Music wea Mekem God Hapi

Olketa storyim music olsem “barava olo and nambawan long evri samting wea man kasem.” Olsem languis, hem barava nambawan present, wea mekem man difren from animal. Music savve muvim feeling. Hem here naes long ear, stap longtaem long mind and, winim evri samting, music savve mekem God hapi.

OLSEM Bible showimaot, olketa Israelite olketa pipol wea laekem music. Unger’s Bible Dictionary hem sei music hem “wanfala main samting long taem bilong Bible bifor.” Olsem part long evriday laef, wei for singsing and olketa samting for pleim music hem part long worship bilong olketa. Bat voice bilong man nao hem main samting for iusim.

King David hem markem samfala man midolwan long olketa Levite “for directim singsing” long tabernacle, bifor olketa dedicatem temple wea Solomon, son bilong hem, buildim. (1 Chronicles 6:31, 32) Taem datfala ark bilong Covenant, wea stand for wei wea Jehovah stap long there, hem kasem Jerusalem, David arrange for samfala Levite “for kolem pipol for remember and for thankiu and praisem Jehovah.” Olketa singim praise witim voice and “witim olketa samting for pleim music wea garem string and witim olketa harp, . . . witim olketa cymbal wea olketa pleim witim bigfala saond, . . . witim olketa trumpet.” Olketa man hia “olketa markem nem bilong olketa for thankiu long Jehovah, bikos ‘loving-kaeness bilong hem for olowe.’”—1 Chronicles 16:4-6, 41; 25:1.

Datfala chorus “loving-kaeness [bilong Jehovah] hem for olowe” kamap planti taem insaed long olketa Psalm, datfala Bible buk wea evriwan savve hem join witim music. Olsem example, hem mek-tu part bilong evri 26 verse bilong Psalm 136. Wanfala man for studyim Bible hem sei: “Wei wea hem short hem for fitim lip bilong pipol. Evriwan wea herem finis savve rememberim.”

Olketa raeting wea stap bifor long evri Psalm showimaot wei wea olketa iusim evritaem olketa samting for pleim music. Psalm 150 storyim olketa samting olsem horn, harp, tambourine, pipe, and olketa cymbal, witim olketa string. Nomata olsem, main samting wea olketa laekem nao hem voice bilong man. Verse 6 encouragem evriwan olsem: “Evri samting wea laef—letem hem praisem Jah. Praisem Jah, iufala pipol!”

From music savve talemaot olketa feeling bilong iumi, long taem bilong Bible olketa sorre tingting savve muvim man for singim olketa sorre singsing. Bat, witim music bilong Israel olketa no savve duim evritaem diskaen singsing. Bible encyclopedia Insight on the Scripturesa hem sei: “Only long wanfala sorre singsing or long taem for talem sorre nao bae olketa chusim spesol singsing for sorre winim melody music or olketa hae, low and strong saond bilong barava toktok bilong man.”

Jesus and olketa faithful aposol bilong hem singim praise long Jehovah long naet bifor Jesus hem dae, and iumi sure olketa go ahed singim olketa toktok bilong Psalm. (Psalms 113-118) Diswan mas strongim olketa disaepol bilong Jesus for feisim wei wea Masta bilong olketa bae lusim olketa! Winim datwan, wei wea olketa disaed for go ahed olsem olketa faithful servant bilong barava hae Sovereign bilong universe, Jehovah, mas kamap moa strong taem olketa go ahed for singim disfala toktok faevfala taem “from loving kaeness bilong hem for olowe.” —Psalm 118:1-4, 29.

Olketa firstfala Christian bilong Ephesus and Colossae singim “olketa psalm and praise long God” (olketa really “hymn”). Olketa addim go “olketa spiritual singsing” long diswan wea olketa singim insaed heart bilong olketa. (Ephesians 5:19; Colossians 3:16) Thru long singsing and toktok, olketa iusim mouth bilong olketa for talemaot praise long gudfala wei. Waswe, Jesus no talem hao “samting wea fulap long heart nao mouth hem talem”?—Matthew 12:34.

Music wea No Mekem God Hapi

No evri music wea olketa story abaotem insaed Bible mekem God hapi. Tingim datfala samting wea happen long Maunt Sinai, ples wea Moses kasem Law, wea Ten Komandment insaed diswan. Taem Moses kam daon from datfala maunten, wanem nao hem herem? “Hem no olsem singsing bilong win,” “hem no olsem singsing bilong lus,” bat “hem here olsem narakaen singsing.” Diswan hem music wea join witim wei for worshipim idol, wanfala samting wea mekem God no hapi and wea kosim dae bilong samting olsem 3,000 wea mekem music hia.—Exodus 32:18, 25-28.

Nomata olketa man savve hao for mekem, pleim, and enjoyim enikaen music, hem no minim evri kaen music hia mekem God hapi. Why nao olsem? Christian aposol Paul hem explainim olsem: “Evriwan sin and no kasem glory bilong God.” (Romans 3:23) Olketa heathen samting, datfala teaching wea sei soul no savve dae, and wei for mekhae long Mary olsem “mami bilong God” hem planti taem showaot olsem subject bilong olketa music wea pipol raetem. Bat, olketa biliv and samting olketa duim hia nating honorim God bilong truth, bikos hem barava difren from samting wea stap insaed long Word bilong hem, Bible.—Deuteronomy 18:10-12; Ezekiel 18:4; Luke 1:35, 38.

Chusim Music Long Wisefala Wei

From staka music tumas stap for iumi chusim distaem, hem savve konfiusim man. Olketa wakem olketa compact disc long wei wea hem bae muvim pipol for baem music wea olketa recordim. Bat sapos wanfala worshiper bilong God want for mekem Hem hapi, hem bae careful and chus long wisefala wei for mekem hem stap klia from olketa singsing and music wea kam from olketa biliv bilong giaman religion or wea mekhae long dirty fasin and wei for worshipim demon.

Albert, wea wantaem hem serve olsem wanfala Christian missionary long Africa, sei hem garem lelebet chance nomoa for pleim piano long there. Bat hem savve lisin olowe long samfala music wea hem tekem witim hem. Long hom kantri bilong hem, Albert hem visitim olketa Christian olsem wanfala traveling overseer. Hem no garem staka taem nao for lisin long music. Hem sei: “Beethoven nao hem favorite composer bilong mi. Insaed long olketa year wea go pas, mi kolektem olketa difren kaen stael long olketa music bilong hem.” Wei for lisin long olketa mekem hem enjoyim tumas. Hem tru, evri man no semsem long wei for chusim music, bat olsem olketa Christian iumi tingim kaonsel bilong Paul: “Nomata iufala kaikai or drink or duim eni samting, duim evri samting for glory bilong God.”—1 Corinthians 10:31.

Music and Wei for Dedicate

Main samting wea Susie lovem nao hem music. Hem sei: “Mi start for pleim piano taem mi 6 year, violin taem mi 10 year, and bihaen harp taem mi 12 year.” Bihaen, Susie attendim Royal College bilong Music long London, England, for studyim harp. Hem study for fofala year witim wanfala woman bilong Spain wea savve tumas long hao for pleim harp and nara year moa long wanfala music skul long Paris, and kasem honors degree long music and diploma for pleim harp and teachim piano.

Gogo Susie start for joinim wanfala kongregeson bilong Olketa Jehovah’s Witness long London. Long there hem faendem tru interest and love midolwan olketa Witness. Gogo, love bilong hem for Jehovah hem grow, and strong bilong hem for service bilong hem muvim hem for luk for olketa wei for servem hem. Diswan lead go long wei for dedicate and baptaes. Susie sei: “For mekem music olsem laef waka hem wanfala wei bilong laef wea man dedicate long hem, so wei for dedicatem laef hem no niu samting long mi.” Taem for plei long olketa concert hem katdaon taem hem join insaed Christian ministry for preachim gud nius bilong Kingdom bilong God for obeyim instruction bilong Jesus.—Matthew 24:14; Mark 13:10.

From distaem hem no spendem staka taem long music, hao nao hem feel? Hem tok stret olsem: “Samfala taem mi lelebet feel nogud bikos mi no garem moa taem for practice, bat mi still pleim olketa instrument bilong mi and enjoyim music. Music hem wanfala present from Jehovah. Mi enjoyim long bigfala wei moa taem mi putim service bilong hem firstaem long laef bilong mi.”—Matthew 6:33.

Music wea Praisem God

Albert and Susie witim klosap six million Witness bilong Jehovah praisem Jehovah witim music evritaem. Long olketa Christian meeting wea olketa holem long olketa Kingdom Hall insaed 234 kantri, sapos fitim, olketa startim and finisim meeting bilong olketa witim wei for singsing long Jehovah. Long major and minor key, olketa naesfala melody garem olketa toktok wea kam from Bible for givim praise long Jehovah God.

Evriwan wea attendim meeting apim voice bilong olketa for singim hao hem wanfala God wea kea (Song 44). Olketa singim wanfala singsing bilong Praise long Jehovah (Song 190). Singsing bilong olketa showimaot hapi and olketa responsibility bilong wei for kaban witim olketa Christian brata and sista, Christian living, and olketa Christian fasin. Olketa difren kaen stael music wea olketa Witness from Asia, Australia, Europe, and North and South America iusim taem olketa mekem olketa melody hem mekem hapi bilong olketa kamap moa big.b

“Sing long Jehovah wanfala niu song. Sing long Jehovah, iufala pipol bilong full earth. Sing long Jehovah, blessim nem bilong hem,” hem olketa firstfala toktok bilong wanfala barava nambawan royal psalm for sing witim feeling wea olketa raetem long taem bilong man wea raetem psalm. “Long evriday talemaot gud nius bilong salvation wea kam thru long hem. Talemaot glory bilong hem long olketa nation, midolwan long olketa pipol talem abaotem olketa nambawan waka bilong hem.” (Psalm 96:1-3) Diswan nao wanem Olketa Jehovah’s Witness duim long ples wea olketa stap, and olketa invaetem iu for joinim olketa for singim disfala praise. Bae olketa welkamim iu long Kingdom Hall bilong olketa, ples wea iu savve lanem hao for praisem Jehovah witim music wea mekem hem hapi.

[Olketa Footnote]

[Piksa long page 28]

Singim praise long Jehovah