KWESTIN FROM READER

Hao nao olketa elder and ministerial servant savve kasem appointment long kongregeson?

Long first century, aposol Paul sei long olketa elder long Ephesus: “Holy spirit hem markem iufala for elder long kongregeson bilong God wea hem baem long blood bilong Son bilong hem. So iufala mas lukluk gud long iufala seleva and lukaftarem olketa sheepsheep.” (Acts 20:28) Hao nao God iusim holy spirit for markem olketa elder and ministerial servant distaem?

First samting, God iusim holy spirit for leadim samfala man for raetem long Bible olketa spiritual mark for olketa elder and ministerial servant. Bible storyim 16-fala difren mark for olketa elder long 1 Timothy 3:1-7. Samfala nara mark moa stap long Titus 1:5-9 and James 3:17, 18. Olketa spiritual mark for olketa ministerial servant hem stap long 1 Timothy 3:8-10, 12, 13. Mek-tu samting, olketa wea recommendim and markem brata for elder or ministerial servant prea for holy spirit leadim olketa taem olketa ting raonem sapos datfala brata kasem olketa mark wea Bible storyim. Mek-thri samting, brata wea olketa recommendim mas showimaot hem garem olketa wei bilong holy spirit. (Gal. 5:22, 23) So holy spirit leadim evri samting wea mekem wanfala brata fit for elder or ministerial servant.

Bat hu nao garem waka for appointim elder or ministerial servant? Long bifor, evri recommendation for brata kamap elder or ministerial servant mas go long branch office. Olketa brata wea Governing Body markem wea stap long branch office ting raonem and disaedem sapos datfala brata fit for duim datfala waka. Sapos branch office appointim datfala brata for elder or ministerial servant, olketa sendem leta for talem olketa elder long kongregeson. Then olketa elder talem long datfala brata hem kasem appointment, and askem hem sapos hem willing and fit for duim datfala waka. Then olketa announcem datwan long kongregeson.

Bat hao nao olketa duim datwan long first century? Samfala taem, olketa aposol markem samfala brata for duim wanfala waka. Olsem example, wantaem olketa aposol markem sevenfala brata for lukaftarem waka for givimaot kaikai long olketa widow woman. (Acts 6:1-6) Bat luk olsem olketa brata wea kasem datfala waka olketa brata wea elder finis.

Nomata Bible no explainim evri samting wea olketa duim long first century for appointim olketa elder and ministerial servant bat Bible storyim samfala samting abaotem diswan. Bible sei taem Paul and Barnabas kam bak from firstfala missionary gogo bilong tufala, “tufala markem samfala man . . . for elder long olketa kongregeson. Tufala prea and followim kastom for no kaikai, and then givim olketa elder hia long Jehovah bikos olketa biliv long hem.” (Acts 14:23) Staka year bihaen, Paul raet long Titus, wea gogo witim hem for visitim olketa kongregeson. Hem sei: “Mi leavim iu long Crete for iu stretem samfala samting wea no stret, and for iu savve markem olketa man for elder long olketa taon, olsem mi talem iu finis.” (Titus 1:5) Luk olsem Timothy, wea visitim olketa kongregeson witim Paul, hem tu kasem paoa for markem samfala brata for elder and ministerial servant. (1 Tim. 5:22) So long first century, olketa traveling overseer nao markem olketa brata for elder or ministerial servant. Olketa aposol and elder long Jerusalem no duim datwan.

For followim wanem olketa duim long first century, Governing Body bilong Olketa Jehovah’s Witness changem wei for appointim olketa elder and ministerial servant. Start long September 1, 2014, diswan nao arrangement wea organization followim: Evri circuit overseer bae ting raonem olketa recommendation wea hem kasem long circuit bilong hem. Taem hem visitim kongregeson, bae hem trae for savve gud long olketa brata wea kasem recommendation, and waka witim olketa long ministry sapos fitim. Bihaen circuit overseer storyim olketa recommendation hia witim olketa elder long kongregeson, hem nao garem responsibility for appointim olketa elder and ministerial servant long olketa kongregeson long circuit bilong hem. Disfala arrangement hem followim wanem olketa duim long first century.

Hu nao olketa wea garem waka insaed disfala arrangement? “Datfala wakaman wea faithful and wise” garem waka for givim spiritual kaikai long olketa tru Christian. (Matt. 24:45-47) Holy spirit leadim olketa taem olketa studyim Bible mekem olketa savve givim direction long olketa kongregeson for helpem olketa organize long wei wea followim olketa Bible principle. Datfala wakaman appointim tu evri circuit overseer and Branch Komiti member. And olketa branch office helpem olketa kongregeson for followim direction wea kam from datfala wakaman. Olketa elder long kongregeson garem important responsibility for ting raonem and disaedem sapos brata wea olketa ting for recommendim for elder or ministerial servant hem kasem olketa mark wea Bible storyim. Olketa circuit overseer garem important responsibility for ting raonem and prea abaotem recommendation wea olketa elder mekem, and for appointim olketa brata wea fit for elder or ministerial servant.

Olketa samting hia helpem iumi for luksavve long wei wea God iusim holy spirit for markem olketa elder and ministerial servant. Diswan helpem iumi for trustim and respectim olketa elder and ministerial servant long kongregeson.—Heb. 13:7, 17.

Hu nao tufala witness wea Revelation chapter 11 storyim?

Long Revelation 11:3 hem story abaotem tufala witness wea talem profesi for 1,260 day. Bible sei bihaen datwan, wanfala wild animal hem ‘faetem tufala, and killim tufala dae.’ Bat bihaen “thri and haf day” tufala witness hia laef bak, and pipol wea lukim tufala sapraes fogud.—Rev. 11:7, 11.

Hu nao tufala witness hia? Olketa nara samting wea Revelation chapter 11 storyim helpem iumi for savve. First samting, Bible sei: “Tufala olive tree and tufala lamp piksarem tufala witness hia.” (Rev. 11:4) Diswan mekem iumi tingim profesi long Zechariah wea story abaotem wanfala lamp and tufala olive tree. Datfala profesi sei tufala olive tree hia piksarem “tufala anointed wan,” wea hem nao Governor Zerubbabel and Hae Priest Joshua, “wea standap saed long Lord bilong earth.” (Zech. 4:1-3, 14) Mek-tu samting, Bible sei tufala witness hia duim olketa mirakol wea klosap semsem olsem olketa mirakol wea Moses and Elijah duim.—Comparem Revelation 11:5, 6 witim Numbers 16:1-7, 28-35 and 1 Kings 17:1; 18:41-45.

Governor Zerubbabel and Hae Priest Joshua, wea profesi bilong Zechariah storyim, tufala leadim pipol bilong God long taem wea olketa kasem test. Semsem tu witim Moses and Elijah. So tufala witness wea Revelation chapter 11 storyim piksarem olketa anointed brata wea leadim pipol bilong God taem Kingdom hem start for rul long heven long 1914. For thri and haf year bihaen 1914 olketa hia “werem kaleko wea showimaot olketa sorre,” wea piksarem wei wea olketa no givap for talemaot judgment message bilong God.

Bihaen long thri and haf year hia, olketa anointed Christian dae long tokpiksa wei taem gavman putim olketa long prison for lelebet taem, wea datfala thri and haf day nao piksarem datwan. Olketa enemy bilong pipol bilong God tingse olketa stopem nao preaching waka, and datwan mekem olketa enemy hia barava hapi.—Rev. 11:8-10.

Bat olsem datfala profesi talem, long end bilong datfala thri and haf day, tufala witness hia laef bak. Olketa anointed Christian hia kamaot from prison, and olketa wea gohed faithful kasem wanfala spesol waka. Long 1919, God iusim Jesus for markem olketa hia and samfala narawan for kamap “datfala wakaman wea faithful and wise” for givim spiritual kaikai long pipol bilong God long olketa last day.—Matt. 24:45-47; Rev. 11:11, 12.

Interesting samting, Revelation 11:1, 2 sei samting wea kasem tufala witness hia happen long taem wea God hem measurem spiritual temple bilong hem, wea minim hem lukluk gud long datwan. Malachi chapter 3 storyim tu datfala taem wea God lukluk gud and klinim spiritual temple bilong hem. (Mal. 3:1-4) Datfala waka for lukluk gud and klinim spiritual temple hem gohed for haomas year? Hem start long 1914 and gohed kasem start bilong 1919. Datfala 1,260 day (42 month) witim datfala tokpiksa thri and haf day wea Revelation chapter 11 storyim, hem nao datfala semtaem wea God klinim spiritual temple start long 1914 and hem gohed kasem start bilong 1919.

Iumi hapi tumas bikos Jehovah duim disfala waka for mekem pipol bilong hem kamap klin and fit for duim olketa gudfala waka! (Titus 2:14) And tu, iumi tinghae long example bilong olketa anointed Christian wea leadim pipol bilong God long datfala taem wea olketa kasem test. Evri samting hia showimaot tufala witness wea Revelation chapter 11 storyim piksarem olketa anointed Christian hia.a