STUDY 15

Showimaot Iu Sure Wanem Iu Talem Hem Tru

1 Thessalonica 1:5

WANEM FOR DUIM: Showimaot iu barava sure long wanem iu talem hem tru and hem important.

Prepare gud. Studyim gud information go kasem taem iu minim olketa main idea and minim tu hao Bible sapotim olketa idea hia. Olketa main point long tok bilong iu shud simpol and klia. Tingim hao information wea iu storyim bae helpem olketa wea lisin. Prea long God for holy spirit.

Taem iu practicem tok bilong iu, act olsem iu story long samwan. Datwan savve mekem olketa idea wea iu laek storyim for klia long mind bilong iu, and bae hem helpem iu for givim gudfala tok.
Iusim toktok wea showimaot iu barava biliv. Winim wei for baeheartim toktok from olketa pablikeson nomoa, iusim toktok bilong iuseleva. Iusim olketa word wea bae showimaot iu barava sure wanem iu talem hem tru.
Hao iu story shud showimaot iu sure wanem iu talem hem tru. No story kwaet, bat voice bilong iu mas laod fitim. Sapos fitim, luk long eye bilong olketa wea lisin.

Nomata iu sure long wanem iu storyim, iu shud tingim feeling bilong audience, and no forcem tingting bilong iu or pointim olketa. Helpem audience for luksavve wanem iu storyim hem important, bat story long wei wea showimaot love.