Why Nao Tumas Corruption?
“Iu mas no acceptim wanfala bribe, from wanfala bribe mekem man wea lukluk for kamap blind and savve tanem toktok bilong olketa raeteous man.”—Exodus 23:8.
THRI thousand faev handred year bifor, Law Bilong Moses tambuim wei for bribem man. Planti handred year bihaen, olketa law wea againstim corruption kamap moa big. Nomata olsem, law no win for daonem corruption. Planti million bribe go ahed evri day, and planti billion pipol safa from diswan.
From corruption kamap big and tumas nao, hem putim danger long barava faondeson bilong wei bilong living. Long samfala kantri, klosap evriting kamap bihaen samwan grisim hand bilong narawan. Olketa bribem man for pasim exam, kasem licence for draev, kasem kontrak, or for winim kot case. Wanfala lawyer long Paris, Arnaud Montebourg, tok sorre olsem: “Corruption hem olsem nogud pollution wea hevi long feeling bilong pipol.”
Saed long bisnis nao main ples wea bribe hem big tumas. Samfala kampani keepim mek-thri part bilong profit bilong olketa for peim olketa raverave bigman bilong gavman. Magasin long Britain, The Economist, talem hao samting olsem 10 percent bilong $298 billion wea pipol spendem evri year long samting for faet raonem world, hem for bribem pipol for peim. From diskaen corruption kamap big kwiktaem, problem wea hem kosim kamap narawe tu. Insaed ten year wea go pas, olketa sei “wantok” system—raverave bisnis wea tu-thri rich pipol nomoa kasem gud samting from olketa savve long samfala—nao spoelem selen bilong samfala kantri.
Olketa wea barava safa from corruption and wei wea hem spoelem kantri hem olketa poor pipol—olketa wea hard for bribem eniwan. Olsem The Economist talem klia, “corruption hem wankaen hevi nomoa.” Waswe, man savve winim disfala hevi, or hem samting wea man kanduit ranawe from? For ansarem datfala kwestin, iumi mas firstaem luksavve long samfala main samting wea kosim corruption.
Wanem Nao Olketa Samting wea Kosim Corruption?
Why nao pipol chus for raverave and no honest? For samfala, hem nao barava isi wei—or only wei—for kasem samting olketa wantem. Samfala taem, wanfala bribe maet provaedem chance for missim panis. Staka wea lukim olketa politician, policeman, and olketa judge luk olsem olketa ting nating long corruption or maet olketa seleva tu raverave followim nomoa example bilong olketa.
Taem corruption kamap big, pipol acceptim gogo hem kamap part long living nomoa. Pipol witim barava smol wages gogo feel olsem olketa no wei nao. Olketa mas askem bribe sapos olketa laek for laef gud. And taem olketa wea forcem man for bribem olketa or wea bribem narawan kasem gud samting long raverave wei olketa no kasem panis, no planti nao bae redy for faet againstim wei olsem. “Bikos panis againstim nogud waka hem no kam kwiktaem, dastawe heart bilong olketa son bilong man kamap strong for duim nogud samting,” King Solomon hem sei.—Ecclesiastes 8:11.
Tufala strongfala paoa nao go ahed for encouragem corruption: selfish and greedy fasin. Bikos long selfish fasin, raverave pipol no laek luksavve long wei for safa wea nogud fasin bilong olketa hem kosim long pipol, and olketa saportim corruption bilong olketa nomoa bikos olketa kasem gud samting from hem. Taem pipol wea duim corruption kasem moa material samting, olketa kamap moa greedy. Solomon hem sei: “Man wea lovem silver bae no satisfae witim silver nomoa, olsem eniwan wea lovem rich samting bae no satisfae witim wages.” (Ecclesiastes 5:10) Hem tru, greedy fasin maet hem gud for mek selen, bat hem no daonem corruption and wei for brekem law.
Nara samting wea iumi shud no forgetim tu hem ruler wea iumi no savve lukim bilong world, wea Bible showimaot hem Satan datfala Devil. (1 John 5:19; Revelation 12:9) Satan barava busy for apim corruption. Bigfala bribe for eni man raet abaotem hem wan wea Satan offerim long Christ. ‘Evri kingdom hia bae mi givim long iu sapos iu foldaon and worshipim mi wanfala taem.’—Matthew 4:8, 9.
Bat, Jesus, hem nating join insaed corruption, and hem teachim olketa follower bilong hem for garem sem fasin. Waswe, teaching bilong Christ fit for kamap gudfala samting for faetem corruption distaem? Nextfala article bae lukluk gud long disfala kwestin.