Report Bilong Olketa wea Talemaot Kingdom
Latvia Acceptim Gud Nius
BIBLE showim klia hao hem will bilong God “for evri difren kaen man mas sev and kasem stretfala savve bilong truth.” (1 Timothy 2:4) Pipol wea nating garem chance for herem gud nius for staka year olketa herem nao distaem! Long Latvia, olsem olketa nara part long world tu, pipol bilong evri age and living acceptim disfala message, olsem olketa experience long daon showimaot.
• Long Rēzekne, wanfala taon east long Latvia, wanfala mami and teenage dota bilong hem askem wanfala woman for helpem tufala kasem wanfala ples. Bihaen hem givim information, woman hia, wea hem wanfala Jehovah’s Witness, invaetem tufala long olketa meeting bilong olketa Witness.
From mami and dota evriwan interest long religion, tufala disaed for attendim meeting. Taem tufala gogo, tufala agree hao sapos eniting nogud happen long there, tufala bae lusim stretawe. Bat, from meeting barava mekem tufala interest, tufala nating ting for lusim. Tufala acceptim offer for studyim Bible, and start for attendim olketa meeting evritaem. Insaed thri month nomoa, tufala laek for joinim preaching waka and luk forward for baptaes.
• Long wanfala taon west long Latvia, wanfala Witness meetim Anna wea 85 year, wea showim tru interest and acceptim Bible study. Dota and samfala long famili bilong Anna againstim hem. Bat hem no letem diswan or wei wea hem olo and nogud health for stopem wei wea hem studyim Bible.
Wanday, Anna talem dota bilong hem hem bae baptaes. “Sapos iu baptaes, mi bae sendem iu long hom for olo pipol,” dota bilong Anna hem sei. Disfala toktok for fraetem hem nating stopem Anna. From nogud health bilong hem, hem baptaes long haos bilong hem.
Hao nao dota bilong Anna? Hem changem tingting bilong hem, and hem redyim spesol kaikai for mami bilong hem bihaen baptism. Then hem askem mami bilong hem, “From distaem iu baptaes, hao nao iu feel?” Ansa bilong Anna? “Olsem mi just born!”
• Long December 1998, tufala Witness meetim wanfala army officer bilong Soviet Union bifor, wea retire. From hem biliv long wanfala Creator, hem acceptim Bible study, and bihaen waef bilong hem joinim hem. Tufala muv ahed kwiktaem and no longtaem bihaen kamap pablisa wea no baptaes. Insaed wan year, datfala officer wea retire hem baptaes. Bigfala love bilong hasband and waef hia for olketa spiritual samting barava encouragem evriwan insaed kongregeson. And tu, tufala share for wakem wanfala haos long area bilong tufala for kamap naes Kingdom Hall.