“Pipol wea Strong for Talemaot Kingdom” Hipap Witim Hapi
OLKETA bigfala problem saed long fasin, selen, and politik sekem world distaem. Bat, nomata long olketa problem hia, Olketa Jehovah’s Witness hipap long peace for olketa thri-day “Pipol wea Strong for Talemaot Kingdom” Distrik Convention. Start long May 2002, olketa convention hia kamap raonem full world.
Olketa convention hia barava taem bilong hapi. Bae iumi storyim shortfala review long datfala program wea garem faondeson long Bible.
First Day Hem Mekhae Long Strong Bilong Jesus
Theme bilong first day bilong convention hem “Followim Strong Bilong Lord Bilong Iumi, Jesus.” (John 2:17) Datfala tok, “Hapi for Hipap Tugeta Olsem Pipol wea Talemaot Kingdom” hem invaetem olketa wea hipap for share long hapi wea evritaem kamap part bilong olketa convention bilong pipol bilong God. (Deuteronomy 16:15) Bihaen disfala tok olketa interviewim samfala wea strong for preachim gud nius.
Datfala tok “Kasem Nambawan Hapi Long Jehovah” storyim evri verse long Psalm 37:1-11. Iumi kasem encouragement for no “kros” taem hem luk olsem wicked pipol win. Nomata olketa wea wicked maet laea abaotem iumi, gogo, Jehovah bae showimaot klia hu nao really faithful pipol bilong hem. Datfala tok “Showimaot Iufala Thankiu” storyim olketa wei wea iumi savve showimaot thankiu long God. Evri Christian mas givim “wanfala sakrifaes bilong praise” long Jehovah. (Hebrews 13:15) Hem tru, haomas taem iumi iusim long service bilong Jehovah hem depend long living bilong iumi and wei for tinghae.
Tok bilong theme hem “Bigfala Strong Muvim Pipol wea Talemaot Kingdom.” Hem point go long Jesus Christ olsem nambawan example bilong strong for iumi. Bihaen Kingdom hem kamap long heven long 1914, olketa tru Christian needim strong for talemaot datfala gud nius. Speaker storyim datfala convention long Cedar Point, Ohio, U.S.A., long 1922 and remindim iumi abaotem datfala barava spesol invitation: “Talemaot datfala King and Kingdom bilong hem”! Gogo, strong bilong olketa faithful servant bilong God muvim olketa for talemaot olketa nambawan Kingdom truth long olketa nation.
Datfala tok “No Fraet—Jehovah Hem Stap Witim Iumi!” wea kamap long aftanun bilong first day, showimaot Satan barava targetim pipol bilong God. Bat, nomata iumi feisim disfala wei for againstim iumi, wei for ting raonem olketa example bilong faith insaed Bible and long distaem savve strongim iumi for no fraet taem iumi feisim olketa test and temptation.—Isaiah 41:10.
Next long program hem tok wea garem thrifala part wea garem theme “Profesi Bilong Micah Strongim Iumi for Wakabaot Long Nem Bilong Jehovah.” First speaker hem markem wei wea fasin bilong pipol hem barava nogud, apostate religion, and wei for lovem tumas material samting long taem bilong Micah hem semsem witim taem bilong iumi. Hem sei: “Bae iumi kasem samting wea iumi hope for hem long future sapos iumi mekem grow heart wea obey and mek sure fasin bilong iumi hem holy and laef bilong iumi busy witim waka wea showimaot iumi lovem God—and sapos iumi nating forgetim hao day bilong Jehovah bae kam.”—2 Peter 3:11, 12.
Mek-tu speaker long disfala tok storyim wei wea Micah judgem olketa leader bilong Judah. Olketa spoelem pipol wea poor wea no garem eni protection. Bat Micah talem profesi tu hao tru worship bae win. (Micah 4:1-5) From holy spirit bilong Jehovah strongim iumi, iumi disaed strong for talemaot disfala message bilong hope wea savve strongim pipol. Bat waswe sapos iumi feel olsem sik or nara samting stopem iumi lelebet? Mek-thri speaker hem sei: “Samting wea Jehovah askem iumi for duim hem balance and iumi fit for duim.” Hem go ahed for strongim samfala nara point from Micah 6:8, wea hem read olsem: “Wanem nao Jehovah askem bak from iu bat for showimaot justice and for lovem kaenfala fasin and for no ova tumas taem iu wakabaot witim God bilong iu?”
From nogud fasin bilong disfala world savve affectim olketa Christian, iumi evriwan kasem gud samting from tok wea garem title “Keepim Klinfala Fasin Long Wei for Protectim Heart Bilong Iu.” Olsem example, for stap klia long dirty fasin bae helpem iumi for garem hapi marit. For tingting abaotem wei wea eni chance maet kamap for duim dirty fasin hem barava tambu for iumi olketa Christian.—1 Corinthians 6:18.
Datfala tok “Protectim Iuseleva From Giaman Wei” showimaot iumi wise sapos iumi ting long olketa laea, toktok wea haf tru and idea wea olketa apostate twistim, olsem poison. (Colossians 2:8) And tu, iumi mas no giamanim iumiseleva long wei for tingse iumi savve satisfaem feeling for duim sin wea body wantem and no kasem nogud samting bihaen.
Last tok long firstfala day garem title “Worshipim Datfala Only Tru God.” Taem living insaed disfala world hem kamap moa hard, hem barava encouragem iumi for savve hao klosap nao Jehovah bae startim raeteous niu world bilong hem! Hu nao bae stap long there? Only olketa wea worshipim Jehovah. For helpem iumi, olketa pikinini bilong iumi and olketa Bible student for kasem datfala goal, speaker releasem niu study buk Worship the Only True God. Iumi barava hapi for kasem datwan!
Mek-Tu Day Hem Mekhae Long Strong for Gud Samting
Mek-tu day bilong convention garem theme “Strong for Duim Gud Samting.” (1 Peter 3:13) First speaker hem storyim Bible text bilong datfala day. Hem strongim hao wei for lukluk long text evritaem long wei for kasem gud samting from datwan hem helpem iumi for moa strong.
Next tok wea garem thrifala part hem “Pipol wea Talemaot Kingdom wea Mekem Ministry Kasem Glory.” First part strongim need for iusim Word bilong God long stretfala wei. (2 Timothy 2:15) Sapos iumi iusim Bible long gudfala wei hem openem wei for datwan ‘garem paoa’ long laef bilong pipol. (Hebrews 4:12) Iumi shud leadim tingting bilong pipol long Bible and iusim long gudfala wei. Mek-tu part bilong datfala tok encouragem iumi for evritaem go bak long pipol wea interest. (1 Corinthians 3:6) Iumi need for prepare and no fraet for go bak kwiktaem long evriwan wea interest. Mek-thri part encouragem iumi for ting long man wanwan wea iumi meetim olsem man wea maet kamap disaepol and hem showim hao wei for offerim Bible study long first kol savve lead go long hapi for helpem pipol kamap olketa disaepol.
Theme bilong nextfala tok hem “Why Iumi Mas ‘Prea Evritaem.’ ” Bible encouragem olketa Christian for luk long God for help long evri part bilong laef. Iumi mas markem taem for prea seleva. And tu, iumi mas go ahed for prea, bikos Jehovah maet letem iumi go ahed prea for lelebet taem bifor ansa bilong hem showaot klia.—James 4:8.
Datfala tok “Wei for Story Abaotem Spiritual Samting Buildimap Narawan” encouragem iumi for iusim toktok bilong iumi for givim gud samting long iumiseleva and nara pipol. (Philippians 4:8) Olketa marit partner and olketa pikinini need for storyim spiritual samting evriday. For helpem olketa duim datwan, olketa famili shud trae for kaikai tugeta wanfala taem evriday, wea givim chance for storyim samting wea buildimap man.
Last tok long morning program hem “Hao Dedication and Baptism Lead Go Long Salvation.” Olketa wea redy for baptaes kasem savve finis, showimaot faith, repent, tanawe from rong fasin, and dedicatem olketa seleva long God. Speaker talem hao, bihaen olketa baptaes, olketa mas go ahed for grow long spiritual wei and for go ahed strong and keepim gudfala fasin.—Philippians 2:15, 16.
Long aftanun datfala tok “No Ova Tumas, and Keepim Eye Bilong Iu Simpol” hem strongim tufala main point. Wei for no ova tumas hem minim for luksavve long samting wea iumi no savve duim and hao nao God hem ting long iumi. Fasin for no ova tumas hem helpem iumi for keepim eye bilong iumi “simpol”—for tingim evritaem Kingdom bilong God, no olketa material samting. Sapos iumi duim olsem, iumi no need for wari, Jehovah bae provaedem samting wea iumi needim.—Matthew 6:22-24, 33, 34.
Next speaker showim why iumi shud “Trust Long Jehovah Evribit Long Taem Bilong Trabol.” Hao nao iumi savve deal witim olketa wik point bilong iumiseleva and olketa problem saed long selen or health? Iumi mas askem Jehovah for wisdom wea savve helpem man and askem help from nara pipol. Winim wei for barava wari and lus hope, iumi shud strongim trust bilong iumi long God thru long wei for readim Word bilong hem.—Romans 8:35-39.
Lastfala tok bilong convention wea garem thrifala part garem theme “Olketa Difren Kaen Test Showimaot Strong Bilong Faith Bilong Iumi.” First part remindim iumi hao evri tru Christian feisim persecution. Diswan givim witness, strongim faith bilong iumi, and givim chance for iumi showimaot iumi loyal long God. Nomata iumi no min for putim laef bilong iumi long danger, iumi nating duim samting wea againstim Bible for missim persecution.—1 Peter 3:16.
Mek-tu speaker long disfala tok story raonem samfala kwestin abaotem wei wea iumi no teksaed. Olketa first Christian luksavve hao olketa mas loyal long God. Long sem wei, Olketa Jehovah’s Witness distaem strong for followim disfala principle: “Iufala no part bilong world.” (John 15:19) From olketa test saed long wei iumi no teksaed savve seknomoa kamap, olketa famili mas markem taem for reviewim olketa Bible principle and direction abaotem disfala subject. Olsem mek-thri part long disfala tok showimaot, maet Satan no garem goal for killim iumi dae, bat for putim hevi long iumi for no faithful. Iumi givim praise long Jehovah taem iumi faithful for stand strong nomata pipol tok spoelem iumi, taem iumi kasem hevi for duim dirty fasin, hevi saed long feeling, and sik.
Datfala loving invitation “Kam Klosap Long Jehovah” hem title bilong last tok bilong datfala day. For minim olketa main fasin bilong Jehovah savve mekem iumi laek for kam klosap long hem. Hem iusim bigfala paoa bilong hem for protectim pipol bilong hem, especially long spiritual wei. Justice bilong hem no raf bat muvim hem for givim laef olowe long evriwan wea duim raeteous fasin. Wisdom bilong God hem showaot long wei wea hem iusim olketa man wea no perfect for raetem Bible. Fasin bilong hem wea iumi barava laekem hem love, wea muvim hem for mekem wei for olketa man kasem salvation thru long Jesus Christ. (John 3:16) Long end, speaker releasem datfala naesfala niu buk Draw Close to Jehovah.
Mek-Thri Day Hem Mekhae Long Wei for Strong for Gudfala Waka
Theme bilong mek-thri day bilong convention hem “Pipol wea Strong for Gudfala Waka.” (Titus 2:14) Morning program hem start long gudfala wei witim wanfala famili wea storyim text bilong day. Next tok hem “Waswe, Trust Bilong Iu Hem Long Jehovah?” Olketa nation trustim rong samting taem olketa depend long wisdom and strong bilong olketa seleva. Bat, long wei wea difren, olketa servant bilong Jehovah no fraet and hapi for depend long hem nomata olketa kasem trabol.—Psalm 46:1-3, 7-11.
Tok wea garem title “Olketa Young Wan—Build for Future Witim Organization Bilong Jehovah” storyim disfala kwestin: Hao nao wanfala young wan savve kasem best samting from laef? No long wei for aftarem selen, olketa material samting, and bignem. Long loving wei, Creator bilong iumi hem encouragem olketa young wan for tingim hem taem olketa young yet. Speaker hem interviewim samfala wea trae hard long Christian service taem olketa young, and iumi luksavve hao olketa hapi. Iumi kasem gud samting tu from datfala niu tract, Youths—What Will You Do With Your Life?, wea olketa wakem for helpem olketa young Witness for putim faondeson for future wea no savve finis witim organization bilong Jehovah!
Next samting hem datfala Bible drama wea mekem iumi lisin and lukluk gud “Stand Strong Long Olketa Hardfala Taem.” Hem storyim laef bilong Jeremiah olsem wanfala profet from taem hem young go kasem taem Jerusalem hem distroe, wea hem nao profesi abaotem. Jeremiah feel olsem hem no fit for assignment bilong hem, bat hem duim nomata pipol againstim hem, and Jehovah sevem hem.—Jeremiah 1:8, 18, 19.
Tok bihaen long drama hem “Kamap Olsem Jeremiah—No Fraet for Talemaot Word Bilong God.” Planti taem pipol talem olketa laea and nogud story againstim olketa wea talemaot Kingdom distaem. (Psalm 109:1-3) Bat, olsem Jeremiah, iumi savve deal witim wei for feel wikdaon thru long wei for hapi long Word bilong Jehovah. And iumi sure olketa wea faet againstim iumi bae fail.
Pablik tok wea garem title “Wei Bilong Disfala World Hem Go Ahed for Change,” hem barava fitim taem bilong iumi. Planti bigfala change kamap long taem bilong iumi. Bible talem profesi abaotem kaen samting olsem, and tu hao datfala singaot bilong “peace and security” bae lead go long judgment day bilong God wea mekem man fraet. (1 Thessalonians 5:3) Olketa nambawan change bae kamap bihaen—olketa war, criminal fasin, raf fasin and sik tu bae finis. So, winim wei for trustim disfala system, hem taem for aftarem waka wea showimaot fasin for lovem God and klinfala fasin.
Bihaen review bilong Wastaoa bilong datfala week, lastfala tok bilong convention hem kamap wea garem title “Duim Planti Gudfala Waka Olsem Pipol wea Strong for Talemaot Kingdom.” Speaker hem mekhae hao datfala program hem muvim iumi long spiritual wei and encouragem iumi for depend long Jehovah. Long conclusion, hem encouragem iumi for stap klin, olsem olketa loving pipol wea strong for talemaot Kingdom bilong God.—1 Peter 2:12.
Witim sem feeling olsem olketa servant bilong Jehovah long taem bilong Nehemiah, taem iumi go bak long haos iumi hapi from olketa spiritual blessing wea iumi kasem long “Pipol wea Strong for Talemaot Kingdom” Distrik Convention. (Nehemiah 8:12) Waswe, disfala convention mekem iu fulap witim hapi and strong for go ahed olsem wanfala man wea strong for talemaot Kingdom?
[Box/Piksa long page 23]
Wanfala Niu Study Buk!
Long end bilong first day bilong convention, audience hapi for kasem wanfala niu buk Worship the Only True God. Diswan hem for study witim olketa wea studyim finis datfala buk Savvy wea Lead Go Long Laef Olawe and bae hem barava strongim faith bilong olketa wea “garem fasin fitim laef olowe.”—Acts 13:48.
[Credit Line]
Piksa long kava bilong buk: U.S. Navy photo
[Box/Olketa Piksa long page 24]
Help for Kam Moa Klosap Long God
Last speaker long mek-tu day bilong convention announcem release bilong niu buk Draw Close to Jehovah. Disfala buk garem fofala main sekson, each wan abaotem wanfala long olketa main fasin bilong Jehovah—paoa, justice, wisdom, and love. Each sekson bilong disfala buk garem wanfala chapter wea showim hao example bilong Jesus Christ showimaot klia olketa fasin bilong God. Main goal bilong disfala niu buk hem for helpem iumi and olketa Bible student bilong iumi for strongim wei wea iumi fren witim Jehovah God and kam moa klos long hem.
[Box/Olketa Piksa long page 26]
Spiritual Help for Young Pipol
Spesol samting long mek-thri day bilong convention hem release bilong spesol tract wea garem title Youths—What Will You Do With Your Life? Olketa wakem niu tract hia for helpem olketa young Witness for mekem olketa stretfala disison abaotem future bilong olketa and hem garem advaes from Bible long hao for mekem service bilong Jehovah kamap laef waka bilong olketa for olowe.