Hao Waed Nao Love Bilong Iu?
“Iu mas lovem neiba bilong iu olsem iuseleva.”—Matthew 22:39.
1. Sapos iumi lovem Jehovah, why nao iumi mas lovem neiba bilong iumi tu?
TAEM samwan askem Jesus wanem nao nambawan komandment, hem ansa olsem: “Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu.” Then hem talem mek-tu komandment wea klosap olsem first wan: “Iu mas lovem neiba bilong iu olsem iuseleva.” (Matthew 22:37, 39) Yes, wei for lovem neiba hem wanfala mark bilong wanfala Christian. Tru nao, sapos iumi lovem Jehovah, iumi mas lovem neiba bilong iumi. Why? Bikos iumi showimaot love bilong iumi for God long wei for obeyim Word bilong hem, and Word bilong hem komandim iumi for lovem neiba bilong iumi. So, sapos iumi no lovem olketa brata and sista bilong iumi, love bilong iumi for God hem kanduit tru wan.—Romans 13:8; 1 John 2:5; 4:20, 21.
2. Wanem kaen love nao iumi shud garem for olketa neiba bilong iumi?
2 Taem Jesus sei iumi shud lovem neiba bilong iumi, hem minim moa samting winim wei for fren nomoa. And hem storyim wanfala love wea difren from feeling wea man born kam witim wea stap insaed famili or witim wanfala man and woman. Hem story abaotem kaen love wea Jehovah garem for olketa servant bilong hem wea dedicate and wea olketa garem for hem. (John 17:26; 1 John 4:11, 19) Wanfala Jew scribe—wea, from toktok bilong hem, Jesus luksavve hem man wea garem savve—hem agree witim Jesus hao man shud lovem God “witim full heart bilong hem and witim full mind bilong hem and witim full strong.” (Mark 12:28-34) Hem talem stretfala toktok. Olketa feeling and savve bilong iumi nao insaed long love wea iumi mekem grow for God and for neiba. Hem samting wea man feelim long heart, and mind nao gaedem.
3. (a) Hao nao Jesus teachim wanfala “man wea savve gud long Law” for garem tingting wea moa waed long hu nao neiba bilong hem? (b) Hao nao parabol bilong Jesus fitim olketa Christian distaem?
3 Olsem Luke hem talem, taem Jesus sei iumi shud lovem neiba bilong iumi, “wanfala man wea savve gud long Law” hem ask olsem: “Hu nao really neiba bilong mi?” Jesus ansa witim wanfala parabol. Samfala killim nogud wanfala man, steal from hem, and leavim hem haf-dead long saed road. Firstaem wanfala priest and then wanfala Levite wakabaot go pas. Tufala evriwan go pas long hem. Gogo, wanfala Samaritan man hem kam, lukim datfala man wea garekil nogud, and showimaot barava kaenfala fasin long hem. Hu long thrifala hia nao hem neiba long datfala man wea garekil? Ansa hem klia. (Luke 10:25-37) Datfala man wea savve gud long Law maet seke fogud for herem Jesus sei wanfala Samaritan man maet moabeta winim wanfala priest and wanfala Levite long wei for olsem neiba. Tru nao, Jesus hem helpem datfala man for lovem neiba bilong hem long wei wea moa waed. Olketa Christian tu showimaot love long kaen wei olsem. Tingim evriwan wea kasem love bilong olketa.
Love Insaed Long Famili
4. Long wea firstaem nao Christian showimaot love?
4 Olketa Christian lovem olketa famili member bilong olketa—waef lovem hasband, hasband lovem waef, dadi and mami lovem pikinini. (Ecclesiastes 9:9; Ephesians 5:33; Titus 2:4) Tru, feeling bilong love wea man born witim and wea keepim pipol tugeta hem stap insaed planti famili. Bat, olketa report bilong marit wea brekdaon, wei for spoelem partner, and no lukaftarem or spoelem pikinini showimaot famili hem kasem hevi distaem, and famili feeling wea man born witim maet no inaf for keepim famili tugeta. (2 Timothy 3:1-3) For mekem famili laef win, olketa Christian need for showimaot love wea Jehovah and Jesus garem.—Ephesians 5:21-27.
5. Dadi and mami luk long hu nao for help for teachim pikinini bilong olketa, and wanem nao kamaot from planti duim olsem?
5 Christian dadi and mami ting long pikinini bilong olketa olsem wanfala responsibility from Jehovah, and olketa luk long hem for help for teachim olketa. (Psalm 127:3-5; Proverbs 22:6) Long wei olsem olketa mekem grow Christian love, wea helpem olketa for protectim pikinini bilong olketa from nogud samting wea young pipol foldaon long hem. From diswan, planti Christian dadi and mami kasem hapi wea semsem witim wanfala mami long Netherlands. Bihaen hem lukim son bilong hem baptaes—wanfala long 575 wea baptaes long Netherlands last year—hem raet olsem: “Long distaem, hard waka bilong mi for 20 year wea go pas hem kasem reward. Full taem and strong wea mi givim—and tu pain, hard waka, and sorre—mi forgetim nao.” Hem hapi tumas from son bilong hem, chus seleva, for servem Jehovah. Insaed long peak bilong 31,089 pablisa wea report long Netherlands last year, planti lane for lovem Jehovah from dadi and mami bilong olketa.
6. Hao nao Christian love savve help for strongim marit?
6 Paul kolem love olsem “perfect wei for keepim wan mind,” and hem savve keepim marit nomata long olketa hard taem. (Colossians 3:14, 18, 19; 1 Peter 3:1-7) Taem wanfala man long Rurutu, wanfala smol island wea stap samting olsem 700 kilometer from Tahiti, hem start for studyim Bible witim Olketa Jehovah’s Witness, waef bilong hem strong for againstim hem. Gogo, hem tekem olketa pikinini, lusim man hia, and go for stap long Tahiti. Nomata olsem, man hia showimaot love bilong hem long wei for sendem selen evritaem and ring long telephone for ask sapos waef or olketa pikinini needim eni samting. So hem duim best bilong hem for fulfillim olketa Christian responsibility bilong hem. (1 Timothy 5:8) Hem prea evritaem for famili bilong hem kam bak tugeta, and gogo waef bilong hem kam bak. Taem hem kam bak, man hia deal witim hem long “love, fasin for go ahed strong, kwaet fasin.” (1 Timothy 6:11) Long 1998, hem baptaes and hapi tumas taem waef bilong hem agree for studyim Bible. Datfala study hem wanfala long 1,351 wea olketa conductim long territory anda long Tahiti branch last year.
7. Olsem wanfala man long Germany talem, wanem nao strongim marit bilong hem?
7 Long Germany wanfala man againstim wei wea waef bilong hem interest long Bible truth and hem feel sure Olketa Jehovah’s Witness laek for giamanim hem. Bat, bihaen, man hia raet go long Witness wea firstaem meetim waef bilong hem: “Thankiu for mekem waef bilong mi meetim Olketa Jehovah’s Witness. Long firstaem, mi wari bikos mi herem planti nogud samting abaotem olketa. Bat distaem, bihaen mi attendim olketa meeting witim waef bilong mi, mi luksavve mi barava rong. Mi savve mi herem truth, and hem mekem marit bilong mitufala kamap moa strong.” Insaed long 162,932 Witness bilong Jehovah long Germany—and 1,773 long olketa island anda long Tahiti branch—hem planti famili wea wan mind from wei for showimaot love wea God showimaot.
Love for Olketa Christian Brata Bilong Iumi
8, 9. (a) Hu nao teachim iumi for lovem olketa brata bilong iumi, and wanem nao love muvim iumi for duim? (b) Givim wanfala example bilong hao love savve helpem olketa brata for saportim each other.
8 Paul sei long olketa Christian long Thessalonica: “God nao teachim iufala for lovem each other.” (1 Thessalonians 4:9) Yes, olketa wea “Jehovah teachim” lovem each other. (Isaiah 54:13) Love bilong olketa showaot long akson, olsem Paul talem taem hem sei: “Thru long love slave for each other.” (Galatians 5:13; 1 John 3:18) Olsem example, diswan olketa duim taem olketa visitim olketa brata and sista wea sik, encouragem olketa wea garem sorre feeling, and saportim olketa wea wik. (1 Thessalonians 5:14) Trufala Christian love bilong iumi hem help for mekem spiritual paradaes bilong iumi grow.
9 Long Ancón Kongregeson—wanfala long 544 kongregeson long Ecuador—olketa brata showimaot love bilong olketa long gudfala wei. Problem saed long selen mekem olketa no garem waka or selen, so olketa pablisa disaed for kasem selen long wei for sellim kaikai long olketa fisherman taem olketa kam bak from full naet wea olketa fishing. Evriwan waka tugeta, olketa pikinini tu. Olketa mas start long 1:00 klok long morning mekem kaikai hem redy long 4:00 klok taem olketa fisherman kam bak. Olketa sharem datfala selen wea olketa kasem midolwan olketa seleva for fitim need bilong olketa. Help olsem wea evriwan duim hem showimaot trufala Christian love.
10, 11. Hao nao iumi savve showimaot love for olketa brata wea iumi no savve gud long olketa?
10 Bat, love bilong iumi hem no for olketa Christian wea iumi savve long olketa nomoa. Aposol Peter hem sei: “Garem love for full grup bilong olketa brata.” (1 Peter 2: 17) Iumi lovem evri brata and sista bilong iumi bikos olketa worshipim Jehovah God. Taem bilong bigfala trabol hem chance for showimaot love hia. Olsem example, long 2000 service year, bigfala flood spoelem Mozambique, and war midolwan pipol bilong Angola hem mekem planti pipol kamap poor. Olketa samting hia affectim staka long 31,725 brata long Mozambique and 41,222 long Angola. So, olketa Witness long South Africa wea stap klosap sendem go staka supply for helpem olketa brata long olketa kantri hia. Wei wea olketa willing for givim “olketa extra samting” for olketa brata wea garem need hem showimaot love bilong olketa.—2 Corinthians 8:8, 13-15, 24.
11 Love hem showaot tu taem olketa brata long planti kantri help for buildim olketa Kingdom Hall and Assembly hall long olketa kantri wea no rich. Wanfala example hem long Solomon Islands. Nomata olketa insaed bigfala trabol, Solomon Islands garem 6-percent increase long olketa pablisa last year, witim peak bilong 1,697. Olketa plan for buildim wanfala Assembly Hall. Nomata planti lusim datfala kantri, olketa volunteer kam from Australia for help for buildim datfala hall. Gogo, olketa volunteer mas go tu, bat olketa trainim firstaem olketa brata long there for finisim faondeson. Olketa wakem evri steel part bilong hall hia long Australia and sendem long ship, and wei for finisim disfala nambawan building bilong worship—long taem wea planti building project stap nating nomoa—hem bae gudfala witness for nem bilong Jehovah and for love bilong olketa brata.
Olsem God, Iumi Lovem World
12. Hao nao iumi followim Jehovah long tingting bilong iumi long olketa wea no garem sem faith olsem iumi?
12 Waswe, love bilong iumi hem for famili and olketa brata bilong iumi nomoa? Sapos iumi “followim wei bilong God” iumi no olsem. Jesus sei: “God lovem world tumas dastawe hem givim only-born Son bilong hem, mekem evriwan wea showimaot faith long hem no need for dae bat kasem laef olowe.” (Ephesians 5:1; John 3:16) Olsem Jehovah God, iumi showimaot loving wei long evriwan—insaed diswan hem olketa wea no garem sem faith olsem iumi. (Luke 6:35, 36; Galatians 6:10) For barava fitim diswan, iumi preachim gud nius bilong Kingdom and talem nara pipol abaotem barava bigfala love wea God showimaot long olketa. Diswan savve leadim eniwan wea lisin for kasem salvation.—Mark 13:10; 1 Timothy 4:16.
13, 14. Wanem nao samfala experience bilong olketa brata wea showimaot love long pipol wea no Witness, nomata hem hard for olketa?
13 Tingim fofala spesol pioneer long Nepal. Olketa hia kasem assignment long wanfala taon long southwest part bilong datfala kantri, and for faev year finis, olketa showimaot love long wei for patient for witness insaed datfala taon and olketa vilij aotsaed. For duim full territory, planti taem olketa gogo planti hour long bicycle nomata hem winim 40°C hot. Love bilong olketa and wei for “go ahed strong long waka wea hem gud” hem kasem gud samting taem wanfala buk study grup hem start long wanfala vilij hia. (Romans 2:7) Long March 2000, 32 pipol kam for herem pablik tok bilong circuit overseer wea visit. Nepal garem peak bilong 430 pablisa last year—wea hem 9 percent increase. Hem klia hao Jehovah hem barava blessim strong and love wea olketa brata long datfala kantri showimaot.
14 Long Colombia olketa temporary spesol pioneer go for preach midolwan olketa Wayuu Indian. For duim diswan, olketa mas lanem niu languis, bat loving interest bilong olketa kasem reward taem 27 pipol attendim wanfala pablik tok nomata big rain. Strong wea olketa pioneer hia showimaot long loving wei hem part long 5-percent increase long Colombia and wanfala peak bilong 107,613 pablisa. Long Denmark wanfala olo sista laek for sharem gud nius witim nara pipol, bat hem disable. Hem no letem datwan stopem hem, hem witness long pipol wea interest thru long olketa leta. Distaem, hem raet long 42 pipol and conductim 11-fala Bible study. Hem wanfala long peak bilong 14,885 pablisa wea report long Denmark last year.
Lovem Olketa Enemy Bilong Iu
15, 16. (a) Jesus sei love bilong iumi mas hao waed? (b) Hao nao olketa brata deal long loving wei witim wanfala man wea raetem laea toktok againstim Olketa Jehovah’s Witness?
15 Jesus talem datfala man wea savve gud long Law hao hem fit for ting long wanfala Samaritan olsem neiba. Insaed Sermon bilong hem long Maunten, Jesus sei tu: “Iufala herem olketa sei, ‘Iufala mas lovem neiba bilong iufala and heitim enemy bilong iufala.’ Bat, mi talem iufala: Go ahed for lovem olketa enemy bilong iufala and for prea for olketa wea persecutim iufala; mekem iufala savve showimaot iufala olketa son bilong Dadi bilong iufala wea stap long heven.” (Matthew 5:43-45) Nomata taem samwan hem againstim iumi, iumi trae for “winim nogud fasin witim gud fasin.” (Romans 12:19-21) Sapos fitim, iumi sharem witim hem barava spesol samting wea iumi garem, hem nao truth.
16 Long Ukraine, wanfala article insaed Kremenchuk Herald niuspepa storyim Olketa Jehovah’s Witness olsem wanfala danger sekson. Diswan hem serious samting bikos long Europe samfala storyim Olketa Jehovah’s Witness long wei olsem for switim pipol for stopem or tambuim waka bilong olketa Witness. So, olketa go lukim editor bilong niuspepa and ask for pablisim wanfala article for stretem datfala article. Hem agree for duim, bat witim datfala article, hem printim wanfala toktok wea sei first article hem storyim olketa tru samting. So olketa brata go lukim hem moa witim moa information. Gogo, datfala editor hem luksavve first article hem rong, so hem pablisim nara toktok for sei first article hem rong. Wei for deal witim hem long stret and kaen wei hem nao loving wei for stretem diswan, and gud samting kamaot from diswan.
Hao Nao Iumi Savve Mekem Love Grow?
17. Wanem nao showaot maet hem no isi evritaem for deal long loving wei witim nara pipol?
17 Taem wanfala baby hem born, kwiktaem nomoa dadi and mami bilong hem lovem tumas. Wei for deal long loving wei witim olketa full-grown man hem no evritaem savve kwiktaem olsem. Dastawe Bible planti taem talem iumi for lovem each other—hem samting wea iumi mas mekem grow. (1 Peter 1:22; 4:8; 1 John 3:11) Jesus savve love bilong iumi bae kasem test taem hem sei iumi shud forgivim brata bilong iumi “go kasem seventi-seven taem.” (Matthew 18:21, 22) Paul tu encouragem iumi for “go ahed for patient witim narawan.” (Colossians 3:12, 13) Dastawe Bible sei: “Aftarem love”! (1 Corinthians 14:1) Hao nao iumi savve duim diswan?
18. Wanem nao bae helpem iumi for mekem grow love for nara pipol?
18 Firstaem, iumi savve evritaem tingim love wea iumi garem for Jehovah God. Disfala love hem strong samting wea muvim iumi for lovem neiba bilong iumi. Why nao olsem? Bikos taem iumi duim olsem, diswan talemaot gudfala samting abaotem Dadi bilong iumi long heven and givim glory and praise long hem. (John 15:8-10; Philippians 1:9-11) Mek-tu samting, iumi savve trae for lukim samting long wei wea Jehovah hem lukim. Evritaem iumi sin, iumi sin againstim Jehovah; nomata olsem, hem evritaem forgivim iumi and go ahed for lovem iumi. (Psalm 86:5; 103:2, 3; 1 John 1:9; 4:18) Sapos iumi mekem grow tingting bilong Jehovah, bae iumi want for lovem nara pipol and forgivim samting wea olketa duim againstim iumi. (Matthew 6:12) Mek-thri samting, iumi savve deal witim nara pipol long sem wei wea iumi laekem olketa for deal witim iumi. (Matthew 7:12) From iumi no perfect, planti taem iumi needim forgiveness. Olsem example, taem iumi talem samting wea mekem narawan feel nogud, iumi hope olketa bae remember hao evriwan sin witim tongue planti taem. (James 3:2) Sapos iumi laekem nara pipol for deal witim iumi long loving wei, iumi shud deal witim olketa long loving wei.
19. Hao nao iumi savve askem help bilong holy spirit for mekem love hem grow?
19 Mek-foa samting, iumi savve askem help bilong holy spirit bikos love hem part bilong olketa frut bilong spirit. (Galatians 5:22, 23) Iumi born witim wei for fren, famili feeling, and love midolwan man and woman. Bat iumi needim help bilong spirit bilong Jehovah for mekem grow love wea Jehovah garem, love wea hem perfect wei for garem wan mind. Iumi savve kasem help bilong holy spirit sapos iumi readim Bible wea kam from help bilong spirit. Olsem example, sapos iumi studyim laef bilong Jesus, iumi savve lukim hao hem deal witim pipol, and iumi savve lane for followim hem. (John 13:34, 35; 15:12) And tu, iumi savve askem Jehovah for holy spirit, especially long olketa taem wea hem hard lelebet for duim samting long loving wei. (Luke 11:13) Last samting, iumi savve aftarem love long wei for stap klosap long Christian kongregeson. Wei for stap witim olketa loving brata and sista helpem iumi for mekem love hem grow.—Proverbs 13:20.
20, 21. Wanem bigfala wei for showimaot love nao Olketa Jehovah’s Witness duim long 2000 service year?
20 Last year, iumi kasem wanfala peak bilong 6,035,564 pablisa bilong gud nius raonem world. Olketa Jehovah’s Witness spendem total bilong 1,171,270,425 hour for lukaotem pipol for talem gud nius long olketa. Love nao mekem olketa gogo long hot sun, rain, and cold for duim disfala waka. Love nao muvim olketa for story witim skulfren and wakfren and for story witim olketa stranger long street and narafala ples. Planti wea olketa Witness visitim olketa no interest, and tu-thri againstim olketa. Nomata olsem, samfala interest, so olketa duim 433,454,049 return visit and conductim 4,766,631 Bible study.a
21 Evri samting hia showimaot love wea Olketa Jehovah’s Witness garem for God and neiba bilong olketa! Datfala love bae nating kamap cold. Iumi feel sure wanfala witness for olketa man wea moa big bae kamap long 2001 service year. Letem blessing bilong Jehovah go ahed for stap witim olketa loyal and strong worshiper bilong hem taem ‘olketa duim evri samting witim love’!—1 Corinthians 16:14.
[Footnote]
a For full information long 2000 Service Year Report, lukim chart long page 18-21.
Waswe, Iu Savve Explainim?
• Hu nao iumi followim taem iumi lovem neiba bilong iumi?
• Love bilong iumi mas hao waed?
• Wanem nao samfala experience wea showimaot Christian love?
• Hao nao iumi savve mekem grow Christian love?
[Olketa Piksa long page 15]
Christian love savve keepim wanfala famili tugeta
[Olketa Piksa long page 17]
Love muvim iumi for sharem hope bilong iumi witim nara pipol