Paul and Timothy

Timothy hem wanfala young brata wea stap lo kongregeson lo Lystra. Dadi blo hem man blo Greek, and mami blo hem wanfala Jew. Mami blo hem, Eunice, and granmami blo hem Lois teachim Timothy abaotem Jehovah taem hem smol yet.

Taem Paul visitim Lystra lo second preaching trip blo hem, hem lukim hao Timothy lovem tumas olketa brata and sista and laek for helpem olketa. So Paul invaetem Timothy for followim hem. Gogo, Paul trainim Timothy for kamap man wea savve tumas hao for preach and for teachim gud nius.

Holy spirit leadim Paul and Timothy lo eni ples wea tufala go. Wanfala naet, wanfala man talem Paul insaed vision for kam lo Macedonia and helpem olketa. So Paul, Timothy, Silas, and Luke go lo there for preach and startim olketa kongregeson.

Lo Thessalonica, wanfala taon lo Macedonia, staka man and woman kamap Christian. Bat samfala Jew jealous lo Paul and olketa fren blo hem. Olketa formimap wanfala grup and tekem olketa brata go lo olketa bigman blo datfala taon, and singaot olsem: ‘Olketa man hia againstim gavman blo Rome!’ Laef blo Paul and Timothy stap lo danger, so olketa ranawe go lo Beroea lo naet.

Pipol lo Beroea laekem tumas for lanem gud nius and olketa blo Greek and Jew wea stap lo there, olketa biliv. Bat taem samfala Jew kam from Thessalonica and mek trabol, Paul lusim Beroea and go lo Athens. Bat Timothy and Silas stap lo Beroea for strongim olketa brata and sista. Gogo, Paul sendem Timothy go bak lo Thessalonica for helpem olketa brata and sista for deal witim nogud persecution wea happen lo there. Then bihaen, Paul sendem Timothy for visitim staka nara kongregeson and encouragem olketa.

Paul sei lo Timothy: ‘Olketa wea laek for worshipim Jehovah bae kasem persecution.’ Timothy kasem persecution and stap lo prison bikos lo faith blo hem. And hem hapi lo chance wea hem garem for pruvim wei wea hem loyal lo Jehovah.

Paul sei lo olketa lo Philippi: ‘Mi bae sendem Timothy kam lo iufala. Hem bae teachim iufala wat nao hem minim for wakabaot followim truth, and hem bae trainim iufala lo ministry.’ Paul savve dat hem savve depend lo Timothy bikos tufala fren gud and waka tugeta for staka year.