Jehovah. Bihaen, taem olketa Israelite tekovarem Jericho, Jehovah mek sure Rahab and famili bilong hem no dae. (Josh. 6:25) Rahab showimaot faith and barava respectim Jehovah and organization bilong hem.

OLKETA CHRISTIAN LONG FIRST CENTURY ORGANIZE GUD

10. Wanem nao Jesus talem long olketa bigman bilong olketa Jew, and why nao hem talem datwan?

¹⁰ Taem Joshua leadim olketa Israelite, olketa tekovarem staka taon long Canaan and stap long there. Bat insaed 1,500 year bihaen datwan, staka taem olketa Israelite no obeyim olketa law bilong God. Taem Jesus kam long earth, hem kamap wei bilong olketa Israelite for barava no obeyim Jehovah and olketa profet bilong hem, dastawe Jesus kolem olketa Israelite wea stap long Jerusalem olketa wea “killim dae olketa profet.” (Readim Matthew 23:37, 38.) Jehovah rejectim olketa bigman bilong olketa Jew bikos olketa no obeyim hem. Jesus talem olketa: “God bae tekem Kingdom bilong hem from iufala and bae givim long pipol wea duim olketa samting wea hem laekem.”—Matt. 21:43.

11, 12. (a) Wanem nao showimaot Jehovah blessim wanfala niu organization wea changem nation bilong Israel? (b) Hu nao insaed long disfala niu organization?

¹¹ No longtaem bihaen Jesus kam long earth, Jehovah rejectim nation bilong Israel. Nomata olsem, hem bae garem yet wanfala sekson long earth wea faithful and organize gud, and wea obeyim Christ and followim olketa teaching bilong hem. Long Pentecost 33 C.E., Jehovah start for blessim wanfala niu organization wea changem nation bilong Israel. Samting olsem 120 disaepol bilong Jesus hipap tugeta and “seknomoa olketa herem wanfala noise wea start kam long skae. Hem here olsem bigfala wind and hem mek noise long full haos.” Then “olketa lukim samting olsem olketa smolfala fire wea laet. Olketa fire hia stap antap long evriwan long olketa, and olketa kasem holy spirit and start for toktok long olketa difren languis.” (Acts 2:1-4) Datfala nambawan samting wea happen showimaot Jehovah hem sapotim disfala niu organization, wea hem nao olketa disaepol bilong Christ.

¹² Long datfala day, samting olsem 3,000 pipol kam insaed datfala niu organization bilong Jehovah. Bible sei tu: “Evriday Jehovah gohed for sevem pipol and olketa hia kamap disaepol.” (Acts 2:41, 47) Olketa disaepol bilong Jesus barava duim gud datfala preaching waka dastawe Bible sei: “Plande pipol moa herem message bilong God and staka pipol long Jerusalem kamap disaepol. Plande priest tu olketa biliv.” (Acts 6:7) Bihaen, taem Jehovah acceptim pipol wea no Jew for kam insaed Christian kongregeson, datwan tu showimaot hem sapotim datfala niu organization.—Readim Acts 10:44, 45.

13. Wanem waka nao God givim long olketa disaepol bilong Jesus?

¹³ Olketa disaepol bilong Jesus savve wanem waka nao God givim long olketa for duim. Taem Jesus stap long earth, hem showimaot example for olketa followim. No longtaem bihaen Jesus baptaes, hem start for preach abaotem “Kingdom bilong God.” (Matt. 4:17) Jesus lanem olketa disaepol bilong hem for duim sem waka tu. Hem talem olketa: “Iufala bae talem pipol abaotem mi long Jerusalem, long evri ples long Judea and long Samaria, and long evri farawe ples long earth.” (Acts 1:8) Waswe, olketa disaepol minim gud wanem nao Jesus laekem olketa for duim? Yes. Wantaem Paul and Barnabas talem long olketa Jew, olketa disaepol bilong Jesus bae start for preach nao long pipol wea no Jew. Paul and Barnabas sei: “Jehovah hem sei olsem long mifala: ‘Iu nao laet wea mi markem for pipol long evri kantri, mekem iu talemaot samting wea mi bae duim for sevem olketa man long evri ples long earth.’” (Acts 13:14, 45-47) Start kam long first century, organization bilong God gohed talem pipol abaotem samting wea Jehovah duim for sevem olketa man.

GOD SEVEM PIPOL BILONG HEM

14. Wanem nao happen long Jerusalem long first century, and wanem nao happen long olketa Christian?

¹⁴ Staka long olketa Jew no acceptim gud nius abaotem Jesus, and olketa no laek for lisin taem Jesus talem olketa abaotem nogud samting wea bae kasem Jerusalem. Hem warnim olketa disaepol olsem: “Taem iufala lukim army hem raonem Jerusalem, iufala savve nao datfala taon hem klosap for finis. Long datfala taem nao, olketa wea stap long Judea mas ranawe go long olketa maunten. Olketa wea stap long Jerusalem mas lusim datfala taon and olketa wea stap aotsaed long hem mas no kam insaed.” (Luke 21:20, 21) Jerusalem barava finis olsem Jesus hem talem. From olketa Jew againstim olketa long Rome, long 66 C.E. army bilong Rome kam and raonem Jerusalem and redi for distroem datfala taon. Bat seknomoa army hia go bak, so olketa disaepol bilong Jesus garem chance for lusim Jerusalem and Judea. Staka long olketa akrosim Jordan River and ranawe go long olketa maunten. Long 70 C.E., army bilong Rome kam bak and distroem Jerusalem. Waswe long olketa Christian? Olketa no dae bikos olketa followim warning wea Jesus givim.

15. Why nao staka pipol kam insaed Christian kongregeson?

¹⁵ Nomata olketa Christian long first century kasem persecution and olketa nara test, staka pipol kam insaed Christian kongregeson. (Acts 11:19-21; 19:1, 19, 20) Olketa Christian long first century gohed gud long spiritual wei bikos God blessim olketa.—Prov. 10:22.

16. Wanem nao each Christian long first century mas duim for gohed gud long spiritual wei?

¹⁶ For gohed gud long spiritual wei and garem wan mind, each Christian long datfala taem mas waka hard. Olketa mas studyim gud Bible, go evritaem long olketa meeting, and strong for duim preaching waka. Olketa kongregeson barava organize gud. Olketa garem olketa elder and ministerial servant wea willing for helpem olketa Christian, and olketa kongregeson kasem gud samting from hard waka wea olketa brata hia duim. (Phil. 1:1; 1 Pet. 5:1-4) And tu, olketa hapi tumas taem olketa traveling overseer, olsem Paul, visitim olketa! (Acts 15:36, 40, 41) Staka samting wea iumi duim distaem for worshipim Jehovah hem semsem olsem wanem olketa Christian long first century duim. Iumi barava tinghae long wei wea Jehovah organizem pipol bilong hem long first century and long distaem tu!a

17. Wanem nao bae iumi storyim long next study?

¹⁷ Iumi stap long olketa last day, and world bilong Satan klosap for finis. Nomata olsem, organization bilong God long earth hem gohed for muv kwiktaem winim enitaem bifor. Waswe, iu gohed muv witim organization bilong Jehovah? Long next study bae iumi storyim hao nao iu savve duim datwan.