Datfala Mirakol lo Red Sea

Semtaem Pharaoh herem olketa Israelite lusim Egypt, hem changem mind blo hem. Hem komandim army blo hem: ‘Redyim olketa war chariot blo mi and iumi aftarem olketa! Iumi shud no letem olketa go.’ Hem and army blo hem aftarem olketa Israelite.

Jehovah iusim cloud lo daytaem and fire lo naet for leadim pipol blo hem. Hem leadim olketa go lo Red Sea and talem olketa for camp lo there.

Then olketa Israelite lukim Pharaoh and army blo hem aftarem olketa. Olketa Israelite no wei nao, bikos olketa lo midol, Red Sea lo front and army blo Egypt lo bihaen. Olketa krae go lo Moses: ‘Mifala bae dae nao! Why nao iu leadim mifala go aot from Egypt?’ Bat Moses sei: ‘Iufala no fraet. Standap kwaet and lukim hao Jehovah bae sevem iumi.’ Moses barava trustim Jehovah, iaman?

Jehovah talem olketa Israelite for daonem tent blo olketa. Lo datfala naet, Jehovah muvim datfala cloud and putim between olketa Egyptian and olketa Israelite. Lo saed blo olketa Egyptian hem dark. Bat lo saed blo olketa Israelite hem laet.

Jehovah talem Moses for liftimap hand blo hem ovarem datfala sea. Then Jehovah mekem wanfala strong wind for blow full naet. And sea hia start for divaed lo tufala haf, and hem garem road lo midol for wakabaot followim. Staka million Israelite hia wakabaot lo drae graon, between tufala wall blo sea for go kasem nara saed.

Army blo Pharaoh go bihaenem olketa Israelite insaed drae graon lo botom lo sea. Then Jehovah mekem army blo Pharaoh for konfius. Olketa wheel lo olketa chariot blo olketa start for aot. Olketa soldia singaot olsem: ‘Iumi go aot from hia! Jehovah nao hem faet for olketa.’

Jehovah sei lo Moses: ‘Liftimap hand blo iu ovarem datfala sea.’ Semtaem nomoa, datfala wall blo sea foldaon ontop army blo Egypt. Pharaoh and evri soldia blo hem dae. No eniwan lo olketa hem laef.

Lo nara saed lo sea, wanfala big grup blo pipol singsing for praisem God: “Sing lo Jehovah, bikos hem kasem bigfala praise. Hem torowem horse and man wea raedem insaed sea.” Taem olketa singsing, olketa woman dance and pleim olketa tambourine. Evriwan hapi tumas bikos olketa free nao.