Bible Reading​—Givim Gud Samting and Givim Hapi

“Iu mas readim . . . long day and naet.”—JOSHUA 1:8.

1. Wanem nao samfala gud samting wea kamaot from wei for readim Bible?

WEI for readim gudfala information hem savve helpem man. Wanfala savveman bilong politik long France Montesquieu (Charles-Louis de Secondat) hem raet: “For mi, study hem evritaem best wei for mekem strong bilong laef kamap moa. No eni wari hem kasem mi wea sapos mi read for wan hour bae datwan no finis.” Long barava big wei, diswan hem tru saed long Bible reading. Man wea raetem psalm sei: “Law bilong Jehovah hem perfect, hem mekem soul kam bak. Man fit for trustim reminder bilong Jehovah, mekem man wea no garem savve for kamap wise. Olketa order from Jehovah olketa stret, mekem heart hem hapi.”—Psalm 19:7, 8.

2. Why nao Jehovah protectim Bible insaed olketa year wea go pas, and wanem nao hem expectim pipol bilong hem for duim long diswan?

² Olsem Man wea raetem Bible, Jehovah God keepim diswan sef long planti handred year wea olketa enemy, saed long religion and long world, strong for againstim. From will bilong hem for “evri difren kaen man mas sev and kasem stretfala savve bilong truth,” hem mek sure pipol long full world savve kasem Word bilong hem. (1 Timothy 2:4) Iu savve story witim 80 percent long evri pipol long world sapos iu iusim 100 languis nomoa. Full Bible stap insaed 370 languis, and olketa part bilong hem stap insaed nara 1,860 languis. Jehovah laekem pipol bilong hem for readim Word bilong hem. Hem blessim olketa servant bilong hem wea lisin long Word bilong hem, yes, wea readim evriday.—Psalm 1:1, 2.

Olketa Overseer Mas Duim Bible Reading

3, 4. Wanem nao Jehovah askem olketa king bilong Israel for duim, and wanem nao olketa reason why diswan hem fitim tu olketa Christian elder distaem?

³ Taem Jehovah luksavve hao nation bilong Israel bae garem wanfala king long earth, hem sei: “Hem mas happen hao taem hem sidaon long throne bilong kingdom, hem mas raetem insaed long buk for hemseleva wanfala copy bilong disfala law from datwan wea stap witim olketa priest, olketa Levite. And diswan mas stap witim hem, and hem mas readim long full laef bilong hem for mekem hem lane for fraet long God bilong hem Jehovah, for keepim evri toktok bilong disfala law and olketa rul hia long wei for followim olketa; so heart bilong hem no apim hemseleva winim olketa brata bilong hem and mekem hem no go difren from datfala komandment long raet or long left.”—Deuteronomy 17:18-20.

⁴ Lukim olketa reason why Jehovah askem evri king wea bae rul long Israel for readim evriday buk wea garem law bilong God: (1) “mekem hem lane for fraet long God bilong hem Jehovah, for keepim evri toktok bilong disfala law and olketa rul hia long wei for followim olketa”; (2) “so heart bilong hem no apim hemseleva winim olketa brata bilong hem”; (3) “mekem hem no go difren from datfala komandment long raet or long left.” Waswe, olketa Christian overseer distaem need for fraet long Jehovah, obeyim olketa law bilong hem, no apim olketa seleva winim olketa brata bilong olketa, and stap klia long wei for go difren from olketa komandment bilong Jehovah? Hem important for olketa readim Bible evriday olsem olketa king bilong Israel tu.

5. Wanem nao Governing Body raet abaotem long olketa member bilong olketa Branch Komiti abaotem Bible reading, and why nao evri Christian elder bae kasem gud samting sapos olketa followim kaonsel hia?

⁵ Olketa Christian elder distaem garem barava busy schedule, wea mekem wei for readim Bible evriday kamap wanfala challenge. Olsem example, olketa member bilong Governing Body bilong Olketa Jehovah’s Witness and olketa member bilong olketa Branch Komiti raonem world olketa barava busy. Nomata olsem, no longtaem go nomoa wanfala leta from Governing Body for evri Branch Komiti mekhae long need for duim Bible reading evriday and studyim Bible gud. Datfala leta sei diswan bae mekem grow love bilong iumi for Jehovah and for truth, and hem “bae helpem iumi for keepim faith, hapi, and wei for go ahed strong go kasem end.” Evri elder insaed olketa kongregeson bilong Olketa Jehovah’s Witness luksavve long sem need tu. Wei for readim Bible evriday bae helpem olketa for “duim samting long wisefala wei.” (Joshua 1:7, 8) Bible reading hem barava fitim olketa hia from hem “gud for teach, for givim kaonsel, for stretem evri samting, for givim discipline long raeteous fasin.”—2 Timothy 3:16, Revised Standard Version.

Young and Olo Mas Duim

6. Why nao Joshua readim laod evri toktok long law bilong Jehovah front long olketa tribe bilong Israel and man from difren ples?

⁶ Long taem bifor, olketa man wanwan no garem Bible bilong hemseleva, so olketa duim Bible reading front long evriwan wea hipap. Bihaen Jehovah mekem hem win long taon bilong Ai, Joshua hipimap olketa tribe bilong Israel front long Maunt Ebal and Maunt Gerizim. Then, datfala story sei: “Hem readim big evri toktok bilong law, olketa blessing and olketa trabol, for fitim evri samting wea olketa raetem insaed long buk bilong law. And no eni toktok miss long evri samting wea Moses komandim wea Joshua no readim big front long full kongregeson bilong Israel, witim olketa woman and olketa smol pikinini and man from difren ples wea stap midolwan long olketa.” (Joshua 8:34, 35) Olketa young and olo, native and man from difren ples, need for raetem olsem insaed heart and mind bilong olketa, fasin wea bae mekem Jehovah blessim olketa and wea bae mekem hem no hapi. Bible reading wea iumi duim evriday bae barava helpem iumi long diswan.

7, 8. (a) Hu long disfala taem nao olsem “man from difren ples,” and why nao olketa need for readim Bible evriday? (b) Wanem nao olketa wei wea “olketa smol pikinini” midolwan pipol bilong Jehovah savve followim example bilong Jesus?

⁷ Distaem, planti million servant bilong Jehovah olsem “man from difren ples” bilong bifor long spiritual wei. Long wantaem, olketa followim mark bilong world, bat olketa changem laef bilong olketa. (Ephesians 4:22-24; Colossians 3:7, 8) Olketa evritaem need for rememberim olketa mark bilong Jehovah long gud samting and nogud samting. (Amos 5:14, 15) Wei for readim Word bilong God evriday helpem olketa for duim diswan.—Hebrews 4:12; James 1:25.

⁸ Planti “smol pikinini” tu stap midolwan pipol bilong Jehovah wea lanem olketa mark bilong Jehovah from dadi and mami bat wea need for pruvim for olketa seleva hao will bilong hem nao stret. (Romans 12:1, 2) Hao nao olketa savve duim olsem? Long Israel, olketa priest and older man kasem disfala instruction: “Iu bae readim disfala law front long full Israel for olketa herem. Hipimap olketa pipol, olketa man and woman and olketa smol pikinini and olketa man from difren ples wea stap insaed long olketa gate bilong iu, mekem olketa savve lisin and lane, from olketa mas fraet long God bilong iufala Jehovah and lukaot gud for followim olketa toktok bilong disfala law. And olketa son bilong olketa wea no savve shud lisin, and olketa mas lane for fraet long God bilong iufala, Jehovah.” (Deuteronomy 31:11-13) Taem hem 12 year, Jesus, wea stap anda long Law, showimaot wei wea hem interest tumas for minim olketa law bilong Dadi bilong hem. (Luke 2:41-49) Bihaen, kastom bilong hem nao for lisin and tekpart long Bible reading long synagogue. (Luke 4:16; Acts 15:21) Olketa young wan distaem bae kasem gud samting sapos olketa followim example bilong Jesus taem olketa readim Word bilong God evritaem and attendim olketa meeting wea olketa savve readim and studyim Bible.

Bible Reading—Wanfala First Samting

9. (a) Why nao iumi need for chusim gud samting wea iumi readim? (b) Wanem nao man wea startim disfala magasin talem abaotem olketa Bible pablikeson?

⁹ Wise King Solomon hem raet olsem: “Wei for mekem planti buk hem no savve finis, and for iusim tumas taem long olketa buk hia hem samting wea mekem body taed.” (Ecclesiastes 12:12) Iumi savve sei wei for readim planti buk wea pipol raetem distaem hem no mekem body nomoa taed, bat for tok stret, hem danger for mind tu. So hem important for chus gud. For join witim wei for readim olketa Bible pablikeson bilong iumi, iumi need for readim Bible seleva. Man wea startim disfala magasin hem raet olsem long olketa wea readim: “No forget hao Bible nao hem Standard wea iumi followim and nomata haomas samting God givim for helpem iumi, olketa samting hem for ‘helpem’ iumi nomoa and no samting for changem ples bilong Bible.”a So, nomata iumi readim olketa Bible pablikeson, iumi need for readim Bible seleva.

10. Hao nao “faithful and wise slave” strongim wei wea Bible reading hem important?

¹⁰ From olketa luksavve long disfala need, for planti year “faithful and wise slave” markem Bible reading olsem part long Theocratic Ministry Skul program long evri kongregeson. (Matthew 24:45) Bible-reading program bilong distaem hem finisim full Bible insaed evri seven year. Disfala schedule hem savve helpem evriwan bat especially olketa niu wan wea no readim yet full Bible. Olketa wea attendim Watchtower Bible Skul Bilong Gilead for olketa missionary and Ministerial Training Skul and tu olketa niu member bilong Bethel famili mas readim full Bible insaed wan year. Nomata wanem schedule iu followim, iuseleva or olsem famili, iu need for ting long Bible reading olsem wanfala main samting.

Wanem Nao Wei Bilong Iu for Read Hem Showimaot?

11. Hao and why nao iumi mas kaikai long olketa toktok bilong Jehovah evriday?

¹¹ Sapos iu savve faendem hard for followim Bible-reading schedule bilong iu, maet hem gud for askem iuseleva: ‘Hao nao wei wea mi read and lukluk long TV hem affectim wei wea mi readim Word bilong Jehovah?’ Tingim samting wea Moses raetem—and Jesus talem moa—hao “man mas laef, no long bred nomoa, bat long evri toktok wea kamaot from mouth bilong Jehovah.” (Matthew 4:4; Deuteronomy 8:3) Long sem wei wea iumi need for kaikaim bred or kaikai evriday for mekem physical body bilong iumi strong, iumi need tu for kasem tingting bilong Jehovah evriday for keepim spiritual saed bilong iumi strong. Iumi savve kasem tingting bilong God evriday long wei for readim Bible.

12, 13. (a) Hao nao aposol Peter showimaot feeling for barava wantem Word bilong God wea iumi shud garem? (b) Hao nao Paul hem iusim tokpiksa bilong milk long difren wei from Peter?

¹² Sapos iumi luksavve hao Bible, “no olsem word bilong man, bat, olsem trufala word bilong God,” iumi bae laekem tumas olsem wanfala baby barava laekem tumas milk bilong mami bilong hem. (1 Thessalonians 2:13) Aposol Peter storyim datwan taem hem raet olsem: “Olsem baby wea just born, mekem grow feeling for barava hangre for klinfala milk bilong datfala word, mekem iufala savve grow for kasem salvation thru long datwan, only sapos iufala luksavve finis hao Lord hem kaen tumas.” (1 Peter 2:2, 3) Sapos iumi barava teistim, from iumi seleva experiencem, hao “Lord hem kaen tumas,” bae iumi garem feeling for laekem tumas Bible reading.

¹³ Hem gud for markem hao Peter, long disfala scripture, iusim point abaotem milk long difren wei from aposol Paul. For baby wea just born, milk nao garem evri samting wea hem needim. Tokpiksa bilong Peter showimaot hao Word bilong God garem evri samting wea iumi needim for “grow for kasem salvation.” Long narasaed, Paul iusim milk for showimaot nogud wei for kaikai bilong samfala wea sei olketa full-grown finis long spiritual wei. Long leta bilong hem for olketa Hebrew Christian, Paul raet olsem: “Nomata iufala shud kamap olketa teacher fitim taem hia, iufala needim samwan for teachim iufala from start olketa firstfala samting bilong olketa holy toktok bilong God; and iufala kamap olsem man wea needim milk, no strongfala kaikai. From evriwan wea kaikaim milk hem no savve long word bilong raeteous fasin, from hem wanfala baby. Bat, strong kaikai hem for mature pipol, for olketa wea thru long wei for iusim, trainim paoa bilong olketa for luksavve long olketa samting wea stret and rong.” (Hebrews 5:12-14) Gudfala Bible reading savve help for mekem grow paoa bilong iumi for luksavve and for muvim iumi for hangre for spiritual samting.

Hao for Readim Bible

14, 15. (a) Wanem privilege nao Man wea raetem Bible offerim long iumi? (b) Hao nao iumi savve kasem gud samting from wisdom bilong God? (Givim samfala example.)

¹⁴ Bible reading wea barava helpem man hem start, no long wei for read, bat witim wei for prea. Prea hem wanfala spesol privilege. Hem olsem iu start for studyim gud wanfala buk abaotem wanfala deep subject long wei for askem man wea raetem for helpem iu minim samting wea iu redy for readim. Datwan bae hem barava help! Man wea raetem Bible, Jehovah, offerim datfala privilege long iu. Wanfala member bilong governing body long first century raet olsem long olketa brata bilong hem: “Sapos eniwan long iufala hem no garem wisdom, letem hem go ahed for askem God, from hem givim planti samting long evriwan and hem no kros taem hem duim diswan; and God bae givim long hem. Bat letem hem go ahed for askem witim faith, no daotem eni samting.” (James 1:5, 6) Governing Body bilong distaem hem evritaem kaonselem iumi for duim Bible reading witim wei for prea.

¹⁵ Wisdom hem wei for iusim savve long gudfala wei. So bifor iu openem Bible bilong iu, askem Jehovah for helpem iu luksavve long olketa point insaed reading bilong iu wea iu need for followim long laef bilong iuseleva. Joinim olketa niu point witim savve wea iu garem finis. Joinim olketa witim “datfala plan bilong healthy toktok” wea iu luksavve long hem. (2 Timothy 1:13) Ting raonem olketa samting wea happen long olketa servant bilong Jehovah bifor, and askem iuseleva wanem iu bae duim sapos iu insaed olketa sem samting.—Genesis 39:7-9; Daniel 3:3-6, 16-18; Acts 4:18-20.

16. Wanem gudfala idea nao iumi savve iusim for mekem iumi kasem moa samting from Bible reading bilong iumi?

¹⁶ No read long wei for finisim olketa page nomoa. Tek taem long hem. Ting raonem samting wea iu readim. Taem iu interest long wanfala point, faendem olketa cross reference sapos Bible bilong iu garem. Sapos point hem no klia yet, raetem note for duim moa research bihaen. Taem iu read, markem olketa scripture wea iu laek for rememberim or copyim olketa. Iu savve raetem olketa note bilong iuseleva tu and cross reference long saed. For olketa scripture wea iu ting maet iu bae needim wanday long preaching or teaching waka, faendem main word and markem long index bilong olketa Bible word long bihaen long Bible bilong iu.b

Mekem Bible Reading Samting Iu Hapi for Duim

17. Why nao iumi shud hapi for readim Bible?

¹⁷ Man wea raetem psalm story abaotem hapi man wea “hapi long law bilong Jehovah, and hem read smol long law bilong Hem day and naet.” (Psalm 1:2) Bible reading bilong iumi evriday hem shud no wanfala hevi bat samting wea man hapi tumas for duim. Wanfala wei for kasem diswan hem for evritaem luksavve long gudfala samting wea man lanem. Wise King Solomon raet olsem: “Hapi nao man wea faendem wisdom . . . Olketa wei bilong hem satisfae, and evri road bilong hem garem peace. Hem wanfala tree bilong laef long olketa wea kasholem, and olketa wea hol strong long hem olketa hapi.” (Proverbs 3:13, 17, 18) Wei for waka hard for kasem wisdom hem barava fitim, bikos olketa wei bilong hem mekem man satisfae, hapi, garem peace, and last samting, laef.

18. Wanem moa man needim for join witim Bible reading, and wanem nao bae iumi storyim long next article?

¹⁸ Tru nao, Bible reading savve givim gud samting and givim hapi. Bat waswe, hem inaf? Olketa member long olketa church bilong Christendom readim Bible for planti handred year finis, olketa “evritaem lane bat no savve kasem stretfala savve bilong truth.” (2 Timothy 3:7) For garem frut from wei for duim Bible reading, iumi mas duim diswan witim tingting for followim datfala savve long living bilong iumiseleva and for iusim long waka for preach and teach. (Matthew 24:14; 28:19, 20) Diswan minim man mas garem gudfala wei for study, wea hem savve enjoyim and wea givim hem reward tu, olsem iumi bae lukim long next article.

[Olketa Footnote]

Olketa Review Kwestin

• Wanem kaonsel wea olketa king bilong Israel kasem nao hem fitim olketa overseer distaem, and why nao olsem?

• Long distaem hu nao olsem “man from difren ples” and “olketa smol pikinini,” and why nao olketa need for readim Bible evriday?

• Wanem nao olketa gudfala wei wea “faithful and wise slave” helpem iumi for evritaem readim Bible?

• Hao nao iumi savve kasem gud samting and hapi from Bible reading?

[Piksa long page 9]

Olketa elder barava need for readim Bible evriday

[Piksa long page 10]

Hem kastom bilong Jesus for evritaem duim Bible reading long synagogue