Hapi for Olketa wea Wakabaot Insaed Long Laet
“Kam and letem iumi wakabaot insaed laet bilong Jehovah.”—ISAIAH 2:5.
1, 2. (a) Hao important nao laet? (b) Why nao warning abaotem wei wea darkness bae kavarem earth hem serious samting?
LAET hem start from Jehovah. Bible kolem hem “Datwan wea givim sun for laet long day, olketa law bilong moon and star for laet long naet.” (Jeremiah 31:35; Psalm 8:3) Hem nao Datwan wea creatim sun bilong iumi, wea hem wanfala bigfala nuclear fire wea givimaot bigfala energy, olsem laet and hot. Lelebet energy wea kasem iumi olsem sunlaet hem mekem laef go ahed long disfala earth. Sapos nomoa eni sunlaet, iumi bae no laef. Earth bae wanfala planet wea no garem laef.
2 Taem iumi tingim datwan, iumi savve minim hao samting wea profet Isaiah storyim hem serious tumas. Hem sei: “Lukim! darkness nao bae kavarem earth, and thick cloud kavarem olketa nation.” (Isaiah 60:2) Tru, diswan hem no minim darkness long really wei. Isaiah no minim wanday sun, moon, and olketa star bae finis for shaen. (Psalm 89:36, 37; 136:7-9) Hem story abaotem spiritual darkness. Bat spiritual darkness savve killim man dae. Gogo, iumi no savve laef sapos iumi no kasem spiritual laet long sem wei wea iumi no savve laef sapos iumi no kasem really laet.—Luke 1:79.
3. From olketa toktok bilong Isaiah, wanem nao olketa Christian shud duim?
3 From diswan, hem important tumas for lukluk long toktok bilong Isaiah, bikos nomata olketa fulfill long Judah bifor, olketa fulfill long wei wea moa big distaem. Yes, long taem bilong iumi spiritual darkness hem kavarem world bilong iumi. From bigfala danger hia, spiritual laet hem important tumas. Dastawe hem gud tumas for olketa Christian followim disfala kaonsel bilong Jesus: “Letem laet bilong iufala shaen front long olketa man.” (Matthew 5:16) Olketa faithful Christian savve laetem laet for olketa hambol wan wea insaed darkness, and givim olketa chance for kasem laef.—John 8:12.
Darkfala Taem Long Israel
4. Wanem taem nao profesi toktok bilong Isaiah hem fulfill, bat wanem samting nao stap finis long taem bilong hem?
4 Toktok bilong Isaiah abaotem darkness wea kavarem earth hem firstaem fulfill taem Judah hem emti and pipol bilong hem stap olsem prisoner long Babylon. Nomata olsem, bifor datfala taem, long taem bilong Isaiah, staka from datfala nation stap finis insaed long spiritual darkness, wea muvim hem for encouragem olketa pipol: “O olketa man bilong haos bilong Jacob, kam and letem iumi wakabaot insaed laet bilong Jehovah”!—Isaiah 2:5; 5:20.
5, 6. Wanem nao samfala samting wea kosim darkness wea stap long taem bilong Isaiah?
5 Isaiah talem profesi long Judah “insaed olketa day bilong Uzziah, Jotham, Ahaz and Hezekiah, olketa king bilong Judah.” (Isaiah 1:1) Hem wanfala taem bilong trabol saed long politik, hypocrite fasin insaed long religion, wei for judge wea no stret, and wei for daonem olketa wea poor. Nomata long taem samfala faithful king rul, olsem Jotham, man savve lukim olketa altar bilong false god antap olketa hill. Taem olketa king wea no faithful rul, datwan kamap moa worse. Olsem example, wicked King Ahaz hem offerim tu pikinini bilong hem olsem sakrifaes long god Molech. Datwan hem barava darkness!—2 Kings 15:32-34; 16:2-4.
6 Saed long olketa nation wea stap raonem olketa, hem nogud tu. Moab, Edom, and Philistia stanbae nomoa for mek-trabol long spialaen bilong Judah. Northern kingdom bilong Israel, nomata olketa wantok nomoa, stap olsem enemy tu. Bihaen go moa long north saed, Syria laek spoelem peace bilong Judah. Sekson wea moa danger nao hem paoa bilong Assyria, wea raf tumas and wea plan for kamap moa big. Long taem Isaiah go ahed for talem profesi, Assyria winim Israel and klosap distroem Judah. Long wan taem, Assyria hem winim evri taon long Judah, Jerusalem nomoa stap free.—Isaiah 1:7, 8; 36:1.
7. Wanem wei nao Israel and Judah chusim, and wanem nao Jehovah duim long diswan?
7 Pipol wea God mekem covenant witim olketa kasem kaen trabol olsem bikos Israel and Judah no loyal long hem. Olsem buk bilong Proverbs hem talem, olketa “lusim road bilong raeteous fasin and wakabaot long wei bilong darkness.” (Proverbs 2:13) Bat, nomata Jehovah hem kros witim pipol bilong hem, hem no lusim olketa evribit. Hem sendem Isaiah and samfala nara profet for givim spiritual laet for eniwan insaed datfala nation wea lukaotem yet wei for servem Jehovah long faithful wei. Laet wea hem provaedem thru long olketa profet hia hem barava spesol. Hem savve givim laef.
Taem Bilong Darkness Distaem
8, 9. Wanem nao olketa samting wea kosim world distaem for stap long darkness?
8 Samting wea happen long taem bilong Isaiah hem barava klosap olsem samting wea iumi lukim tuday. Long taem bilong iumi, olketa leader tanem baksaed bilong olketa long Jehovah and King bilong hem wea rul, Jesus Christ. (Psalm 2:2, 3) Olketa leader bilong Christendom giamanim finis sheep bilong olketa. Olketa leader hia sei olketa servem God, bat really klosap evriwan saportim olketa god bilong disfala world—wei for mekhae long kantri, army, riches, and olketa bigman—wea join tu witim wei for teachim olketa heathen teaching.
9 Long evri ples, olketa religion bilong Christendom join insaed olketa war and faet wea againstim nara tribe and olketa narafala barava nogud samting. And tu, olketa no stand for saed bilong fasin wea kam from Bible, bat planti church no laek luksavve and olketa barava saportim dirty fasin olsem fornication and homosexual fasin. From wei for rejectim olketa Bible mark olsem, olketa sheep bilong Christendom kamap olsem pipol wea man for raetem psalm storyim: “Olketa no savve, and olketa no minim; olketa go ahed for wakabaot long darkness.” (Psalm 82:5) Tru nao, Christendom, olsem Judah bifor, hem stap insaed bigfala darkness.—Revelation 8:12.
10. Hao nao laet hem shaen insaed darkness distaem, and hao nao olketa hambol wan kasem gud samting?
10 Midolwan evri darkness hia, Jehovah mekem laet shaen for saed bilong olketa hambol wan. For duim diswan, hem iusim olketa anointed servant bilong hem long earth, “datfala faithful and wise slave,” and olketa hia “shaen olsem olketa laet insaed long world.” (Matthew 24:45; Philippians 2:15) Datfala slave class, wea planti million “nara sheep” saportim olketa, showimaot spiritual laet wea garem faondeson long Word bilong God, Bible. (John 10:16) Insaed disfala world wea dark tumas, kaen laet hia hem givim hope long olketa hambol wan, hem helpem olketa for garem wei for fren witim God, and helpem olketa for stap klia long olketa spiritual trap. Hem barava spesol, hem givim laef.
“Mi Praisem Nem Bilong Iu”
11. Wanem information nao Jehovah givimaot long taem bilong Isaiah?
11 Long dark taem wea Isaiah hem laef and long taem wea moa dark bihaen olketa bilong Babylon tekem go nation bilong Jehovah olsem prisoner, wanem kaen gaedens nao Jehovah givim? Tugeta witim gaedens saed long fasin, hem talemaot klia firstaem hao hem bae fulfillim olketa purpose bilong hem saed long pipol bilong hem. Olsem example, tingim olketa nambawan profesi wea stap insaed Isaiah chapter 25 go kasem 27. Olketa toktok insaed olketa chapter hia showimaot hao Jehovah deal witim samting long datfala taem and hao hem duim olsem long distaem.
12. Wanem toktok from heart nao Isaiah hem talem?
12 Firstaem, Isaiah sei: “O Jehovah, iu nao God bilong mi. Mi apim iu, mi praisem nem bilong iu.” Datwan hem toktok bilong praise wea kam from heart! Bat wanem nao muvim datfala profet for talem kaen prea olsem? Wanfala main reason hem showaot long nara part bilong disfala verse, wea sei: “From iu [Jehovah] duim finis planti nambawan samting, evriting iu disaedem from taem bifor kam, long faithful wei, long wei wea fitim trust.”—Isaiah 25:1.
13. (a) Wanem savve nao strongim wei wea Isaiah tinghae long Jehovah? (b) Hao nao iumi savve lane from example bilong Isaiah?
13 Kasem taem bilong Isaiah, Jehovah duim finis planti nambawan samting for Israel, and olketa raetem. Isaiah hem savve gud long olketa raeting hia. Olsem example, hem savve hao Jehovah tekaotem pipol bilong hem from wei for olsem slave long Egypt and sevem olketa from kros bilong army bilong Pharaoh long Red Sea. Hem savve Jehovah leadim pipol bilong hem thru long wilderness and tekem olketa insaed long Promis Land. (Psalm 136:1, 10-26) Kaen story bilong history showimaot wei wea Jehovah God hem faithful and man fit for trustim. “Evriting [hem] disaedem”—evri purpose bilong hem—kamap tru. Stretfala savve wea kam from God strongim Isaiah for go ahed wakabaot insaed long laet. Long wei olsem hem wanfala nambawan example for iumi. Sapos iumi studyim gud Word bilong God and followim long living bilong iumi, bae iumi tu stap insaed long laet.—Psalm 119:105; 2 Corinthians 4:6.
Wanfala Taon Hem Distroe
14. Wanem nao profesi talem abaotem wanfala taon, and luk olsem hem wanem taon?
14 Wanfala example long kaonsel bilong God hem stap long Isaiah 25:2, wea hem sei olsem: “Iu mekem finis wanfala taon for kamap hip bilong ston, strongfala taon for pisis olabaot, strongfala taoa bilong olketa stranger for kamap no eni taon, wea bae no kamap moa nomata for olowe.” Wanem nao disfala taon? Luk olsem Isaiah hem profesi abaotem Babylon. Tru nao, gogo Babylon hem kamap wanfala hip bilong ston nomoa.
15. Wanfala “bigfala taon” nao stap distaem, and wanem nao bae happen long hem?
15 Waswe, datfala taon wea Isaiah storyim hem garem samting wea semsem distaem? Yes. Buk bilong Revelation storyim “datfala bigfala taon wea garem wanfala kingdom ovarem olketa king bilong earth.” (Revelation 17:18) Datfala bigfala taon hem “Bigfala Babylon,” world rul bilong giaman religion. (Revelation 17:5) Distaem, main part bilong Bigfala Babylon hem Christendom, wea olketa bigman bilong hem lead for againstim waka wea pipol bilong Jehovah duim for preachim Kingdom. (Matthew 24:14) Bat, olsem Babylon bifor, klosap nao Bigfala Babylon bae distroe, and nating kamap moa.
16, 17. Hao nao olketa enemy bilong Jehovah long bifor and distaem givim glory long hem?
16 Wanem moa abaotem datfala “strongfala taon” nao Isaiah profesi abaotem? Isaiah sei olsem long Jehovah: “Olketa wea strong bae givim glory long iu; taon bilong olketa kantri wea bossim pipol, olketa bae fraet long iu.” (Isaiah 25:3) Hao nao disfala raf taon, “taon bilong olketa kantri wea bossim pipol,” hem givim glory long Jehovah? Well, tingim samting wea happen long barava maeti king bilong Babylon, Nebuchadnezzar. Bihaen wanfala samting kasem hem wea barava showaot hem wik fogud, hem mas luksavve long wei wea Jehovah big tumas and olmaeti paoa bilong Hem. (Daniel 4:34, 35) Taem Jehovah showimaot paoa bilong hem, olketa enemy bilong hem tu mas luksavve, nomata olketa les, long olketa strongfala waka bilong hem.
17 Waswe, Bigfala Babylon tu mas luksavve long olketa strongfala waka bilong Jehovah? Yes. Long first world war, olketa anointed servant bilong Jehovah preach nomata olketa kasem barava hard taem. Long 1918 olketa kamap prisoner long spiritual wei taem olketa bigman bilong Watch Tower Society go long prison. Preaching waka wea organize hem stop nao. Then, long 1919, Jehovah mekem olketa kamap gud moa and strongim olketa witim spirit bilong hem, and diswan muvim olketa for fulfillim komand for preachim gud nius long full earth. (Mark 13:10) Evri samting hia buk bilong Revelation talem profesi abaotem, and tu hao diswan affectim sekson wea againstim olketa. Olketa hia “kamap fraet and givim glory long God bilong heven.” (Revelation 11:3, 7, 11-13) Hem no minim evriwan long olketa hia change, bat olketa bae barava luksavve long strongfala waka wea Jehovah duim long datfala taem, olsem Isaiah talem profesi abaotem.
“Strongfala Ples Long Man Nating”
18, 19. (a) Why nao sekson wea againstim pipol bilong Jehovah fail for brekem faithful fasin bilong olketa? (b) Hao nao “melody bilong olketa raf wan” bae finis?
18 Distaem Isaiah storyim olketa kaenfala samting wea Jehovah duim witim pipol wea wakabaot insaed laet, hem sei olsem long Jehovah: “Iu kamap olsem strongfala ples long man nating, wanfala strongfala ples long poor man long hardfala taem wea hem kasem, wanfala ples for haed from big rain, wanfala ples for haed from hot sun, taem olketa raf man hem olsem big rain wea bangam wanfala wall. Olsem hot bilong kantri wea no garem wata, noise bilong olketa stranger iu kontrolem, datfala hot witim shadow bilong wanfala cloud. Melody bilong olketa raf wan hem finis nao.”—Isaiah 25:4, 5.
19 Start kam long 1919, olketa hardfala ruler traem evri samting for brekem faithful fasin bilong olketa tru worshiper, bat olketa fail. Why? Bikos Jehovah nao ples for haed and sef ples for pipol bilong hem. Hem provaedem shade from hot bilong persecution and hem stand olsem strongfala wall for satem bigfala rain bilong pipol wea againstim olketa. Iumi wea wakabaot insaed long laet bilong God savve luk forward long taem wea ‘melody bilong olketa raf wan bae finis.’ Yes, iumi barava weitim day wea olketa enemy bilong Jehovah nomoa nao.
20, 21. Wanem feast nao Jehovah provaedem, and wanem nao bae insaed long datfala feast long niu world?
20 Jehovah no just protectim olketa servant bilong hem nomoa. Hem provaed for olketa olsem loving Dadi bilong olketa. Bihaen hem mekem pipol bilong hem free from Bigfala Babylon long 1919, hem wakem wanfala bigfala feast bilong win, wanfala big supply bilong spiritual kaikai. Isaiah 25:6 talem profesi abaotem datwan: “Jehovah bilong olketa army bae mekem for evri pipol, long disfala maunten, wanfala feast bilong olketa nambawan kaikai, wanfala feast bilong barava gudfala wine, bilong nambawan kaikai wea gud tumas, witim barava gudfala wine.” Hem barava bigfala blessing for share insaed datfala feast! (Matthew 4:4) “Tebol bilong Jehovah” hem fulap witim olketa gudfala samting for kaikaim. (1 Corinthians 10:21) Thru long “faithful and wise slave,” iumi kasem evri samting iumi needim long spiritual wei.
21 And moa samting stap insaed long disfala feast wea God provaedem. Spiritual feast wea iumi enjoyim distaem hem mekem iumi tingim staka physical kaikai wea bae stap insaed promis niu world bilong God. Then, datfala “feast bilong olketa nambawan kaikai” bae minim tu staka physical kaikai. No eniwan bae hangre long physical or spiritual wei. Datwan hem barava gud nius for olketa faithful wan distaem wea safa from ‘kaikai hem short’ wea hem part long “saen” bilong taem wea Jesus stap moa! (Matthew 24:3, 7) For olketa, toktok bilong man wea raetem psalm hem barava givim comfort. Hem sei: “Planti kaikai bae stap long earth; antap long olketa maunten hem bae fulap.”—Psalm 72:16.
22, 23. (a) Wanem “kaleko,” or “tent,” nao bae finis, and hao nao olsem? (b) Hao nao ‘shame bilong pipol bilong Jehovah’ bae finis?
22 Lisin distaem long wanfala promis wea moa spesol. Taem hem markem sin and dae olsem wanfala “kaleko,” or wanfala “tent,” Isaiah sei: “Insaed disfala maunten [Jehovah] bae barava swallowim tent wea pasolem evri pipol, and kaleko wea pasolem evri kantri.” (Isaiah 25:7) Tingim datwan! Sin and dae, wea barava hevi olsem wanfala blanket wea laek satem wind bilong man, bae nomoa nao. Iumi barava weitim datfala day wea olketa gudfala samting wea kamaot from ransom sakrifaes bilong Jesus bae kasem evri man wea obey and faithful!—Revelation 21:3, 4.
23 Taem hem storyim datfala nambawan taem, datfala profet promisim iumi: “[God] bae finisim dae evribit, and Sovereign Lord Jehovah bae aotem evri krae from evri feis. And hem bae aotem shame long pipol bilong hem evriwea long earth, from Jehovah seleva hem talem diswan.” (Isaiah 25:8) No eniwan bae dae from sik or olo or krae from hem lusim wanfala wea hem lovem. Barava gudfala change! And tu, shame and laea toktok wea God and pipol bilong hem evritaem feisim bae finis from earth. Hao nao olsem? Bikos Jehovah bae finisim start bilong diswan—dadi bilong laea, Satan datfala Devil, witim evri seed bilong Satan tu.—John 8:44.
24. Wanem nao olketa wea wakabaot insaed long laet duim taem olketa lukim evri strongfala waka wea Jehovah duim for olketa?
24 Taem olketa ting raonem olketa samting olsem wea showimaot paoa bilong Jehovah, diswan muvim olketa wea wakabaot insaed long laet for sei: “Lukim! Diswan nao God bilong mifala. Iumi hope long hem, and hem bae sevem iumi. Diswan hem Jehovah. Iumi hope long hem. Iumi mas hapi long salvation thru long hem.” (Isaiah 25:9) Klosap nao, olketa man wea raeteous bae garem evri reason for hapi. Darkness bae finis evribit, and olketa faithful wan bae stap insaed laet bilong Jehovah for olowe. Waswe, eni hope hem winim diswan? Barava nomoa nao!
Iu Savve Minim?
• Why nao hem important tumas distaem for wakabaot insaed long laet?
• Why nao Isaiah praisem nem bilong Jehovah?
• Why nao olketa enemy bae nating savve brekem faithful fasin bilong pipol bilong God?
• Wanem nao olketa rich blessing wea weitim pipol wea wakabaot insaed long laet?
[Piksa long page 12, 13]
Pipol bilong Judah sakrifaesim olketa pikinini long Molech
[Olketa Piksa long page 15]
Savve abaotem olketa maeti samting Jehovah duim muvim Isaiah for praisem nem bilong Jehovah
[Piksa long page 16]
Olketa raeteous wan bae stap insaed laet bilong Jehovah for olowe