Olketa wea Duim Word Bilong God Faendem Hapi
“Iumi luksavve long disfala convention olsem narafala samting wea Jehovah provaedem for redyim iumi for moa Kingdom waka,” wanfala long olketa speaker hem sei long start bilong “Pipol wea Duim Word Bilong God” Distrik Convention bilong Olketa Jehovah’s Witness. Hem go ahed for sei: “Iumi redyim iumiseleva for kasem teaching abaotem hapi famili laef, for kasem encouragement for stap klosap long organization bilong Jehovah, for muvim iumi for keepim strong bilong iumi long Kingdom service, and remindim iumi abaotem need for go ahed for lukaot.”
START from May 2000, planti million long olketa wea duim word bilong God and fren bilong olketa hipap long planti thousand difren ples raonem world for kasem important Bible education. Wanem nao olketa lanem insaed thri-day convention hia?
Day Wan—No Forgetim Evriting wea Jehovah Duim
Long firstfala tok, chairman invaetem audience for experiencem olketa blessing wea kam from worship bilong Jehovah long olketa convention. Hem promisim evriwan wea attend hao faith bilong olketa bae kamap moa big and wei wea olketa fren witim Jehovah bae kamap strong.
“Disfala hapi God” savve long wanem iumi needim for mekem iumi wanwan hapi. (1 Timothy 1:11) So, disfala tok “Wei for Duim Will Bilong God Hem Bringim Hapi” strongim hao Word bilong Jehovah, Bible, showimaot olketa best wei bilong living. (John 13:17) Olketa interview witim olketa Witness bilong Jehovah wea serve for longfala taem finis, showimaot hao wei for duim will bilong God insaed olketa difren kaen living mekem laef bilong iumi garem moa mining. Nextfala tok, “Shaen Braet From Gudfala Fasin Bilong Jehovah,” hem mekhae hao, olsem olketa wea “followim wei bilong God,” olketa Christian want for mekem grow “evri kaen gudfala samting” long laef bilong olketa. (Ephesians 5:1, 9) Wanfala nambawan wei for duim diswan hem for preachim gud nius and mekem disaepol.—Psalm 145:7.
Disfala tok “Go Ahed Strong Olsem Man wea Lukim Datwan wea Iumi No Lukim” showimaot hao strongfala faith helpem iumi for “lukim” God wea man no savve lukim. Datfala speaker storyim hao spiritual pipol luksavve long olketa fasin bilong God, wea insaed diswan hem wei wea hem savve long nomata wanem nao iumi tingim and duim. (Proverbs 5:21) Olketa wea interview storyim samfala samting wea olketa duim for mekem grow faith wea moa strong and putim olketa spiritual samting firstaem long laef bilong olketa.
Morning session hem finis witim disfala tok bilong theme, “Praisem Jehovah—Man wea Duim Olketa Nambawan Samting.” Diswan helpem audience for luksavve hao taem iumi go ahed for lanem moa samting abaotem Jehovah, iumi faendem moa reason for praisem hem olsem man wea duim olketa nambawan samting. Datfala speaker hem sei: “Taem iumi ting raonem olketa nambawan waka bilong creation witim evri nambawan samting wea hem go ahed duim for iumi distaem, wei for barava tinghae muvim iumi for praisem hem. Taem iumi ting raonem olketa samting wea hem duim long mirakol wei for saed bilong pipol bilong hem bifor, iumi want for praisem hem. And taem iumi ting raonem olketa promis bilong nambawan samting wea Jehovah bae duim, iumi lukaotem olketa wei for showimaot wei wea iumi tinghae tu.”
Aftanun session hem start witim disfala tok “No Givap for Duim Gud Samting,” wea talem moa evriwan long audience hao olketa hevi bilong disfala world showimaot end hem klosap. (2 Timothy 3:1) Nomata olsem, taem iumi no givap, iumi pruvim hao iumi “datkaen wea garem faith for keepim soul laef.”—Hebrews 10:39.
Wanem Bible kaonsel nao olketa givim abaotem famili laef? First tok wea garem thrifala part bilong datfala convention—“Obeyim Word Bilong God”—hem start witim disfala part “Taem Iu Chusim Wanfala Marit Partner.” Wei for chusim wanfala marit partner hem wanfala long olketa barava serious disison wea pipol mekem. Dastawe, olketa Christian want for weit for marit go kasem taem olketa kamap mature, and olketa mas marit “only insaed long Lord.” (1 Corinthians 7:39) Nextfala part bilong disfala thri-part tok hem storyim wei wea Jehovah barava wantem evri Christian famili for win and kamap wan long spiritual wei, and hem givim samfala wei for duim diswan. Lastfala part talem moa olketa mami and dadi hao wei for teachim pikinini for lovem God hem start witim love bilong olketa dadi and mami for hem.
Olketa point wea olketa talemaot long disfala tok “Keakea Long Story wea Gogo Raon and Gossip” helpem evriwan for luksavve hao nomata enikaen samting happen, iumi shud duim samting long wisefala wei, no kwiktaem for bilivim samting, taem iumi herem enikaen nius. Olketa Christian garem samting wea moabeta long wei wea olketa story abaotem samting wea olketa savve hem tru—gud nius bilong Kingdom. Planti faendem nextfala tok, “Deal Witim ‘Wanfala Nila Long Body,’” barava comfortim and encouragem olketa. Hem helpem olketa for luksavve hao nomata iumi maet go ahed for feisim olketa test, Jehovah savve strongim iumi thru long holy spirit bilong hem, Word bilong hem, and olketa Christian brata and sista bilong iumi. Man kasem staka encouragement from experience bilong aposol Paul long disfala samting.—2 Corinthians 12:7-10; Philippians 4:11, 13.
Firstfala day hem finis witim disfala tok “Followim Step Witim Organization Bilong Jehovah.” Olketa ting raonem thrifala wei wea organization bilong God hem muv ahed long hem: (1) wei for luksavve long spiritual laet from Jehovah hem go ahed for kamap moa big, (2) ministry wea God givim long iumi, and (3) wei wea olketa change long olketa gaedlaen bilong organization kamap long barava taem. Then datfala speaker sei: “Iumi hapi tumas long olketa samting wea stap long front.” Hem ask olsem: “Waswe, eni daot stap long wei wea iumi garem reason for keepim trust wea iumi garem long firstaem strong go kasem end?” (Hebrews 3:14) Ansa hem klia tumas. Datwan lead go long release bilong wanfala niu brochure wea garem title Iu Savve Kamap Fren Bilong God! Hem bae kamap olsem wanfala barava nambawan teaching tul for helpem olketa man wea no skul gud or no savve read gud for lane abaotem Jehovah.
Day Tu—Go Ahed for Tok Abaotem Olketa Nambawan Waka Bilong God
Bihaen olketa story long text bilong day, mek-tu day bilong convention go ahed witim disfala tok wea garem thrifala part “Olketa Minister Bilong Word Bilong God.” Firstfala part pullim interest long wei wea preaching waka bilong iumi evriwea long world hem win. Bat, planti pipol wea rejectim message bilong Kingdom challengem wei wea iumi go ahed strong long disfala waka. Samfala long olketa wea pablisa for longfala taem finis explainim hao olketa keepim hapi bilong olketa long ministry taem olketa strongim mind and heart bilong olketa for feisim disfala challenge bilong wei wea pipol no interest or againstim iumi. Mek-tu part talem moa olketa wea kam long convention hao Olketa Jehovah’s Witness trae for kasem pipol evriwea, long haos-tu-haos and long enitaem. And lastfala part storyim planti difren kaen wei wea evri Christian savve mekem ministry bilong hem kamap moa big. Speaker hem strongim hao for duim diswan, iumi shud mekem Kingdom bilong God kamap first samting, nomata diswan no isi and minim man mas no tingim seleva.—Matthew 6:19-21.
From iumi stap long wanfala world wea no followim God and wea fulap witim wei for laekem tumas olketa material samting, datfala tok “Mekem Grow Love for God Witim Wei for Satisfae Nomoa” hem barava fitim. Taem hem talem samfala koment from 1 Timothy 6:6-10, 18, 19, speaker hia showimaot hao wei for lovem God helpem olketa Christian for stap klia long wei for lovem selen, wea savve leadim olketa for go difren and kosim planti pain. Hem strongim hao nomata wanem kaen living iumi garem saed long selen, wei for hapi hem depend long wei wea iumi fren witim Jehovah and wei wea iumi stap gud long spiritual wei. Datfala tok “No Givim Eni Reason for Mekem God Shame” barava muvim planti pipol. Hem mekhae long wei wea Jehovah nating forgetim olketa faithful Witness bilong hem. Nambawan example bilong Jesus Christ—wea “hem semsem yesterday and tuday, and for olowe”—bae helpem planti for go ahed for ran long resis for laef witim wei for win.—Hebrews 13:8.
Morning session hem finis witim baptism tok—wea evritaem hem nao olsem haelaet long olketa bigfala hipap bilong Olketa Jehovah’s Witness. Hem wanfala barava hapi samting for lukim olketa niu wan wea dedicate followim step bilong Jesus taem olketa baptaes long wata! (Matthew 3:13-17) Evriwan wea followim disfala step duim finis staka samting olsem olketa wea duim word bilong God. And tu, taem olketa baptaes olketa kasem mark for kamap olketa minister bilong gud nius, and kasem bigfala hapi from olketa savve hao olketa share for mekem nem bilong Jehovah kamap holy.—Proverbs 27:11.
Olketa givim strongfala kaonsel insaed disfala tok “Man Mas Mature ‘for Luksavve Long Stret and Rong Samting.’ ” Olketa mark bilong world long samting wea stret and rong hem barava no fit. Dastawe iumi need for depend long olketa mark bilong Jehovah. (Romans 12:2) Olketa encouragem evriwan for waka hard for kasem stretfala savve abaotem olketa wei bilong God and grow for kamap mature. Then, taem iumi go ahed for iusim, paoa bilong iumi for luksavve bae kasem training “for luksavve long olketa samting wea stret and rong.”—Hebrews 5:11-14.
Next tok wea kamap hem tok wea garem thrifala part “Waka Hard for Mekem Grow Spiritual Fasin.” Olketa tru Christian luksavve long wei wea hem important for mekem grow and keepim spiritual samting. Diswan needim hard waka—wei for read, study, and ting raonem samting. (Matthew 7:13, 14; Luke 13:24) Spiritual pipol go ahed long “evrikaen wei for prea and beg.” (Ephesians 6:18) Iumi luksavve hao olketa prea bilong iumi showimaot hao deep nao faith and worship bilong iumi, level wea iumi kasem long spiritual wei, and wanem iumi tingim olsem “samting wea moa important.” (Philippians 1:10) Olketa strongim tu wei wea hem important for mekem grow wei for showimaot feeling, loving wei for fren witim Jehovah olsem datwan wea pikinini wea obey garem witim kaenfala dadi. Iumi no just garem religion nomoa—nomata hem nao tru wan—bat iumi want for buildimap strongfala faith, ‘olsem iumi lukim God.’—Hebrews 11:6, 27.
Olketa storyim moa topic abaotem wei for muv ahed long spiritual wei insaed disfala tok “Showimaot Wei wea Iu Muv Ahed.” Olketa ting raonem thrifala wei for muv ahed olsem: (1) kasem moa savve, wei for minim samting, and wisdom, (2) garem frut bilong spirit bilong God, and (3) duim olketa responsibility bilong iumi olsem olketa famili member.
Long end bilong lastfala tok long datfala day, “Wakabaot Insaed Laet From Word Bilong God wea Muv Ahed,” olketa wea kam long convention hapi tumas for kasem wanfala niu buk, Isaiah’s Prophecy—Light for All Mankind I. Diswan hem first wan long tufala volume wea deal witim Bible buk bilong Isaiah long evri chapter wanwan. “Buk bilong Isaiah garem wanfala message for iumi distaem,” speaker hem sei. Hem go ahed: “Tru nao, planti long olketa profesi bilong hem fulfill finis long taem bilong Isaiah. . . . Nomata olsem, planti long olketa profesi bilong Isaiah hem go ahed for fulfill long taem bilong iumi, and samfala bae fulfill insaed niu world wea God promisim.”
Day Thri—Kamap Pipol wea Duim Word Bilong Jehovah
Lastfala day bilong datfala convention hem start witim wei for story tugeta long text bilong datfala day. Then disfala tok “Profesi Bilong Zephaniah Garem Mining for Pipol wea Duim Will Bilong God” wea garem thrifala part hem kamap. Thrifala tok hia showimaot hao, olsem hem duim finis long taem bilong pipol bilong Judah wea bighed, Jehovah bae bringim trabol long olketa wea no laek for obeyim warning bilong hem distaem. Bikos olketa sin againstim God, olketa bae wakabaot olsem olketa blind man, and no savve faendem wei for sev. Bat, olketa tru Christian go ahed for lukaotem Jehovah, and olketa bae haed long day bilong kros bilong God. And tu, olketa enjoyim planti blessing nomata distaem. Olketa garem nambawan chance for tok long “klinfala languis” bilong Bible truth. (Zephaniah 3:9) Speaker hem sei: “Insaed wei for tok long klinfala languis hem no wei for biliv long truth and teachim long nara pipol nomoa, bat hem minim fasin bilong iumi mas followim olketa law and principle bilong God.”
Olketa wea kam long convention barava interest for weitim datfala drama “Olketa Warning Example for Taem Bilong Iumi.” Disfala full-costume drama showimaot hao planti thousand Israelite lusim laef bilong olketa long spialaen bilong Promis Land bikos olketa forgetim Jehovah and olketa heathen woman switim olketa for duim fornication and giaman worship. Wanfala long olketa main man—Jamin—hem no savve chus midolwan olketa Moabite woman wea switim hem and worship bilong hem for Jehovah. Giaman tingting bilong man wea no followim God, Zimri, hem barava showaot klia, olsem tu faith and worship bilong Phinehas. Olketa showimaot long kliafala wei hao hem danger for kaban witim olketa wea no lovem Jehovah.
Datfala drama redyim tingting for nextfala tok, “No Kamap Pipol wea Herem Nomoa and Forgetim.” Wei for ting raonem 1 Corinthians 10:1-10 showimaot hao Jehovah testim fasin for obey mekem hem disaed sapos iumi fit for kasem laef insaed long niu world. For samfala, olketa samting wea body wantem stopem olketa from olketa spiritual goal nomata distaem, wea iumi klosap for go insaed long niu system. Evriwan kasem encouragement for no lusim chance for ‘go insaed long rest bilong Jehovah.’—Hebrews 4:1.
Pablik tok hem abaotem disfala subject “Why Ting Strong Long Olketa Nambawan Waka Bilong God.” Olketa “nambawan waka” bilong Jehovah showimaot wisdom bilong hem and wei wea hem garem paoa ovarem physical creation wea stap raonem iumi. (Job 37:14) Samfala long olketa kwestin for ting raonem from Jehovah hem inaf for mekem Job tinghae long paoa bilong olmaeti Creator. Jehovah bae duim tu olketa “nambawan waka” long future for saed bilong olketa servant bilong hem. Speaker hem finisim tok olsem: “Iumi garem planti reason for tingting strong long olketa nambawan waka bilong Jehovah—samting wea hem duim bifor, samting wea hem go ahed for duim long creation raonem iumi distaem, samting wea hem promis for duim long future wea klosap.”
Bihaen olketa story abaotem main point bilong Wastaoa study article for datfala week, lastfala tok bilong convention kamap. Disfala tok wea muvim man wea garem title “Barava Tinghae Long Privilege for Duim Word Bilong God,” strongim hao hem privilege for kamap pipol wea duim word bilong God. (James 1:22) Hem talem moa long audience hao privilege bilong iumi olsem olketa wea duim word bilong God hem barava spesol, and taem iumi duim for longfala taem, iumi bae barava ting moa hae long hem. Evriwan wea attend kasem encouragement for showimaot evribit olketa nambawan samting bilong disfala distrik convention long wei wea olketa want for kamap pipol wea duim word bilong God. Hem nao only wei for kasem barava bigfala hapi!
[Box/Piksa long page 25]
Iu Savve Kamap Fren Bilong God!
Long Friday aftanun olketa releasem wanfala niu brochure wea garem title Iu Savve Kamap Fren Bilong God! Bigfala need stap for mekem Bible education moa simpol long planti part bilong world, and olketa bae iusim disfala brochure for satisfaem datfala need. Hem bae kamap wanfala bigfala blessing for pipol wea no skul gud or no savve read gud.
[Box/Olketa Piksa long page 26]
Isaiah’s Prophecy—Light for All Mankind
Olketa wea kam long convention hapi tumas for kasem Volume I bilong datfala tu-volume Isaiah’s Prophecy—Light for All Mankind. Olketa mekhae long profesi bilong Isaiah insaed disfala buk wea fitim taem bilong iumi.