Donkey blo Balaam Hem Toktok

Olketa Israelite bin stap lo wilderness for klosap 40 years. Olketa faet and tekovarem staka strong taon finis. Taem olketa camp lo wilderness lo Moab lo east saed lo Jordan River, hem taem nao for olketa go insaed Promis Land. Balak wea hem king lo Moab, hem fraet nogud olketa tekovarem land blo hem. So hem askem wanfala man wea nem blo hem Balaam for kam lo Moab and cursim olketa Israelite.

Bat Jehovah talem Balaam: ‘Iu mas no cursim olketa Israelite.’ So Balaam no laek for go. King Balak askem hem mek-tu taem and promis for givim hem eni samting wea hem laekem. Balaam still no laek for go. Then God sei lo hem: ‘Iu savve go, bat iu mas talem nomoa toktok wea mi talem lo iu.’

Balaam raedem donkey blo hem and gogo for Moab. Hem plan finis for cursim olketa Israelite, nomata Jehovah bin talem hem for no duim datwan. Thrifala taem nao angel blo Jehovah standap lo road. Balaam no savve lukim datfala angel, bat donkey blo Balaam nao lukim angel hia. Firstaem, datfala donkey tane from road and go difren. Mek-tu taem, datfala donkey muv go lo wanfala wall ston, and pressim leg blo Balaam againstim wall ston hia. Mek-thri taem, datfala donkey leidaon midol lo road. Lo thrifala taem hia, Balaam whipim donkey blo hem witim wanfala stik.

Bihaen mek-thri taem, Jehovah mekem datfala donkey for toktok. Donkey hia askem Balaam olsem: ‘Why nao iu whipim mi?’ Balaam sei: ‘Iu mekful tumas lo mi. Sapos mi holem wanfala sword bae mi killim iu dae.’ Datfala donkey sei: ‘Iu bin raedem mi for staka year finis. Hao, mi treatim iu olsem enitaem bifor?’

Then Jehovah letem Balaam for lukim datfala angel. Angel hia sei: ‘Jehovah warnim iu finis for no cursim Israel.’ Balaam sei: ‘Samting wea mi duim hem no stret. Mi bae go bak lo hom.’ Bat datfala angel sei: ‘Iu savve go lo Moab, bat iu mas talem nomoa toktok wea Jehovah talem lo iu.’

Iu tingse Balaam lanem eni samting? Nomoa. Bihaen datwan, Balaam trae for cursim Israel thrifala taem, bat each taem wea Balaam cursim olketa Israelite, Jehovah blessim olketa. Then gogo, olketa Israelite attakim Moab and olketa killim dae Balaam. Sapos Balaam bin lisin lo Jehovah, hard for hem kasem nogud samting, iaman?