Wanfala Kingdom wea Olsem Big Tree

Wanfala naet, Nebuchadnezzar garem wanfala dream wea mekem hem fraet tumas. Hem kolem kam olketa wise man blo hem for talem hem mining blo datfala dream. Bat no eniwan lo olketa savve explainim. Gogo, king storyim lo Daniel.

Nebuchadnezzar talem Daniel: ‘Lo dream blo mi, mi lukim wanfala tree. Hem grow tol tumas and top blo hem kasem skae. Evriwan lo full earth savve lukim. Olketa leaf blo hem luk naes and hem garem staka frut. Olketa animal savve kam rest lo shade blo hem, and olketa bird wakem nest blo olketa lo olketa branch blo hem. Then wanfala angel kam daon from heven. Hem singaot olsem: “Katem daon datfala tree and katemaot olketa branch blo hem. Bat leavim stump blo hem and olketa rut blo hem lo graon, and putim iron strap and copper strap raonem. Heart blo datfala tree bae change from heart blo man go lo heart blo animal, and sevenfala taem bae go pas. Evri pipol bae savve dat God nao hem Ruler and hem savve givim kingdom lo eniwan wea hem laekem.”’

Jehovah showim mining blo datfala dream lo Daniel. Taem Daniel savve lo mining blo dream hia, hem fraet fogud. Hem sei: ‘O king, mi wish nomoa disfala dream hem abaotem olketa enemy blo iu, bat hem abaotem iu. Iu nao datfala big tree wea olketa katem daon. Bae iu lusim kingdom blo iu, and bae iu kaikaim grass olsem olketa wild animal. Bat from datfala angel sei for leavim stump blo datfala tree and rut blo hem lo graon, bae iu king bak moa.’

Wan year bihaen, Nebuchadnezzar wakabaot ontop flat ruf lo palace blo hem, and tok praod abaotem Babylon. Hem sei: ‘Lukim disfala taon wea mi buildim wea luk naes tumas. Diswan mekhae lo glory blo mi!’ Taem hem gohed story yet, wanfala voice tok kam from heven: ‘Nebuchadnezzar! Distaem iu lusim kingdom blo iu.’

Semtaem nomoa, Nebuchadnezzar mentol nao and hem olsem wanfala wild animal. Olketa raosem hem from palace blo hem and hem go stap witim olketa wild animal lo bush. And hair blo Nebuchadnezzar long olsem olketa feather blo eagle, and olketa fingernail blo hem olsem olketa claw blo bird.

Afta seven years, Nebuchadnezzar gud bak moa and Jehovah mekem hem king moa lo Babylon. Then Nebuchadnezzar sei: ‘Mi praisem Jehovah, wea hem King lo heven. Distaem nao mi savve Jehovah hem Ruler. Hem mekem pipol wea praod for hambol, and hem savve givim kingdom lo eniwan wea hem laekem.’