Hem Lanem Forgiveness From Masta blo Hem

1. Wat nao maet wanfala worse samting wea happen lo laef blo Peter?

PETER no savve forgetim datfala taem wea hem and Jesus luk lo each other. Waswe, hem luksavve dat Jesus feel nogud or kros lelebet? Iumi no savve, bat Bible sei: “Jesus hem lukluk go long Peter.” (Luke 22:61) Bat semtaem wea Jesus luk lo Peter, Peter luksavve lo mistek blo hem. Hem luksavve hem duim nao samting wea hem strong for sei hem bae no duim. Hem denyim Masta blo hem wea hem lovem tumas. Masbi Peter barava feel nogud, datwan hem wanfala worse samting wea happen lo laef blo Peter.

2. Wanem leson nao Peter need for lanem, and hao nao iumi savve kasem gud samting from story blo hem?

² Disfala situation no mekem Peter for lus hope. From Peter hem man wea garem strongfala faith, hem garem chance for winim mistek blo hem, and lanem wanfala important leson from Jesus. Hem lanem leson abaotem wei for forgive. Each wan lo iumi need for lanem leson from datwan, so distaem bae iumi storyim disfala hard situation wea Peter deal witim.

Peter Need for Lanem Staka Samting

3, 4. (a) Wanem kwestin nao Peter askem Jesus, and wat nao maet Peter tingim? (b) Hao nao Jesus showim lo Peter dat hem garem tingting blo pipol lo datfala taem?

³ Samting olsem six month bifor, lo hom blo Peter lo Capernaum, hem askem Jesus: “Lord, sapos brata bilong mi gohed for sin againstim mi, haomas taem nao mi mas forgivim hem? Hao, sevenfala taem?” Maet Peter tingse wei for forgive sevenfala taem showimaot hem kaen tumas. Olketa bigman lo religion lo datfala taem teachim hao man mas forgive thrifala taem nomoa! Bat Jesus sei: “No sevenfala taem nomoa, bat seventi-seven taem.”—Matt. 18:21, 22.

⁴ Waswe, Jesus minim Peter shud kaontem haomas taem man sin againstim hem? Nomoa, taem Jesus changem datfala namba 7 go lo 77, hem minim dat man wea garem love hem no tingim olowe nogud samting wea narawan duim lo hem, bat hem gohed for forgive. (1 Cor. 13:4, 5) Jesus showim lo Peter dat hem garem tingting blo pipol lo datfala taem wea bighed and wea no willing for forgive, olketa gohed keepim record olsem man wea raetem daon evri kaon. Bat for followim example blo Jehovah for forgive hem minim for iumi kaen and willing for forgive evritaem.—Readim 1 John 1:7-9.

5. Wat taem nao maet iumi lane for barava forgive?

⁵ Peter no argue witim Jesus. Bat waswe, leson wea Jesus teachim barava kasem heart blo Peter? Samfala taem, iumi lane for barava forgive, taem iumi luksavve iumiseleva tu barava needim forgiveness. So distaem, iumi bae lukim olketa samting wea happen just bifor Jesus dae. Lo olketa last hour hia wea no isi, Peter duim staka samting wea needim forgiveness from Masta blo hem.

Need for Barava Forgive

6. Wat nao Peter duim taem Jesus trae for teachim olketa aposol abaotem wei for hambol, bat hao nao Jesus treatim hem?

⁶ Hem wanfala important evening, bikos hem last naet blo Jesus lo earth. Olketa aposol need for lanem staka samting from Jesus, olsem wei for hambol. Jesus showimaot nambawan example for hambol taem hem wasim leg blo olketa aposol, wea datwan hem waka blo olketa servant wea pipol luk daonem olketa. Firstaem, Peter kwestinim wat Jesus duim. Then, hem stopem Jesus for wasim leg blo hem. Next samting, hem askem Jesus for no wasim leg nomoa, bat hand and hed blo hem tu! Jesus patient witim Peter and explainim why hem important for duim datwan and mining blo wat hem duim.—John 13:1-17.

7, 8. (a) Hao nao Peter testim moa wei wea Jesus patient? (b) Hao nao Jesus gohed for showimaot hem kaen and gohed forgive?

⁷ No longtaem bihaen, Peter testim moa wei wea Jesus patient. Olketa aposol raoa abaotem hu nao important lo olketa and Peter joinim tu olketa aposol hia wea bighed and praod. Nomata olsem, Jesus stretem tingting blo olketa aposol hia lo kaenfala wei, and hem praisem olketa bikos olketa gohed faithful lo hem. Jesus talem olketa hao gogo olketa bae lusim hem. Peter sei hem bae no lusim Jesus nomata hem mas dae. Jesus talem profesi hao lo datfala naet, Peter bae denyim Masta blo hem thrifala taem, and then wanfala kokorako bae krae tufala taem. Peter no agree lo wanem Jesus talem, bat hem tok praod and tingse hem nao bae faithful winim olketa nara aposol!—Matt. 26:31-35; Mark 14:27-31; Luke 22:24-28; John 13:36-38.

⁸ Waswe, Jesus no patient nao witim Peter? Nomata lo olketa hard taem hia, Jesus gohed lukluk evritaem lo gud saed blo olketa aposol hia wea no perfect. Hem luksavve Peter bae lusim hem, bat Jesus sei: “Mi barava prea strong for iu, mekem faith bilong iu no wik. Bihaen iu repent and gud bak, strongim olketa brata bilong iu.” (Luke 22:32) Jesus showimaot hem barava sure Peter bae repent from mistek blo hem, and bae hem gohed faithful lo waka blo hem. Jesus showimaot hem kaen and gohed forgive!

9, 10. (a) Lo garden blo Gethsemane, wanem kaonsel nao Peter needim? (b) Mistek blo Peter remindim iumi lo wanem samting?

⁹ Bihaen, lo garden blo Gethsemane, tu-thri taem Jesus mas stretem Peter. Jesus askem Peter, James and John for gohed wekap taem Hem prea. Jesus barava feel wari tumas and needim sapot, bat evritaem Peter and olketa narawan sleep nomoa. Jesus tingim and forgivim olketa, taem hem sei: “Nomata man savve laekem tumas for duim samting, maet body bilong hem no strong for duim wanem hem laekem.”—Mark 14:32-41.

¹⁰ No longtaem bihaen, staka pipol kam wea holem olketa laet and samting for faet. Hem taem for lukaot and tingting gud. Nomata olsem, Peter no tingting gud firstaem, bat hem kwiktaem tekem sword and laek katemaot hed blo Malchus, wea hem wakaman blo hae priest, bat hem katemaot nomoa ear blo datfala man. Lo kaenfala wei, Jesus stretem Peter, and healim ear blo datfala man. Then Jesus teachim important leson for no raf, wea olketa tru Christian followim kam kasem distaem. (Matthew 26:47-55; Luke 22:47-51; John 18:10, 11) Peter duim finis staka mistek wea needim forgiveness from Masta blo hem. Datwan mekem iumi tingim hao iumi evriwan mistek staka taem. (Readim James 3:2.) Tru nao, evriday iumi needim God for forgivim iumi! Staka samting yet bae happen lo Peter lo datfala naet. Worse samting moa hem bae duim.

Peter Duim Worse Samting

11, 12. (a) Hao nao Peter showimaot hem no fraet afta olketa arrestim Jesus? (b) Lo olketa wanem wei nao Peter no duim wanem hem talem firstaem?

¹¹ Jesus talem sekson wea kam sapos olketa lukaotem hem, olketa shud letem olketa aposol go. Peter no savve duim eni samting bat hem lukluk nomoa taem olketa holem Jesus. Then Peter and olketa nara aposol ranawe.

¹² Peter and John ranawe and maet tufala stop klosap lo haos blo Annas wea hem Hae Priest bifor, hem nao ples wea olketa tekem Jesus firstaem for kwestinim hem. Taem olketa tekem Jesus from there, Peter and John go followim olketa bat tufala “no go klosap long hem.” (Matthew 26:58; John 18:12, 13) Peter hem no man for fraet. Hem willing for followim Jesus lo eni ples wea olketa tekem hem. Datfala sekson karem tu olketa samting for faet, and Peter katem finis ear blo wanfala lo olketa. Nomata olsem, iumi no lukim Peter showimaot loyal love wea hem talem firstaem, taem hem sei hem willing for dae lo saed blo Masta sapos need kamap.—Mark 14:31.

13. Wat nao only wei for followim Christ lo stretfala wei?

¹³ Olsem Peter, staka pipol distaem “no go klosap long” Christ, olketa trae for followim hem bat no laekem nara pipol for savve lo datwan. Bat bihaen, Peter sei for followim Christ lo stretfala wei, iumi mas fren gud witim Hem, and followim example blo Hem lo evriting nomata wanem samting kasem iumi.—Readim 1 Peter 2:21.

14. Wat nao Peter duim lo naet taem olketa gohed kwestinim Jesus?

¹⁴ Peter hem careful taem hem gogo bihaen olketa wea tekem Jesus, and hem kasem gate blo wanfala big haos lo Jerusalem. Hem haos blo hae priest Caiaphas, wea hem rich and garem bigfala paoa. Staka taem, olketa bigfala haos olsem garem gate lo front and area lo midol lo haos wea no eni ruf antap wea olketa kolem lo courtyard. Peter kasem gate, bat olketa no letem hem for go insaed. John wea savve lo datfala hae priest, hem go insaed finis, then hem kam bak and askem olketa wea lukaftarem gate for letem Peter kam insaed. Luk olsem Peter no kam klosap lo John, and hem no trae for go insaed haos for standap saed lo Masta blo hem. Peter lo courtyard witim samfala man wea waka lo datfala haos and naet hem cold tumas, evriwan sidaon front lo wanfala big fire, and olketa watchim pipol wea gohed arrive for talem laea story for accusim Jesus lo kot.—Mark 14:54-57; John 18:15, 16, 18.

15, 16. Storyim hao profesi blo Jesus hem fulfill abaotem wei for denyim hem thrifala taem.

¹⁵ Gele wea letem Peter kam insaed lo gate lukim klia Peter taem hem klosap lo fire. Gele hia luksavve lo Peter. Hem sei: “Mi lukim iu tu iu gogo witim Jesus bilong Galilee!” Peter seke lo datwan and sei hem no savve lo Jesus and samting wea disfala gele storyim. Peter go and stap klosap lo gate mekem no eniwan luksavve lo hem, bat nara gele lukim hem and talem sem samting: “Disfala man tu hem savve gogo witim Jesus bilong Nazareth.” Peter tok strong olsem: “Mi no savve long datfala man!” (Matthew 26:69-72) Maet bihaen Peter denyim Jesus mek-tu taem nao hem herem wanfala kokorako krae, bat from evri samting wea gohed for happen, hem no tingim nao profesi wea Jesus talem tu-thri hour go finis.

¹⁶ Bihaen, Peter trae hard for mekem no eniwan luksavve lo hem. Bat samfala pipol wea standap lo courtyard kam lo hem. Wanfala lo olketa hem relative blo Malchus, datfala wakaman wea Peter katemaot ear blo hem. Hem sei lo Peter: “Iu nao mi lukim witim hem long garden, iaman?” Peter trae hard for sei, wat olketa hia talem hem no tru. So hem barava tok strong and sei, hem bae kasem nogud samting sapos hem no tok tru. Datwan hem mek-thri taem wea Peter denyim Jesus. Semtaem nomoa kokorako krae nao. Datwan nao mek-tu taem wea Peter herem kokorako krae lo datfala naet.—John 18:26, 27; Mark 14:71, 72.

17, 18. (a) Hao nao Peter feel taem hem luksavve lo nogud samting wea hem duim lo Masta blo hem? (b) Wat nao Peter maet tingim?

¹⁷ Jesus just kamaot lo varanda antap wea hem savve luk daon lo datfala courtyard. Lo datfala taem nao olsem iumi storyim finis, Jesus luk lo eye blo Peter. Lo datfala taem nomoa, Peter luksavve hem duim barava nogud samting lo Masta blo hem. Peter lusim datfala courtyard bikos hem barava feel guilty. Hem wakabaot go aot lo street blo datfala city, wea still dark yet. Tias fulap lo eye blo hem then gogo hem krae big nao.—Mark 14:72; Luke 22:61, 62.

¹⁸ Bihaen man duim bigfala sin olsem, hem isi tumas for tingse hard for hem kasem forgiveness for sin blo hem. Maet Peter tu ting olsem. Hao, Peter no savve kasem forgiveness nao?

Hao, Peter No Fit for Kasem Forgiveness Nao?

19. Hao nao Peter feel abaotem mistek blo hem, bat hao nao iumi savve hem no letem datwan mekem hem givap?

¹⁹ Hem hard for imaginim feeling blo Peter lo datfala day taem hem daylaet, and olketa nara samting moa happen. Bihaen Jesus safa for samfala hour and dae lo datfala aftanun, masbi Peter kros lo hemseleva! Peter mas tingim samting wea hem duim mekem Masta blo hem feel nogud tumas lo last day blo Hem. Nomata Peter barava sorre tumas, hem no letem datwan for mekem hem givap. Iumi savve datwan hem tru bikos no longtaem bihaen, hem stap moa witim olketa spiritual brata blo hem. (Luke 24:33) Masbi evri aposol feel nogud tumas abaotem samting wea olketa duim lo datfala naet, so olketa savve comfortim each other.

20. Wat nao iumi savve lanem from wanfala lo olketa wise disison wea Peter mekem?

²⁰ Wanfala lo olketa samting wea Peter duim showimaot hem wise. Taem wanfala man wea worshipim God foldaon lo sin, important samting hem no hao big nao datfala sin, bat hem wei wea hem disaed strong for getap and trae hard for stretem datwan. (Readim Proverbs 24:16.) Peter showimaot trufala faith taem hem hipap witim olketa brata blo hem nomata hem feel nogud. Taem man barava sorre and feel nogud, hem isi tumas for laek stap seleva bat datwan hem danger tumas. (Prov. 18:1) Wise samting for duim, hem for fren gud witim olketa wea iumi garem sem biliv, and kasem bak strong for gohed worshipim God.—Heb. 10:24, 25.

21. From Peter hipap witim olketa spiritual brata blo hem, wat kaen nius nao hem herem?

²¹ Bikos Peter stap witim olketa spiritual brata blo hem, datwan mekem hem herem nius hao body blo Jesus no stap lo tomb. Peter and John ran go lo tomb wea olketa putim body blo Jesus insaed. Maet John young winim Peter and hem nao arrive firstaem. Taem John lukim datfala tomb open, hem hol bak for go insaed. Bat Peter no duim olsem. Nomata hem shortwind, hem ran stret insaed tomb. Bat hem emti!—John 20:3-9.

22. Wat nao mekem evri sorre feeling and daot blo Peter for finis?

²² Waswe, Peter bilivim Jesus hem laef bak? Nomata samfala faithful woman lukim olketa angel wea talem nius hao Jesus hem laef bak, Peter no biliv yet. (Luke 23:55–24:11) Bat lo end blo datfala day, evri feeling blo Peter for sorre and daot hem finis nao. Jesus hem laef bak, and distaem hem wanfala maeti spirit! Hem showim hemseleva lo evri aposol blo hem. Bat firstaem, hem duim nara samting for Peter seleva. Olketa aposol sei: “Tru ia, Lord hem laef bak and Simon lukim hem!” (Luke 24:34) Aposol Paul tu storyim datfala spesol day wea “Ceʹphas lukim hem, then twelvfala aposol lukim hem tu.” (1 Cor. 15:5) Cephas and Simon hem tufala nara nem blo Peter. Diswan pruvim hao lo datfala day, Jesus showim hemseleva lo Peter taem hem stap seleva.

23. Why nao olketa Christian distaem wea duim serious sin need for tingim wat happen lo Peter?

²³ Bible no talem eni detail moa abaotem spesol taem wea Jesus and Peter meet bak moa. Imaginim feeling blo Peter taem hem lukim Lord wea hem lovem hem laef bak, and Peter garem chance for talemaot wei wea hem sorre tumas and showimaot hem repent. Winim eni samting lo disfala world, Peter laek for kasem forgiveness. Iumi sure Jesus barava forgivim hem. Olketa Christian distaem wea duim serious sin need for tingim samting wea happen lo Peter. Iumi shud no tingse hem hard tumas for God forgivim iumi. Jesus followim Dadi blo hem, wea savve “barava forgivim” iumi olketa man.—Isa. 55:7.

Nara Pruv blo Forgiveness

24, 25. (a) Storyim wat hem happen lo naet wea Peter go fishing lo Sea blo Galilee. (b) Hao nao Peter feel abaotem mirakol blo Jesus lo next morning?

²⁴ Jesus talem olketa aposol blo hem for go lo Galilee for meetim hem moa. Taem olketa arrive, Peter go fishing lo Sea blo Galilee. Samfala narawan tu go witim hem. Peter barava savve gud lo datfala ples bikos hem bin spendem staka taem lo there. Taem hem herem olketa wave bangam boat and hem holem net, hem mas hapi tumas bikos hem samting wea hem duim olowe. Lo datfala full naet olketa no kasem eni fish.—Matt. 26:32; John 21:1-3.

²⁵ Bat lo early morning, samwan singaot from shore and talem olketa for daonem net lo narasaed blo boat. Taem olketa duim datwan, olketa pullim 153 fish! Peter savve hu nao datfala man. So hem jamp from boat and swim go lo shore. Lo sandbis, Jesus givim lo olketa fren blo hem, olketa fish wea hem bonem lo sakol. Main wan wea hem story witim nao hem Peter.—John 21:4-14.

26, 27. (a) Wat nao Jesus talem Peter for duim thrifala taem? (b) Wat nao pruvim Jesus barava forgivim Peter?

²⁶ Jesus askem Peter sapos hem lovem Lord blo hem “winim olketa hia,” and maet hem point lo staka fish wea olketa kasem. From Peter lovem fishing bisnis, waswe, bae datwan winim love wea hem garem for Jesus? From Peter sei hem no savve lo Jesus thrifala taem, Jesus askem Peter thrifala taem for showimaot hem lovem hem front lo olketa fren blo hem. Taem Peter duim olsem, Jesus talem hem for showimaot love taem hem putim olketa holy waka firstaem winim eni nara samting, and for feedim, strongim, and shepherdim olketa sheepsheep wea followim Christ.—Luke 22:32; John 21:15-17.

²⁷ Taem Jesus duim olsem, datwan pruvim hao hem laekem yet for Peter waka for hem and Dadi blo hem. Peter savve duim bigfala waka insaed kongregeson anda lo direction blo Christ. Datwan hem bigfala pruv wea showimaot Jesus barava forgivim Peter! Tru nao, Peter tinghae lo wei wea Jesus showimaot mercy lo hem.

28. Hao nao Peter duim samting followim nem wea Jesus givim hem?

²⁸ Peter gohed faithful lo assignment blo hem for staka year. Hem strongim olketa brata blo hem, olsem Jesus talem lo evening bifor Hem dae. Peter gohed for kaen and patient taem hem lukaftarem and feedim olketa sheepsheep wea followim Christ. Disfala man wea nem blo hem Simon duim samting followim nem wea Jesus givim lo hem, wea hem nao Peter, or Rock, wea diswan showimaot Peter hem stedy, strong, and fit for helpem kongregeson. Iumi lukim pruv blo olketa samting hia lo tufala buk lo Bible wea Peter raetem. Tufala leta hia showim tu Peter nating forgetim leson wea hem lanem from Jesus abaotem forgiveness.—Readim 1 Peter 3:8, 9; 4:8.

29. Hao nao iumi showimaot faith olsem Peter and followim example blo Masta blo hem for showimaot mercy?

²⁹ Iumi tu savve lanem leson from datwan. Waswe, evriday iumi askem God for forgivim olketa mistek blo iumi? Waswe, iumi showimaot faith lo wei wea God savve forgivim iumi, and mekem iumi klin? And waswe, iumi forgivim olketa narawan tu? Sapos iumi duim olsem, iumi bae followim faith blo Peter, and followim example blo Masta blo hem for showimaot mercy.