Pipol wea Teachim Word Bilong God Kasem Encouragement for Fulfillim Assignment
Planti handred thousand teacher hipap for kasem instruction insaed olketa month wea just go pas. Start kam long May 2001, olketa hipap long planti handred “Pipol wea Teachim Word Bilong God” Distrik Convention bilong Olketa Jehovah’s Witness evriwea long world. Evriwan wea kam kasem encouragement for teachim olketa seleva, for kamap moa fit, and for fulfillim assignment olsem teacher.
Waswe, iu attendim wanfala long olketa convention hia? Sapos olsem, bae iu barava tinghae long spiritual kaikai wea olketa givimaot long olketa hipap olsem for worshipim tru God, Jehovah. Distaem iumi bae reviewim olketa instruction insaed program bilong convention.
First Day—Scripture wea Kam From God Hem Gud for Teach
Chairman bilong convention hapi for welkamim evriwan witim tok “Kasem Instruction, Iufala Pipol wea Teachim Word Bilong God.” From Jesus Christ lane from Jehovah datfala “Barava Nambawan Teacher,” hem kamap datfala Nambawan Teacher. (Isaiah 30:20; Matthew 19:16) Sapos iumi laek muv ahed olsem pipol wea teachim Word bilong God, iumi tu mas kasem instruction from Jehovah.
Nextfala tok hem “Kingdom Teaching Garem Gudfala Frut.” Olketa interview witim olketa teacher bilong Word bilong God, mekhae long olketa hapi and blessing wea iumi kasem from wei for mek-disaepol.
Bihaen diswan wanfala tok kamap wea barava muvim man, “Olketa ‘Nambawan Samting Bilong God’ Nao Muvim Iumi.” Long first century, “olketa nambawan samting” abaotem Kingdom bilong God muvim pipol for duim samting. (Acts 2:11) Iumi tu savve muvim pipol for duim samting taem iumi talemaot “olketa nambawan samting” olsem olketa teaching from Bible abaotem ransom, resurrection, and datfala niu covenant.
Nextfala tok encouragem evriwan for “Hapi Long Raeteous Fasin Bilong Jehovah.” (Psalm 35:27) Iumi kasem help for aftarem raeteous fasin taem iumi lane for lovem samting wea raeteous and heitim samting wea nogud, taem iumi go ahed for studyim Bible, taem iumi duim samting for againstim olketa samting wea savve spoelem iumi long spiritual saed, and taem iumi mekem grow hambol fasin. Taem iumi duim diswan bae hem protectim iumi from nogud wei for kaban, wei wea world tinghae long material samting, and from dirty and raf hapitaem.
Tok bilong theme, wea garem title “Fit Evribit Olsem Pipol wea Teachim Word Bilong God,” mekem iumi tingim hao Jehovah mekem iumi kamap olketa minister bilong hem wea fit thru long Word bilong hem, holy spirit, and organization bilong hem long earth. Long saed bilong wei for iusim Word bilong God, speaker givim disfala encouragement: “Goal bilong iumi, hem for tekem message bilong Bible wea stap long pepa and putim insaed heart bilong olketa wea lisin.”
First tok bilong convention wea garem thrifala part hem “Teachim Iumiseleva Taem Iumi Teachim Narawan.” First part strongim hao iumi shud garem sem haefala mark bilong Christian fasin wea iumi teachim long narawan. Nextfala part encouragem iumi for ‘iusim word bilong truth long stretfala wei.’ (2 Timothy 2:15) For teachim iumiseleva, hem important for waka hard for study seleva long Bible evritaem, nomata iumi servem God for longtaem or nomoa. Last part hem showimaot hao Devil lukluk long iumi for lukim kaen tingting olsem praod fasin, fasin for independent, for tinghae long seleva, jealous fasin, for feel nogud, for keepim kros, and for lukluk long mistek bilong narawan. Bat, sapos iumi strong for againstim Devil, hem bae ranawe from iumi. For iumi againstim hem, iumi need for kam klos long God.—James 4:7, 8.
Datfala tok wea kam long barava taem “Barava Heitim Pornography wea Kamap Big Tumas Long World” showim iumi hao for deal witim datfala barava nogud samting wea savve spoelem spiritual fasin. Profet Habakkuk sei abaotem Jehovah: “Iu klin tumas long eye for lukim samting wea nogud; and for luk go long trabol iu no fit for duim.” (Habakkuk 1:13) Iumi shud “barava heitim wicked samting.” (Romans 12:9) Parents kasem kaonsel for chekim wei wea pikinini iusim Internet and wanem hem lukim long television. Speaker sei olketa wea garem feeling for laekem pornography need for kasem help from wanfala mature spiritual fren. Hem bae savve help tu sapos man ting raonem and baeheartim samfala scripture olsem Psalm 97:10; Matthew 5:28; 1 Corinthians 9:27; Ephesians 5:3, 12; Colossians 3:5; and 1 Thessalonians 4:4, 5.
Nextfala tok, “Letem Peace Bilong God Protectim Iu,” comfortim iumi witim promis hao taem iumi kasem hevi from wari, iumi savve torowem hevi bilong iumi long Jehovah. (Psalm 55:22) Sapos iumi pourimaot heart bilong iumi long God long prea, hem bae givim iumi “peace bilong God,” hem nao peaceful, kwaet fasin wea stap insaed man from hem garem spesol wei for fren witim God.—Philippians 4:6, 7.
Firstfala day end witim wanfala hapi samting long datfala tok “Jehovah Mekem Pipol Bilong Hem Luk Naes Tumas Witim Laet,” wea explainim wei wea Isaiah chapter 60 hem fulfill. Midolwan long darkness bilong world distaem, “olketa man from difren ples”—datfala bigfala crowd wea olsem sheep wea kakamap— enjoyim laet bilong Jehovah witim olketa anointed Christian. Taem hem storyim verse 19 and 20, speaker explainim olsem: “Jehovah bae no ‘go daon’ olsem sun or ‘kat daon’ olsem moon. Hem bae go ahed for mekem pipol bilong hem luk naes tumas long wei for shaenim laet long olketa. Datwan hem wanfala nambawan promis for iumi taem iumi go thru long olketa last day bilong disfala world wea stap long darkness!” Long end bilong tok, speaker announcem release bilong buk Isaiah’s Prophecy—Light for All Mankind, Volume Two. Waswe iu readim finis disfala niu pablikeson?
Mek-Tu Day—Kamap Fit for Teachim Narafala Pipol
Bihaen wei for storyim text bilong mek-tu day, iumi barava interest for herem mek-tu tok wea garem thrifala part, “Olketa Minister wea Helpem Pipol Kamap Olketa wea Biliv.” Olketa speaker bilong disfala tok wea garem thrifala part mekhae long thrifala wei for helpem pipol kamap olketa wea biliv—talemaot message bilong Kingdom, mekem grow interest, and teachim olketa wea interest for followim samting Christ komandim. Witim help bilong olketa interview and demonstration, iumi barava lukim hao iumi savve teachim olketa narawan for kamap disaepol.
Nextfala part story abaotem theme “Joinim Go Long Fasin for Stand Strong, Fasin for Lovem God.” Speaker showimaot hao samting wea important nao hem ‘wei for stand strong kasem end.’ (Matthew 24:13) Iumi shud iusim evri samting wea God provaedem—prea, study seleva, olketa meeting, and ministry—for mekem grow fasin for lovem God. Iumi mas no letem olketa samting wea world wantem and duim, for tekovarem or killim dae fasin bilong iumi for lovem God.
Hao nao pipol wea waka hard and karem bigfala hevi savve faendem strong distaem? Datfala tok “Faendem Strong Anda Long Yoke Bilong Christ” ansarem datfala kwestin. Jesus givim kaenfala invitation for pipol kam anda long yoke bilong hem and for lane from hem. (Matthew 11:28-30) Iumi savve kam anda long yoke bilong Jesus taem iumi followim klos example bilong hem for garem living wea simpol and balance. Olketa main point barava kamap klia thru long olketa interview bilong olketa wea mekem laef bilong olketa kamap simpol.
Wanfala long olketa main samting long olketa bigfala hipap bilong Olketa Jehovah’s Witness hem baptism bilong olketa servant bilong God wea just dedicate. Brata wea givim tok “Baptism Lead Go Long Moa Chance for Teachim Narawan” barava welkamim olketa wea redy for baptaes and invaetem olketa for share insaed olketa privilege bilong service wea moa big. Olketa teacher bilong Word bilong God wea just baptaes wea kasem olketa mark from olketa scripture savve reach aot for kasem samfala responsibility insaed kongregeson.
“Followim Datfala Nambawan Teacher” nao title bilong firstfala tok long datfala aftanun. For longtaem long heven, Jesus lukluk gud and followim Father bilong hem, dastawe hem kamap datfala Nambawan Teacher. Taem hem stap long earth, hem iusim olketa wei for teach wea barava gud tumas, olsem olketa kwestin wea pullim feeling and olketa tokpiksa wea simpol and klia. Faondeson bilong Jesus for teach hem Word bilong God and hem story long wei wea garem laef, feeling, and olsem man wea garem paoa. Tok hia barava muvim iumi for followim example bilong datfala Nambawan Teacher.
Nara nambawan tok, “Waswe, Iu Willing for Servem Narawan?,” hem encouragem iumi for followim example bilong Jesus for servem narafala pipol. (John 13:12-15) Speaker hem encouragem olketa man wea fit, for kamap olsem Timothy for kasholem chance for helpem olketa narawan. (Philippians 2:20, 21) Parents kasem encouragement for olsem Elkanah and Hannah long wei for helpem pikinini bilong olketa for aftarem full-taem ministry. And olketa young wan kasem encouragement for followim example bilong Jesus Christ and young Timothy long wei for willing for helpem narawan. (1 Peter 2:21) Iumi kasem encouragement tu from toktok bilong olketa wea bin mekius long olketa chance for servem narawan.
Theme bilong mek-thri tok wea garem thrifala part hem “Kasem Moa Gud Samting From Theocratic Education.” First speaker strongim wei wea hem important for mekem moa big hao long nao iumi savve interest. For kasem datfala goal, iumi savve start witim shortfala wei for study seleva and then trae mekem moa long. Hem encouragem audience tu for lukluk long evri scripture and raetem note long olketa meeting. Mek-tu speaker storyim bigfala need for go ahed for hol strong long “plan bilong healthy toktok.” (2 Timothy 1:13, 14) For protectim iumiseleva from olketa dirty fasin insaed radio, television, niuspepa, and olketa buk, tingting bilong olketa savveman, and olketa apostate teaching, iumi mas baem taem for study seleva and attendim olketa meeting. (Ephesians 5:15, 16) Last speaker mekhae long need for duim olketa samting wea iumi lanem mekem iumi kasem evri gud samting from theocratic education.—Philippians 4:9.
Iumi barava hapi tumas for herem tok “Olketa Niu Samting for Helpem Iumi Muv Ahed Long Spiritual Wei”! Iumi hapi for savve hao klosap bae olketa pablisim datfala niu buk Kasem Gud Samting From Theocratic Ministry Skul Education. Hem mekem iumi want tumas for kasem disfala buk taem iumi herem speaker storyim olketa samting insaed. Taem hem storyim part insaed buk abaotem olketa kaonsel point, hem sei: “Wei wea disfala niu buk storyim 53 difren samting wea insaed long gudfala reading, toktok, and teaching, hem garem faondeson long olketa Bible principle.” Disfala buk bae showimaot hao olketa profet, Jesus, and olketa disaepol bilong hem showimaot gudfala wei for teach. Tru nao, disfala textbuk and niu wei for duim Theocratic Ministry Skul bae barava helpem iumi for kamap olketa teacher bilong Word bilong God wea moabeta.
Mek-Thri Day—Kamap Olketa Teacher Fitim Taem Hia
Bihaen wei for storyim text bilong last day, evriwan lisin gud long last tok wea garem thrifala part, “Profesi Bilong Malachi Redyim Iumi for Day Bilong Jehovah.” Malachi talem profesi klosap handred year bihaen olketa Jew kam bak from Babylon. Olketa start for join moa insaed apostate fasin and wicked fasin, wea no showimaot honor long nem bilong Jehovah taem olketa no followim olketa raeteous law bilong hem and taem olketa tekem kam olketa blind, cripple, and sik animal for sakrifaesim. And tu, olketa divorcem waef bilong olketa, maet for maritim olketa young heathen woman.
Firstfala chapter bilong profesi bilong Malachi strongim long iumi hao Jehovah lovem pipol bilong hem. Hem mekhae long need for garem wei for fraet long God and mas showimaot wei for tinghae long olketa holy samting. Jehovah expectim iumi for givim hem best bilong iumi, for worshipim hem from love wea no selfish. Iumi shud no duim nating holy service bilong iumi, and iumi mas givim ansa long God.
Taem hem storyim hao mek-tu chapter bilong Malachi hem fitim taem bilong iumi, speaker bilong mek-tu part bilong tok wea garem thrifala part ask olsem: “Waswe, iumiseleva lukluk gud mekem ‘no eni fasin wea no raeteous stap long mouth bilong iumi’?” (Malachi 2:6) Olketa wea lead for teach shud mek sure hao samting wea olketa talem hem garem strong faondeson long Word bilong God. Iumi shud heitim kaen barava nogud wei for kasem divorce wea no stret.—Malachi 2:14-16.
Taem hem story raonem theme “Hu Nao Bae Stap Laef Bihaen Day Bilong Jehovah?” last speaker bilong tok wea garem thrifala part helpem iumi for redy for day bilong Jehovah. Speaker hem sei: “Olketa servant bilong Jehovah kasem bigfala comfort for savve hao Malachi chapter 3, verse 17, hem fulfill long main wei long olketa! Wea sei: ‘“Olketa mas kamap pipol bilong mi,” Jehovah bilong olketa army hem talem, “long day wea mi mekem wanfala spesol samting bilong mi. And mi bae showimaot fasin for kea long olketa, olsem wanfala man hem showimaot fasin for kea long son bilong hem wea servem hem.” ’ ”
Nara main samting bilong convention hem datfala drama “Respectim Paoa Bilong Jehovah,” wea storyim olketa son bilong Korah. Nomata dadi bilong olketa garem bighed fasin againstim Moses and Aaron, olketa stap loyal long Jehovah and olketa wea hem markem. Korah and olketa follower bilong hem dae, bat olketa son bilong Korah laef. Tok wea kam bihaen, “Loyal for Stap Anda Long Paoa Bilong God,” showim hao samting insaed drama hem fitim each wan long iumi. Speaker warnim iumi abaotem sixfala wei wea Korah and olketa follower fail long hem: no loyal for saportim paoa bilong Jehovah; letem praod fasin, wei for aftarem bignem, and jealous fasin for bossim olketa; tingim nomoa wik point bilong olketa wea Jehovah appointim; kamap man wea komplen; no satisfae witim olketa privilege wea olketa garem; and letem wei for fren witim narawan or for loyal long famili for kamap moa important winim wei for loyal long Jehovah.
“Hu Nao Teachim Truth Long Evri Nation?” hem nao theme bilong pablik tok. Truth wea hem story abaotem hem no just eni truth nomoa, bat hem truth abaotem purpose bilong Jehovah wea Jesus Christ witness abaotem. Speaker story raonem truth wea join witim olketa biliv, truth saed long hao for worship, and truth saed long fasin bilong man seleva. Faith bilong iumi hao ‘God hem barava stap midolwan long iumi’ kasem strong taem iumi markem olketa first-century Christian witim Olketa Jehovah’s Witness distaem.—1 Corinthians 14:25.
Bihaen olketa main point bilong Wastaoa for datfala week, last tok “Fulfillim Assignment for Teach Witim Feeling for Hariap,” barava muvim evri teacher bilong Word bilong God wea attend for duim samting. Wanfala short review long program strongim hao hem important for iusim olketa Scripture insaed teaching, olketa wei wea iumi savve kamap teacher wea fit, and need for garem trust long datfala truth wea iumi teachim olketa narawan. Speaker kaonselem iumi for mekem ‘wei wea iumi muv ahed showaot klia’ and for ‘lukluk gud evritaem long iumiseleva and teaching bilong iumi.’—1 Timothy 4:15, 16.
Iumi enjoyim wanfala nambawan spiritual feast long “Pipol wea Teachim Word Bilong God” Distrik Convention! Iumi mas followim Barava Nambawan Teacher bilong iumi, Jehovah, and Nambawan Teacher bilong iumi, Jesus Christ, long wei for teachim nara pipol abaotem word bilong God.
[Box/Olketa Piksa long page 28]
Olketa Niu Pablikeson for Olketa Spesol Need
Olketa wea attendim “Pipol wea Teachim Word Bilong God” Distrik Convention hapi tumas for kasem tufala pablikeson wea shud help for teachim Bible truth long pipol long samfala part bilong world. Disfala tract wea garem title Waswe, Iu Garem Spirit wea No Savve Dae? bae help for startim story witim pipol wea stap long olketa kantri wea long languis bilong olketa, “soul” and “spirit” hem semsem nomoa. Disfala niu tract showimaot klia hao wanfala spirit force hem difren from spirit creature and pipol no kamap spirit creature taem olketa dae.
Long end bilong mek-tu day bilong convention, olketa releasem brochure A Satisfying Life—How to Attain It. Olketa preparem disfala brochure witim goal for startim olketa Bible study witim pipol wea no idea abaotem wanfala Creator wea garem olketa fasin and wanfala buk from God. Waswe, iu kasem chance finis for iusim olketa niu pablikeson hia long ministry bilong iu?
[Olketa Piksa long page 26]
Long Milan, Italy, and olketa convention evriwea long world, planti handred baptaes
[Piksa long page 29]
Datfala drama “Respectim Paoa Bilong Jehovah” muvim olketa audience