Followim Faith Bilong Olketa

Hem Lanem Wei for Forgive From Masta

PETER nating forgetim datfala nogud taem wea hem and Jesus lukim each other. Waswe, Jesus feel nogud and kros lelebet? Iumi no savve, bat Bible sei: “Jesus hem lukluk go long Peter” nomoa. (Luke 22:61) Taem Jesus luk long Peter, Peter luksavve nao long nogud samting wea hemseleva duim. Hem luksavve hem duim nao samting wea hem strong for sei hem bae nating duim. Hem sei hem no savve long masta bilong hem wea hem lovem tumas. Masbi Peter barava feel nogud tumas nao long datfala taem.

Peter no need for givap. From Peter showimaot strongfala faith, hem garem chance for winim mistek bilong hem, and lanem wanfala important leson from Jesus. Hem lanem leson abaotem wei for forgive. Distaem, iumi bae lukim samting wea kasem Peter and lanem leson from datwan.

Peter Need for Lanem Staka Samting

Samting olsem six month bifor, long hom bilong Peter long Capernaum, hem askem Jesus: “Lord, sapos brata bilong mi gohed for sin againstim mi, haomas taem nao mi mas forgivim hem? Hao, sevenfala taem?” Maet Peter tingse wei for forgive sevenfala taem showimaot hem kaen tumas. Olketa bigman long religion long datfala taem teachim hao man mas forgive thrifala taem nomoa! Bat Jesus sei: “No sevenfala taem nomoa, bat seventi-seven taem.”​—Matthew 18:21, 22.

Waswe, Jesus minim Peter shud kaontem haomas taem man sin againstim hem? Nomoa, bat Jesus minim man shud gohed for forgivim narawan. Long datfala taem, hem wei bilong staka for no forgivim narawan, olsem man wea raetem daon evri kaon. Jesus luksavve datwan nao affectim tingting bilong Peter. Bat trufala wei for forgive hem minim, iumi mas gohed for forgive and no kaontem datwan.

Peter no kwestinim Jesus abaotem datwan. Bat waswe, leson wea Jesus teachim barava kasem heart bilong Peter? Samfala taem, iumi savve lane from olketa mistek bilong iumiseleva. So distaem, iumi bae lukim olketa samting wea happen just bifor Jesus dae. Long olketa lalas hour hia, Peter duim staka samting wea needim Masta for forgivim hem.

Need for Forgive Kamap Moa Big

Lastfala naet long laef bilong Jesus long earth hem wanfala important evening. Olketa aposol need for lanem staka samting from Jesus, olsem wei for hambol. Jesus hambol taem hem showimaot nambawan example and wasim leg bilong olketa aposol, samting wea olketa wakaman shud duim. Firstaem, Peter kwestinim wanem Jesus duim. Then, hem trae for stopem Jesus. Nextfala samting, hem askem Jesus for no wasim leg nomoa bat hand and hed bilong hem tu! Jesus no hotem Peter bat hem gohed for storyim why nao hem duim datwan.​—John 13:​1-​17.

No longtaem bihaen, olketa aposol raoa abaotem hu nao nambawan. Peter joinim tu olketa aposol hia wea bighed and praod. Nomata olsem, Jesus stretem tingting bilong olketa aposol hia long kaenfala wei, and hem praisem olketa bikos olketa gohed faithful long hem. Jesus sei olketa bae lusim hem. Peter sei hem bae no lusim Jesus nomata hem mas dae. Jesus talem profesi hao long datfala naet, wanfala kokorako bae krae mek-tu taem bihaen Peter sei thrifala taem hem no savve long Masta. Peter no agree long wanem Jesus talem, bat hem tokplas and tingse hem nao bae faithful winim olketa nara aposol!​—Matthew 26:31-​35; Mark 14:27-​31; Luke 22:24-​28.

Waswe, Jesus kros long Peter? Jesus gohed lukluk evritaem long gud saed nomata olketa aposol no perfect. Hem luksavve Peter bae lusim hem, bat Jesus sei: “Mi barava prea strong for iu, mekem faith wea iu garem hem no finis. Bihaen iu repent and gud bak, strongim olketa brata bilong iu.” (Luke 22:32) Long wei olsem, Jesus showimaot hem sure Peter bae winim datfala problem and gohed for faithful. Jesus willing tumas for forgive!

Long garden long Gethsemane, Jesus mas stretem Peter winim wanfala taem. Jesus askem Peter, James and John for gohed lukaot taem Hem prea. Jesus barava feel nogud tumas and needim sapot, bat evritaem Peter and olketa narawan sleep nomoa. Jesus tingim and forgivim olketa taem hem sei: “Nomata man savve laekem tumas for duim samting, maet body bilong hem no strong for duim wanem hem laekem.”​—Mark 14:32-​38.

No longtaem bihaen, staka pipol kam wea holem olketa laet and samting for faet. Hem taem nao for tingting gud and wise. Nomata olsem, Peter no tingting gud firstaem, bat hem kwiktaem trae for katemaot hed bilong Malchus, wea hem wakaman bilong hae priest. Bat hem katemaot nomoa ear bilong datfala man. Jesus stretem tingting bilong Peter, and healim ear bilong datfala man. Then Jesus teachim important leson for no raf, wea olketa tru Christian followim kam kasem distaem. (Matthew 26:47-​55; Luke 22:47-​51; John 18:10, 11) Staka samting wea Peter duim, Masta forgivim hem. Datwan mekem iumi tingim, “iumi evriwan mistek staka taem.” (James 3:2) Tru nao, evriday iumi needim God for forgivim iumi! Staka samting yet bae happen long Peter long datfala naet. Bat worse samting moa hem bae duim.

Peter Duim Worse Samting

Jesus talem sekson wea kam sapos olketa lukaotem hem, olketa shud letem olketa aposol go. Taem olketa taemapem Jesus, Peter no savve duim eni samting bat hem lukluk nomoa. Then Peter and olketa nara aposol ranawe.

Peter and John ranawe and maet tufala stop klosap long haos bilong Annas wea hem Hae Priest bifor. Hem nao ples wea olketa tekem Jesus firstaem for kwestinim hem. Taem olketa tekem Jesus from there, Peter and John go bihaenem olketa bat “no go klosap long hem.” (Matthew 26:58; John 18:12, 13) Peter hem no man for fraet. Hem willing for followim Jesus. Datfala sekson karem olketa samting for faet and Peter katem finis wanfala long olketa. Nomata olsem, Peter promis hem willing for dae long saed bilong Masta sapos need kamap. Bat kasem datfala taem, hem nating stap klosap long Jesus.​—Mark 14:31.

Distaem staka pipol tu olsem Peter. Olketa “no go klosap long” Christ bikos olketa trae for followim hem, bat no laekem nara pipol for savve long datwan. Bat bihaen, Peter sei for followim stretfala wei, iumi mas fren gud witim Christ, and followim example bilong hem nomata wanem samting kasem iumi.​—1 Peter 2:​21.

Peter hem keakea taem hem go bihaenem olketa wea tekem Jesus, and hem kasem gate bilong wanfala big haos long Jerusalem. Hem haos bilong hae priest Caiaphas, wea hem rich and garem bigfala paoa. Plande taem, olketa bigfala haos olsem garem gate long front and area long midol long haos wea no eni ruf kavarem. Peter kasem gate, bat olketa no letem hem for go insaed. John go insaed finis, then hem kam bak and askem gele wea lukaftarem gate for letem Peter kam insaed. Luk olsem Peter no stap klosap long John, and hem no trae for go insaed haos for standap saed long Masta. Peter stap long datfala area witim samfala man wea waka long datfala haos. From hem cold tumas olketa wakem bigfala fire, and olketa lukim samfala pipol wea kam for talem laea story againstim Jesus.​—Mark 14:54-​57; John 18:15, 16, 18.

Gele wea letem Peter kam insaed long gate lukim Peter taem hem klosap long fire. Gele hia luksavve long Peter. Hem sei: “Mi lukim iu tu iu gogo witim Jesus bilong Galilee!” From Peter seke long datwan, hem sei hem no savve long Jesus and samting wea disfala gele storyim. Peter go and stap klosap long gate mekem no eniwan luksavve long hem, bat nara gele lukim hem and talem sem samting: “Disfala man tu hem savve gogo witim Jesus bilong Nazareth.” Peter tok strong olsem: “Mi no savve long datfala man!” (Matthew 26:69-​72) Bihaen hem sei hem no savve long Jesus mek-tu taem, maet hem herem wanfala kokorako krae. Bat from evri samting wea gohed for happen, hem no tingim nao profesi wea Jesus talem tu-thri hour go finis.

Bihaen, Peter trae hard for mekem no eniwan luksavve long hem. Bat samfala pipol wea standap long datfala area kam long hem. Wanfala long olketa, hem relative bilong Malchus datfala wakaman wea Peter katemaot ear bilong hem. Hem sei long Peter: “Iu nao mi lukim witim hem long garden, iaman?” Peter trae hard for sei, olketa no tok tru. So hem barava tok strong and sei, nogud samting bae kasem hem sapos hem no tok tru. Semtaem nomoa, kokorako krae nao. Datwan nao mek-tu taem wea kokorako krae long datfala naet.​—John 18:26, 27; Mark 14:71, 72.

Jesus kamaot long varanda wea hem savve luk daon long datfala area. Long datfala taem nao olsem iumi storyim finis, Jesus luk long eye bilong Peter. Long datfala taem nomoa Peter luksavve hem duim barava nogud samting long Masta bilong hem. Peter lusim datfala ples bikos hem barava feel sorre. Hem no savve tingting stret nao bikos hem wiki tumas. Gogo hem krae fogud.​—Mark 14:72; Luke 22:61, 62.

Bihaen man duim eni bigfala sin olsem, hem isi tumas for tingse God no savve forgivim hem. Maet Peter tu ting olsem. Waswe, Peter no savve kasem forgiveness?

Waswe, Peter No Savve Kasem Forgiveness?

Hem hard for barava minim feeling bilong Peter long datfala day taem sun kamap, and olketa nara samting wea happen. Bihaen Jesus safa for samfala hour and dae long datfala aftanun, masbi Peter kros long hemseleva! Peter mas tingim samting wea hem duim mekem Masta bilong hem feel nogud tumas long last day bilong Hem. Nomata Peter barava sorre tumas, hem no letem datwan winim hem. Iumi savve datwan hem tru bikos no longtaem nomoa, hem stap moa witim olketa brata bilong hem. (Luke 24:33) Hem tru nao, evri aposol mas feel nogud abaotem samting wea olketa duim long datfala naet, so olketa savve comfortim each other lelebet.

Samting wea Peter duim showimaot hem wise. Taem wanfala man wea worshipim God foldaon long sin, samting wea important tumas hem no hao big nao datfala sin, bat wei hem trae hard for stretem datwan. (Proverbs 24:16) Peter showimaot trufala faith taem hem hipap witim olketa brata bilong hem nomata hem feel nogud. Taem man barava sorre and feel nogud, hem isi tumas for laek stap seleva bat datwan hem danger tumas. (Proverbs 18:1) Wise samting for duim, hem for fren gud witim olketa wea garem sem biliv and kasem bak strong for gohed worshipim God.​—Hebrews 10:24, 25.

Bikos Peter stap witim olketa spiritual brata bilong hem, datwan mekem hem herem nius hao body bilong Jesus no stap long cave. Peter and John ran go long cave wea olketa putim body bilong Jesus insaed long hem. Maet John young winim Peter and hem nao arrive firstaem. Taem John lukim cave open, hem stop nao. Bat Peter no duim olsem. Nomata hem shortwind, hem ran stret insaed cave. Bat hem emti!​—John 20:​3-9.

Waswe, Peter bilivim Jesus hem laef bak? Nomata samfala faithful woman lukim olketa angel wea talem nius hao Jesus hem laef bak, hem no biliv yet. (Luke 23:⁠55–24:11) Bat long end long datfala day, evri feeling bilong Peter for sorre and daot hem finis nao. Jesus hem laef bak, and distaem hem wanfala maeti spirit! Hem showim hemseleva long evri aposol bilong hem. Bat firstaem, hem duim nara samting for Peter seleva. Olketa aposol sei: “Tru ia, Lord hem laef bak and Simon lukim hem!” (Luke 24:34) Aposol Paul tu storyim datfala spesol day wea Jesus “kam long Cephas, then long twelvfala.” (1 Corinthians 15:5) Cephas and Simon hem tufala nara nem bilong Peter. Diswan pruvim hao long datfala day, Jesus showim hemseleva long Peter taem hem stap seleva.

Bible no talem eni samting moa abaotem datfala spesol taem wea Jesus and Peter meet bak moa. Iumi savve tingim feeling bilong Peter taem hem lukim Lord wea hem lovem hem laef bak, and Peter garem chance for talemaot wei wea hem sorre tumas and for repent. Winim eni samting long disfala world, Peter laek for kasem forgiveness. Iumi sure Jesus barava forgivim hem. Olketa Christian distaem wea foldaon long sin need for tingim samting wea happen long Peter. Iumi shud no tingse hem hard tumas for God forgivim iumi. Jesus barava followim Dadi bilong hem, wea “bae forgive long bigfala wei.”​—Isaiah 55:7.

Nara Pruv God Savve Forgive

Jesus talem olketa aposol bilong hem for go long Galilee for meetim hem moa. Taem olketa kasem there, Peter hem go fishing long Sea long Galilee. Samfala narawan tu go witim hem. Peter barava savve gud long datfala ples. Taem hem herem olketa wave bangam boat and hem holem net, hem mas feel gud bikos hem samting wea hem duim olowe. Long datfala naet, waswe, hem tingim wanem nao bae hem duim long future bikos ministry bilong Jesus long earth hem finis nao? Waswe, hem laek tumas for gohed olsem man for fishing? Nomata wanem Peter tingim, long datfala full naet olketa no kasem eni fish.​—Matthew 26:32; John 21:​1-3.

Bat long early morning, samwan singaot from shore and talem olketa for daonem net long nara saed long boat. Taem olketa duim datwan, olketa pullim 153 fish! Peter savve hu nao datfala man. So hem jamp go long sea and swim go long shore. Long sandbis, Jesus givim fish long olketa wea hem kukim long sakol. Main wan wea hem story witim nao hem Peter.

Jesus askem Peter sapos hem lovem Lord bilong hem “winim olketa hia.” Hem point long staka fish wea olketa kasem. From Peter lovem fishing bisnis, waswe, bae datwan winim love wea hem showimaot for Jesus? From Peter sei hem no savve long Jesus thrifala taem, Jesus askem Peter thrifala taem for showimaot hem lovem hem front long olketa fren bilong hem. Taem Peter duim olsem, Jesus talem hem for showimaot love taem hem putim olketa holy waka firstaem winim eni nara samting, and for givim kaikai and lukaftarem gud olketa sheepsheep wea followim Christ.​—John 21:​4-​17.

Long wei olsem, Jesus pruvim hao hem laekem yet for Peter waka for hem and Dadi bilong hem. Peter savve duim bigfala waka insaed kongregeson anda long Christ. Datwan hem bigfala pruv hao Jesus barava forgivim Peter! Tru nao, Peter mas feel gud tumas from hem kasem mercy.

Peter gohed faithful long assignment bilong hem for staka year. Hem strongim olketa brata bilong hem, olsem Jesus talem long evening bifor Hem dae. Peter gohed for kaen and patient taem hem lukaftarem and feedim olketa sheepsheep wea followim Christ. Disfala man wea nem bilong hem Simon live followim nem wea Jesus givim, wea hem nao Peter, or Bigfala Ston. Diswan showimaot Peter hem stedy, strong, and kamap bigfala help for kongregeson. Tufala buk bilong Bible wea Peter raetem showimaot datwan. Tufala buk hia showimaot tu, Peter nating forgetim leson wea hem lanem from Jesus abaotem forgiveness.​—1 Peter 3:​8, 9; 4:8.

Iumi tu savve lanem leson from datwan. Waswe, evriday iumi askem God for forgivim olketa mistek bilong iumi? Waswe, iumi showimaot faith long wei wea God savve forgivim iumi and mekem iumi kamap klin? And waswe, iumi tu forgivim olketa narawan? Sapos iumi duim olsem, iumi bae showimaot faith olsem Peter, and followim mercy bilong Masta bilong hem.

[Piksa long page 22]

Peter duim staka samting for mekem Masta bilong hem forgivim hem, bat iumi tu needim Jesus for forgivim iumi evri day.

[Piksa long page 23]

“Jesus hem lukluk go long Peter”

[Piksa long page 24]

‘Simon hem lukim Lord!’