Timothy​—⁠Hem Redi and Laek Helpem Pipol

“IU redi nao?” Waswe, iu herem datfala kwestin enitaem?​— Taem man ask olsem, hem laek savve sapos iu redyim evri samting finis. Maet datfala man laek savve: ‘Waswe, iu garem evri buk bilong iu and iu readim finis?’ Distaem bae iumi storyim hao Timothy redi evritaem.

Timothy laek helpem pipol. Iu savve wanem nao hem minim for laek helpem pipol?​— Taem Paul askem Timothy for kamap wakman bilong God, Timothy garem sem tingting olsem nara wakman bilong God wea tok olsem: “Mi long hia! Sendem mi.” (Isaiah 6:8) From Timothy hem redi and laek helpem pipol, hem duim staka gudfala samting. Waswe, iu laek herem story bilong hem?​—

Timothy hem born long Lystra wea stap farawe from Jerusalem. Grani bilong hem Lois and mami bilong hem Eunice studyim gud olketa Scripture. Taem Timothy baby nomoa, tufala start lanem hem abaotem God.​—2 Timothy 1:5; 3:​15.

Luk olsem Timothy hem youngfala nomoa taem aposol Paul and Barnabas kasem Lystra long firstfala farawe gogo bilong Paul for preach. Maet long datfala taem nao mami and grani bilong Timothy kamap Christian. Waswe, iu laek savve long olketa nogud samting wea kasem Paul and Barnabas?​— Wanfala taem pipol wea no laekem olketa Christian tekem ston and sutim Paul gogo hem foldaon and olketa pullim hem go aotsaed long taon. Olketa tingse hem dae nao.

Olketa wea laekem wanem Paul teachim kam hipap raonem hem, batawea hem laef nomoa. Long narafala day, Paul and Barnabas lusim Lystra, bat no longtaem bihaen tufala kam bak. Taem tufala kam bak Paul talem olketa disaepol: “Iumi mas kasem staka hard taem bifor iumi savve go insaed long kingdom bilong God.” (Acts 14:​8-​22) Iu savve wanem nao Paul minim?​— Hem minim pipol bae spoelem olketa wakman bilong God. Narafala taem bihaen, Paul raet go long Timothy olsem: ‘Pipol bae spoelem evriwan wea worshipim God.’​—2 Timothy 3:​12; John 15:20.

Paul and Barnabas go long hom bihaen tufala lusim Lystra. Tu-thri month bihaen, Paul and Silas go for strongim olketa niu disaepol long olketa ples wea Paul kasem bifor. Taem Paul kasem Lystra, Timothy mas barava hapi for lukim hem! Timothy hapi narawe taem Paul askem hem for gogo witim hem and Silas. Timothy agree for gogo witim tufala and hem redi and laek for go.​—Acts 15:⁠40–16:​5.

Thrifala hia wakabaot tugeta go long olketa farawe ples, and bihaen olketa go long wanfala ship. Taem olketa go aot from datfala ship, olketa wakabaot go long Thessalonica long Greece. Long Thessalonica staka pipol kamap Christian. Bat samfala nara pipol wea barava kros hipap for killim Paul, Silas, and Timothy. From datwan olketa go long Beroea.​—Acts 17:​1-​10.

Paul tingim olketa wea no longtaem go nomoa kamap Christian long Thessalonica, so hem talem Timothy for go bak long datfala ples. Waswe, iu savve why nao Paul duim olsem?​— Paul talem olketa Christian long Thessalonica olsem: ‘For strongim iufala mekem no eniwan hem wikdaon.’ Waswe, iu savve why nao Paul talem Timothy wea hem youngfala nomoa for go long ples wea pipol laek killim hem?​— Datwan hem from olketa rabis man no savve gud long Timothy, and hemseleva tu laek for go. Hem nating fraet for duim datwan! Hao nao gogo bilong Timothy? Taem Timothy go bak long Paul, hem storyim hao olketa long Thessalonica gohed strong for worshipim God. From datwan, Paul raet go long olketa olsem: “Iufala mekem mifala barava feel gud moa.”​—1 Thessalonians 3:​2-7.

Paul and Timothy waka tugeta for tenfala year moa. Bihaen datwan, olketa long Rome putim Paul long prison, and Timothy go for stap klosap long hem. Diswan hem happen no longtaem bihaen Timothy kamaot from prison. Taem Paul stap long prison, hem raetem wanfala leta for olketa long Philippi, and maet hem iusim Timothy for duim datwan. Paul talem olsem: ‘Mi ting for sendem go Timothy long iufala, from no eniwan moa gohed strong olsem hem wea savve helpem iufala.’​—Philippians 2:​19-​22; Hebrews 13:23.

Luk olsem Timothy barava hapi long samting wea Paul talem! Paul lovem Timothy tumas bikos hem redi and laek helpem pipol. Mifala laekem iu tu for olsem Timothy.