“Iu Mas Lovem Narawan Long Sem Wei wea Iu Lovem Iuseleva”

1, 2. (a) Wanem nara law nao Jesus sei hem barava important? (b) Wanem nao tufala kwestin wea iumi bae ansarem?

TAEM wanfala Pharisee askem Jesus wanem law nao hem important winim olketa nara law, Jesus sei: “Iu mas lovem God bilong iu Jehovah long full heart bilong iu, long full soul bilong iu, and long full mind bilong iu.” Long study bifor diswan iumi storyim wanem Jesus minim taem hem talem datwan. Jesus talem tu nara law wea barava important. Hem sei: “Iu mas lovem narawan long sem wei wea iu lovem iuseleva.”—Matt. 22:34-39.

² Jesus sei iumi mas lovem nara pipol. Hu nao nara pipol wea iumi mas lovem? Hao nao iumi savve showimaot love long nara pipol? Long disfala study bae iumi ansarem tufala kwestin hia. And tu, bae iumi lukim hao wei wea iumi lovem nara pipol savve mekem Jehovah hapi, and iumi evriwan savve kasem gud samting from diswan.

WANEM NAO HEM MINIM FOR LOVEM NARAWAN?

3, 4. (a) Wanem tokpiksa nao Jesus iusim for helpem wanfala man luksavve wanem hem minim for lovem narawan? (b) Wanem nao man long Samaria duim for helpem datfala man wea garekil? (Lukim piksa long start bilong study.)

³ Tingim samting wea Jesus talem long wanfala man wea askem hem olsem: ‘Hu nao olketa wea mi mas lovem?’ Jesus iusim wanfala tokpiksa for ansarem datfala man and for helpem hem luksavve wanem hem minim for lovem narawan. Datfala tokpiksa hem abaotem wanfala man long Samaria. (Readim Luke 10:29-37.) Samfala man for steal kasholem wanfala Jew, steal from hem, killim hem nogud, and leavim hem long road for dae. Wanfala priest long Israel, and wanfala Levite, wea shud showimaot love long hem lukim hem bat nating helpem hem. Bat wanfala man long Samaria nao helpem hem. Long datfala taem olketa Jew and olketa long Samaria heitim each other.—John 4:9.

⁴ Datfala man long Samaria kapsaetem oil and wine long olketa garekil bilong man hia for helpem hem. Then hem tekem hem go long wanfala resthaos and givim tufala denarii long man wea ownim datfala resthaos. Tufala denarii hem pei wea man savve kasem sapos hem waka for tufala day. (Matt. 20:2) Big samting wea datfala man long Samaria duim for helpem man wea garekil showimaot hem lovem nara pipol. Datfala tokpiksa bilong Jesus teachim iumi for kaen and lovem nara pipol.

5. Wanem nao Olketa Jehovah’s Witness duim bihaen long Hurricane Sandy wea showimaot olketa lovem narawan?

⁵ Iumi stap long “olketa last day” wea staka pipol no savve kaen long narawan. Staka pipol spoelem narawan, raf, and no garem love for nara pipol. (2 Tim. 3:1-3) Olsem example, long October 2012, Hurricane Sandy hem barava spoelem wanfala area long New York City. Staka pipol no garem paoa, olketa cold, and no garem olketa nara samting wea olketa needim. Sorre samting nao samfala pipol go steal from olketa hia wea kasem barava hard taem. Bat Olketa Jehovah’s Witness barava difren. Olketa mekem arrangement for helpem olketa brata and sista and nara pipol long datfala area bikos olketa lovem pipol. Wanem nao samfala nara wei for showimaot love long nara pipol?

HAO IUMI SAVVE SHOWIMAOT LOVE LONG NARAWAN

6. Hao nao preaching waka showimaot iumi lovem nara pipol?

⁶ Helpem pipol long spiritual wei. Iumi duim diswan long preaching waka taem iumi iusim Bible for givim comfort long pipol. (Rome 15:4) Iumi showimaot love long narawan taem iumi iusim Bible for storyim gud nius abaotem Kingdom bilong God. (Matt. 24:14) Hem privilege for storyim Kingdom message wea kam from “God wea givim hope”!—Rome 15:13.

7. Wanem nao datfala Golden Rul, and wanem nao bae happen sapos iumi followim?

⁷ Followim Golden Rul. Jesus storyim datfala Golden Rul taem hem sei: “So samting wea iufala laekem pipol for duim long iufala, sem samting nao iufala mas duim long olketa. Diswan nao mining bilong samting wea datfala Law and olketa profet talem.” (Matt. 7:12) “Datfala Law” hem minim olketa Bible buk start long Genesis go kasem Deuteronomy, and “olketa profet” hem minim olketa buk long olketa Hebrew Scripture wea storyim olketa profesi. Jehovah givim “datfala Law and “olketa profet” long pipol bilong hem bikos hem lovem olketa and hem laekem olketa for lovem each other. Distaem tu Jehovah laekem iumi for lovem nara pipol. Jehovah sei: “Duim stret samting, and duim samting wea raeteous. . . . Man wea duim diswan bae hapi.” (Isa. 56:1, 2) Sapos iumi followim datfala Golden Rul and showimaot love long nara pipol, bae iumi hapi.

8. Why nao iumi shud lovem olketa enemy bilong iumi, and wanem nao savve happen sapos iumi duim datwan?

⁸ Lovem olketa enemy bilong iufala. Jehovah laekem iumi for lovem olketa enemy bilong iumi. Taem Jesus stap long earth, samfala sei pipol shud heitim enemy bilong olketa. Bat Jesus sei: “Gohed lovem olketa enemy bilong iufala and for prea for olketa wea spoelem iufala.” (Matt. 5:43-45) Aposol Paul tu storyim wei for lovem enemy taem hem sei: “Sapos enemy bilong iufala hem hangre, givim kaikai long hem. Sapos hem laek drink, givim wata long hem.” (Rome 12:20; Prov. 25:21) Law bilong Moses sei man mas helpem enemy bilong hem and helpem tu olketa animal bilong enemy bilong hem. (Ex. 23:5) Sapos olketa Israelite followim datfala kaonsel, maet samfala wea firstaem olketa enemy long each other kamap gudfala fren bihaen. From iumi olketa Christian showimaot love for olketa enemy bilong iumi, datwan savve changem wei wea olketa ting long iumi. Maet samfala long olketa bae disaed for worshipim Jehovah.

9. Wanem nao Jesus talem abaotem wei for stretem problem witim brata bilong iumi?

⁹ “Waka hard for stap gud witim nara pipol.” (Heb. 12:14) Diswan minim iumi mas stap gud witim olketa brata and sista bilong iumi tu. Jesus sei: “Tingim sapos iu tekem sakrifaes bilong iu go long altar. Waswe sapos taem iu kasem long there iu tingim hao brata bilong iu hem feel nogud long iu? Firstaem, leavim sakrifaes bilong iu long there and go stretem datfala problem witim brata bilong iu. Bihaen, go bak moa long altar and givim datfala sakrifaes.” (Matt. 5:23, 24) Sapos iu and wanfala brata garem wanfala problem, iu savve showimaot love long datfala brata taem iu traem best for kwiktaem stretem datfala problem witim hem. Taem iumi kwiktaem stretem eni problem, Jehovah bae blessim iumi.

10. Why nao iumi shud no judgem narawan?

¹⁰ No judgem narawan. Jesus sei: “Iufala mas no judgem narawan mekem God no judgem iufala.” Jesus teachim iumi for no judgem olketa narawan taem olketa mekem mistek. Hem sei tu: “Why nao iu lukluk long smol grass insaed long eye bilong brata bilong iu, bat iu no tingim bigfala timba insaed long eye bilong iuseleva? Sapos bigfala timba nao stap insaed long eye bilong iuseleva, iu hard for sei long brata bilong iu, ‘Kam mi aotem smol grass insaed long eye bilong iu.’ Iu tingse iu holy tumas! Aotem firstaem bigfala timba from eye bilong iuseleva, mekem iu lukluk gud and savve hao for aotem smol grass from eye bilong brata bilong iu.” (Matt. 7:1-5) Diswan teachim iumi for no tok spoelem nara pipol taem olketa mekem mistek, bikos iumi tu savve mekem staka mistek.

NAMBAWAN WEI FOR SHOWIMAOT LOVE LONG NARA PIPOL

11, 12. Wanem nao wanfala nambawan wei for showimaot love long nara pipol?

¹¹ Staka difren wei stap wea iumi savve showimaot love long nara pipol. Bat Jesus teachim iumi nambawan wei for duim datwan hem for preachim gud nius abaotem Kingdom. (Luke 8:1) Hem sei olsem long olketa disaepol bilong hem: “Teachim pipol long evri kantri for kamap disaepol.” (Matt. 28:19, 20) Taem iumi obeyim datfala komand bilong Jesus, iumi savve helpem narawan for lusim road wea waed wea lead go long dae, and helpem hem for wakabaot long road wea smol wea lead go long laef. (Matt. 7:13, 14) Iumi savve Jehovah hem blessim iumi taem iumi waka hard for duim diswan.

¹² Jesus helpem staka pipol for luksavve olketa needim Jehovah. (Matt. 5:3) Iumi followim example bilong Jesus taem iumi talem pipol abaotem “gud nius bilong God.” (Rome 1:1) Iumi teachim olketa for luksavve sakrifaes bilong Jesus helpem olketa for fren gud witim God. (2 Cor. 5:18, 19) So wei for preachim gud nius hem nambawan wei for showimaot love long nara pipol.

13. Hao nao iu feel taem iu teachim pipol abaotem Jehovah?

¹³ Taem iumi prepare gud for olketa return visit and Bible study bilong iumi, iumi savve teachim pipol for obeyim Jehovah. Maet samfala need for changem staka samting long laef bilong olketa. (1 Cor. 6:9-11) Iumi barava hapi for lukim wei wea Jehovah helpem olketa wea hambol for gohed gud long spiritual wei and kamap olketa fren bilong hem. (Acts 13:48) Staka pipol wea wari and no garem hope bifor, olketa hapi taem olketa studyim Bible and trustim Jehovah. Hem wanfala privilege for duim disfala important waka wea showimaot iumi lovem nara pipol.

WANEM NAO LOVE?

14. Wanem nao Paul talem long 1 Corinth 13:4-8 abaotem love?

¹⁴ Sapos iumi lovem olketa narawan long wei wea Paul storyim, iumi bae mekem Jehovah hapi, no garem tumas problem, and iumi bae hapi. (Readim 1 Corinth 13:4-8.) Distaem iumi bae storyim wanem Paul talem abaotem love and lukim hao datwan savve helpem iumi for lovem narawan long sem wei wea iumi lovem iumiseleva.

15. (a) Why nao iumi shud patient and kaen? (b) Why nao iumi shud no jealous or praod?

¹⁵ “Man wea garem love hem patient and kaen.” Jehovah hem patient and kaen long evri pipol nomata olketa no perfect. So taem olketa narawan mekem mistek or no kaen long iumi, iumi mas patient and kaen long olketa. Bible sei man wea garem love “hem no savve jealous.” Samfala brata maet garem samfala privilege long kongregeson or olketa nara samting wea iumi no garem. Sapos iumi barava lovem olketa brata bilong iumi bae iumi no jealous long olketa. And tu, iumi shud no tok praod, or tinghae tumas long iumiseleva. Bible sei Jehovah heitim olketa wea praod and bighed.—Prov. 21:4.

16, 17. Wanem nao samfala wei for showimaot love wea 1 Corinth 13:5, 6 storyim?

¹⁶ Man wea garem love hem “evritaem showimaot respect.” Sapos iumi lovem olketa narawan, bae iumi no laea long olketa, steal from olketa, or duim eni nara samting wea mekem Jehovah no hapi. And tu, bae iumi evritaem tingim olketa narawan and no tingim iumiseleva nomoa.—Phil. 2:4.

¹⁷ Man wea garem love hem “no kwiktaem for kros. Hem no tingim olowe nogud samting wea narawan duim long hem.” Sapos samwan hem no kaen long iumi, iumi no kwiktaem for kros long hem. Iumi shud no tingim olowe nogud samting wea narawan duim long iumi. (1 Thess. 5:15) Sapos iumi duim datwan, kros bilong iumi bae olsem wanfala fire wea gohed nomoa for bone, and diswan savve spoelem iumiseleva and nara pipol tu. (Lev. 19:18) Bat iumi shud willing for forgivim narawan. Man wea garem love “hem no hapi long olketa nogud samting.” Sapos nogud samting kasem man wea no laekem iumi, iumi shud no hapi for lukim hem safa.—Readim Proverbs 24:17, 18.

18. Wanem nao iumi lanem abaotem love long 1 Corinth 13:7, 8?

¹⁸ Paul sei ‘man wea garem love hem hapi nomoa, nomata wanem hem happen.’ Sapos iumi lovem narawan, bae iumi forgivim hem taem hem duim samting wea mekem iumi feel nogud. Paul sei tu man wea garem love “hem gohed for biliv” long wanem Bible talem and tinghae long spiritual kaikai wea hem kasem from organization bilong Jehovah. Man wea garem love “hem evritaem garem hope.” Iumi garem hope bikos iumi trustim evri samting wea Jehovah promisim. From iumi lovem pipol iumi bae waka hard for talem olketa abaotem datfala hope. (1 Pet. 3:15) Taem iumi kasem hard taem, iumi prea and trustim wei wea Jehovah bae helpem iumi. Paul sei olsem tu abaotem man wea garem love: “No eni samting savve mekem hem givap.” Nomata sapos eniwan duim nogud samting long iumi or againstim iumi, bae iumi no givap. Paul sei tu: “Love no savve finis.” Olketa wea obeyim Jehovah bae showimaot love long narawan for olowe.

GOHED LOVEM NARAWAN LONG SEM WEI WEA IU LOVEM IUSELEVA

19, 20. Olketa wanem scripture nao teachim iumi for gohed showimaot love long olketa narawan?

¹⁹ Sapos iumi followim wanem Bible talem, iumi bae evritaem lovem narawan long sem wei wea iumi lovem iumiseleva. (Matt. 22:39) Jehovah and Jesus laekem iumi for duim diswan. Iumi mas lovem evriwan, nomata wea nao olketa kam from or wanem kaen living nao olketa garem. Sapos samfala taem hem no isi for iumi showimaot love long narawan, iumi savve prea long Jehovah and askem hem for givim holy spirit for helpem iumi. Jehovah bae hapi sapos iumi duim datwan, and bae hem helpem iumi.—Rome 8:26, 27.

²⁰ Datfala komand for lovem narawan hem barava important, dastawe Bible sei hem “law bilong king.” (Jas. 2:8) Staka komand wea stap insaed Law bilong Moses hem teachim olketa long Israel for lovem olketa narawan. Bihaen aposol Paul story abaotem samfala komand hia, hem raetem disfala toktok: “Olketa law hia and olketa nara law hem wanfala law nomoa, wea hem sei: ‘Iu mas lovem narawan long sem wei wea iu lovem iuseleva.’”—Rome 13:8-10.

21, 22. Why nao iumi shud lovem God and olketa narawan?

²¹ Jesus helpem iumi for savve moa abaotem hu nao iumi mas lovem taem hem sei Dadi bilong hem “mekem sun hem shaen long pipol wea gud and pipol wea nogud and hem mekem hem rain long pipol wea raeteous and pipol wea no raeteous.” (Matt. 5:43-45) Jesus teachim iumi for showimaot love long evriwan, nomata olketa raeteous or no raeteous. Olsem iumi storyim finis, wanfala nambawan wei for showimaot love long nara pipol hem for teachim olketa abaotem Jehovah and Kingdom bilong hem. Sapos man wea iumi teachim hem followim wanem hem lanem long Bible, hem bae hapi tumas for kamap fren bilong God.

²² Iumi storyim finis why iumi shud lovem Jehovah long full heart, soul, and mind bilong iumi. Iumi lanem tu hao for lovem narawan. Sapos iumi lovem Jehovah and olketa narawan, iumi respectim wanem Jesus talem abaotem tufala important samting hia. And main samting nao, iumi mekem Dadi bilong iumi long heven, Jehovah, hem hapi.