Wanem Nao Waka Bilong Datfala Watch Tower Bible and Tract Society?
Watch Tower Bible and Tract Society of Pennsylvania hem wanfala legal organization wea start long 1884, long Pennsylvania, U.S.A. Hem no wanfala bisnis. Law bilong America sei Olketa Jehovah’s Witness mas garem wanfala legal organization for sapotim preaching waka wea olketa duim evriwea long world and for mekem olketa fit for printim olketa Bible and olketa Bible pablikeson wea olketa iusim long preaching waka.
Disfala organization hem for sapotim olketa samting saed long religion, teaching waka, and olketa nara wei for helpem pipol, bat main samting hem for sapotim preaching waka and for teachim pipol abaotem Kingdom bilong God wea Christ Jesus nao hem King bilong hem. For kamap member bilong datfala organization hem no depend long haomas selen nao man hem givim, bat olketa bae chusim pipol for kamap olketa member long datfala organization. Olketa member and olketa director helpem Governing Body bilong Olketa Jehovah’s Witness.
Olketa Nara Legal Organization
Olketa Jehovah’s Witness garem tu olketa legal organization long olketa nara kantri. Samfala organization hia garem datfala toktok “Watch Tower,” or “Watchtower,” insaed nem bilong olketa or olketa iusim languis toktok for datwan.
Olketa legal organization hia helpem mifala for duim staka samting olsem:
Raetem and pablisim olketa pablikeson. Mifala pablisim finis samting olsem 253 million Bible. Olketa pablikeson bilong mifala stap long winim 1,050 languis. And tu, pipol savve readim Bible long winim 300 languis long datfala jw.org website, and staka kasem ansa for olketa Bible kwestin olsem, “Wanem nao Kingdom bilong God?”
Education. Mifala garem olketa skul wea teachim Bible. Olsem example, start kam long 1943, winim 10,000 Jehovah’s Witness attendim Watchtower Bible Skul Bilong Gilead for lanem hao for duim waka bilong missionary or for encouragem and strongim olketa narawan long organization. And evri week, plande million pipol, nomata olketa wea no Witness tu, lane abaotem Bible long olketa meeting bilong mifala long olketa kongregeson. And tu, mifala garem skul for teachim pipol for read and raet and mifala iusim wanfala buk wea stap long 136 languis for duim datwan.
Helpem pipol. Mifala givim olketa samting for helpem olketa wea kasem olketa barava nogud samting. Olsem example, long 1994, mifala duim datwan for olketa long Rwanda taem wanfala tribe trae for killim dae evriwan long nara tribe, and tu, mifala sendem olketa samting for helpem olketa wea natural disaster affectim olketa, olsem long Haiti taem earthquake spoelem ples bilong olketa long 2010.
Nomata mifala iusim olketa legal organization hia for duim staka samting, preaching waka wea mifala duim hem no depend long olketa organization hia. Evri Christian mas duim waka wea God givim long olketa, wea hem nao for preach and for teachim pipol abaotem gud nius. (Matthew 24:14; 28:19, 20) Mifala bilivim God nao sapotim datfala waka wea mifala duim and hem nao bae mekem datfala waka for gohed.—1 Corinth 3:6, 7.