Hem Trae Hard for No Fraet and No Daot

1-3. Wat nao Peter lukim hem happen lo datfala day, and wat nao hem experiencem lo datfala naet?

IMAGINIM Peter hem stragol for padol, and hem gogo for big naet nao. Taem hem luk go aot lo sea, hem lukim laet, hao datwan minim hem klosap daylaet nao? Olketa masol lo baksaed and shoulder blo hem barava pain tumas from hem padol for staka hour finis. Datfala strong wind wea blowim hair blo Peter hem mekem Sea blo Galilee for raf tumas. Olketa wave gohed for bangam front lo datfala fishing boat, and Peter hem wet from wave wea kam insaed boat. Nomata olsem hem gohed for padol.

² Lo datfala day taem olketa lo shore yet, Peter and olketa fren blo hem lusim Jesus. Olketa lukim Jesus feedim staka thousand pipol witim tu-thri bred and fish. Taem pipol lukim wat Jesus duim, olketa laek for mekem hem king, bat hem no laek involve lo politik. Hem laek for teachim olketa follower blo hem for no involve lo politik tu. From hem laek for sendem olketa pipol hia for go, hem talem olketa disaepol blo hem for go insaed lo boat and padol go akros lo narasaed lo sea, and hem go ap seleva lo maunten for prea.—Mark 6:35-45; readim John 6:14-17.

³ Lo taem wea olketa start for padol go aot, hem klosap full moon and hem lo midol lo skae, and distaem moon start for gogo daon nao. Olketa go for tu-thri kilometer nomoa. And then, bigfala wind and wave hem start for strong and datwan mekem hem hard for olketa savve story lo each other. Maet lo datfala taem, Peter gohed for tingting abaotem samfala samting.

4. Why nao Peter hem wanfala gud example for iumi followim?

⁴ Staka samting nao Peter ting raonem! Hem winim tufala year finis since firstaem wea Peter meetim Jesus blo Nazareth. Peter lanem staka samting finis, bat hem still need for lanem staka samting moa. From wei wea hem trae hard for no fraet and no daot, datwan nao mekem hem gud example for iumi followim. Bae iumi lukim why nao olsem.

“Mifala faendem nao datfala Messiah”!

5, 6. Wat kaen laef nao Peter garem?

⁵ Peter no savve forgetim day wea hem meetim Jesus. Brata blo hem, Andrew, nao kam talem datfala hapi nius, hem sei: “Mifala faendem nao datfala Messiah.” Olketa toktok hia changem laef blo Peter. Start from datfala taem, laef blo hem barava change nao.—John 1:41.

⁶ Peter stap lo Capernaum, wanfala city lo north saed blo Sea blo Galilee wea garem fresh wata. Hem and Andrew ranem wanfala fishing bisnis witim James and John, tufala son blo Zebedee. Peter and waef blo hem, mami-in-law blo hem and brata blo hem Andrew, olketa nao stay tugeta lo wanfala haos. Man wea duim fishing for provaedem need blo famili mas waka hard, strong and garem skill for duim datwan. Tingim olketa naet wea olketa man hia daonem net lo sea midol lo tufala boat blo olketa, and barava waka hard for pullim eni fish wea olketa kasem. Tingim tu olketa day wea olketa mas waka hard for separatem olketa fish and salem, and for repairim and klinim olketa net.

7. Wat nao Peter herem abaotem Jesus, and why nao datfala nius mekem hem hapi?

⁷ Bible sei Andrew hem disaepol blo John Baptaesa. Peter mas barava interest for herem wat brata blo hem talem abaotem message blo John. Wan day, Andrew lukim taem John pointim go Jesus blo Nazareth and sei: “Lukim go man hia, Pikinini Sheepsheep bilong God nao ia!” Semtaem nomoa, Andrew followim Jesus nao, and hem hapi tumas for talem disfala nius lo Peter: Messiah kam finis nao! (John 1:35-40) Bihaen nogud samting wea happen lo Eden, wea hem samting olsem 4,000 years ago, Jehovah God promisim dat wanfala spesol man bae kam wea bae givim tru hope lo olketa man. (Gen. 3:15) Andrew hem meetim disfala Man for sevem man, wea hem nao datfala Messiah! Peter tu hariap for go meetim Jesus.

8. Wat nao mining blo datfala nem wea Jesus givim lo Peter, and why nao samfala still kwestinim datfala nem?

⁸ Kam kasem datfala taem, evriwan savve lo Peter olsem Simon, or Simeon. Bat Jesus luk go lo hem and sei: “‘Iu nao Simon, son bilong John, bat bae olketa kolem iu Ceʹphas.’ (Long Greek languis disfala nem Ceʹphas hem Peter).” (John 1:42) “Cephas” hem minim “ston,” or “rock.” Samting wea Jesus talem hem wanfala profesi. Hem luksavve finis, Peter bae olsem wanfala rock, wea minim hem bae strong, stedy, and olketa wea followim Christ savve depend lo hem. Waswe, hem nao hao Peter ting lo hemseleva? Maet nomoa. Samfala wea readim olketa Gospel distaem tu no ting lo Peter olsem man wea stedy and wea pipol savve trustim. And tu, hao Bible storyim olketa wei blo Peter hem mekem samfala tingse Peter hem man wea no stedy and savve change mind evritaem.

9. Hao nao Jehovah and Son blo hem ting lo iumi, and why nao iumi shud trustim hao tufala ting lo iumi?

⁹ Peter garem olketa wik point. Jesus luksavve lo datwan. Bat olsem Dadi blo hem Jehovah, Jesus evritaem tingim gud samting wea pipol duim. Jesus luksavve Peter fit for duim staka samting for hem and hem helpem Peter for impruv lo olketa wei hia. Distaem tu, Jehovah and Son blo hem tingim olketa gud samting wea iumi fit for duim. Maet iumi tingse, tufala bae no lukim eni gud samting lo iumi. Bat iumi need for trustim tufala and pruvim iumi willing for tufala trainim iumi, and for iumi change followim datwan olsem Peter.—Readim 1 John 3:19, 20.

“Iu No Fraet”

10. Wat nao Peter lukim, bat wat nao mekem hem go bak?

¹⁰ Taem Jesus gogo raon for preach lo olketa ples, luk olsem Peter followim hem samfala taem. Maet hem lukim Jesus duim first mirakol for changem wata for kamap wine, wea datwan happen lo wedding feast lo Cana. Samting wea moa important, hem herem nambawan message blo Jesus abaotem Kingdom blo God wea givim hope. Nomata olsem, hem go bak lo fishing bisnis blo hem. Bihaen samfala month, Peter and Jesus meet moa. Lo datfala taem, Jesus askem Peter for followim hem olowe nao.

11, 12. (a) Wat kaen waka nao Peter duim full naet? (b) Taem hem herem Jesus teach, wat nao olketa kwestin wea Peter maet tingim?

¹¹ Peter hem waka hard for full naet and hem taed tumas. Olketa gohed for daonem net lo sea, bat olketa nating kasem eni fish nomoa. Peter mas traem evri teknik wea hem savve for kasem fish, and hem mas go lo olketa difren ples for lukaotem ples wea fish hem kaikai. Samfala taem, Peter garem sem tingting olsem olketa nara fisherman wea hem wish nomoa hem faendem staka fish, or mekem staka fish go insaed net blo hem. Bat kaen tingting olsem bae mekem hem feel nogud go moa. For Peter, wei for fishing hem no samting for hem enjoyim nomoa, bat pipol depend lo hem for mas kasem fish. Gogo, hem no tekem kam bak eni fish nomoa. Nomata olsem, hem mas klinim fishing net blo hem. Taem Peter busy for klinim datfala net, Jesus kam lo hem.

¹² Staka pipol hipap raonem Jesus bikos olketa barava laek herem taem hem teach. From datwan, Jesus go insaed boat blo Peter and talem hem for muv go aot lelebet from shore. Taem hem lo boat, pipol herem gud wat Jesus teachim. Peter and evri pipol wea hipap lo there barava lisin gud. Hem nating taed for herem story blo Jesus abaotem Kingdom blo God, wea hem nao main samting wea Jesus preach abaotem. Hem wanfala privilege for helpem Christ for preachim disfala message wea givim hope lo pipol lo evri ples! Waswe, Peter tingse hem fit for helpem Christ for duim datfala waka? Hao nao Peter bae provaed for famili blo hem? Maet Peter tingim moa datfala naet wea hem barava waka hard bat no kasem eni fish.—Luke 5:1-3.

13, 14. Wat kaen mirakol nao Jesus duim for Peter, and wat nao Peter duim?

¹³ Taem Jesus finis for story, hem sei lo Peter: “Tekem boat hia go long ples wea hem deep, and putim go net bilong iufala long sea for kasem fish.” Peter barava daotem datwan. Hem sei: “Teacher, mifala waka hard for full naet gogo mifala no kasem eni fish, bat bae mi daonem olketa net hia olsem iu talem.” Luk olsem, Peter barava no laek for daonem moa net blo olketa, bikos hem savve distaem bae fish no kaikai nao! Nomata olsem, hem obey nomoa and kolem kam olketa fren blo hem lo nara boat for followim olketa.—Luke 5:4, 5.

¹⁴ Taem Peter start for pullim net, hem sapraes tumas from hem hevi tumas. Hem pullim strong net hia, and hem seke tumas for lukim staka fish seksek insaed lo net! Hem barava needim help, so hem kolem olketa lo nara boat for kam helpem olketa. Taem olketa duim olsem, olketa luksavve wanfala boat no fitim evri fish hia. Nomata olketa fulimap tufala boat finis, staka fish stap yet, from hem hevi tumas tufala boat hia start for sink. Peter hem sapraes tumas. Hem lukim finis Christ iusim paoa blo hem for duim samting, bat distaem hem happen lo hem and famili blo hem! Disfala man hem garem paoa for mekem olketa fish go insaed net tu! Peter start for fraet nao. Hem nildaon and sei: “Lord, iu go from mi, bikos mi man wea sin.” Waswe, enitaem bae hem fit for followim man wea iusim paoa blo God lo wei olsem?—Readim Luke 5:6-9.

15. Hao nao Jesus teachim Peter for luksavve hem no garem eni reason for daot or fraet?

¹⁵ Lo kaenfala wei, Jesus sei: “Iu no fraet. Start long disfala taem, bae iu fishing for kasem pipol.” (Luke 5:10, 11) Distaem hem no taem for daot or fraet. Peter no garem eni reason for daotem sapos hem fit for provaedem need blo famili evriday, and tu, hem no need for fraet bikos lo olketa wik point blo hem. Jesus garem bigfala waka for duim, wea datwan nao bae changem future blo olketa man. God wea hem worshipim “bae barava forgivim hem.” (Isa. 55:7) Jehovah bae provaedem physical and spiritual need blo Peter.—Matt. 6:33.

16. Wat nao Peter, James, and John duim taem Jesus invaetem olketa, and why nao datwan hem best disison?

¹⁶ Peter kwiktaem duim samting. James and John tu duim sem samting. “Olketa go shore and lusim evri samting and go followim hem nao.” (Luke 5:11) Peter showimaot faith lo Jesus and lo God wea sendem kam Jesus. Datwan hem best disison wea hem mekem. Olketa Christian distaem wea winim eni daot wea olketa garem and wei for fraet, duim waka blo God olsem Peter, and datwan showimaot olketa garem faith. Wei for trustim Jehovah olsem hem barava stretfala samting for duim.—Ps. 22:4, 5.

“Hao Nao Iu Garem Daot Olsem?”

17. Wat nao Peter rememberim abaotem Jesus from tu years ago wea tufala meet?

¹⁷ Samting olsem tu years afta firstaem wea Jesus meetim Peter, hem nao datfala naet wea iumi storyim finis wea Peter padolem boat lo big wind lo Sea lo Galilee. Iumi no savve wat nao Peter ting raonem lo datfala taem. Staka samting nao hem rememberim! Jesus healim mami-in-law blo Peter. Hem givim datfala Sermon lo Maunten. Evritaem lo olketa teaching and mirakol wea hem duim, hem showimaot hem nao datfala Messiah wea Jehovah chusim. Lo olketa taem wea go pas, Peter start for kontrolem olketa wik point blo hem, olsem wei for kwiktaem fraet and daotem samting. Jesus chusim Peter tu for kamap wanfala lo olketa 12-fala aposol! Nomata olsem, samting wea bae happen lo Peter bae mekem hem luksavve hem no winim yet olketa wik point blo hem.

18, 19. (a) Storyim wat Peter lukim lo Sea blo Galilee. (b) Hao nao Jesus ansarem wat Peter askem?

¹⁸ Taem hem gogo for early morning, lo samting olsem 3 klok, Peter stop for padol and hem sidaon, hem lukim wanfala samting hem muv kam antap lo olketa wave! Waswe, datwan hem reflection blo moon wea shaen antap olketa wave? Nomoa, hem wanfala samting wea barava stedy antap wata. Hem wanfala man ia! Yes, hem wanfala man and hem wakabaot antap lo sea! Taem datfala man kakam klosap, luk olsem hem bae go pas lo olketa. Olketa disaepol fraet tumas and tingse olketa lukim wanfala vision. Datfala man sei long olketa: “Mi nomoa ia. Iufala no fraet.” Hem Jesus nao ia!—Matt. 14:25-28.

¹⁹ Peter sei lo hem: “Lord, sapos olsem, talem mi for wakabaot kam long iu antap long wata.” Firstaem, hem showimaot hem no fraet. From Peter hapi tumas for lukim datfala spesol mirakol, hem laek for duim samting for showimaot faith blo hem. Hem tu laek for experiencem wat hem happen. Lo kaenfala wei, Jesus talem Peter for kam lo hem. Peter go daon from boat and standap antap lo sea wea barava raf. Tingim feeling blo Peter taem hem savve dat hem standap strong antap lo wata. Hem mas barava sapraes taem hem wakabaot go lo Jesus. Bat hem start for tingim nara samting.—Readim Matthew 14:29.

20. (a) Why nao Peter no focus, and wat nao happen? (b) Wat important leson nao Jesus strongim lo Peter?

²⁰ Peter need for focus lo Jesus nomoa. Paoa blo Jehovah nao Jesus iusim, wea mekem Peter for no sink daon nomata lo big wind and raf sea. Jesus hem duim olsem bikos Peter showimaot faith lo hem. Bat Peter start for tingim difren samting. “Taem hem lukim strongfala wind hia hem fraet nao.” Peter lukluk lo olketa bigfala wave wea gohed bangam boat, datwan mekem hem fraet tumas and no savve wat for duim. Luk olsem hem tingim bae hem sink daon and draon. Taem hem barava fraet, faith blo hem wikdaon. Datfala man wea Jesus nemim hem Ston wea fit for stedy, hem start for sink daon olsem ston bikos faith blo hem wikdaon. Peter savve hao for swim, bat hem no tingim datwan nao. Hem singaot and sei: “Lord, sevem mi!” Jesus grabim hand blo hem and pullim hem kamap. Taem tufala standap yet antap lo wata, Jesus strongim disfala important leson lo Peter: “Faith bilong iu hem smol tumas, hao nao iu garem daot olsem?”—Matt. 14:30, 31.

21. Why nao wei for daot hem danger, and hao nao iumi savve faet againstim datwan?

²¹ Datfala toktok, “garem daot” hem barava fitim! Wei for daot hem samting wea savve barava spoelem man. Sapos iumi no winim wei for daot, datwan savve spoelem faith blo iumi and mekem iumi wikdaon lo spiritual wei. Iumi mas faet againstim datwan! Wanem nao bae iumi duim? Iumi mas focus evritaem. Sapos iumi gohed for tingim samting wea savve mekem iumi fraet, wikdaon, and wea mekem iumi no tingim Jehovah and Son blo hem, daot wea iumi garem bae winim iumi. Sapos iumi focus lo wat Jehovah and Son blo hem duim lo bifor, distaem, and lo future, for olketa wea lovem tufala, bae iumi no garem eni daot wea savve spoelem faith blo iumi.

22. Why nao hem gud for iumi followim example blo Peter?

²² Taem Peter followim Jesus go bak insaed boat, hem lukim datfala big wind hem finis nao. Sea lo Galilee barava kwaet nao. Peter and olketa nara disaepol sei lo hem: “Iu barava Son bilong God nao.” (Matt. 14:33) Taem hem start for daylaet, Peter mas barava tinghae lo samting wea happen. Firstaem hem fraet and garem daot bat hem winim datwan. Nomata olsem, hem mas changem staka samting bifor hem kamap strong Christian olsem rock, wea Jesus talem abaotem hem firstaem. Bat Peter disaed strong for gohed traem best and waka hard. Waswe, iu tu disaed strong duim datwan? Sapos olsem, iu savve garem sem faith olsem Peter tu.