Waswe, Iu Mekem Truth Samting Bilong Iuseleva Finis?
“Kamap difren evribit from iufala changem tingting bilong iufala, mekem iufala savve pruvim long iufala seleva, gudfala and stretfala and perfect will bilong God.”—Romans 12:2.
1, 2. Why nao hem no isi for wanfala tru Christian distaem?
FOR olsem wanfala tru Christian long olketa last day distaem—olketa “nogud taem wea hard for deal witim”—hem no isi. (2 Timothy 3:1) Tru nao, for followim example bilong Christ man mas winim world. (1 John 5:4) Tingim samting wea Jesus talem abaotem Christian wei: “Go insaed long smolfala gate; bikos road wea lead go long dae hem big tumas and waed, and planti pipol nao go insaed long hem; bat gate hem smol and road hem taet wea lead go long laef, and samfala nomoa faendem.” Hem sei tu: “Sapos eniwan hem want for kam bihaenem mi, letem hem lusim will bilong hemseleva and karem torture-stake bilong hem evriday and followim mi olowe.”—Matthew 7:13, 14; Luke 9:23.
2 From hem faendem smol road bilong laef, next challenge bilong wanfala Christian hem for stap long datfala road. Why nao datwan hem wanfala challenge? Hem bikos wei wea iumi dedicate and baptaes hem mekem Satan targetim iumi witim olketa kleva or giaman trik bilong hem. (Ephesians 6:11; footnote) Hem luksavve long olketa wik point bilong iumi and lukaotem wei for mekius long olketa for spoelem spiritual saed bilong iumi. Tru nao, hem trae for spoelem Jesus, so waswe, bae hem no duim olsem long iumi tu?—Matthew 4:1-11.
Olketa Kleva Trik Bilong Satan
3. Hao nao Satan plantim olketa daot insaed mind bilong Eve?
3 Wanfala trik wea Satan iusim hem for plantim olketa daot insaed mind bilong iumi. Hem lukaotem olketa wik point long spiritual kaleko bilong iumi. Long barava firstaem, hem iusim datfala trik long Eve, taem hem ask: “Waswe, hem really tru God talem iu for no kaikai from evri tree bilong garden?” (Genesis 3:1) Hem olsem Satan sei, ‘Waswe, hem really stret God savve putim tambu olsem long iu? Waswe, hem bae holem bak gudfala samting olsem from iu? Tru nao, God savve long day wea iu kaikai from datfala tree bae eye bilong iu open and iu bae olsem God, and savve long gud samting and nogud samting!’ Satan plantim wanfala seed bilong daot and weit for hem grow.—Genesis 3:5.
4. Wanem daot nao maet kasem samfala distaem?
4 Hao nao Satan iusim datfala trik distaem? Sapos iumi fail for duim Bible reading, study seleva, prea, and duim Christian ministry and attendim olketa meeting, iumi maet isi for garem daot wea olketa nara pipol talem. Olsem example: “Hao nao iumi savve diswan hem truth olsem Jesus teachim?” “Waswe, olketa hia really olketa last day? From iumi stap finis insaed mek-21 century.” “Waswe, Armageddon barava klosap, or hem farawe yet?” Sapos olketa daot olsem kamap, wanem nao iumi savve duim for aotem olketa?
5, 6. Wanem nao iumi mas duim sapos iumi garem olketa daot?
5 James givim gudfala kaonsel taem hem raet: “Sapos eniwan long iufala hem no garem wisdom, letem hem go ahed for askem God, from hem givim planti samting long evriwan and hem no kros taem hem duim diswan; and God bae givim long hem. Bat letem hem go ahed for askem witim faith, no daotem eni samting, from man wea daot hem olsem wave bilong sea wea wind blowim olabaot. Tru nao, no letem datfala man tingse hem bae kasem eni samting from Jehovah; hem man wea no sure, no stedy long evri wei bilong hem.”—James 1:5-8.
6 So, wanem nao iumi mas duim? Iumi shud “go ahed for askem God” long prea for faith and savve, and strongim wei for studyim seleva information abaotem eni kwestin or daot. Iumi savve askem tu help from olketa wea strong long faith, no daotem hao Jehovah bae givim iumi saport wea iumi needim. James hem sei tu: “So, stap anda long God; bat againstim Devil, and hem bae ranawe from iufala. Kam klosap long God, and hem bae kam klosap long iufala.” Tru nao, olketa daot bilong iumi bae isisi finis taem iumi kam klosap long God thru long study and prea.—James 4:7, 8.
7, 8. Wanem nao samfala main mark for luksavve long wei bilong worship wea Jesus teach abaotem and hu nao kasem olketa mark hia?
7 Olsem example, tingim disfala kwestin: Hao nao iumi savve iumi followim worship wea Jesus teach abaotem? For ansarem diswan, wanem mark nao iumi mas tingim? Bible showimaot hao olketa tru Christian mas garem trufala love midolwan olketa seleva. (John 13:34, 35) Olketa mas mek holy long nem bilong God, Jehovah. (Isaiah 12:4, 5; Matthew 6:9) And olketa mas talemaot datfala nem.—Exodus 3:15; John 17:26.
8 Narafala mark for luksavve long tru worship hem respect for Word bilong God, Bible. Hem nomoa buk wea showimaot fasin and olketa purpose bilong God. (John 17:17; 2 Timothy 3:16, 17) And tu, olketa tru Christian talemaot Kingdom bilong God olsem only hope for man kasem laef olowe insaed wanfala paradaes. (Mark 13:10; Revelation 21:1-4) Olketa stap separate from raverave politik bilong disfala world and dirty living bilong hem. (John 15:19; James 1:27; 4:4) Hu long distaem nao kasem olketa mark hia? Olketa pruv point go long wanfala ansa nomoa—Olketa Jehovah’s Witness.
Waswe Sapos Olketa Daot Still Stap?
9, 10. Wanem nao iumi savve duim for winim olketa daot wea still stap?
9 Waswe sapos iumi insaed dark road bilong daot? Wanem nao iumi shud duim? Wise King Solomon givim ansa: “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; and tu, sapos iu singaot for minim samting and ask for fasin for luksavve, sapos iu go ahed for lukaotem olsem silver, and olsem riches wea haed iu go ahed for lukaotem, then iu bae minim wei for fraet long Jehovah, and iu bae faendem barava savve bilong God.”—Proverbs 2:1-5.
10 Waswe, datwan hem no wanfala barava spesol samting? Sapos iumi willing for lisin gud long wisdom bilong God, bae iumi “faendem barava savve bilong God.” Tru nao, iumi savve kasem savve bilong Sovereign Lord bilong universe sapos iumi willing for herem and tinghae long olketa toktok bilong hem. Datwan minim for tan long Jehovah long prea and thru long study seleva. Olketa riches wea haed bilong Word bilong hem savve aotem eni daot and helpem iumi for lukim laet bilong truth.
11. Hao nao daot hem affectim servant bilong Elisha?
11 Wanfala klia example long wei wea prea helpem wanfala servant bilong God wea fraet and daot hem stap long 2 Kings 6:11-18. Servant bilong Elisha short long spiritual wei for luksavve. Hem no luksavve hao army long heven stap long there for saportim profet bilong God, wea army bilong Syria raonem hem. Datfala servant wea fraet singaot olsem: “Sorre tumas, masta bilong mi! Wanem nao bae iumi duim?” Hao nao Elisha ansa? “No fraet, from planti moa stap witim iumi winim namba wea stap witim olketa.” Bat hao nao datfala servant bae barava bilivim? Hem no savve lukim datfala army bilong heven.
12. (a) Hao nao olketa daot bilong datfala servant hem finis? (b) Hao nao iumi savve aotem eni daot wea iumi maet garem?
12 “Elisha start for prea and sei: ‘O Jehovah, openem eye bilong hem, plis, mekem hem savve lukluk.’ Stretawe Jehovah openem eye bilong datfala servant, mekem hem lukluk; and, lukim! datfala maunten area hem fulap witim olketa horse and war chariot bilong fire raonem Elisha.” Long hia Jehovah mekem datfala servant lukim army bilong heven wea protectim Elisha. Bat iumi shud no expectim semkaen help from God distaem. Tingim hao datfala servant bilong profet no garem full Bible for study mekem hem strongim faith bilong hem. Iumi garem full Bible. Sapos iumi mekius long hem, diswan savve strongim faith bilong iumi tu. Olsem example, maet iumi ting raonem samfala scripture wea storyim Jehovah taem hem stap long kot long heven. Olketa hia barava mekem iumi sure Jehovah garem wanfala organization long heven wea saportim olketa servant bilong hem long education waka wea go ahed evriwea long world distaem.—Isaiah 6:1-4; Ezekiel 1:4-28; Daniel 7:9, 10; Revelation 4:1-11; 14:6, 7.
Keakea Long Olketa Trik Bilong Satan!
13. Wanem nao olketa wei wea Satan trae for mekem wei wea iumi hol strong long truth hem wikdaon?
13 Wanem nao samfala nara wei wea Satan iusim for mekem spiritual saed and wei wea iumi hol strong long truth hem wikdaon? Wanfala wei hem dirty fasin, wea garem planti difren saed. Long world distaem wea interest tumas long sex, samting wea olketa kolem ‘affair’ (nara toktok for adultery) or ‘wan-naet stand’ (sex wan naet nomoa) hem normal samting nomoa insaed wanfala genereson wea olowe aftarem hapitaem nomata wanem. Olketa movie, TV, and video apim kaen living olsem. Nius hem fulap witim dirty piksa, main wan nao Internet. Evri samting stap for eniwan wea interest for laek savve.—1 Thessalonians 4:3-5; James 1:13-15.
14. Why nao samfala Christian foldaon long olketa trik bilong Satan?
14 Samfala Christian letem wei for laek savve long samting winim olketa and mind and heart bilong olketa kamap dirty taem olketa lukluk long dirty piksa. Olketa letem olketa seleva for foldaon insaed long trap bilong Satan. Planti taem diswan hem lead go for shiprek long spiritual wei. Olketa pipol olsem fail for stap olsem “baby long saed bilong nogud samting.” Olketa no kamap “full-grown man long paoa for minim samting.” (1 Corinthians 14:20) Evri year, planti thousand safa from samting wea kamaot from wei for no followim olketa principle and mark long Word bilong God. Olketa fail for werem and keepim “full kaleko for faet wea kam from God.”—Ephesians 6:10-13; Colossians 3:5-10; 1 Timothy 1:18, 19.
Barava Tinghae Long Samting Iumi Garem
15. Why nao samfala maet faendem hard for tinghae long spiritual present bilong olketa?
15 Jesus hem sei: “Iufala bae savve long truth, and truth bae mekem iufala free.” (John 8:32) Planti Witness distaem brek free from living and religion bilong olketa bifor. So, maet olketa hia kwiktaem for tinghae long freedom wea truth hem mekem olketa kasem. Long narasaed, samfala young pipol wea dadi and mami lanem olketa long truth from taem olketa smol, maet faendem hem hard for tinghae long spiritual present bilong olketa. No enitaem olketa bin part long giaman religion or part long disfala world wea mekhae tumas long hapitaem, wei for depend long drug, and dirty fasin. From diswan, olketa maet fail for lukim wei wea spiritual paradaes hem difren tumas from nogud world bilong Satan. Samfala maet foldaon tu long test for teistim poison bilong disfala world for faendemaot wanem nao olketa missim!—1 John 2:15-17; Revelation 18:1-5.
16. (a) Wanem kwestin nao iumi savve askem iumiseleva? (b) Wanem nao iumi lanem and kasem encouragement for duim?
16 Waswe, iumi really need for bonem hand bilong iumi for savve long feeling bilong pain and safa? Waswe, iumi no savve lane from olketa nogud experience bilong nara pipol? Waswe, iumi need for tan go long “mud” bilong disfala world for lukim sapos iumi missim samting? (2 Peter 2:20-22) Peter talem moa olketa Christian long first century wea part long world bilong Satan bifor: “Taem wea go pas finis hem fitim iufala for savve long will bilong olketa nation taem iufala go ahed for duim olabaot fasin, dirty fasin, ova tumas long wine, olketa wild party, wei for resis long drink, and nogud wei for worshipim olketa idol.” Tru nao, iumi no need for experiencem “rabis wei” bilong world for lukim long wanem wei nao world hem nogud tumas. (1 Peter 4:3, 4) Long narasaed, iumi lanem olketa hae mark bilong Jehovah saed long fasin insaed olketa Kingdom Hall bilong iumi, wea main ples bilong Bible education. And iumi kasem encouragement for iusim paoa bilong gudfala tingting for pruvim long iumiseleva hao iumi garem truth and then mekem truth samting bilong iumiseleva.—Joshua 1:8; Romans 12:1, 2; 2 Timothy 3:14-17.
Nem Bilong Iumi Hem No Wanfala Mark Nomoa
17. Hao nao iumi savve kamap olsem gudfala Witness bilong Jehovah?
17 Sapos iumi mekem truth samting bilong iumiseleva, bae iumi want for sharem witim nara pipol evritaem. Diswan no minim iumi bae trae for forcem long olketa wea no showimaot interest. (Matthew 7:6) Bat, bae iumi no fraet for talemaot iumi Jehovah’s Witness. Sapos man showimaot lelebet interest long wei for askem gudfala kwestin or acceptim wanfala Bible pablikeson, bae iumi redy and stanbae for sharem hope bilong iumi. Tru nao, diswan minim iumi evritaem garem samfala literature witim iumi nomata wea nao iumi—long haos, waka, skul, stoa, or ples bilong hapitaem.—1 Peter 3:15.
18. Hao nao wei for talemaot iumi Christian hem savve olsem gud samting long laef bilong iumi?
18 Taem iumi talemaot klia iumi Christian, bae iumi strongim samting wea iumi garem for protectim iumiseleva againstim olketa isisi attak bilong Satan. Sapos wanfala birthday or Christmas party kamap or olketa gamble long office, planti taem olketa wakfren sei, “No askem hem. Hem wanfala Jehovah’s Witness.” For sem reason, pipol no savve mekfani long dirty wei taem iumi stap. So, wei wea iumi talemaot iumi Christian hem gud samting long laef bilong iumi, olsem aposol Peter talemaot: “Tru nao, hu nao bae spoelem iufala sapos iufala strong for duim gudfala samting? Bat nomata sapos iufala mas safa for saed bilong raeteous fasin, iufala hapi.”—1 Peter 3:13, 14.
19. Hao nao iumi savve iumi deep insaed olketa last day?
19 Narafala gud samting bilong wei for mekem truth samting bilong iumiseleva hem hao iumi bae sure distaem hem barava olketa last day bilong disfala system. Iumi bae savve planti Bible profesi kasem end bilong olketa long taem bilong iumi.a Warning bilong Paul hao “insaed long olketa last day nogud taem wea hard for deal witim bae stap” hem barava tru long olketa nogud samting wea happen long century wea just go pas. (2 Timothy 3:1-5; Mark 13:3-37) Wanfala niuspepa article no longtaem go nomoa abaotem mek-20 century hem garem title “Pipol Bae Rememberim Hem Olsem Wanfala Taem wea Fasin and Wei Bilong Man Hem Rabis Tumas.” Datfala article hem sei: “1999 nao hem year bilong killkill wea winim last part bilong barava nogud century.”
20. Distaem hem taem for duim wanem?
20 Distaem hem no taem for hol bak. Blessing bilong Jehovah hem barava stap long bigfala Bible education waka wea winim enitaem wea go ahed long full world olsem wanfala witness long olketa nation. (Matthew 24:14) Mekem truth samting bilong iuseleva, and sharem witim nara pipol. Future bilong iu for olowe hem depend long samting wea iu duim distaem. Wei for slakdaon bae mekem iu no kasem blessing bilong Jehovah. (Luke 9:62) Bat, distaem hem taem for “stand strong, no seksek, evritaem garem planti samting for duim insaed long waka bilong Lord, from iufala savve waka bilong iufala hem no hard waka nating long saed long Lord.”—1 Corinthians 15:58.
[Footnote]
a Lukim Wastaoa January 15, 2000, page 12-14. Paragraf 13-18 storyim sixfala barava strong pruv wea showimaot iumi stap insaed olketa last day start kam long 1914.
Waswe, Iu Remember?
• Hao nao iumi savve aotem olketa daot?
• Wanem nao iumi savve lanem from example bilong servant bilong Elisha?
• Iumi mas keakea evritaem long olketa wanem test saed long fasin?
• Why nao iumi shud talemaot klia iumi Jehovah’s Witness?
[Olketa Piksa long page 10]
Bible study evritaem and prea savve helpem iumi aotem olketa daot
[Piksa long page 11]
Wanfala vision nao kliarem olketa daot bilong servant bilong Elisha
[Piksa long page 12]
Iumi lanem olketa hae mark bilong Jehovah insaed olketa Kingdom Hall olsem diswan long Benin