Mek-108 Class Bilong Gilead Kasem Encouragement for Duim Holy Service

INSAED long Bible, planti taem disfala toktok “holy service” hem minim worship bilong God. Disfala toktok hem kam from Greek word wea minim wei for duim service long God. (Romans 9:4) Olketa 5,562 pipol wea lisin long graduation program bilong mek-108 class bilong Watchtower Bible Skul Bilong Gilead herem olketa speaker givim gudfala kaonsel wea bae helpem olketa wea graduate for duim holy service wea Jehovah God acceptim.a

Theodore Jaracz, wanfala member bilong Governing Body bilong Olketa Jehovah’s Witness, hem nao chairman. Program hem start witim English song namba 52, “Nem Bilong Dadi Bilong Iumi.” Mek-tu verse bilong datfala song hem sei: “Mifala lukaotem olketa wei for mifala savve talemaot tu nambawan nem bilong iu.” Datwan barava showimaot trufala feeling bilong olketa student hia (wea kam from 10-fala kantri) for iusim training wea olketa kasem for missionary assignment long 17 difren kantri.

Long introduction bilong hem, Brata Jaracz tok abaotem deep study wea olketa student duim long Bible for faevfala month wea hem redyim olketa for duim service long nara kantri. Diswan helpem olketa for “mek sure long evri samting,” hem nao, for lukluk gud followim Word bilong God wanem olketa lanem finis, and for “hol strong long samting wea gud.” (1 Thessalonians 5:21) Hem encouragem olketa for stap faithful long Jehovah, Word bilong hem, and assignment wea olketa kasem training for hem. Wanem nao bae helpem olketa taem olketa duim evri samting hia?

Gudfala Advaes for Duim Holy Service

Lon Schilling, wanfala member bilong Bethel Operations Komiti, storyim disfala theme “Waswe, Bae Iu Winim Test Bilong Balance Fasin?” Hem mekhae long gud samting wea kamaot from balance fasin, wea showimaot wisdom bilong God. (James 3:17) Balance fasin hem minim for mekwei, no teksaed, kaen, and patient. “Pipol wea garem balance fasin showimaot disfala fasin taem olketa deal witim nara man. Olketa no ova tumas,” Brata Schilling hem sei. Wanem nao savve helpem wanfala missionary for balance? Garem balance tingting abaotem seleva, iusim chance for lisin and lane from nara man, and willing for herem tingting bilong nara man wea no brekem principle bilong God.—1 Corinthians 9:19-23.

“No Forget for Kaikai!” hem title bilong next part long program, wea Samuel Herd, nara member bilong Governing Body, hem givim. Hem mekhae long gud samting wea kamaot taem man kaikai gud long spiritual wei, for mekem hem stap redy for duim holy service. Brata Herd hem sei: “Spiritual waka bilong iu bae kwiktaem kamap big taem iu busy long assignment bilong iu for preach and teach. Dastawe, iu bae need for kaikaim staka moa spiritual kaikai for balancem strong bilong iu.” Wei for kaikaim spiritual kaikai olowe savve helpem missionary for no feel wikdaon long spiritual wei and ting bak long hom. Hem helpem man for satisfae and disaed for stap long assignment bilong hem for duim holy service.—Philippians 4:13.

Wanfala teacher long Gilead, Lawrence Bowen, encouragem olketa student wea graduate for “Go Bak Long Start.” Wanem nao hem minim? Hem askem full audience for lukim Proverbs 1:7, wea sei: “Wei for fraet long Jehovah hem start bilong savve.” Speaker hem sei: “Eni samting wea no acceptim main truth hao Jehovah hem stap kanduit kamap fit olsem trufala savve or kamap stretfala savve.” Brata Bowen hem markem olketa information insaed long Word bilong God, Bible, olsem olketa pisis bilong wanfala jigsaw puzzle. Taem iu joinim tugeta evri pisis, iu lukim wanfala piksa. Sapos staka pisis stap, piksa hia bae luk moa big and moa klia and man bae minim gud. Diswan savve helpem evriwan for duim holy service long God.

Wallace Liverance, registrar bilong Gilead Skul, hem givim last tok. Theme bilong hem sei “Givim Thankiu Olsem Sakrifaes Bilong Iu Long God.” Hem tok abaotem story wea Jesus healim tenfala man wea garem leprosy. (Luke 17:11-19) Wanfala nomoa tan go bak for praisem God and talem thankiu long Jesus. Brata Liverance hem sei: “Iumi sure, olketa narawan hapi tumas from olketa klin. Olketa hapi long olketa seleva, bat luk olsem wanem olketa laekem nomoa hem for priest sei olketa klin nao.” Wei wea man kamap klin long spiritual wei, witim wei for showimaot thankiu, from hem lanem truth shud muvim hem for talemaot thankiu long God for gudfala fasin bilong hem. Olketa student bilong mek-108 class bilong Gilead kasem encouragement for ting raonem evri waka bilong God and gudfala fasin bilong hem mekem service and sakrifaes bilong olketa showimaot thankiu long God.—Psalm 50:14, 23; 116:12, 17.

Olketa Experience and Interview Long Hao for Duim

Mark Noumair, nara teacher long Gilead, leadim next part bilong program. Hem abaotem olketa experience bilong class long field service taem olketa kasem training. Olketa student duim average bilong samting olsem 12 year long full-taem ministry bifor olketa go long Gilead. Taem olketa attendim disfala skul, olketa startim planti Bible study witim pipol from difren kaen living, wea diswan showim hao olketa student savve hao nao for “kamap evri samting long evrikaen pipol.”—1 Corinthians 9:22.

Bihaen olketa experience, Charles Molohan and William Samuelson interviewim samfala member bilong Bethel famili and traveling overseer wea attendim Gilead bifor. Wanfala brata wea olketa interviewim, Robert Pevy, hem serve long Philippines bihaen hem graduate from mek-51 class bilong Gilead. Hem talem class: “Taem eni problem kamap, evriwan givim idea bilong olketa seleva long hao nao for stretem datfala problem. Evritaem samwan hem moa kleva winim iu, samwan wea bae talem idea wea moabeta. Bat sapos iu luk insaed long Bible and trae for faendem tingting bilong God long samting, no eniwan bae winim datwan. Datwan nao bae givim stret ansa evritaem.”

For finisim disfala nambawan spiritual program, John Barr, wanfala member bilong Governing Body, storyim disfala theme “Duim Holy Service Wea Jehovah Acceptim.” Hem showim hao nao for duim holy service long field ministry for helpem pipol wea garem honest heart for worshipim God long wei wea Hem acceptim. Bihaen Brata Barr storyim toktok bilong Jesus long Matthew 4:10, hem sei, “For iumi worshipim Jehovah nomoa, iumi mas stap klia long evrikaen wei for worshipim idol, olsem fasin for kavet, barava wantem riches, and wei for apim seleva. Iumi barava hapi tumas taem iumi tingim hao start kam long 1940 kasem distaem, olketa missionary bilong iumi garem nambawan record long diswan! And mifala sure hao iufala wea graduate long mek-108 class bilong Gilead bae followim gudfala example bilong olketa. Iufala bae duim holy service long Jehovah, wea hem nomoa fit for kasem.”

Datwan hem endim program long gudfala wei. Then hem taem for herem olketa greeting wea kam from planti ples raonem world, givimaot olketa diploma, and readim wanfala leta from class, wea showimaot thankiu for training wea olketa kasem. Datfala class wea graduate kasem encouragement for stap faithful long assignment bilong olketa and long wei for servem Jehovah. Evriwan wea hipap, insaed diswan hem olketa guest from 25 kantri, join for finisim program witim song and prea.

[Footnote]

[Box long page 23]

INFORMATION ABAOTEM CLASS

Haomas kantri olketa kam from: 10

Haomas kantri olketa bae go long hem: 17

Haomas student: 46

Average age: 34

Average year insaed truth: 16

Average year insaed full-taem ministry: 12

[Piksa long page 24]

Mek-108 Class Bilong Watchtower Bible Skul Bilong Gilead wea Graduate

List long daon start long front and go long bihaen, and olketa nem start long left go long raet saed bilong each laen.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.