Lanem Olketa Wei Bilong Jehovah
“Mekem mi savve . . . long olketa wei bilong iu, mekem mi savve long iu.”—EXODUS 33:13.
1, 2. (a) Taem Moses lukim wanfala man bilong Egypt spoelem wanfala Hebrew man, why nao hem killim hem dae? (b) For kamap fit for duim waka bilong Jehovah, wanem nao Moses need for lanem?
MOSES growap insaed famili bilong Pharaoh, and olketa teachim hem kaen savve wea olketa hae class pipol bilong Egypt tinghae long hem. Nomata olsem, Moses luksavve hem no man bilong Egypt. Dadi and mami bilong hem, tufala Israelite. Taem hem kasem 40 year hem go lukim olketa brata bilong hem, olketa Israelite. Taem Moses lukim wanfala man bilong Egypt hem spoelem wanfala Israelite, hem no standap and lukluk nomoa. Hem killim dae datfala man bilong Egypt. Moses chus for saed witim pipol bilong Jehovah and hem tingse God iusim hem for sevem olketa brata bilong hem. (Acts 7:21-25; Hebrews 11:24, 25) Taem olketa ruler bilong Egypt herem samting wea Moses duim, olketa ting long Moses olsem man wea againstim olketa, so hem mas ranawe mekem olketa no killim hem dae. (Exodus 2:11-15) For mekem God fit for iusim Moses, hem mas savve long moa samting abaotem olketa wei bilong Jehovah. Waswe, Moses bae hambol and willing for letem Jehovah teachim hem?—Psalm 25:9.
2 Insaed next 40 year, Moses stap long difren ples and duim waka olsem wanfala shepherd. Moses no feel kros from olketa Israelite brata bilong hem no tinghae long hem, bat hem acceptim nomoa wei wea God letem olketa samting hia for kasem hem. Nomata for plande year luk olsem no eniwan luksavve long wanem Moses trae for duim taem hem stap long Egypt, hem letem Jehovah for teachim hem. Bihaen, Moses talem samting abaotem hemseleva wea hem no for mekhae long hemseleva, bat hem samting holy spirit bilong God nao muvim hem for raetem, hem sei: “Datfala man Moses hem garem kwaet fasin winim evri nara man wea stap antap long graon.” (Numbers 12:3) Jehovah iusim Moses long olketa barava spesol wei. Sapos iumi tu aftarem kwaet fasin, Jehovah bae blessim iumi.—Zephaniah 2:3.
Kasem Wanfala Assignment
3, 4. (a) Wanem assignment nao Jehovah givim long Moses? (b) Wanem help nao Moses kasem?
3 Wanday, angel bilong Jehovah story witim Moses klosap long Maunt Horeb long Sinai Peninsula. Hem sei olsem long Moses: “Mi barava lukim finis nogud samting wea kasem pipol bilong mi wea stap long Egypt, and mi herem finis singaot bilong olketa bikos long pipol wea forcem olketa for waka; bikos mi barava savve long olketa hard samting olketa safa long hem. And mi go daon nao for sevem olketa from hand bilong olketa bilong Egypt and for aotem olketa from datfala land, and tekem olketa go long wanfala bigfala land wea barava naes, and wea fulap witim milk and honey.” (Exodus 3:2, 7, 8) God givim assignment long Moses, bat hem mas duim followim wei wea Jehovah laekem.
4 Angel bilong Jehovah gohed for sei olsem: “So kam distaem and bae mi sendem iu go long Pharaoh, and bae iu tekem olketa son bilong Israel, pipol bilong mi, aot from Egypt.” Moses hem hol bak. Hem tingse hem no fit. Tru nao, hem no savve duim datwan long strong bilong hemseleva. Nomata olsem, Jehovah talem disfala toktok long Moses: “Mi bae stap witim iu.” (Exodus 3:10-12) Jehovah givim paoa long Moses for duim olketa mirakol wea bae pruvim God nao sendem hem. Aaron, brata bilong Moses bae go witim hem for toktok for hem. Jehovah bae teachim tufala wanem for talem and duim. (Exodus 4:1-17) Waswe, Moses bae faithful for fulfillim datfala assignment?
5. Why nao wei bilong olketa Israelite mekem hem hard tumas for Moses?
5 Fastaem, olketa olo man bilong Israel bilivim Moses and Aaron. (Exodus 4:29-31) Bat gogo, “olketa leader bilong olketa son bilong Israel” blamem Moses and brata bilong hem. Olketa sei tufala mekem olketa kamap olsem samting wea “smel nogud” long Pharaoh and olketa servant bilong hem. (Exodus 5:19-21; 6:9) Taem olketa Israelite lusim Egypt, olketa fraet tumas taem olketa lukim olketa chariot bilong Egypt ronem olketa. From Red Sea hem stap front long olketa and olketa bilong Egypt stap bihaen, olketa Israelite feel olsem olketa no wei nao, and olketa blamem Moses for datwan. Sapos iu nao Moses, hao nao bae iu feel? Nomata olketa Israelite no garem eni boat, Moses followim toktok bilong Jehovah taem hem talem olketa for redim evriting bilong olketa. Then God openem Red Sea and hem kamap drae fitim olketa Israelite for wakabaot thru long hem.—Exodus 14:1-22.
Samting wea Moa Important Winim Wei for Sev
6. Taem Jehovah givim assignment long Moses, wanem nao hem mekhae long hem?
6 Taem hem givim assignment long Moses, Jehovah mekhae long wei wea nem bilong Hem important tumas. Hem barava important for respectim datfala nem and Datwan wea garem nem hia. Taem Moses ask abaotem nem bilong Jehovah, Jehovah hem sei: “Mi bae kamap wanem mi bae kamap.” And tu, Moses mas sei olsem long olketa Israelite: “Jehovah, God bilong olketa laen dadi bilong iufala, God bilong Abraham, God bilong Isaac and God bilong Jacob, hem sendem mi kam long iufala.’ Jehovah sei moa: “Diswan nao hem nem bilong mi for olowe, and diswan nao mekem evri genereson rememberim mi.” (Exodus 3:13-15) Kam kasem distaem, evri servant bilong Jehovah long evri kantri long world still iusim disfala nem bilong hem.—Isaiah 12:4, 5; 43:10-12.
7. Wanem nao God talem Moses for duim nomata Pharaoh hem praod?
7 Moses and Aaron go front long Pharaoh and talem message wea kam from Jehovah. Bat Pharaoh tok praod olsem: “Jehovah hem hu ia, for mi mas obeyim voice bilong hem for sendem Israel go? Mi nating savve long Jehovah, and tu, bae mi no sendem Israel go.” (Exodus 5:1, 2) Pharaoh showimaot hem garem nogud heart and hem man for laea. Nomata olsem, Jehovah talem Moses for go bak staka taem for talem hem olketa message bilong hem. (Exodus 7:14-16, 20-23; 8:1, 2, 20) Moses luksavve hao Pharaoh hem kros. Waswe, bae eni gud samting kamap sapos olketa go lukim hem moa? Olketa Israelite laek tumas for sev, bat Pharaoh hem no laek for letem olketa go. Sapos iu nao Moses, wanem nao bae iu duim?
8. Wanem gudfala samting nao kamaot from wei wea Jehovah deal witim Pharaoh, and olketa samting hia wea happen shud affectim iumi long wanem wei?
8 Moses talem narafala message moa taem hem sei: “Diswan nao samting wea Jehovah, God bilong olketa Israelite hem talem: ‘Sendem go pipol bilong mi mekem olketa savve servem mi.’” God sei olsem tu: “Mi fit for killim iu and pipol bilong iu witim sik and aotem iufala from earth finis. Bat mi letem iufala gohed laef mekem mi showimaot paoa bilong mi long iufala and mekem pipol evriwea long earth savve long nem bilong mi.” (Exodus 9:13-16) From Jehovah bae finisim Pharaoh wea bighed, hem disaed for showimaot paoa bilong hem long wei wea olsem warning long eniwan wea laek againstim hem. Wanfala wea againstim hem nao hem Satan, wea Jesus Christ kolem hem “ruler bilong disfala world.” (John 14:30; Romans 9:17-24) Olsem Jehovah talem finis, gogo, pipol evriwea long earth savve long nem bilong hem. From hem garem fasin for long-safaring, olketa Israelite and wanfala big sekson bilong difren pipol wea joinim olketa for worshipim hem, olketa sev. (Exodus 9:20, 21; 12:37, 38) Kam kasem distaem, wei for talemaot nem bilong Jehovah hem helpem plande million pipol for worship long stretfala wei.
Deal Witim Bighed Pipol
9. Long wanem wei nao olketa Israelite no respectim Jehovah?
9 Olketa Israelite savve long nem bilong God. Moses iusim datfala nem taem hem story long olketa, bat staka taem olketa nating respectim Datwan wea garem datfala nem. No longtaem bihaen Jehovah iusim mirakol for sevem olketa Israelite from Egypt, wanem nao happen taem olketa no kwiktaem faendem wata wea fit for drinkim? Olketa komplen againstim Moses. Then olketa komplen abaotem kaikai. Moses warnim olketa hao wei for komplen olsem, hem no againstim hem and Aaron nomoa, bat hem againstim Jehovah tu. (Exodus 15:22-24; 16:2-12) Long Maunt Sinai, Jehovah givim datfala Law long olketa Israelite and showimaot paoa bilong hem long spesol wei tu. Nomata olsem, olketa disobey and wakem wanfala gold buluka for worshipim and olketa sei hem “wanfala festival for Jehovah.”—Exodus 32:1-9.
10. Why nao olketa Christian overseer distaem interest tumas long samting wea Moses askem long Exodus 33:13?
10 Hao nao Moses savve deal witim pipol hia wea Jehovah kolem olketa bighed? Moses askem Jehovah olsem: “Sapos iu hapi long mi, plis mekem mi savve long olketa wei bilong iu, for mi savve long iu, mekem iu hapi long mi.” (Exodus 33:13) Olketa Christian overseer wea lukaftarem pipol bilong Jehovah distaem, lukaftarem olketa sheep wea moa hambol winim nation bilong Israel. Nomata olsem, olketa overseer tu prea olsem: “Mekem mi savve long olketa wei bilong iu, O Jehovah; teachim mi olketa road bilong iu.” (Psalm 25:4) Taem olketa overseer savve long olketa wei bilong Jehovah, olketa savve deal witim samting fitim wanem Word bilong God talem and fitim fasin bilong God tu.
Samting Jehovah Laekem Pipol Bilong Hem for Duim
11. Olketa wanem samting nao Jehovah givim for helpem Moses, and why nao iumi interest long olketa samting hia?
11 Long Maunt Sinai, Jehovah talem samting hem laekem pipol bilong hem for duim. Bihaen, hem raetem Tenfala Komandment long tufala ston and givim long Moses. Taem Moses kam daon from datfala maunten, hem lukim olketa Israelite worshipim buluka karving and from hem kros fogud hem pisisim tufala ston hia. Jehovah raetem moa Tenfala Komandment hia long olketa ston wea Moses hem katem kam. (Exodus 32:19; 34:1) Olketa komandment hia no difren from olketa wea hem givim fastaem. Moses mas duim samting followim olketa. God barava showimaot klia long Moses tu wanem kaen God nao Hem, wea datwan hem showim long Moses wanem kaen fasin nao hem mas garem olsem man wea stand for Jehovah. Olketa Christian no stap anda long Law Bilong Moses, bat samting wea Jehovah talem long Moses hem garem staka principle wea no change and wea fitim yet evriwan wea worshipim Jehovah. (Romans 6:14; 13:8-10) Iumi storyim samfala hia.
12. Wei wea Jehovah laekem pipol for worshipim hem nomoa shud affectim Israel long wanem wei?
12 Worshipim Jehovah nomoa. Nation bilong Israel herem taem Jehovah sei hem laekem olketa for worshipim hem nomoa. (Exodus 20:2-5) Olketa lukim staka samting wea pruvim hao Jehovah nao hem trufala God. (Deuteronomy 4:33-35) Nomata olketa nation garem difren wei for worship, Jehovah talemaot klia hao hem no letem pipol bilong hem for worshipim idol or duim spiritism. Wei for worshipim Jehovah hem no minim olketa mas duim olketa ceremony nomoa. Evriwan mas lovem Jehovah witim full heart, soul, and strong bilong olketa. (Deuteronomy 6:5, 6) Diswan mas affectim evri part long laef bilong olketa, no just toktok and fasin nomoa. (Leviticus 20:27; 24:15, 16; 26:1) Jesus Christ talemaot klia tu hao Jehovah laekem pipol bilong hem for worshipim hem nomoa.—Mark 12:28-30; Luke 4:8.
13. Why nao Israel mas barava obeyim God, and wanem nao shud muvim iumi for obeyim hem? (Ecclesiastes 12:13)
13 Barava obeyim olketa komandment bilong Jehovah. Pipol bilong Israel need for remember hao olketa mekem wanfala covenant witim Jehovah, olketa promis for obeyim evri samting wea hem talem. Olketa free for chusim staka samting, bat saed long olketa samting wea Jehovah komandim olketa for duim, olketa mas obey evribit. Taem olketa duim olsem, datwan bae pruvim olketa lovem God, and tu, hem bae helpem olketa and pikinini bilong olketa, bikos evri samting wea Jehovah askem olketa for duim hem for helpem olketa.—Exodus 19:5-8; Deuteronomy 5:27-33; 11:22, 23.
14. Hao nao God showimaot klia long olketa Israelite wei wea hem important tumas for markem olketa spiritual samting olsem moa important?
14 Markem olketa spiritual samting olsem moa important. Nation bilong Israel mas no iusim staka taem tumas for aftarem need bilong olketa seleva, wea bae mekem olketa no garem inaf taem for olketa spiritual samting. Olketa Israelite mas no busy long olketa iusles samting. Jehovah markem taem for olketa duim samting saed long worship bilong hem each week. Datfala taem hem holy. (Exodus 35:1-3; Numbers 15:32-36) Evri year, hem markem samfala extra taem for olketa holy convention. (Leviticus 23:4-44) Diswan givim chance long olketa for story abaotem olketa nambawan samting wea Jehovah duim finis, for rememberim olketa wei bilong hem, and for talemaot thankiu long hem for evri gudfala samting wea hem duim. Taem olketa Israelite hia worshipim Jehovah, wei for fraet long hem and lovem hem bae kamap moa big, and tu, olketa kasem help for wakabaot followim olketa wei bilong hem. (Deuteronomy 10:12, 13) Olketa gudfala principle wea insaed olketa instruction wea Jehovah givim olketa Israelite savve helpem olketa servant bilong hem distaem.—Hebrews 10:24, 25.
Tinghae Long Olketa Fasin Bilong Jehovah
15. (a) Why nao wei for tinghae long olketa fasin bilong Jehovah hem helpem Moses? (b) Wanem nao olketa kwestin wea savve helpem iumi for tingting strong long each wan long olketa fasin bilong Jehovah?
15 Wei for tinghae long olketa fasin bilong Jehovah bae helpem Moses tu long wei wea hem deal witim olketa Israelite. Exodus 34:5-7 sei God hem go pas front long feis bilong Moses and sei: “Jehovah, Jehovah, God wea garem mercy and kaenfala fasin, slow for kros and wea fulap witim loving-kaeness and truth, wea keepim loving-kaeness for olketa thousand, forgivim mistek and rong and sin, bat hem bae no letem man wea duim rong for missim panis, hem bae givim panis for rong bilong olketa dadi and olketa son and olketa granson, long mek-thri genereson and long mek-foa genereson.” Tingting gud raonem olketa toktok hia. Askem iuseleva: ‘Wanem nao mining bilong each fasin hia? Hao nao Jehovah showimaot datwan? Hao nao olketa Christian overseer savve showimaot fasin hia? Hao nao fasin hia shud affectim samting wea iumi wanwan duim?’ Tingim samfala fasin hia.
16. Hao nao iumi savve minim go moa mercy bilong God, and why nao wei for duim diswan hem important?
16 Jehovah hem “God wea garem mercy and kaenfala fasin.” Sapos iu garem Insight on the Scriptures, readim information wea stap anda long datfala word “Mercy.” Or maet iu duim research abaotem diswan taem iu iusim Watch Tower Publications Index or computer program Watchtower Library (CD-ROM).a Iusim wanfala concordance for faendem olketa scripture wea story abaotem mercy. Bae iu lukim hao from Jehovah garem mercy, hem no givim full panis samfala taem, and tu, hem garem fasin for barava tingim pipol. Mercy hem muvim God for duim samting for helpem pipol bilong hem. Wanfala samting wea pruvim diswan nao hem wei wea God givim wanem olketa Israelite needim long physical and spiritual wei taem olketa wakabaot go for Promis Land. (Deuteronomy 1:30-33; 8:4) Taem olketa mistek, Jehovah showimaot mercy thru long wei for forgivim olketa. From hem showim mercy long pipol bilong hem bifor, hem barava fitim for olketa servant bilong hem distaem garem fasin for barava tingim each other!—Matthew 9:13; 18:21-35.
17. Taem iumi minim fasin bilong Jehovah for duim samting long kaenfala wei, hao nao diswan savve apim tru worship?
17 Jehovah showimaot mercy tu taem hem duim samting long kaenfala wei. Long tingting bilong iu, wanem nao “kaenfala fasin”? Markem tingting bilong iu witim wanem Bible talem abaotem kaenfala fasin bilong Jehovah. Bible hem showimaot hao wanfala part long kaenfala wei bilong Jehovah hem for lovem and tingim pipol bilong hem wea garem hard laef. (Exodus 22:26, 27) Nomata long wanem kantri, pipol from datfala ples and pipol wea kam stap long there, savve kasem hard taem. Taem Jehovah teachim pipol bilong hem for no teksaed and for showimaot kaenfala fasin long pipol from difren ples, hem remindim olketa hao bifor, olketa stap long Egypt olsem olketa stranger tu. (Deuteronomy 24:17-22) Waswe long iumi distaem? Wei for duim samting long kaenfala wei hem help for mekem iumi wan mind and mekem nara pipol laek for kam worshipim Jehovah.—Acts 10:34, 35; Revelation 7:9, 10.
18. Iumi lanem wanem samting from olketa tambu wea Jehovah markem for olketa Israelite saed long olketa wei bilong pipol bilong olketa nara nation?
18 Bat, wei wea olketa Israelite garem feeling for pipol bilong nara nation hem mas no kamap samting wea moa important winim love wea olketa garem for Jehovah, and olketa standard bilong hem saed long fasin. Dastawe Jehovah teachim olketa for no followim wei bilong olketa nation wea stap raonem olketa, olsem olketa kastom saed long religion, and tu, dirty fasin wea olketa nation hia duim. (Exodus 34:11-16; Deuteronomy 7:1-4) Datwan fitim iumi distaem tu. Iumi mas pipol wea holy, olsem God bilong iumi Jehovah hem holy.—1 Peter 1:15, 16.
19. Taem pipol bilong Jehovah minim tingting bilong hem abaotem rong fasin, hao nao datwan protectim olketa?
19 For mek sure Moses hem minim olketa wei bilong Jehovah, Hem talemaot klia hao nomata hem no hapi long man wea duim sin, hem no savve kros kwiktaem tu. Hem givim chance long pipol for lanem olketa mark bilong hem and followim. Taem man repent, Jehovah forgivim olketa sin bilong hem, bat hem no hol bak for panisim olketa wea fit for kasem datwan from bigfala rong wea olketa duim. Hem warnim Moses hao samting wea olketa Israelite duim savve affectim olketa genereson wea kam bihaen long gudfala or nogud wei. Taem pipol bilong Jehovah minim and tinghae long olketa wei bilong hem, diswan bae stopem olketa for blamem hem for olketa problem wea olketa seleva mekem kamap. Diswan bae stopem olketa tu for sei hem slow tumas for duim samting.
20. Wanem nao savve helpem iumi for deal long stretfala wei witim olketa brata and sista and pipol iumi meetim long ministry? (Psalm 86:11)
20 Sapos iu laekem savve bilong iu abaotem Jehovah and olketa wei bilong hem for kamap moa big, gohed for duim research and for ting raonem wanem iu readim insaed Bible. Lukluk gud long olketa nambawan fasin bilong Jehovah. Ting raonem and prea abaotem hao iu savve followim example bilong God, and hao iu savve followim evribit olketa samting wea hem laekem. Diswan bae helpem iu for deal witim olketa nara brata and sista long stretfala wei, stap klia long olketa trap, and helpem pipol for savve and lovem nambawan God bilong iumi.
[Footnote]
a Olketa Jehovah’s Witness pablisim evriwan hia.
Wanem Nao Iu Lanem?
• Why nao hem important for Moses garem kwaet fasin, and why nao hem barava important for iumi garem datwan distaem?
• Wanem gud samting nao kamaot from wei wea Moses talem toktok bilong Jehovah long Pharaoh staka taem?
• Wanem nao samfala nambawan principle wea Moses lanem and wea fitim iumi distaem tu?
• Hao nao iumi savve minim go moa olketa fasin bilong Jehovah?
[Piksa long page 21]
Moses faithful for talem evri toktok bilong Jehovah long Pharaoh
[Piksa long page 23]
Jehovah talem Moses olketa samting wea hem laekem hem for duim
[Piksa long page 24, 25]
Ting raonem olketa fasin bilong Jehovah