Waswe, Iu Savve Finis?

Hao, music hem important samting lo laef blo olketa Israelite bifor?

MUSIC hem wanfala important samting lo culture blo olketa Israelite bifor. Staka taem, Bible story abaotem pipol wea pleim olketa musical instrument and olketa wea singsing. Klosap wan tenth lo Bible hem olketa singsing, and samfala main wan lo olketa nao hem Bible buk Psalms, Song of Solomon, and Lamentations. Datfala buk Music in Biblical Life hem sei dat Bible hem “storyim klia hao olketa Israelite iusim music lo staka activity wea olketa duim lo evriday laef.”

Music hem part lo evriday laef. Olketa Israelite pleim olketa musical instrument and singim olketa song for showimaot feeling blo olketa. (Isa. 30:29) Olketa woman savve pleim tambourine, singim olketa hapi song, and dance lo taem blo coronation, festival, and taem army winim war. (Judg. 11:34; 1 Sam. 18:​6, 7; 1 Ki. 1:​39, 40) Olketa Israelite singim tu olketa singsing blo sorre taem samwan hem dae. (2 Chron. 35:25) Datfala McClintock and Strong’s Cyclopedia sei dat “olketa Jew olketa pipol wea barava interest lo music.”

Music lo haos blo king. Olketa king blo Israel barava enjoyim wei for lisin lo music. King Saul tekem kam David lo palace blo king for pleim music for hem. (1 Sam. 16:​18, 23) Bihaen taem David kamap king, hem wakem olketa musical instrument, composim olketa barava naes song, and organizem orchestra for plei lo temple blo Jehovah. (2 Chron. 7:6; Amos 6:5) King Solomon garem olketa man and woman singer lo palace blo hem.—Eccl. 2:8.

Music hem part lo worship. Olketa Israelite iusim music lo worship blo olketa for Jehovah. Olketa garem 4,000 musician wea savve pleim music lo temple lo Jerusalem. (1 Chron. 23:5) Olketa pleim olketa cymbal, string instrument, olketa harp, and trumpet. (2 Chron. 5:12) Bat hem no just olketa professional musician hia wea iusim music taem olketa worshipim Jehovah. Luk olsem, staka Israelite nao savve singim olketa song wea olketa kolem lo ‘Song blo Olketa wea Go Ap’ taem olketa travel go lo Jerusalem for celebratem olketa festival evri year. (Ps. 120-134) Olketa raeting blo Jew showimaot dat taem olketa Israelite celebratem Pasova, olketa savve singim olketa Hallel Psalms.a

Kam kasem distaem, music hem wanfala important samting lo pipol blo God. (Jas. 5:13) Singsing hem part lo worship blo iumi. (Eph. 5:19) Music mekem iumi for wan mind witim olketa brata and sista blo iumi. (Col. 3:16) And hem savve strongim iumi taem iumi deal witim olketa hard taem. (Acts 16:25) Music hem wanfala beautiful wei for showimaot faith blo iumi lo Jehovah and love blo iumi for hem.