KAVA SUBJECT | WANFALA GAVMAN WEA NO CORRUPT
Kingdom Bilong God Wanfala Gavman wea No Corrupt
President bilong audit office bilong gavman bilong Nicaragua storyim why nao hem tingse hem hard tumas for finisim corruption long gavman. Hem sei: “Evriwan olketa citizen. So sapos olketa citizen corrupt, then olketa bigman bilong pablik service bae corrupt tu.”
Sapos world hem fulap long corruption, masbi olketa gavman wea part bilong disfala world corrupt tu. Sapos olsem, gavman wea no corrupt mas no part bilong disfala world. Bible story abaotem kaen gavman olsem. Datfala gavman hem Kingdom bilong God, wea Jesus teachim olketa disaepol bilong hem for prea abaotem.—Matthew 6:9, 10.
Kingdom bilong God hem wanfala gavman wea rul kam from heven. Bae hem changem evri gavman bilong man. (Psalm 2:8, 9; Revelation 16:14; 19:19-21) Datfala Kingdom bae finisim corruption long gavman. Datwan hem wanfala nomoa long olketa blessing wea olketa man bae kasem from datfala Kingdom. Lukim sixfala pruv wea showimaot Kingdom hem fit for duim datwan.
1. PAOA
WHY NAO HEM WANFALA PROBLEM?: Olketa gavman kasem selen from citizen bilong olketa, maet from tax or duty. Diswan switim samfala bigman for stealim selen hia, and olketa narawan tekem bribe from pipol wea no laek peim tax wea olketa shud peim, or nara selen wea gavman askem. Diswan mekem gavman askem samfala tax moa for changem selen wea hem lusim. Datwan mekem corruption big go moa and hem hard moa for pipol wea honest.
HAO NAO KINGDOM BAE STRETEM?: Kingdom bilong God kasem paoa from Olmaeti God, Jehovah.a (Revelation 11:15) Kingdom no need for askem tax for duim waka bilong hem. From God hem garem “bigfala paoa” and hem kaen and no selfish, datfala Kingdom bae provaedem evri samting wea olketa citizen bilong hem needim.—Isaiah 40:26; Psalm 145:16.
2. RULER
WHY NAO HEM WANFALA PROBLEM?: Susan Rose-Ackerman wea iumi storyim finis, hem sei for finisim corruption iumi “mas start from olketa bigman and kam daon.” Pipol no trustim gavman taem hem duim samting for finisim corruption midolwan olketa police or olketa wea waka long customs, bat hem no duim eni samting long olketa bigman wea corrupt. Nomata sapos wanfala ruler laek for duim stret samting, hem no perfect tu. Bible sei: “No eni man wea raeteous hem stap long earth wea evritaem duim gudfala samting.”—Ecclesiastes 7:20.
Jesus rejectim bribe from Satan wea big winim eni nara bribe
HAO NAO KINGDOM BAE STRETEM?: Jesus Christ wea God markem for Ruler bilong Kingdom hem no olsem olketa man wea sin, and no eniwan savve switim hem for duim nogud samting. Jesus pruvim diswan taem hem rejectim bribe from Satan wea big winim eni nara bribe. Satan wea rulim disfala world laek givim Jesus “evri kantri long world and olketa nambawan samting wea olketa garem.” Satan promis for givim olketa samting hia long Jesus sapos hem baodaon and worshipim hem. (Matthew 4:8-10; John 14:30) Nomata taem Jesus gogo for dae, hem barava laek for gohed faithful, so hem les for drinkim wanfala drug for daonem pain wea maet mekem hem no savve tingting stret. (Matthew 27:34) Jesus pruvim hem fit, dastawe God mekem hem laef bak long heven for Ruler bilong Kingdom bilong Hem.—Philippi 2:8-11.
3. GAVMAN WEA CHANGE EVRITAEM
WHY NAO HEM WANFALA PROBLEM?: Staka kantri garem election evri tu-thri year, wea shud mekem pipol garem chance for aotem olketa bigman wea corrupt. Bat samting wea savve happen nao, samfala taem olketa campaign and election savve corrupt nomata long olketa rich kantri tu. Olketa wea rich savve givim selen for olketa campaign and for olketa nara samting, wea savve switim olketa wea winim election finis, and olketa narawan wea hope for winim election long future.
Justice John Paul Stevens bilong U.S. Supreme Court storyim wei wea olketa wea rich switim olketa hia hem savve mekem “Gavman hem nogud and no followim law, and pipol no trustim tu.” Dastawe long tingting bilong staka pipol, olketa grup bilong politik nao corrupt winim eni nara organization.
HAO NAO KINGDOM BAE STRETEM?: Kingdom bilong God bae stap for olowe and no eni nara gavman bae changem hem, so datwan bae finisim corruption long olketa campaign and election. (Daniel 7:13, 14) God nao chusim Ruler bilong Kingdom bilong hem, so hem no depend long pipol for votem hem and olketa no savve aotem hem. From datfala Kingdom hem stap for olowe, samting wea hem duim bae helpem pipol distaem and long future tu.
4. OLKETA LAW
Kingdom bilong God hem wanfala gavman wea rul kam from heven
WHY NAO HEM WANFALA PROBLEM?: Maet iu tingse olketa niu law savve stretem olketa problem. Bat samfala savveman sei taem iumi garem staka niu law, pipol garem moa chance for duim samting wea corrupt. And tu, for duim samting for followim olketa law for finisim corruption hem kostim big selen, bat hem no barava winim datfala problem.
HAO NAO KINGDOM BAE STRETEM?: Olketa law bilong Kingdom bilong God barava winim olketa law bilong gavman bilong man. Olsem example, Jesus no mekem staka rul for iumi followim, bat hem talem iumi for followim datfala Golden Rul. Hem sei: “Samting wea iufala laekem pipol for duim long iufala, sem samting nao iufala mas duim long olketa.” (Matthew 7:12) And tu, olketa law bilong Kingdom affectim tingting wea man garem abaotem why hem duim samting, and wanem hem duim. Jesus sei: “Iu mas lovem narawan long sem wei wea iu lovem iuseleva.” (Matthew 22:39) God nomoa savve long heart bilong man and savve sapos hem followim olketa law olsem or nomoa.—1 Samuel 16:7.
5. REASON FOR DUIM SAMTING
WHY NAO HEM WANFALA PROBLEM?: Corruption hem stap bikos pipol greedy and tingim olketa seleva. Plande long olketa bigman bilong gavman and olketa citizen garem olketa nogud wei olsem. Long firstfala article, iumi story abaotem bigfala stoa wea foldaon long Seoul. Olketa bigman bilong gavman tekem bribe from olketa wea wakem datfala building. Olketa wakaman hia peim bribe bikos olketa savve hem cheap winim wei for peim olketa gudfala building material and for followim olketa building gaedlaen.
For finisim corruption, pipol mas lane for no greedy and selfish. Bat olketa gavman bilong man no willing and no savve hao for duim datwan.
HAO NAO KINGDOM BAE STRETEM?: Kingdom bilong God deal witim corruption long wei for teachim pipol for aotem olketa rong tingting wea leadim olketa for duim datwan.b Olketa teaching olsem helpem olketa “for garem wanfala niu tingting.” (Ephesus 4:23) Olketa lane for lusim wei for greedy and selfish, and for satisfae nomoa and for tingim olketa narawan.—Philippi 2:4; 1 Timothy 6:6.
6. OLKETA CITIZEN
WHY NAO HEM WANFALA PROBLEM?: Nomata samfala pipol kam from gudfala famili and savve long wanem hem stret and no stret, olketa bae chus for corrupt and no honest. Olketa savveman sei hem nao reason why olketa gavman bilong man no savve finisim corruption. Samting wea olketa gavman savve duim nomoa hem for mekem corruption katdaon lelebet and no spoelem staka samting.
HAO NAO KINGDOM BAE STRETEM?: United Nations Convention Against Corruption sei for stopem corruption, olketa gavman shud encouragem pipol for “faithful, honest, and givim ansa for samting wea olketa duim.” Nomata datwan hem gudfala goal, Kingdom bilong God no just encouragem pipol for garem olketa gudfala wei olsem, bat pipol wea laek for citizen bilong disfala Kingdom mas garem olketa wei hia. Bible sei pipol wea “greedy” and “laea” bae no kasem Kingdom.—1 Corinth 6:9-11; Revelation 21:8.
Olketa firstfala Christian showimaot pipol savve lane for followim olketa hae standard bilong God. Olsem example, taem wanfala disaepol wea nem bilong Simon laek for givim selen long olketa aposol for kasem holy spirit, olketa no tekem datfala bribe. Olketa sei long hem: “Repent and lusim disfala nogud wei bilong iu.” Taem Simon luksavve hem stap long danger bikos long nogud samting wea hem laekem, hem askem olketa aposol for prea long Jehovah mekem hem savve changem wei bilong hem.—Acts 8:18-24.
WANEM NAO IU SAVVE DUIM FOR IU CITIZEN BILONG DATFALA KINGDOM?
Nomata wanem kantri nao iu kam from, iu savve kamap citizen bilong Kingdom bilong God. (Acts 10:34, 35) Evriwea long world datfala Kingdom hem teachim pipol distaem wanem olketa mas duim for kamap citizen bilong Kingdom. Olketa Jehovah’s Witness bae hapi for showim iu hao olketa conductim free Bible study. Iu bae lanem staka samting, and bae iu lanem moa samting abaotem “gud nius abaotem Kingdom bilong God” and wanem datfala Kingdom bae duim for finisim corruption long gavman. (Luke 4:43) Sapos iu laek for studyim Bible, iu savve story witim eni Witness long ples bilong iu, or go long Web site bilong mifala, jw.org.
Waswe, iu laek kasem wanfala free Bible study?
a Jehovah hem nem bilong God wea stap long Bible.
b Olsem example, lukim article “Is It Possible to Be Honest in a Corrupt World?” long The Watchtower bilong October 1, 2012.