Olketa No Keepim Promis blo Olketa

Jehovah sei lo Moses: ‘Kam ap lo mi lo maunten. Bae mi raetem olketa law blo mi lo olketa ston tablet and givim lo iu.’ Moses go ap lo datfala maunten and stap lo there for 40 days and 40 naet. Taem Moses lo there, Jehovah raetem datfala Ten Komandment lo tufala ston tablet and givim lo hem.

Gogo olketa Israelite tingse Moses bae no kam bak nao. So olketa sei lo Aaron: ‘Mifala laekem samwan for leadim mifala. Mekem wanfala god for mifala!’ Aaron sei. ‘Givim kam olketa gold blo iufala.’ Hem meltim olketa gold hia and mekem wanfala statue blo young buluka. Pipol hia sei: ‘Disfala young buluka nao God blo iumi wea leadim iumi aot from Egypt!’ Olketa start for worshipim datfala young buluka wea olketa mekem lo gold, and olketa celebrate. Hao, datwan hem rong? Ia, bikos pipol hia promis finis for worshipim Jehovah nomoa. Bat distaem olketa no keepim nao promis blo olketa.

Jehovah lukim samting wea happen and sei lo Moses: ‘Iu go daon lo pipol hia. Olketa disobeyim mi and worshipim wanfala false god.’ Moses karem tufala tablet hia and go daon.

Taem Moses kam klosap lo datfala camp, hem herem pipol singsing. Then hem lukim olketa dance and baodaon lo datfala young buluka. Moses kros fogud. Hem torowem lo graon tufala tablet wea hem holem and tufala pisis nao. Then hem distroem datfala statue. Hem askem Aaron olsem: ‘Wat nao pipol hia switim iu lo hem gogo iu duim disfala nogud samting?’ Aaron sei: ‘Iu no kros. Iu savve finis lo wei blo olketa pipol hia. Olketa laekem wanfala god, so mi torowem gold blo olketa insaed lo fire and disfala young buluka kamaot nao!’ Aaron shud no duim datwan. So Moses go ap moa lo datfala maunten and begim Jehovah for forgivim pipol hia.

Jehovah savve forgivim olketa wea willing for obeyim hem. Hao, iu luksavve why hem important for olketa Israelite followim wat Moses talem?