Waswe, Iu Gohed Muv Witim Organization Bilong Jehovah?

1. Wanem organization nao God chusim wea changem nation bilong Israel? (Lukim piksa long start bilong study.)

JEHOVAH hem hapi long worship bilong pipol bilong hem long earth. Long bifor, nation bilong Israel nao pipol wea God chusim. Bat olketa kamap apostate. So Jehovah startim wanfala niu nation wea hem nao olketa disaepol bilong Christ. Olketa kamap wanfala organization wea talem pipol abaotem Jehovah. Datfala organization hem no finis nomata Jerusalem hem distroe long 70 C.E. (Luke 21:20, 21) Long distaem wea world hem gogo for finis, datfala niu nation hem organize for talem pipol abaotem Jehovah. Taem world bilong Satan hem finis, datfala organization bae no finis. (2 Tim. 3:1) Wanem nao mekem iumi sure long diswan?

2. Wanem nao Jesus talem abaotem “bigfala trabol,” and hao nao datwan bae start?

² Jesus talem finis wanem bae happen long olketa last day. Hem sei: “Bae bigfala trabol kamap wea hem winim eni trabol wea happen start kam long taem world hem start, kam kasem distaem, and no eni trabol wea kam bihaen bae nogud olsem.” (Matt. 24:3, 21) Datfala big trabol bae start taem Jehovah finisim “Bigfala Babylon,” wea hem nao evri false religion long world. Bae hem iusim olketa gavman bilong man for duim diswan. (Rev. 17:3-5, 16) Bihaen datwan, wanem nao bae happen?

TAEM SATAN ATTAK, ARMAGEDDON BAE START

3. Bihaen false religion hem finis, wanem nao bae happen long pipol bilong Jehovah?

³ Bihaen false religion hem finis, Olketa Jehovah’s Witness nomoa religion wea bae stap long earth. Then, Satan and world bilong hem bae attakim pipol bilong God. Bae olketa tingse pipol bilong Jehovah no garem eniwan for protectim olketa. Bible sei olsem abaotem “Gog from land bilong Magog”: “Iu witim army bilong iu and staka pipol bae againstim olketa olsem strongfala wind, and iu bae kavarem datfala ples olsem olketa cloud.” Bat for attakim pipol bilong God hem wanfala big mistek!—Ezek. 38:1, 2, 9-12.

4, 5. Wanem nao Jehovah bae duim taem Satan attakim pipol bilong hem?

⁴ Taem Satan and olketa wea followim hem attakim pipol bilong God, Jehovah bae ting long datwan olsem olketa attakim hem. (Readim Zechariah 2:8.) Wanem nao Jehovah bae duim? From hem nao ruler bilong universe, bae hem sevem pipol bilong hem. Hem bae no letem eniwan for finisim olketa. Then Jehovah bae finisim world bilong Satan long Armageddon.—Rev. 16:14, 16.

⁵ Jeremiah talem wanfala profesi abaotem taem wea Jehovah bae faet againstim olketa nation long Armageddon. Hem sei: “‘[Jehovah] nao bae judgem evri man. Hem bae iusim sword for finisim nogud pipol.’ Diswan nao samting wea Jehovah, komanda bilong olketa army, hem talem: ‘Wanfala big trabol bae kasem evri nation, and wanfala big wind bae blow kam from olketa barava farawe ples long earth. And long datfala day Jehovah bae killim dae pipol long evri ples long earth. No eniwan bae krae for olketa, and no eniwan bae hipimap olketa for berem olketa. Bae olketa rotten nomoa long graon.’” (Jer. 25:31-33) World bilong Satan bae finis long Armageddon, bat organization bilong Jehovah bae no finis.

ORGANIZATION BILONG JEHOVAH GOHED FOR GROW

6, 7. (a) Datfala “big crowd” kam from wea? (b) Wanem nao showimaot organization bilong God hem grow long olketa year wea go pas?

⁶ Organization bilong God long earth distaem hem gohed for grow bikos hem fulap long pipol wea raeteous and wea God hapi long olketa. Bible sei: “Jehovah hem lukluk long olketa wea raeteous and hem herem prea bilong olketa.” (1 Pet. 3:12) “Wanfala big crowd,” wea minim staka pipol, olketa insaed disfala sekson wea raeteous, and olketa bae “no dae long datfala big trabol.” (Rev. 7:9, 14) Tingim feeling bilong iu taem datfala big trabol hem kam and iu no dae from iu insaed datfala big crowd!

⁷ Olketa wea insaed datfala big crowd kam from evri kantri, and preaching waka nao mekem olketa kam tugeta. Jesus sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.” (Matt. 24:14) Dastawe main waka bilong pipol bilong God hem for preachim gud nius abaotem Kingdom bilong God. From datwan, staka million pipol worshipim Jehovah “followim holy spirit and followim samting wea tru.” (John 4:23, 24) Olsem example, long 2003 go kasem 2012, winim 2,707,000 nao dedicate long Jehovah and baptaes. Distaem, winim 7,900,000 Witness stap raonem world, and evri year plande million pipol tu attendim Memorial. Iumi hapi from namba bilong datfala big crowd hem gohed for grow, and iumi savve ‘Jehovah nao mekem datwan for grow.’—1 Corinth 3:5-7.

8. Wanem nao mekem organization bilong Jehovah gohed for kamap big?

⁸ Jehovah chusim wanfala organization long earth for talem pipol abaotem hem. And datfala organization hem gohed for kamap big. (Readim Isaiah 43:10-12.) Isaiah talem profesi abaotem datwan taem hem sei: “Datfala smol wan bae kamap wan thousand, and datwan wea no big tumas bae kamap wanfala maeti nation. Mi Jehovah, bae mi mekem datwan for happen kwiktaem long taem bilong hem.” (Isa. 60:22) Long firstaem olketa anointed Christian, wea olketa nao datfala “Israel bilong God,” olketa olsem datfala “smol wan.” Bat Jehovah blessim preaching waka wea olketa duim, so namba bilong olketa kamap big taem samfala anointed Christian moa kam insaed organization bilong God. (Gal. 6:16) Long olketa year wea go pas staka million pipol wea garem hope for laef long earth tu lanem truth.

WANEM JEHOVAH LAEKEM IUMI FOR DUIM

9. Wanem nao iumi mas duim for kasem nambawan samting wea God promisim long future?

⁹ Nomata iumi anointed Christian or iumi insaed datfala big crowd, Jehovah promisim wanfala nambawan future for iumi evriwan. For kasem wanem God promisim iumi mas duim wanem hem laekem iumi for duim. (Isa. 48:17, 18) Olsem example, Jehovah sei olketa Israelite mas obeyim Law bilong Moses. Datfala Law protectim olketa and teachim olketa hao for garem hapi famili, for garem olketa gudfala fren, for no raverave long bisnis, and hao for kaen long olketa narawan. (Ex. 20:14; Lev. 19:18, 35-37; Deut. 6:6-9) Iumi distaem tu kasem gud samting taem iumi obeyim God. Olketa law bilong God protectim iumi and helpem iumi for kasem gud samting, and olketa law hia no hard tumas for iumi obeyim. (Readim 1 John 5:3.) Taem iumi obeyim olketa law hia iumi hapi, and iumi garem strongfala faith.—Titus 1:13.

10. Why nao iumi mas markem taem for studyim Bible evritaem and duim Famili Worship evri week?

¹⁰ Organization bilong God long earth hem gohed for muv long staka wei. Olsem example, hem gohed helpem iumi for minim gud olketa tru teaching long Bible. Datwan nao samting wea Bible promisim. Hem sei: “Road bilong olketa wea raeteous hem olsem laet from sun wea kamap moa braet go kasem big daylaet.” (Prov. 4:18) So iumi shud ting raonem olketa kwestin hia: ‘Waswe, mi luksavve long samfala change long wei wea iumi minim samfala scripture? Waswe, mi readim Bible evriday? Waswe, mi readim evri niu pablikeson wea iumi kasem? Waswe, mi duim Famili Worship evri week?’ Olketa samting hia hem no hard for duim, bat iumi mas markem taem for olketa. Hem barava important for iumi gohed studyim Bible, followim wanem iumi lanem, and gohed muv witim organization bilong God. Hem important for iumi duim olketa samting hia bikos datfala big trabol hem klosap tumas!

11. Why nao pipol bilong Jehovah go long olketa meeting, assembly, and convention?

¹¹ Organization bilong Jehovah encouragem iumi for followim disfala kaonsel bilong aposol Paul: “Iumi mas barava tingim narawan mekem iumi savve encouragem olketa for showimaot love and duim olketa gudfala samting. No misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.” (Heb. 10:24, 25) Olketa Israelite bifor evritaem hipap tugeta for worshipim Jehovah and for hem teachim olketa. Wei for hipap olsem hem mekem olketa Israelite hapi. Wanfala example nao hem long taem bilong Nehemiah wea olketa Israelite celebratem festival wea olketa stap insaed olketa smol leaf haos. (Ex. 23:15, 16; Neh. 8:9-18) Long distaem, iumi tu garem olketa meeting, assembly, and convention. Iumi shud traem best for attendim evri hipap hia bikos olketa helpem iumi for gohed fren gud witim Jehovah, and hapi long worship bilong iumi.—Titus 2:2.

12. Wanem tingting nao iumi shud garem abaotem preaching waka?

¹² From iumi insaed organization bilong Jehovah, iumi mas preachim gud nius. Diswan hem nambawan privilege. Bible sei disfala waka hem “holy waka.” (Rome 15:16) Taem iumi duim preaching waka iumi waka tugeta witim “datfala Holy God,” Jehovah. (1 Cor. 3:9; 1 Pet. 1:15) Iumi join insaed wei for mekhae long holy nem bilong Jehovah. Iumi barava hapi long privilege wea iumi garem for talemaot “datfala nambawan gud nius wea hem kam from datfala hapi God.”—1 Tim. 1:11.

13. Sapos iumi laek for laef and for fren gud witim Jehovah, wanem nao iumi mas duim?

¹³ Jehovah laekem iumi for kasem gud samting. Dastawe hem laekem iumi for fren gud witim hem and sapotim organization bilong hem. Iumi mas chusim sem samting wea Moses talem olketa Israelite for chusim. Moses sei long olketa: “Tufala road nao stap front long iufala. Wanfala hem lead go long laef. Narawan hem lead go long dae. Iufala nao mas chus. Wanem iufala chusim bae mekem iufala kasem olketa blessing or kasem nogud samting. Skae and earth nao olsem witness for wanem iufala chusim. So iufala mas chusim laef mekem iufala and olketa pikinini bilong iufala savve gohed for laef. Iufala mas lovem God bilong iufala Jehovah, lisin long hem, and barava followim hem, bikos hem nao givim laef long iufala and mekem iufala for stap longtaem.” (Deut. 30:19, 20) Iumi mas chusim laef, lovem Jehovah, and faithful long hem and organization bilong hem.

14. Storyim feeling bilong wanfala brata abaotem organization bilong God.

¹⁴ Brata Pryce Hughes, wea kam insaed truth bifor 1914, hem gohed faithful long Jehovah and organization bilong Hem for full laef bilong hem. Long laef story bilong hem, hem sei barava important samting wea hem lanem nao hem for stap klosap long organization bilong Jehovah and no depend long tingting bilong man. Datwan helpem hem for winim olketa hard taem wea hem kasem. Brata Hughes sei sapos iumi laekem Jehovah for hapi long iumi, iumi mas evritaem followim wanem organization bilong hem talem.

GOHED MUV WITIM ORGANIZATION BILONG JEHOVAH

15. Wanem example long Bible nao showimaot wanem iumi shud duim taem olketa change kamap long wei wea iumi minim samfala scripture?

¹⁵ Jehovah laekem iumi for sapotim organization bilong hem, acceptim olketa change wea kamap long wei wea iumi minim samfala scripture, and followim olketa change wea kamap long wei for iumi preach. Long first century, samfala Christian wea Jew laek for gohed followim Law bilong Moses. (Acts 21:17-20) Bat Paul stretem tingting bilong olketa and helpem olketa for luksavve sakrifaes bilong Jesus nao mekem God forgivim olketa sin bilong man, and no olketa animal sakrifaes. (Heb. 10:5-10) Staka long olketa Christian hia wea Jew acceptim kaonsel wea Paul givim and changem tingting bilong olketa abaotem datwan. Iumi savve lanem important samting from example bilong olketa. Iumi mas studyim gud Bible and olketa pablikeson bilong iumi, and taem organization bilong Jehovah changem samfala samting, iumi mas hambol for acceptim datwan.

16. (a) Wanem nao olketa nambawan blessing wea bae kamap long Paradaes? (b) Wanem nao iu luk forward long hem long niu world?

¹⁶ Evriwan wea gohed faithful long Jehovah and organization bilong hem bae kasem olketa blessing. Olketa anointed Christian bae rul witim Jesus Christ long heven. (Rome 8:16, 17) Olketa wea garem hope for laef long earth luk forward for laef olowe long Paradaes. Evriwan wea worshipim Jehovah long full world garem privilege for storyim diswan long nara pipol. (2 Pet. 3:13) Bible sei: “God bae givim earth long olketa wea hambol, and olketa bae hapi fogud bikos evriwan bae garem peace.” (Ps. 37:11) Pipol bae garem gudfala waka. “Olketa bae wakem olketa haos and stap insaed.” (Isa. 65:21, 22) No eniwan bae spoelem narawan. No eniwan bae poor or hangre. (Ps. 72:13-16) Olketa false religion bae no teachim laea samting abaotem God, bikos olketa bae no stap nao. (Rev. 18:8, 21) Olketa wea dae finis bae laef bak and garem chance for laef olowe long earth. (Isa. 25:8; Acts 24:15) Sapos iumi strongim wei wea iumi fren witim Jehovah and gohed muv witim organization bilong hem, bae iumi kasem olketa blessing hia.

17. Hao nao iumi shud ting long Jehovah and organization bilong hem?

¹⁷ Klosap nao world bilong Satan bae finis. Sapos iumi laek for stap laef, iumi mas gohed for garem strongfala faith and gohed worshipim Jehovah and sapotim organization bilong hem. Iumi garem sem feeling olsem David wea sei: “Wanfala samting nao mi askem long Jehovah, hem nao samting wea mi barava laekem, for mi savve stap long haos bilong Jehovah long full laef bilong mi. Mi laek for lukim naesfala wei bilong Jehovah, and for gohed tinghae long temple bilong hem.” (Ps. 27:4) Iumi evriwan laek for gohed fren gud witim Jehovah and gohed muv witim organization bilong hem.