Nomata Man Olo, Hem Savve Worshipim God
Long December 19, 2009, long Málaga, long south Spain, wanfala mami and dota bilong hem wea garem sem nem, Ana, tufala baptaes. Long datfala year, 2,352 nao baptaes long Spain. Bat interesting samting abaotem tufala nao, mami hem 107 year and dota hem 83 year!
Wanem nao mekem tufala for dedicate long Jehovah and baptaes? Tu-thri year bihaen 1970, wanfala neiba wea Jehovah’s Witness invaetem Ana wea hem nao dota for attendim Kongregeson Buk Study long haos bilong hem. Samfala taem Ana savve go. Bat waka wea Ana duim for selen mekem hem for no gohed for lanem truth.
Samting olsem tenfala year bihaen, samfala pikinini bilong Ana start for studyim Bible and gogo olketa worshipim Jehovah. Wanfala long olketa hem Mari Carmen, wea helpem mami bilong hem for tinghae moa long truth and acceptim Bible study. Then grani bilong Mari Carmen, Ana, hem tu start for interest long Bible. Gogo tenfala long famili hia olketa baptaes.
Long day wea tufala Ana hia baptaes, tufala hapi fogud. Ana wea 107 year sei: “Jehovah kaen tumas long mi. Hem helpem mi for savve long hem.” Dota bilong hem sei: “Bifor Paradaes hem kam, mi laek for worshipim Jehovah. Mi laek duim wanem hem laekem and duim best bilong mi for preachim gud nius.”
Tufala widow woman hia hapi tumas taem olketa go long olketa meeting. Wanfala elder long kongregeson sei: “Tufala nating missim eni meeting. Evritaem tufala koment long Wastaoa Study.”
Example bilong tufala mekem iumi tingim datfala widow woman Anna long Bible. “Hem savve go for worship long temple evri day and evri naet. Evritaem hem savve barava prea strong and markem samfala taem for no kaikai.” From hem duim olsem, hem garem privilege for lukim Jesus taem hem smol pikinini. (Luke 2:36-38) Nomata Anna hem 84 year, no eni samting stopem hem for worshipim Jehovah and no eni samting stopem tufala Ana tu.
Waswe, eni relative willing for herem message long Bible? Waswe, iu meetim eni olo man or woman wea willing for lisin taem iu go long haos bilong hem? Olketa savve olsem tufala Ana long disfala experience bikos nomata man olo, hem savve worshipim tru God, Jehovah.
[Piksa long page 25]
“Jehovah kaen tumas long mi”
[Piksa long page 25]
“Bifor Paradaes hem kam, mi laek for worshipim Jehovah”